Mixëꞌl Jesús tu dusen apost cheꞌn Me par kë xaꞌ zhiꞌn nazhon cheꞌn Dios
9
No mizhin Jesús dub tu dusen men cheꞌn Me,
par mizaꞌ Me yalnazhon nkaꞌ bixaꞌ,
par leꞌ bixaꞌ mandad lo rë mbi mal,
mbaino par liwen bixaꞌ rë men nzhakne;
San Lucas 9:1-27
2 no mixëꞌl Jesús bixaꞌ par diꞌzh bixaꞌ lo rë men,
xmod gak men,
men cheꞌn Dios,
no par liwen bixaꞌ rë lo yalyizh,
3 mbaino nzhab Jesús lo bixaꞌ:
―Yent kwaꞌn weiꞌ go nez;
naweiꞌt go ni tu bar,
ni tu bols,
no ni yët,
mbaino ni dimi,
no lar nak tsa go biꞌy go namás.
4 No or zhin go kwalisquier tu lizh men,
plo wiꞌ bixaꞌ wen lo go,
zeꞌ biyaꞌn go haxta or ya go xtu plo,
roꞌ go zeꞌ.
5 No wanei tu plo nawiꞌ men wen lo go,
guroꞌ go zeꞌ,
guzhiꞌb go niꞌ go lo rë men yezh zeꞌ,
nela tu señ gaꞌ,
lëꞌ bixaꞌ mileꞌ nayaꞌ lo Dios.
6 Orzeꞌ ngwa bixaꞌ rë nak yezh win,
kwaꞌn nzhin nakaꞌn zeꞌ,
midiꞌzh bixaꞌ widiꞌzh nazhon cheꞌn Dios,
no miliwen bixaꞌ rë men nzhakne.
Ngut Juan xaꞌ nililëiꞌ men leꞌn nits
7 Or mbin gobiernador Herodes rë kwaꞌn kileꞌ Jesús,
orzeꞌ dox xigab nguzob yek Herodes,
porke nzho men nidiꞌzh,
lëꞌ Juan nguruban,
8 más men nidiꞌzh ka profet Li nguruban,
mbaino nzho men nidiꞌzh,
ka tu rë profet xaꞌ tiemp nguruban,
9 per nzhab Herodes:
―Na mileꞌ mandad,
miroꞌg yek Juan,
¿per cho ska xaꞌ kwaꞌn nidiꞌzh men,
xaꞌ nzhona nileꞌ rë kubaꞌ?
Kuzeꞌ dox nzhakla Herodes ne xaꞌ Jesús.
Jesús mizaꞌ kwan gao gaiꞌ mil men
10 No or miëk rë apost,
mizaꞌ bixaꞌ kwent lo Jesús rë nak kwaꞌn mileꞌ bixaꞌ,
orzeꞌ nzhanu Jesús bixaꞌ tu lad di roꞌ yezh kwaꞌn lë Betsaida.
11 Per or mbin rë men plo nzha Jesús,
rë bixaꞌ ngwakë.
No milats laxtoꞌ Me rë men zeꞌ.
Midiꞌzh Jesús lo bixaꞌ,
xmod gak bixaꞌ men cheꞌn Dios,
no miliwen Jesús rë nak men nzhakne nzho xid bixaꞌ.
12 No or nzhazhëlyuo,
dub tu dusen men cheꞌn Jesús,
nguzubi bixaꞌ lo Me,
nzhab bixaꞌ:
―Bi rë men reꞌ,
guzh go,
par yakwaꞌn bixaꞌ plo gaꞌ bixaꞌ,
no kwaꞌn gao bixaꞌ,
ya bixaꞌ rë rranch no rë yezh kwaꞌn ñaꞌn gax reꞌ,
porke plo nzhin be reꞌ,
yent kwan nak.
13 Per nzhab Jesús:
―¡Bizaꞌ go kwaꞌn gao rë men reꞌ!
Orzeꞌ nzhab bixaꞌ:
―Gaiꞌtsa yët kinu no,
no choptsa mbël,
o ¿chi yaziꞌ no kwaꞌn gao rë men reꞌ?
14 Nzhin zeꞌ pas tu gaiꞌ mil men nab tsa miyiꞌ.
Per nzhab Jesús lo rë men cheꞌn Jesús:
―Guzh go zob rë men,
choꞌ bichiꞌgaꞌ bixaꞌ bizhin go.
15 Orzeꞌ mileꞌ bixaꞌ nguzob men.
16 Orzeꞌ nguzen Jesús za gaiꞌ yët kun rop mbël zeꞌ,
miwiꞌ Me lo yibëꞌ mizaꞌ Me xkix lo Dios por kwaꞌn gao bixaꞌ,
orzeꞌ michiꞌx Mei,
mizaꞌ Mei kaꞌ rë men cheꞌn Me,
par lëꞌ bixaꞌ kiꞌze gao rë men.
17 Rë nak men zeꞌ ndao,
haxta plo ngwazhë bixaꞌ;
no or milox ndao bixaꞌ,
mikan rë men cheꞌn Jesús,
tu dusen kardor kwaꞌn miaꞌn sobr lo kwaꞌn ndao bixaꞌ.
Midiꞌzh Per, lëꞌ Jesús nak Krist
18 No ngol tu ngubizh,
nab Jesús kinaꞌb lo Dios,
no rë men cheꞌn Me nzhin kun lëꞌ Me,
orzeꞌ nzhab Me lo bixaꞌ:
―¿Cho da nzhab men?
19 Orzeꞌ nzhab rë men cheꞌn Me:
―Pla men nidiꞌzh,
lu nak Juan xaꞌ nililëiꞌ men leꞌn nits,
más men nidiꞌzh,
lu nak Li,
no nzho men nidiꞌzh lu nak tu rë profet xaꞌ tiemp nguruban.
20 Orzeꞌ nzhab Jesús lo bixaꞌ:
―Mbai go gaꞌ,
¿cho da par go?
Orzeꞌ nzhab Per:
―Go nak Krist Me mixëꞌl Dios.
Nzhab Jesús: “Lëꞌ Da gat”
―Na Xgaꞌn Dios no nak da tu men yizhyuo,
dox nakiꞌn zakzi da;
mbaino nayilat rë xaꞌ kwaꞌn nak zhiꞌn,
xid rë men Israel da,
no ni rë xaꞌ nileꞌ mandad lo rë ngulëiꞌ,
mbaino ni rë xaꞌ kwaꞌn niluꞌ ley,
nayilat da;
no mis rë xaꞌ reꞌ leꞌ mandad gat da,
per ngubizh yon lëꞌda ruban.
23 No nzhab Jesús lo rë nak men nzhin zeꞌ:
―Chi tu go nzhakla gak xpena,
nakiꞌn yaꞌl laxtoꞌ go rë kwaꞌn nzhakla go leꞌ go,
par leꞌ go kwaꞌn nzhaklan,
mbaino nazoliaꞌzht go (leꞌt go nayaꞌ) or nakiꞌn zakzi go,
haxta ter gat go por da,
24 porke xaꞌ gat nzhaklat gak xaꞌ men da par leꞌ xaꞌ kwaꞌn nzhakla xaꞌ,
orzeꞌ milaꞌ xaꞌ kwaꞌn ban xaꞌ par dubtaꞌ lo Dios;
per xaꞌ laꞌ kwaꞌn nzhakla xaꞌ leꞌ xaꞌ,
por nak xaꞌ men da,
orzeꞌ lëꞌ xaꞌ ban par dubtaꞌ lo Dios,
25 porke,
yent kwan zuꞌ par tu men,
kaꞌ xaꞌ rë nak kwaꞌn nzho yizhyuo,
por mileꞌ xaꞌ kwaꞌn nzhakla xaꞌ,
no or gat xaꞌ,
lëꞌ xaꞌ lox lo Dios par dubtaꞌ.
26 Chi tu go leꞌ nayaꞌ lon no lo rë widiꞌzh da,
nu ska da le nayaꞌ,
nawiꞌtaꞌ lo go,
or yala kun biani da kwaꞌn más ke ngubizh,
mbaino kun biani cheꞌn Xuza,
no cheꞌn rë ganj nazhon cheꞌn Dios.
27 No walika kwaꞌn nin lo go,
nzho pla xaꞌ xid go nalreꞌ,
nagataꞌ xaꞌ antis dike ne bixaꞌ,
xmod nileꞌ Dios mandad kun yalnazhon cheꞌn Me.
Ngubixlo Jesús lo pla men cheꞌn Me
28 Nzha xon ngubizh di midiꞌzh Jesús kureꞌ,
orzeꞌ nzha Me yek tu yiꞌ par naꞌb Me lo Dios,
no nzhanu Me Per kun Juan no Jakob.
San Lucas 9:28-56
29 No or kinaꞌb Me lo Dios,
orzeꞌ ngubixlo lo Me;
no xab Me miluꞌ bëo laka,
no ñaꞌzbële.
30 Lëꞌchi nguruxoꞌb xchop miyiꞌ,
kidiꞌzh bixaꞌ kun Jesús.
Tu xaꞌ reꞌ Muisés,
no xtu xaꞌ Li.
31 No nzhin bixaꞌ leꞌn tu biani maska ñaꞌzbël,
kidiꞌzh bixaꞌ rë kwaꞌn mizhin la zak Jesús yezh Jerusalén.
32 No Per kun xchop xaꞌ kwaꞌn nzo kun lëꞌ xaꞌ,
dub nzë mikaꞌl lo bixaꞌ,
mixek bixaꞌ nangaꞌt bixaꞌ,
no une bixaꞌ biani kwaꞌn maska ñaꞌzbël cheꞌn Jesús,
kun xchop xaꞌ kwaꞌn nzo kun Jesús reꞌ;
33 no or nguiubchi rë xaꞌ zeꞌ lo Jesús,
orzeꞌ nzhab Per lo Jesús:
―Maestr,
¡zheꞌb wen nzhin be reꞌ!
Bilaꞌ go chaoꞌ no chon yoꞌ yix;
tube par go,
xtube par Muisés,
no xtube par Li.
Seꞌ midiꞌzh Per porke gat nayaꞌt Per par diꞌzh Per.
34 No dub kidiꞌzh Per,
mbiꞌd tu xkao,
ngulai plo nzhin yon bixaꞌ,
orzeꞌ mizheb bixaꞌ nzho bixaꞌ leꞌn xkao reꞌ,
35 no mbin bixaꞌ leꞌn xkao reꞌ,
nguroꞌ tu widiꞌzh kwaꞌn nzhab seꞌ:
―¡Xaꞌ reꞌ nak Xgaꞌna Me nazhiꞌ da,
no Me ngulen nak Krist;
bileꞌ go kwaꞌn ne Me!
36 No or milox mbin bixaꞌ widiꞌzh zeꞌ,
une bixaꞌ lëꞌ nab Jesús nzo,
orzeꞌ nab bixaꞌ nane kureꞌ,
leꞌn rë ngubizh zeꞌ,
yent cho lo ngadiꞌzh bixaꞌ kwaꞌn une bixaꞌ.
Nguloꞌ Jesús mbi mal laxtoꞌ tu miyiꞌ xi
37 No xtu riyëꞌl,
or ngula bixaꞌ yek lom zeꞌ,
nayax men nzhachëlo Jesús,
38 lëꞌchi xid rë men reꞌ nguroꞌ tu miyiꞌ nibizhyë naye,
nzhab xaꞌ lo Jesús:
―Maestr,
kinaꞌba lol,
liwenal xmëꞌda reꞌ,
porke tutsa mbwin reꞌ nzhapa.
39 Nizen tu mbi mal mbwin,
nikuzhiëi mbwin,
no nileꞌi dox nixiz mbwin,
no niroꞌ bichiꞌn roꞌ mbwin,
orzeꞌ peꞌn nilaꞌi mbwin.
40 Dox la nzhapne lo rë xpenal par koꞌ bixaꞌ mbi mal reꞌ,
per nangaleꞌt bixaꞌ gan ngaroꞌi.
41 Orzeꞌ nzhab Jesús lo rë men zeꞌ:
―¡Taxa nagat yila go kwaꞌn nin lo go!
¡Tatu nad go par yila go rë kwaꞌn wen cheꞌn Dios!
¡Dox kixek da lo go,
nagat zobyek go kwaꞌn nin lo go!
Orzeꞌ nzhab Jesús:
―¡Dinu xmëꞌdal reꞌ!
42 No or nguzubi mbwin lo Jesús,
milichin mbi mal reꞌ mbwin,
mbaino maska nixiz mbwin;
per nguloꞌ Jesús mbi mal reꞌ laxtoꞌ mbwin,
miliwen Jesús mbwin,
orzeꞌ nzhab Jesús lo xuz mbwin:
“Lëꞌ xmëꞌdal reꞌ”.
43 No rë men xe miaꞌn bixaꞌ tuli,
or une bixaꞌ yalnazhon ro kwaꞌn mileꞌ Dios.
Jesús midiꞌzh xtu wëlt lëꞌ Me gat
Dub niwiꞌ rë men kwaꞌn mileꞌ Jesús,
orzeꞌ nzhab Jesús lo rë men cheꞌn Me:
44 ―Bizobyek go kureꞌ,
no nayaꞌlt laxtoꞌ goi:
Na nak Xgaꞌn Dios,
no nak da tu men yizhyuo,
lëꞌ men chi Da lo rë men niyiꞌ nine da par gut bixaꞌ Da.
45 Per nangazobyekt bixaꞌ kwaꞌn nzhab Jesús,
porke stubi gat xaꞌl yek bixaꞌ,
par ne bixaꞌ kwane;
mbaino nu nizheb bixaꞌ nabdiꞌzh bixaꞌ,
kwan gab widiꞌzh baꞌ lo Jesús.
Midiꞌzh men cheꞌn Jesús: “¿Cho más tsak?”
46 No nguzublo kichëlroꞌ rë men cheꞌn Jesús par nabei,
¿cho xaꞌ gak más xaꞌ tsak xid bixaꞌ?,
47 per lwegaꞌ mizi Jesús cho xigab kileꞌ bixaꞌ,
orzeꞌ nguzen Me tu mëꞌd win,
no mizo Me mëꞌd taꞌ Me,
48 orzeꞌ nzhab Me:
―Men kwaꞌn niwiꞌ wen lo mëꞌd win reꞌ por nak mëꞌd men da,
pwes lon niwiꞌ xaꞌ wen;
no xaꞌ kwaꞌn niwiꞌ wen lon,
lo Xuza,
Me mixëꞌl da,
niwiꞌ xaꞌ wen lo.
Kuzeꞌ men yent kwan tsak xid go,
xaꞌ zeꞌ xaꞌ más tsak lo go.
Xaꞌ gat niyiꞌt nine be, lad cheꞌn be nzho xaꞌ
49 Orzeꞌ nzhab Juan lo Jesús:
―Maestr,
une no tu xaꞌ kigotin mbi mal laxtoꞌ tu men por lël,
no nzhab no lo xaꞌ naleꞌtraꞌ xaꞌi,
porke gat nikizët xaꞌ kun be.
50 Orzeꞌ nzhab Jesús:
―Bilaꞌ go kileꞌ xaꞌi,
porke xaꞌ gat niyiꞌ nine be,
lad cheꞌn be nzho xaꞌ.
51 No or nzhazhin la zhë,
bi Jesús lo yibëꞌ,
mbaino ter nane la Me rë kwaꞌn zak Me yezh Jerusalén,
per tutsa xigab mileꞌ Me,
lëꞌ Me ya ka yezh Jerusalén,
52 orzeꞌ mixëꞌl Me pla men cheꞌn Me par ya bixaꞌ tu rë yezh lazh men Samaria,
yakwaꞌn bixaꞌ plo yaꞌn bixaꞌ kun lëꞌ Me.
53 Per rë men Samaria,
nangazaꞌt bixaꞌ plo yaꞌn Jesús kun rë men cheꞌn,
porke nane bixaꞌ,
lëꞌ Jesús kileꞌ xigab ya par yezh Jerusalén.
54 Orzeꞌ nzhab Jakob kun Juan lo Jesús:
―Señor,
¿chi ziyël go naꞌb no lo Dios,
gab bël lo yibëꞌ,
par loꞌxe rë men reꞌ?
55 Orzeꞌ miëk Jesús,
miwiꞌ Me lo bixaꞌ,
orzeꞌ nzhab Jesús:
―¡Nanet go cho rë mbi mal nzo lo go,
par kidiꞌzh go kubaꞌ!
56 Na Xgaꞌn Dios,
no nu tu men yizhyuo da,
nangayalta par loxa men;
na nzhal,
par kon men lo rë kwaꞌn nazheꞌb,
nzadkë tich men.
Orzeꞌ ña bixaꞌ xtu yezh win.
Kwan nakiꞌn leꞌ men par gak bixaꞌ men cheꞌn Jesús
57 Or nzha bixaꞌ nez,
nzhab tu miyiꞌ lo Jesús:
―Señor,
nzhaklan yiꞌdkëꞌn tichal,
rë plo yal.
San Lucas 9:57-62
58 Orzeꞌ nzhab Jesús:
―Lëꞌ mbëz kinu ma lizh ma,
no lëꞌ rë miyin kinu yo cheꞌn,
per na Xgaꞌn Dios,
mbaino nak da tu men yizhyuo,
per gat kinutaꞌ ni plo gaꞌn.
59 No nzhab Jesús lo xtu xaꞌ:
―Diꞌkë ticha.
Orzeꞌ nzhab xaꞌ reꞌ:
―Señor,
bilaꞌ go galo laka nzhakacha xuza.
60 Orzeꞌ nzhab Jesús:
―Kwaꞌn más nakiꞌn leꞌl nal reꞌ,
wadiꞌzh lo rë men,
xmod gak bixaꞌ men cheꞌn Dios,
no bilaꞌ yakaꞌch rë xaꞌ nak nela mengut gaꞌ,
tsaꞌ mengut bixaꞌ.
61 Xtu men nzhab lo Jesús:
―Señor,
nzhaklan yiꞌdkëꞌn tichal,
per bilaꞌ galo,
yayapne lo rë xaꞌ lizha.
62 Orzeꞌ nzhab Jesús:
―Nagakt gak men tu men cheꞌn Dios,
or nak xaꞌ nela tu men nzhaꞌn,
xaꞌ nazuꞌt.
Xaꞌ kwaꞌn nileꞌ rrëi yuo mbaino yëk xaꞌ al tich xaꞌ,
orzeꞌ lëꞌ rrëi cheꞌn xaꞌ xub.