Ngut Juan xaꞌ nililëiꞌ men leꞌn nits
14
Leꞌn rë ngubizh zeꞌ nak Herodes gobiernador lazh rë men Galilea,
no mbin xaꞌ rë kwaꞌn nzhudiꞌzh men por Jesús,
2 kuzeꞌ nzhab Herodes lo rë men xaꞌ nileꞌ mandad cheꞌn xaꞌ:
―Lëꞌla Juan xaꞌ nililëiꞌ men leꞌn nits nguruban,
kuzeꞌ nileꞌ xaꞌ reꞌ rë kwaꞌn nazhon baꞌ.
3 Porke lëꞌ Herodes mileꞌ mandad,
ngwagaꞌ Juan,
miliꞌb xaꞌ Juan kun kaden,
orzeꞌ ngulo xaꞌ Juan lizhyiꞌb por Herodías,
unaꞌ cheꞌn Lip wech xaꞌ,
4 por nzhab Juan lo Herodes:
“Gat went kaꞌl unaꞌ cheꞌn wechal.”
5 Orzeꞌ ngokla Herodes ngut xaꞌ Juan,
per nangaleꞌt xaꞌi por nizheb xaꞌ lo rë men,
porke lëꞌ rë men nane,
lëꞌ Juan nidiꞌzh por Dios.
6 Per or ngol lani cheꞌn Herodes,
nguio xchaꞌp Herodías,
mbilniꞌ xid bixaꞌ,
orzeꞌ nguio laxtoꞌ Herodes kun rë xaꞌ kwaꞌn nzob lo mes kun lëꞌ xaꞌ,
xmod mbilniꞌ unaꞌ.
7 Mizeꞌt xaꞌ Dios or nzhab xaꞌ lo unaꞌ,
lëꞌ xaꞌ zaꞌ wanei kwan naꞌb unaꞌ lo xaꞌ.
8 Per lëꞌ xnaꞌ unaꞌ mikiꞌl la unaꞌ,
kuzeꞌ nzhab unaꞌ lo Herodes:
“Nzhaklan yiꞌdnu go yek Juan,
leꞌn tu plat.”
9 No or mbin Herodes kureꞌ,
miwin laxtoꞌ xaꞌ,
per por lëꞌ xaꞌ miaꞌn la tutsa dilant lo rë men nzob kun lëꞌ xaꞌ,
lëꞌ xaꞌ zaꞌ wanei kwan naꞌb unaꞌ,
kuzeꞌ nguziyël xaꞌ zaꞌ xaꞌ kwaꞌn ngunaꞌb unaꞌ,
10 orzeꞌ mileꞌ xaꞌ mandad,
miroꞌg yek Juan leꞌn lizhyiꞌb,
11 no ñadnu bixaꞌ yek Juan,
nzhoi leꞌn tu chëꞌ,
par mizaꞌ bixaꞌi kaꞌ unaꞌ,
orzeꞌ lëꞌ unaꞌ mizaꞌi kaꞌ xnaꞌ.
12 Orzeꞌ mizhin rë men cheꞌn Juan par ngwats Juan,
mbiꞌy xaꞌ Juan par migaꞌch xaꞌ,
orzeꞌ ngwayab bixaꞌi lo Jesús.
Jesús mizaꞌ kwaꞌn ndao gaiꞌ mil miyiꞌ
13 Or mbin Jesús lëꞌ Juan ngut,
orzeꞌ nguroꞌ Jesús zeꞌ kun dub tu dusen men cheꞌn Me,
nkë Me leꞌn tu bark,
nzha Me tu plo yent men.
Per lëꞌ rë men,
or mbin bixaꞌ plo nzha Me,
rë yezh nguroꞌ men,
nzhakë bixaꞌ niꞌ bixaꞌ,
tich Jesús.
14 Or ngula Jesús bark,
une Me,
lëꞌ tu bëd men nzhin la zeꞌ,
orzeꞌ milats laxtoꞌ Me men,
miliyak Me rë men nzhakne xaꞌ nzho xid rë men zeꞌ.
15 Per or nzhala la yëꞌl,
nguzubi rë men cheꞌn Me lo Me nzhab bixaꞌ:
―Ya cho gor la nal,
no yent kwaꞌn nak dan reꞌ.
Guzh go lo rë men,
bi bixaꞌ,
yaziꞌ bixaꞌ kwaꞌn gao bixaꞌ rë yezh win kwaꞌn nzhin nakaꞌn reꞌ.
16 Per nzhab Jesús:
―Gat nakiꞌnt bi bixaꞌ;
¡yub go bizaꞌ kwaꞌn gao bixaꞌ!
17 Orzeꞌ nkab rë men cheꞌn Me:
―Gat kinut no nayax kwaꞌn gao rë xaꞌ reꞌ,
nab tsa gaiꞌ pan kun chop mbël kinu no.
18 Orzeꞌ nzhab Jesús:
―Dinu goi reꞌ.
19 Orzeꞌ mileꞌ Me mandad,
nguzob rë men zeꞌ lo gozh,
nguzen Me za gaiꞌ pan zeꞌ kun rop mbël zeꞌ,
miwiꞌ Me lo yibëꞌ,
mizaꞌ Me xkix lo Dios.
Orzeꞌ michiꞌx Mei,
no mizaꞌ Mei kaꞌ rë men cheꞌn Me;
par lëꞌ bixaꞌ kiꞌze gao rë men.
20 No rë men zeꞌ ndao haxta plo nguzhë bixaꞌ.
No mikan bixaꞌ rë bilao kwaꞌn miaꞌn sobr;
michizhë bixaꞌ tu dusen kardor.
21 Rë xaꞌ ndao reꞌ,
nab tsa xaꞌ miyiꞌ,
paste gaiꞌ mil bixaꞌ,
no ngalabt bixaꞌ rë unaꞌ no rë mëꞌd.
Jesús nguzë lo nits
22 Or milox ngok rë kureꞌ,
tuli mileꞌ Me mandad,
nkili rë men cheꞌn Me leꞌn bark par kubner gaꞌ bixaꞌ xtu roꞌ nits plo lë Betsaida;
mbaino lëꞌ Jesús miaꞌn par une Me xmod ña rë men.
23 Or milox mireꞌchbe rë men zeꞌ,
nkili Jesús yek yiꞌ par ngunaꞌb Me lo Dios.
Nab Me nzo zeꞌ or ngula la yëꞌl.
24 No dox la zit ñazë bark di plo miaꞌn Me,
une Me labai-larei kikwin mbi bark por nzha bixaꞌ nez nzë mbi.
25 No paste las tres garziꞌl,
nzhazë Jesús lo nits nez nzë bixaꞌ.
26 Or une bixaꞌ ñëꞌdzë Me lo nits,
nguruzhië bixaꞌ:
“¡Tu komale!”,
por dox mizheb bixaꞌ.
27 Tuli midiꞌzh Me,
nzhab Me:
―¡Nazhebt go!
¡Ka nai!
28 Orzeꞌ nzhab Per lo Me:
―¡Lëꞌ go!,
chi walika go kubaꞌ,
gurezh go da yala lo go.
29 Orzeꞌ nzhab Me:
―¡Dëꞌx!
Tuli nguroꞌ Per leꞌn bark,
nguzublo nzhazë xaꞌ nali laka lo Jesús,
30 per or une Per,
dox naye nzo mbi,
mizheb xaꞌ,
no or nguzublo nzhayaꞌzyuo xaꞌ leꞌn nits,
orzeꞌ nguruzhië xaꞌ,
nzhab xaꞌ:
―¡Lëꞌo!,
¡nalaꞌt go gat da!
31 Tuli nguzen Jesús yaꞌ Per,
nzhab Jesús:
―¿Chon tatu lo ya ñayilal da?
32 No or unkë Me leꞌn bark kun Per,
xega ngulëz mbi,
33 orzeꞌ nguzuxib rë men cheꞌn Me lo Me,
nzhab bixaꞌ:
―¡Walika go nak Xgaꞌn Dios!
Miliyak Jesús rë xaꞌ nzhakne yezh Genesaret
34 Or milox nded bixaꞌ leꞌn nits zeꞌ,
mizhin bixaꞌ lazh men Genesaret.
35 Or miliꞌbeꞌ rë men yezh zeꞌ Jesús,
mixoꞌbdiꞌzh bixaꞌ,
lëꞌ Jesús mizhin zeꞌ,
lo rë yezh kwaꞌn nzhin nakaꞌn zeꞌ.
Orzeꞌ ngwanu men rë xaꞌ nzhakne lo Jesús,
36 no dox ngunaꞌb bixaꞌ ziyël Jesús,
namás gal bixaꞌ xiꞌ xab Me,
no rë xaꞌ migale,
miak bixaꞌ.