2 Or ngol zhë kwaꞌn nayiꞌ kë men Israel zhiꞌn,

orzeꞌ ngwaluꞌ Jesús widiꞌzh cheꞌn Dios leꞌn yoꞌ plo nitseꞌd bixaꞌ widiꞌzh cheꞌn Dios.

No rë xaꞌ mbin kwaꞌn midiꞌzh Me,

xe miaꞌn bixaꞌ tuli por xmod niluꞌ Jesús widiꞌzh cheꞌn Dios,

orzeꞌ nzhab bixaꞌ lo wech bixaꞌ:

―¿Plo ngwatseꞌd xaꞌ reꞌ,

dox kwaꞌn nzhak xaꞌ?

¿Plo ngwatseꞌd xaꞌ rë kwaꞌn nzhak xaꞌ reꞌ,

no rë kwaꞌn nazhon nileꞌ xaꞌ?

3 ¿Per chi gat lëꞌt xaꞌ reꞌ karpinter,

xgaꞌn Mari;

no wech Jakob,

no Che,

no Judas,

mbaino Simón?

No,

¿chi gat lëꞌt rë bizan xaꞌ reꞌ,

nzo kun be?

Kuzeꞌ,

nangayilat bixaꞌ Me.

4 Orzeꞌ nzhab Jesús:

―Rë plo ñila men tu profet,

xaꞌ nidiꞌzh por Dios.

Nabtsa rë men lazh xaꞌ,

no rë melizh xaꞌ,

mbaino rë xaꞌ nzhin kun lëꞌ xaꞌ gat ñilat xaꞌ.

5 Nangakt ngaleꞌ Jesús nayax zhiꞌn nazhon lazh Me.

Nabtsa pla men nzhakne miliyak Me or mixoꞌb Me yaꞌ Me yek bixaꞌ.

6 No xe miaꞌn Jesús por tanta nad rë men lazh Me,

par yila bixaꞌ Jesús.

No nkizë Jesús nakaꞌn rë yezh win kwaꞌn nzhin zeꞌ,

par miluꞌ Me widiꞌzh cheꞌn Dios.

7 Orzeꞌ ngurezh Me dub tu dusen men cheꞌn Me,

par mixëꞌl Me bixaꞌ kad yezh,

chop ga bixaꞌ;

no mizaꞌ Me yalnazhon kaꞌ bixaꞌ par koꞌ bixaꞌ mbi mal laxtoꞌ rë men.

8 orzeꞌ mileꞌ Me mandad,

yent kwaꞌn weiꞌ bixaꞌ nez;

nab tsa tu bordón;

no ni naweiꞌ bixaꞌ kwaꞌn gao bixaꞌ,

no ni tu bols,

no ni dimi;

9 no ni naweiꞌ bixaꞌ xtu nez yalyid,

no ni xtu nez lar.

10 No nzhab Me:

―Wanei plo zhin go lizh tu men,

biyaꞌn go zeꞌ haxta or ya go xtu yezh.

11 No wanei cho yezh plo naziyël bixaꞌ gon bixaꞌ kwaꞌn gab go;

or roꞌ go zeꞌ,

kwib go yuo xan xkalyid go,

nela tu señ gaꞌ,

ke lëꞌ bixaꞌ nzëꞌb xki lo Dios.

(Kuzeꞌ walika kwaꞌn nin lo go,

más zakzi rë men zeꞌ lo rë men yezh Sodoma kun yezh Gomorra,

or gab Dios xmod gak kun kad men yizhyuo.)

12 Orzeꞌ nguroꞌ bixaꞌ par nzhadiꞌzh bixaꞌ widiꞌzh cheꞌn Dios lo rë men Israel,

par laꞌ rë men zeꞌ rë kwaꞌn gat lëꞌ nileꞌ bixaꞌ lo Dios.

13 Orzeꞌ nguloꞌ bixaꞌ nayax mbi mal laxtoꞌ rë men,

mbaino nayax men nzhakne mitsaꞌ bixaꞌ aseit,

par miak rë men zeꞌ.

14 No mbin rey Herodes rë kwaꞌn nileꞌ Jesús no rë kwaꞌn nileꞌ rë men cheꞌn Me,

porke rë plo nguxoꞌb diꞌzhe,

kuzeꞌ nguio men nzhab:

—Pas Juan xaꞌ niliꞌlëiꞌ men leꞌn nits,

nguruban,

no nzhaknu Dios xaꞌ par nileꞌ xaꞌ rë kwaꞌn nazhon baꞌ.

15 No zipla men nzhab:

—Li xaꞌ baꞌ.

Mbaino zipla men nzhab:

—Xaꞌ baꞌ xaꞌ nak xtu xaꞌ nidiꞌzh por Dios,

xaꞌ nguio nzhala.

16 No or mbin Herodes kwaꞌn nidiꞌzh men,

orzeꞌ nzhab xaꞌ:

―¡Juan xaꞌ baꞌ!

¡Na mile mandad miroꞌg yek xaꞌ,

no nal nguruban xaꞌ!

17 Seꞌ midiꞌzh Herodes,

porke mis lëꞌ xaꞌ mileꞌ mandad ngwagaꞌ Juan par miliꞌb xaꞌ Juan kun kaden,

no ngulo xaꞌ Juan lizhyiꞌb,

por roꞌ Herodías,

unaꞌ cheꞌn wech xaꞌ Lip,

por ngok jwandang cheꞌn Herodes kun lëꞌ unaꞌ,

18 porke nzhab Juan lo Herodes:

“Gat ñalt,

banal kun unaꞌ cheꞌn wechal”,

19 kuzeꞌ xian reꞌ kinu Herodías kun Juan,

orzeꞌ mikwaꞌn unaꞌ mod par gat Juan,

per nangaktaꞌ ngut unaꞌ Juan,

20 porke Herodes nizheb nine Juan,

porke nane Herodes dox wen rë kwaꞌn nileꞌ Juan,

mbaino nab tsa par Dios naban Juan.

Kuzeꞌ nikina xaꞌ Juan par niyent kwan zak Juan.

No or mbin Herodes rë kwaꞌn nidiꞌzh Juan,

orzeꞌ net xaꞌ kwan leꞌ xaꞌ,

mbaino mizheb xaꞌ,

per ño laxtoꞌ xaꞌ nzhon xaꞌ kwaꞌn nidiꞌzh Juan.

21 Per ngol tu ngubizh,

ngwazhël Herodías xmod gut xaꞌ Juan.

Or ngol lani cheꞌn Herodes,

mizaꞌ Herodes kwaꞌn gao rë men cheꞌn xaꞌ,

xaꞌ nileꞌ mandad,

mbaino rë xaꞌ nileꞌ mandad lo rë sondad,

no rë xaꞌ más tsak yezh Galilea.

22 No plo kiyao rë xaꞌ reꞌ,

nguio xchaꞌp Herodías no kiyolniꞌ unaꞌ.

Orzeꞌ nguio laxtoꞌ Herodes kureꞌ,

no rë xaꞌ kwaꞌn nzob lo mes kun lëꞌ xaꞌ,

orzeꞌ nzhab Herodes lo unaꞌ:

—Binaꞌb kwaꞌn nzhaklal lon,

na nei.

23 No haxta mizeꞌt Herodes Dios,

zaꞌ xaꞌ wanei kwan naꞌb unaꞌ,

mbaino haxta zaꞌ xaꞌ garol rë kwaꞌn kinu xaꞌ par lëꞌ unaꞌ.

24 Orzeꞌ nguroꞌ unaꞌ,

nzhab unaꞌ lo xnaꞌ unaꞌ:

―¿Kwan naꞌba?

Orzeꞌ nzhab xaꞌ:

―Yek Juan xaꞌ nililëiꞌ men leꞌn nits ngunaꞌb.

25 Orzeꞌ lwegaꞌ ña ska unaꞌ plo nzob Herodes par nzhab unaꞌ kureꞌ:

―Nzhaklan nal reꞌ tuli,

neꞌ go yek Juan xaꞌ niliꞌlëiꞌ men leꞌn nits kan;

leꞌn tu cheꞌ.

26 Orzeꞌ dox miwin laxtoꞌ Herodes por Juan,

per lëꞌ xaꞌ nzhablai lo Dios,

no lo rë xaꞌ ngurezh xaꞌ,

kuzeꞌ nangakt ngab xaꞌ:

“Gakte.”

27 Orzeꞌ lwegaꞌ mileꞌ rey Herodes mandad par nzha tu sondad cheꞌn xaꞌ,

nzhachoꞌ yek Juan leꞌn lizhyiꞌb,

28 mbaino ñadnu xaꞌ yek Juan leꞌn tu chëꞌ,

mizaꞌ xaꞌi kaꞌ unaꞌ,

no lëꞌ unaꞌ mizaꞌi nkaꞌ xnaꞌ unaꞌ.

29 Or mbin rë men cheꞌn Juan kureꞌ,

ngwakaꞌ bixaꞌ kwerp cheꞌn Juan par mikaꞌch bixaꞌi.

30 Orzeꞌ ñëꞌd rë apost,

men cheꞌn Jesús xaꞌ más nileꞌ mandad,

migan bixaꞌ lo Me,

no midiꞌzh bixaꞌ rë kwaꞌn nazhon kwaꞌn mileꞌ bixaꞌ,

no rë kwaꞌn miluꞌ bixaꞌ,

31 orzeꞌ nzhab Me lo rë men cheꞌn Me:

―Guroꞌ go xid rë men baꞌ;

chaꞌ go nzha be plo yent cho nak,

par leꞌ go diskans cheꞌp.

Porke dox men nzhin lo bixaꞌ,

cho ña la,

no cho laore nzë;

kuzeꞌ ni nangak ngao bixaꞌ.

32 Orzeꞌ ña Me kun rë men cheꞌn Me leꞌn tu bark,

plo yent cho nak.

33 Per nayax men une nzha Jesús kun rë men cheꞌn Me,

no ngwanu laxtoꞌ bixaꞌ plo nzha Jesús.

Orzeꞌ,

rë bixaꞌ nzha niꞌ plo nzha Jesús,

no galo bixaꞌ mizhin plo zhin Me kun rë men cheꞌn Me.

34 Or ngula Jesús bark,

une Me dox nayax men nzhin la,

orzeꞌ milats laxtoꞌ Me rë men zeꞌ,

porke nzhin bixaꞌ chigab nela rë mbëkxiꞌl kwaꞌn yent cho nikina gaꞌ.

Orzeꞌ nguzublo miluꞌ Jesús nayax kwaꞌn lo bixaꞌ.

35 No nzhazhëlalyuo,

orzeꞌ nguzubi rë men cheꞌn Me,

nzhab:

―Yent kwaꞌn nak dan reꞌ,

no cho or la nal.

36 Más ñal guzh go lo rë men baꞌ,

bi bixaꞌ lo rë xaꞌ nzho dan mbaino lo rë xaꞌ nzho yezh win,

par yaziꞌ bixaꞌ kwaꞌn gao bixaꞌ.

37 Orzeꞌ nzhab Jesús:

―¡Bizaꞌ go kwaꞌn gao bixaꞌ!

Orzeꞌ nzhab rë men cheꞌn Me:

―¿Taxa nzhakla go yaziꞌ no kwaꞌn gao bixaꞌ,

kun dimi kwaꞌn nileꞌ men gan chop gayoꞌ ngubizh zhiꞌn?

38 Orzeꞌ nzhab Jesús:

―Biwiꞌ go pla pan kinu go.

No or milab bixaꞌi,

orzeꞌ nzhab bixaꞌ:

―Kinu no gaꞌytsa pan,

no chop mbël.

39 Orzeꞌ mileꞌ Me mandad,

nguzhin tu montón gaꞌ bixaꞌ,

lo gozh nayëꞌ.

40 No nguzhin montón bixaꞌ,

por gayoꞌ bixaꞌ,

no por choꞌ bichiꞌ gaꞌ bixaꞌ,

por montón.

41 Orzeꞌ nguzen Me za gaiꞌ pan zeꞌ no rop mbël zeꞌ,

no or miwiꞌ Me lo yibëꞌ,

no mizaꞌ Me xkix lo Dios,

orzeꞌ michiꞌx Mei,

no mizaꞌ Mei kaꞌ rë men cheꞌn Me,

par kiꞌz rë men cheꞌn Mei gao rë men zeꞌ.

No seꞌgaꞌ mileꞌ Me kun rop mbël zeꞌ.

42 No rë men ndao haxta plo une ndao bixaꞌ.

43 No mikan bixaꞌ rë bilao kwaꞌn miaꞌn sobr ndao rë men zeꞌ;

michizhë bixaꞌ tu dusen kardor.

44 No rë men ndao reꞌ,

nab tsa rë xaꞌ miyiꞌ,

como gaiꞌ mil bixaꞌ.

45 No lwegaꞌ mileꞌ Jesús mandad,

nkë rë men cheꞌn Me leꞌn bark,

par ñaner gaꞌ bixaꞌ xtu roꞌ nits plo lë Betsaida;

no lëꞌ Me miaꞌn tras par miwiꞌ Me xmod ña rë men zeꞌ.

46 No or milox ña rë men zeꞌ,

orzeꞌ nzha Jesús leꞌn mont par nzhanaꞌb Me lo Xuz Me Dios.

47 No or ngula yëꞌl,

lëꞌ bark nzha la garol saoꞌ nits,

no lëꞌ Jesús nzo gak ka lo yuo.

48 No une Me rë men cheꞌn Me,

dox vid kitsëꞌ bixaꞌ bark kun yaꞌ bixaꞌ,

porke nzo dox mbi no kichëꞌl-lo bixaꞌ mbi.

No paste las tres or garziꞌl,

nzhazë Me lo nits plo nzhazë bixaꞌ.

No ngokla Jesús,

ngazhubner lo bixaꞌ.

49 Per or une bixaꞌ,

lëꞌ Jesús nzhazë lo nits,

mileꞌ bixaꞌ xigab:

“¡Paste tu komale!”,

kuzeꞌ haxta nguruzhië bixaꞌ,

50 porke rë bixaꞌ une Jesús,

dox mizheb bixaꞌ,

per lwegaꞌ midiꞌzh Jesús lo bixaꞌ,

nzhab Me:

―¡Nazhebt go!

¡Ka nai!

51 Orzeꞌ nkë Jesús leꞌn bark,

no ngulëz mbi.

Orzeꞌ rë bixaꞌ xe miaꞌn tuli por kureꞌ.

52 Seꞌ nguzak bixaꞌ,

porke nagat zobyek bixaꞌ kwaꞌn mileꞌ Jesús kun rë pan zeꞌ;

porke nayaoꞌ yek bixaꞌ.

53 No or milox nded bixaꞌ leꞌn nits,

orzeꞌ mizhin bixaꞌ par lazh men Genesaret,

orzeꞌ mikidoꞌ bixaꞌ bark roꞌ nits.

54 no or ngula bixaꞌ bark,

lwegaꞌ ngokbeꞌ men Jesús,

55 orzeꞌ rë men nzhin nakaꞌn yezh zeꞌ,

karre ñanu bixaꞌ rë men nzhakne lo ya,

plo mbin bixaꞌ mizhin Jesús.

56 Rë plo ña Jesús,

ter yezh ro o yezh win,

o haxta rë dan plo nzho men;

leꞌn rë nez ñanu bixaꞌ men nzhakne,

no ninaꞌb bixaꞌ lo Jesús ke namás laꞌ Jesús gal bixaꞌ xab Jesús.

No rë xaꞌ kwaꞌn nigale zeꞌ,

ñak bixaꞌ.