Miluꞌ Jesús kwan nzhak or nzhaꞌn men
13
No zhë zeꞌ nguroꞌ Jesús leꞌn yoꞌ zeꞌ par ngwa Me roꞌ lagún;
zeꞌ nguzob Me.
2 Por dox nayax men migan zeꞌ,
nkë Jesús leꞌn tu bark,
nguzob Me leꞌne,
no lëꞌ rë men nzhin roꞌ nits.
3 Orzeꞌ midiꞌzh Me nayax kwaꞌn lo rë men zeꞌ kun pura kwent,
nzhab Me:
―Bingole,
tu wëlt nzha tu men,
nzhayaꞌn lazh triu lo yuo.
4 No or ngwacheꞌch xaꞌi,
pla lazhe ngob leꞌn nez,
ndao miyine.
5 No más lazhe ngob lo yuo ke;
lwegaꞌ ngulëne,
per niyent beꞌs yuo zeꞌ.
6 Or ngulen ngubizh,
no or mina ngubizh nayiꞌ,
mikeꞌx ngubizhe por niyen luche;
mibizhe.
7 No ziplai ngob leꞌn ya yich,
per or miroꞌb ya yich,
ngalaꞌt ya yich ngabane,
orzeꞌ ngute.
8 Per ziplai ngob lo yuo wen,
miroꞌbe,
no dox mizaꞌi.
Tu lazhe mizaꞌ tu gayoꞌi,
xtu lazhe mizaꞌ chon gale,
mbaino xtu lazhe mizaꞌ gal bichiꞌy.
9 ¡Chi lëꞌ go mbine,
bizobyek goi!
¿Kwan gab rë kwent reꞌ?
10 Orzeꞌ nguzubi rë men cheꞌn Me lo Me par nzhab bixaꞌ:
―¿Chon nidiꞌzh go kun pura kwent tsa lo rë men?
11 Orzeꞌ nzhab Jesús lo rë men cheꞌn Me:
―Nabtsa go milaꞌ Dios,
ne go kwaꞌn nagaꞌch kwaꞌn kinu Dios plo nileꞌ Dios mandad;
per rë xaꞌ baꞌ,
nangalaꞌt Dios ngane bixaꞌi,
12 porke rë xaꞌ kwaꞌn nzhakla zobyeke,
mbaino leꞌ rë kwaꞌn nidizha,
rë xaꞌ reꞌ xaꞌ nzhaknu Dios par más zobyek bixaꞌi;
per rë xaꞌ gat nzhaklat beꞌs zobyek kwaꞌn nidizha,
haxta cheꞌp tsa kwaꞌn nileꞌ xaꞌ xigab ya nane la xaꞌ,
per lëꞌi yubchi lo xaꞌ.
13 Kuzeꞌ midizha lo rë xaꞌ baꞌ kun pura kwent tsa,
par une bixaꞌi per nanganet bixaꞌ kwane;
mbaino par mbin bixaꞌi,
per nangazobyekt bixaꞌi.
14 Kuzeꞌ,
par yek rë xaꞌ baꞌ nzha widiꞌzh kwaꞌn mizobniꞌ Isaías kwaꞌn nzhab seꞌ:
Ter más gon bixaꞌi,
per nazobyekt bixaꞌi,
no ter más ne bixaꞌi,
per nanet bixaꞌ kwane,
15 porke dox nad laxtoꞌ rë men reꞌ.
No gat nzhont nzha bixaꞌi;
no nak bixaꞌ nela tu men nikal lo gaꞌ.
No chi nangak bixaꞌ saꞌ,
lëꞌ bixaꞌ nganei kun zalo bixaꞌ,
no ngon bixaꞌi kun nzha bixaꞌ,
no ngazobyek bixaꞌi dub la bixaꞌ,
orzeꞌ ngalaꞌ bixaꞌ rë kwaꞌn gat lëꞌ nak bixaꞌ,
par ngagoꞌ Dios bixaꞌ lo rë kwaꞌn nazheꞌb.
16 ’Per go,
wen nzha go por une goi,
no wen nzha go por mbin goi.
17 Walika kwaꞌn nin lo go,
nayax xaꞌ midiꞌzh por Dios,
mbaino nayax men,
xaꞌ mileꞌ rë kwaꞌn nzhakla Dios,
ngokla bixaꞌ ngane bixaꞌ rë kwaꞌn kine go,
per nanganet bixaꞌi;
mbaino ngokla bixaꞌ ngon bixaꞌ rë kwaꞌn kiyon go,
per nangont bixaꞌi.
Nzhab Jesús kwan gab kwent cheꞌn yalgoꞌn
18 ’Bin go xmod nak kwent cheꞌn nzhaꞌn men lazh triu zeꞌ.
19 Or nzhon tu men widiꞌzh cheꞌn Dios no gat nizobyekt xaꞌi,
orzeꞌ laxtoꞌ men reꞌ nak nela yuo leꞌn nez zeꞌ,
porke or nzhon xaꞌi,
gat ñat laxtoꞌ xaꞌ,
kuzeꞌ nizhin Mizhab,
nigoꞌ Mizhab kwaꞌn mixëꞌn Dios laxtoꞌ xaꞌ.
20 No lazh kwaꞌn ngob lo yuo ke zeꞌ,
nak rë men mbin widiꞌzh cheꞌn Dios,
no or mbin xaꞌi,
nizak laxtoꞌ xaꞌ,
21 per yent beꞌs luche,
cheꞌptsa midiꞌy.
Seꞌ nak rë men,
or nizak xaꞌ tu kwaꞌn nalats,
o niyiꞌ men nine xaꞌ por nak xaꞌ men cheꞌn Dios;
orzeꞌ por kureꞌ tuli nilaꞌ xaꞌ Dios.
22 No lazh kwaꞌn ngob leꞌn ya yich zeꞌ,
nak rë men ngwayila widiꞌzh cheꞌn Dios,
per por dox nileꞌ xaꞌ xigab por rë kwaꞌn nakiꞌn xaꞌ yizhyuo reꞌ,
mbaino por niwix xaꞌ gap xaꞌ dimi,
kuzeꞌ ñaꞌl laxtoꞌ xaꞌ Dios;
nak xaꞌ nela tu ya kwaꞌn gat nizaꞌt xlë gaꞌ.
23 Per lazh kwaꞌn ngob lo yuo wen zeꞌ,
nak rë xaꞌ nzhon widiꞌzh cheꞌn Dios,
no nizobyek xaꞌi,
orzeꞌ nileꞌ xaꞌ rë kwaꞌn nzhakla Dios;
nak xaꞌ nela tu yalgoꞌn kwaꞌn dox mizaꞌ,
nela tu do cheꞌn triu gaꞌ kwaꞌn mizaꞌ tu gayoꞌ lazhe,
no xtube mizaꞌ zichon gale,
mbaino xtube mizaꞌ zigal bichiꞌy.
Kwent cheꞌn triu mbaino yix kwaꞌn ngulen leꞌne
24 No midiꞌzh Jesús xtu kwent lo rë men zeꞌ,
nzhab Me:
―Nu plo nileꞌ Dios mandad nak nela tu miyiꞌ kwaꞌn ngoꞌn lazh triu wen lo yuo cheꞌn,
25 no lëꞌ rë men cheꞌn xaꞌ nax,
lëꞌchi mizhin tu xaꞌ nidil xaꞌ,
par ngwaxëꞌn xaꞌ yix kwaꞌn lë cizaña,
xid rë triu zeꞌ,
orzeꞌ ña xaꞌ.
26 No or miroꞌb triu,
no mizaꞌi do;
orzeꞌ nu yix zeꞌ nguluxoꞌb,
27 orzeꞌ ngwayab rë mos lo xaꞌ nak cheꞌn triu zeꞌ:
“Lëꞌo,
¿chi gat lëꞌt nab tsa lazh triu mixëꞌn go?
No nal,
¿plo nguroꞌ yix kwaꞌn nzhiꞌb leꞌne reꞌ?”
28 Orzeꞌ nzhab xaꞌ nak cheꞌne:
“Tu xaꞌ niyiꞌ nine da mixëꞌn kureꞌ.”
No nzhab rë mos zeꞌ:
“¿Chi nzhakla go yakiꞌb no yix kwaꞌn nazuꞌt baꞌ?”
29 Per nzhab xaꞌ:
“Nakiꞌbtaꞌ goi nal,
napaꞌ nu triu kiꞌb go.
30 Más wen bilaꞌ go roꞌbe tutsa haxta or yats yalgoꞌn;
orzeꞌ xëla go par kan go galo laka yix kwaꞌn nazuꞌt baꞌ,
orzeꞌ liꞌb goi,
leꞌ go manoje par yëke;
orzeꞌse kan go triu no kichaoꞌ goi plo niguchaoꞌ go rë kwaꞌn.”
Kwent cheꞌn lazh mostas
31 No midiꞌzh Jesús xtu kwent lo rë men,
nzhab Me:
―No nu plo nileꞌ Dios mandad nak nela tu lazh win mostas kwaꞌn mixëꞌn tu xaꞌ leꞌn yuo cheꞌn.
32 Ter más win lazh mostas,
lo rë lazh ya kwaꞌn nixëꞌn men,
per or niroꞌbe,
lëꞌi más nzhak kwaꞌro,
lo rë ya kwaꞌn nzhiꞌb tutsa kun lëꞌi,
no lo rë rram cheꞌne,
ñiꞌd rë miyin,
nixoꞌb yo cheꞌn.
Kwent cheꞌn levadur
33 No midiꞌzh Jesús xtu kwent,
nzhab Me:
―No seꞌska nak plo nileꞌ Dios mandad;
nake nela levadur kwaꞌn nguzen tu unaꞌ par migoch unaꞌi,
leꞌn tu bëd harin,
par zubeche.
¿Chon niluꞌ Jesús widiꞌzh cheꞌn Dios kun nab tsa kwent lo rë men?
34 Midiꞌzh Jesús rë nak kureꞌ lo rë men kun nab tsa kwent;
yent kwan ngadiꞌzh Me lo bixaꞌ chi gat lëꞌ kun kwente,
35 par ngok rë kwaꞌn midiꞌzh tu xaꞌ midiꞌzh por Dios or nzhab xaꞌ:
Kun pura kwent tsa dizha lo rë men,
Rë kwaꞌn nagaꞌch cheꞌn Dios kwaꞌn kinu Me or ni naga ko Me yizhyuo.
Jesús nzhab kwan gab yix kwaꞌn nazuꞌt, nzhiꞌb xid triu
36 Or ngulunez Jesús rë men zeꞌ,
nguio Me leꞌn yoꞌ,
orzeꞌ nguzubi rë men cheꞌn Me lo Me,
par minaꞌbdiꞌzh bixaꞌ,
kwan gab kwent cheꞌn yix kwaꞌn nazuꞌt zeꞌ.
37 Orzeꞌ nzhab Jesús:
―Xaꞌ mixëꞌn lazh triu kwaꞌn wen zeꞌ nak Xgaꞌn Dios Me nu nak tu men yizhyuo,
38 mbaino lëꞌ yuo cheꞌn Me nak rë men yizhyuo reꞌ.
Lazh triu wen zeꞌ nak rë men cheꞌn Dios,
no lëꞌ yix kwaꞌn nazuꞌt zeꞌ nak rë men cheꞌn Mizhab.
39 Lëꞌ men kwaꞌn ngwaxëꞌn yix nazuꞌt zeꞌ nak Mizhab,
mbaino lëꞌ yalgoꞌn nak or gab Dios xmod gak kun kad men yizhyuo,
mbaino rë xaꞌ kan yalgoꞌn nak rë ganj cheꞌn Dios.
40 Nela nigan yix kwaꞌn nazuꞌt par yëke,
seꞌtaꞌ gak kun rë xaꞌ chigab walika men cheꞌn Dios.
41 Na,
Xgaꞌn Dios,
mbaino nak Da tu men yizhyuo,
xëla rë ganj da,
par koꞌ bixaꞌ xid rë men da,
rë men kwaꞌn nileꞌ nzhap xtu men dol lo Dios,
mbaino rë xaꞌ naban ngokla ngwa xid rë men cheꞌn Dios.
42 Rë men reꞌ koꞌ rë ganj da par bi bixaꞌ leꞌn bël cheꞌn gabil,
plo goꞌn bixaꞌ no kwezh lëi bixaꞌ por dox yalne.
43 Orzeꞌse rë men xaꞌ nileꞌ kwaꞌn nzhakla Dios,
gak bixaꞌ nela biani cheꞌn ngubizh plo nileꞌ Xuz bixaꞌ Dios mandad.
¡Chi lëꞌ go mbin kureꞌ,
bizobyek goi!
Kwent cheꞌn kwaꞌn wen dox
44 ’Plo nileꞌ Dios mandad nak nela tu kwaꞌn dox tsak,
nzhukaꞌche leꞌn yuo,
no or ngwazhël tu miyiꞌy,
ngulukaꞌch ska xaꞌi.
Por dox nizak laxtoꞌ xaꞌ,
miëk xaꞌ lizh xaꞌ,
ngwato xaꞌ rë kwaꞌn kinu xaꞌ par nguziꞌ xaꞌ dub yuo zeꞌ.
Kwent cheꞌn tu ke chul kwaꞌn dox tsak
45 No nzhab Jesús:
―Nu plo nileꞌ Dios mandad nak nela tu xaꞌ nito no niziꞌ,
kikwaꞌn xaꞌ ke chul.
46 No or ngwachib xaꞌ lo ke chul kwaꞌn dox tsak,
orzeꞌ miëk xaꞌ lizh xaꞌ,
mito xaꞌ rë nak kwaꞌn kinu xaꞌ par nguziꞌ xaꞌ ke tsak reꞌ.
Kwent cheꞌn yex kwaꞌn nizen mbël
47 ’No nela tu yex kwaꞌn nizen rë lo mbël,
seꞌtaꞌ nak plo nileꞌ Dios mandad.
48 Or ñazhëi di mbël,
nigoꞌ mene roꞌ nits par nibe bixaꞌ ma wen tsa,
niguchaoꞌ bixaꞌ.
No lëꞌ rë ma nazuꞌ,
nigubi bixaꞌ.
49 Saꞌtaꞌ leꞌ Dios kun rë men or gab Dios xmod gak kun kad men yizhyuo.
Xëꞌl Me rë ganj cheꞌn Me par kutin rë men nakap xid rë men wen,
50 par bi rë men nakap zeꞌ leꞌn bël cheꞌn gabil.
Zeꞌ goꞌn bixaꞌ,
haxta kwezh lëi bixaꞌ por dox yalne.
Xid kwaꞌn wen nguroꞌ kwaꞌn kub no kwaꞌn goꞌx
51 Orzeꞌ nzhab Jesús lo rë men cheꞌn Me:
—¿Chi mizobyek go rë kwaꞌn midizha lo go reꞌ?
Nkab bixaꞌ:
―Lëꞌi mizobyek ka no.
52 Orzeꞌ nzhab Jesús lo bixaꞌ:
―Wenkai.
Chi tu xaꞌ nane ley kwaꞌn milaꞌ Dios lo Muisés,
mbaino nizobyek xaꞌ rë kwaꞌn nilun,
xaꞌ reꞌ nak nela tu xaꞌ nak lizh tu yoꞌ gaꞌ;
xid rë kwaꞌn kinuchaoꞌ xaꞌ,
nane xaꞌ xmod leꞌ xaꞌ kun kwaꞌn kub mbaino kun kwaꞌn goꞌx.
Miëk Jesús yezh Nazaret plo miroꞌb Me
53 Or milox midiꞌzh Jesús kureꞌ,
nguroꞌ Me zeꞌ.
54 Or mizhin Me yezh Nazaret plo nak lazh Me,
tuli ka nguzublo Me miluꞌ Me widiꞌzh cheꞌn Dios lo rë men nzhin leꞌn yoꞌ plo nitseꞌd bixaꞌ widiꞌzh cheꞌn Dios.
Xe miaꞌn bixaꞌ tuli por kwaꞌn miluꞌ Jesús,
orzeꞌ nzhab bixaꞌ:
―¿Plo mitseꞌd xaꞌ reꞌ kwaꞌn nzhak xaꞌ,
no rë kwaꞌn nazhon kwaꞌn nileꞌ xaꞌ?
55 ¿Chi gat lëꞌt xaꞌ reꞌ xgaꞌn xaꞌ nichaoꞌ mes,
no Mari lë xnaꞌ xaꞌ,
no gat rë wech xaꞌ lë Jakob,
Che,
Simón,
no Judas?
56 ¿No chi gat lëꞌt rë bizan xaꞌ nzo kun be reꞌ?
¿Plo ska mitseꞌd xaꞌ reꞌ rë kwaꞌn nzhak xaꞌ?
57 No por nak bixaꞌ saꞌ,
kuzeꞌ nangayilat bixaꞌ widiꞌzh cheꞌn Dios kwaꞌn miluꞌ Jesús,
per nzhab Jesús lo bixaꞌ:
―Rë plo,
lëꞌ men ñila ka tu xaꞌ nidiꞌzh por Dios;
per mis rë men lazh xaꞌ no rë men lizh xaꞌ,
nayilat kwaꞌn nidiꞌzh xaꞌ.
58 No por nangayila rë men zeꞌi,
kuzeꞌ nangaleꞌt Jesús nayax kwaꞌn nazhon zeꞌ.