Ngokla Mizhab ngakide Jesús
4
No dox nzho Sprit cheꞌn Dios laxtoꞌ Jesús,
nguiubre Jesús plo nak youꞌ Jordán,
no mbiyꞌ Sprit cheꞌn Dios Jesús leꞌn yuo bizh plo yent cho nak.
San Lucas 4:1-30
2 Zeꞌ nguio Jesús dub choꞌ ngubizh,
mbaino yent kwan ngao Jesús.
Per or nded rë ngubizh reꞌ,
milaꞌn Jesús,
no ngokla Mizhab ngazenbeꞌ Jesús (ngawiꞌ Mizhab xmod nak Jesús),
3 kuzeꞌ nzhab Mizhab:
―Chi walika nakal Xgaꞌn Dios,
guzh lo ke reꞌ gake yët.
4 Per nzhab Jesús:
―Seꞌ nzobniꞌ lo Yech cheꞌn Dios:
“Gat lëꞌt nab kun yët gak ban men,
sino kun nab tsa rë widiꞌzh kwaꞌn niroꞌ roꞌ Dios.”
5 Orzeꞌ ngwanu Mizhab Jesús yek tu yiꞌ ro,
no tu rratsa miluꞌ Mizhab rë lazh men plo nzhin men yizhyuo,
6 orzeꞌ nzhab Mizhab lo Jesús:
―Na ne rë nak kureꞌ kaꞌl,
par leꞌl mandade,
mbaino rë kwaꞌn tsak cheꞌne,
porke na nileꞌ mandade,
no na zai kaꞌ cho nzhaklan.
7 Chi lëꞌl ne nazhon da,
mbaino zuxibal lon,
cheꞌnal rëi.
8 Orzeꞌ nzhab Jesús:
―¡Chi lon Mizhab!,
porke seꞌ nzobniꞌ lo Yech cheꞌn Dios:
“Nabtsa lo Dios Me nileꞌ mandadal,
zuxibal lo,
mbaino gabal nazhon.”
9 Orzeꞌ mbiyꞌ Mizhab Jesús haxta yek laka yadoꞌ Jerusalén,
no nzhab Mizhab:
―Chi lëꞌl walika nak Xgaꞌn Dios,
dizde reꞌ wats haxta lo yuo,
10 porke seꞌ nzobniꞌ lo Yech cheꞌn Dios:
Dios xëꞌl rë ganj cheꞌn Dios par gaknul mbaino kinal;
11 mbaino zen rë ganj yaꞌl par nakë ke niꞌl,
nes par nayachinal.
12 Orzeꞌ nzhab Jesús:
―Nuska nzob lo Yech cheꞌn Dios:
“Nagaktaꞌ leꞌl mandad lo Dios,
jwers leꞌ Dios tu kwaꞌn or nzhaklal.”
13 No or une Mizhab,
nangakt ngakide xaꞌ Jesús,
orzeꞌ nguiubchi Mizhab cheꞌp lo Jesús,
haxta or leꞌ xaꞌi xtu wëlt,
orzeꞌ zubi xaꞌ.
Nguzublo nikë Jesús zhiꞌn nazhon cheꞌn Dios
14 Orzeꞌ miëk Jesús lazh men Galilea,
dox kileꞌ Sprit cheꞌn Dios kwaꞌn nazhon kun Jesús,
no rë yezh kwaꞌn nzhin nakaꞌn zeꞌ,
nzhon men kwaꞌn nileꞌ Jesús.
15 No ñaluꞌ Jesús widiꞌzh cheꞌn Dios lo rë men plo nzob rë yoꞌ plo nitseꞌd men widiꞌzh cheꞌn Dios,
kwaꞌn nzob kad yezh zeꞌ,
mbaino dox wen ñët Jesús xid rë men.
Jesús nzo yezh Nazaret
16 Orzeꞌ ngwa Jesús yezh Nazaret plo mixen Me.
No zhë kwaꞌn nayiꞌ kë men Israel zhiꞌn,
nguio Jesús leꞌn yoꞌ plo nitseꞌd men widiꞌzh cheꞌn Dios,
nela xmod nileꞌ ka Jesús,
nguzuli Me par goꞌl Me widiꞌzh cheꞌn Dios.
17 Orzeꞌ mizaꞌ men yech goꞌl Me,
yech kwaꞌn mikëꞌ profet Isaías,
tu xaꞌ kwaꞌn midiꞌzh por Dios;
no or mixaꞌl Me loi,
mbiꞌl Me plo nzobniꞌ widiꞌzh reꞌ:
18 Lëꞌ Sprit cheꞌn Dios kiyaknu da,
porke ngule Dios da par dizha widiꞌzh wen lo rë men prob;
no mixëꞌl Dios da par rë xaꞌ nayaoꞌ yoꞌ,
par kon bixaꞌ lizhyiꞌb;
no rë xaꞌ kwaꞌn nikal lo,
lëꞌ da le wiꞌ bixaꞌ,
mbaino kotina rë xaꞌ nzho yaꞌ Mizhab;
19 mbaino par dizha lo rë nak men:
“¡Mizhin la zhë koꞌ Dios men lo rë kwaꞌn nazheꞌb kwaꞌn nzadkë tich men!”
20 Orzeꞌ mitsaoꞌ Jesús lo yech,
no mizaꞌ ska Mei kaꞌ xaꞌ niguchaoꞌwe,
orzeꞌ nguzob Me.
No rë xaꞌ nzhin zeꞌ,
xe niwiꞌ bixaꞌ lo Me,
21 orzeꞌ nzhab Jesús lo rë men nzhin zeꞌ:
―Mis nal reꞌ mizhin ngok rë widiꞌzh kwaꞌn nzobniꞌ,
kwaꞌn milox mbin go reꞌ.
22 Orzeꞌ rë men midiꞌzh wen por Jesús,
no xe miaꞌn bixaꞌ tuli por rë kwaꞌn wen midiꞌzh Jesús,
orzeꞌ nzhab bixaꞌ lo wech bixaꞌ:
―Gat xaꞌ reꞌ nak xgaꞌn Che.
23 Orzeꞌ nzhab Jesús:
―Sigur ka,
lëꞌ go ne widiꞌzh reꞌ lon:
“Doctor,
biliwen mis lu”;
no nu ne go:
“Kwaꞌn mileꞌl Capernaúm yezh yeꞌn baꞌ,
seꞌska bileꞌi lazhal reꞌ.”
24 Per nzhab Jesús:
―Walika da kwaꞌn nin reꞌ,
rë xaꞌ kwaꞌn nidiꞌzh por Dios,
mis rë xaꞌ lazh xaꞌ nayilat kwaꞌn diꞌzh xaꞌ.
25 Mbaino walika,
nayax unaꞌ kwaꞌn ngut xmiyiꞌ,
nguio lazh men Israel zhë cheꞌn Li,
or nangalat yiu chon liꞌn garol,
no dub rë zeꞌ nguio yalwin,
26 per nangaxëꞌlt Dios Li lo ni tu rë unaꞌ men Israel zeꞌ,
sino ke nab tsa lo tu unaꞌ gat lëꞌt men Israel mixëꞌl Dios Li,
tu unaꞌ ngut xmiyiꞌ xaꞌ nzë yezh Sarepta,
plo nileꞌ lazh men Sidón mandad.
27 No zhë cheꞌn profet Eliseo,
tu xaꞌ midiꞌzh por Dios,
nguio dox men Israel xaꞌ nzhakne di yalyizh kwaꞌn lë lepra,
no per ni tu rë xaꞌ reꞌ ngaliwent Eliseo;
sino ke nab tsa Naamán miliwen Eliseo,
tu men gat lëꞌt men Israel,
tu xaꞌ nzë lazh men Siria.
28 Or mbin rë men kureꞌ,
rë xaꞌ kwaꞌn nzhin plo nitseꞌd men widiꞌzh cheꞌn Dios,
dox miyiꞌxian bixaꞌ,
29 orzeꞌ rë bixaꞌ ngwatso par nguloꞌ bixaꞌ Jesús haxta roꞌ yezh yek lom plo nzhin yezh reꞌ,
par zeꞌ,
ngacheꞌp bixaꞌ Jesús leꞌn barrank.
30 Per nded Jesús xid bixaꞌ,
ña Jesús.
Tu miyiꞌ kwaꞌn nzho mbi mal laxtoꞌ
31 Orzeꞌ ña Jesús yezh Capernaúm,
plo nileꞌ lazh men Galilea mandad.
Zeꞌ kiluꞌ Jesús widiꞌzh cheꞌn Dios lo rë men,
rë zhë kwaꞌn nayiꞌ kë men Israel zhiꞌn.
San Lucas 4:31-44
32 No xe ñaꞌn rë men tuli,
por xmod niluꞌ Jesús widiꞌzh cheꞌn Dios,
porke niluꞌ Me,
lëꞌ Me kinu poder cheꞌn Dios par leꞌ Me mandad.
33 No leꞌn yoꞌ zeꞌ plo nitseꞌd men widiꞌzh cheꞌn Dios,
nzo tu miyiꞌ kwaꞌn nzho mbi mal laxtoꞌ;
naye nguruzhië xaꞌ,
nzhab xaꞌ:
34 ―¡Bilaꞌ no!
¿Chon nzël lo no Jesús,
xaꞌ nzë yezh Nazaret?
¿Chi nzël par loꞌxal no?
¡Lëꞌda nilibeꞌkal,
lu nak Me Nazhon cheꞌn Dios!
35 Orzeꞌse ngalatraꞌ Jesús ngadiꞌzh mbi mal zeꞌ,
nzhab Jesús:
―¡Nadiꞌzhtraꞌl;
biliyaꞌ miyiꞌ reꞌ!
Orzeꞌ milichin mbi mal zeꞌ miyiꞌ reꞌ lo rë nak men,
mbaino nguroꞌi;
yent kwan ngaliꞌnoi miyiꞌ reꞌ.
36 Orzeꞌ rë nak xaꞌ nzhin zeꞌ,
xe miaꞌn bixaꞌ tuli pur kureꞌ,
no kidiꞌzh bixaꞌ,
tu xaꞌ kun xtu xaꞌ:
―¿Xmod nak rë widiꞌzh reꞌ?
¡Porke kinu xaꞌ poder par nileꞌ xaꞌ mandad lo rë mbi mal,
mbaino niliyaꞌi men!
37 No rë yezh kwaꞌn nzhin nakaꞌn zeꞌ,
ñët kwaꞌn nileꞌ Jesús.
Miliwen Jesús xnaꞌzhaꞌp Simón
38 No or nguroꞌ Jesús leꞌn yoꞌ plo nitseꞌd men widiꞌzh cheꞌn Dios,
no ña Jesús lizh Simón,
lëꞌ xnaꞌzhaꞌp Simón nzhakne,
dox nzho xlëꞌ xaꞌ;
no minaꞌb bixaꞌ lo Jesús par liwen Me xaꞌ reꞌ,
39 orzeꞌ nguzobdaꞌ Jesús plo nax me unaꞌ reꞌ,
mbaino mileꞌ Jesús mandad nguroꞌ xlëꞌ,
mbaino lwegaꞌ ngwaxche xaꞌ unaꞌ reꞌ par mizaꞌ xaꞌ kwaꞌn gao rë xaꞌ reꞌ.
Miliwen Jesús nayax men nzhakne
40 Lëꞌ ngubizh ngwaꞌz,
lëꞌ rë men nzhanu rë xaꞌ nzhakne,
nizak rë lo yalyizh,
orzeꞌ migal Jesús tu gaꞌ bixaꞌ,
no rë bixaꞌ miak.
41 No nu nayax men nzhakne nguroꞌ mbi mal laxtoꞌ,
naye nguruzhië rë mbi zeꞌ lo Jesús:
―¡Lu Xgaꞌn Dios!
Per Jesús midiꞌzh nayiꞌ lo rë mbi zeꞌ par nakuzhiëtraꞌi,
porke lëꞌ rë mbi zeꞌ nzhakbeꞌ,
lëꞌ Jesús nak Krist.
Kidiꞌzh Jesús widiꞌzh cheꞌn Dios lazh men Galilea
42 Or ngwanilyuo,
nguroꞌ Jesús yezh zeꞌ par nzha Me plo yent cho nak,
per rë men kikwaꞌn Me,
no or ngwazhël bixaꞌ Me,
gat nzhaklatraꞌ bixaꞌ bi Me xtu plo,
43 per nzhab Jesús:
―Per más rë yezh plo nzhin men,
nakiꞌn yalun widiꞌzh cheꞌn Dios,
kwaꞌn leꞌ zak laxtoꞌ men par gon bixaꞌ xmod yo bixaꞌ plo nileꞌ Dios mandad,
porke par kureꞌ mixëꞌl Dios da yizhyuo reꞌ.
44 No seꞌ nikizë Jesús,
ñaluꞌ Jesús widiꞌzh cheꞌn Dios leꞌn rë yoꞌ kwaꞌn nzob lazh men Judea,
plo nitseꞌd men widiꞌzh cheꞌn Dios.