Jesús miliyak tu men nizak yalyizh kwaꞌn lë lepra
8
No or ñala Jesús yek lom zeꞌ,
nayax dox men nzadkë tich Me,
2 lëꞌchi nguzubi tu miyiꞌ lo Jesús,
tuli ngoꞌt kuslo xaꞌ lo Me;
no miyiꞌ reꞌ nizak tu yalyizh kwaꞌn lë lepra,
orzeꞌ nzhab xaꞌ lo Jesús:
―Lëꞌ go,
chi lëꞌo nzhaklai,
gak liyak go da.
3 Orzeꞌ mitsigaꞌ Jesús yaꞌ,
no migal Me yek miyiꞌ reꞌ,
nzhab Me:
―Nzhaklan niwenal.
―Wiꞌle,
nadiꞌzhtle lo men,
maska wa lo ngulëiꞌ par rël xaꞌ lu,
no bizaꞌ gon nela xa nzobniꞌ lo ley cheꞌn Muisés par ne xaꞌ,
lëꞌl uniwen la.
Jesús miliyak mos cheꞌn tu xaꞌ nzë Roma
5 No or nguio Jesús yezh Capernaúm,
nguzubi tu capitán xaꞌ nzë Roma lo Me,
dox nalats mileꞌ xaꞌ,
ngunaꞌb xaꞌ lo Jesús,
6 nzhab xaꞌ:
―Lëꞌ go,
kinun tu mos da,
nax nzhakne,
nagakt win xaꞌ,
no dox yalne kinu xaꞌ.
7 Orzeꞌ nzhab Jesús:
―Lëꞌda yal,
liyaka xaꞌ.
8 Orzeꞌ nzhab capitán zeꞌ:
―Lëꞌ go,
gat ñalt da yiꞌd go lizha;
namás bileꞌ go mandad por xtiꞌzh go,
lëꞌ mos da niwen,
9 porke kinun más rë xaꞌ nileꞌ mandad lon,
no nu ska da kinu rë sondad xaꞌ nileꞌ kwaꞌn nzhapa;
chi gapa lo tu xaꞌ:
“Wa”,
lëꞌ xaꞌ ya;
no chi gapa lo xtu xaꞌ:
“Dëꞌ”,
no lëꞌ xaꞌ yëꞌd;
no or gapa lo tu mos da:
“Bileꞌ kureꞌ”,
no lëꞌ xaꞌ leꞌi.
10 Or mbin Jesús kureꞌ,
xe miwiꞌ Me,
orzeꞌ nzhab Me lo rë xaꞌ nzhakë tich Me:
―Walika kwaꞌn nin lo go;
per ni xid rë men Israel gat nen tu xaꞌ ñila xtiꞌzha nela miyiꞌ reꞌ,
11 no nin lo go,
nayax men yiꞌd nez plo nilen ngubizh,
no nez plo ñaꞌz ngubizh,
par gao bixaꞌ lo mes kun Abraham no kun Isaac,
mbaino kun Jakob plo nileꞌ Dios mandad,
12 per rë men Israel xaꞌ gat nzhont widiꞌzh cheꞌn Dios,
lëꞌ Dios xëꞌl bixaꞌ plo nakao no plo goꞌn bixaꞌ lo yalne,
haxta kwezh lëi bixaꞌ.
13 Orzeꞌ nzhab Jesús lo capitán zeꞌ:
―Bizë lizhal;
saꞌ gake nela xmod ngwayilal da.
No mis orzeꞌ,
tuli miak mos cheꞌn capitán zeꞌ.
Miliyak Jesús xnaꞌzhaꞌp Per
14 No or mizhin Jesús lizh Per,
une Me,
lëꞌ xnaꞌzhaꞌp Per nax lo loꞌn,
nizak xlëꞌ,
15 no migal tsa Jesús yaꞌ xaꞌ unaꞌ reꞌ,
tuli nguroꞌ xlëꞌ xaꞌ,
no ngwaxche xaꞌ,
orzeꞌ mizaꞌ unaꞌ reꞌ kwaꞌn ndao Jesús.
Miliyak Jesús nayax men nzhakne
16 No or nzhazhëlalyuo,
nzhanu men nayax xaꞌ nzho mbi mal laxtoꞌ,
lo Jesús;
no kun widiꞌzh cheꞌn Jesús namás,
mileꞌ Me mandad nguroꞌ rë mbi mal laxtoꞌ rë men zeꞌ;
no nu miliyak Jesús rë nak rë xaꞌ nzhakne nzhin zeꞌ.
17 Rë kureꞌ ngok par mizhin rë kwaꞌn midiꞌzh Isaías,
tu xaꞌ midiꞌzh por Dios nzhala,
or nzhab xaꞌ:
“Lëꞌ xaꞌ reꞌ mbiꞌy yalyizh cheꞌn be,
no ñanu xaꞌ yalne cheꞌn be.”
Kwan nakiꞌn leꞌ men par yakë men tich Jesús
18 No or une Jesús,
nayax men nzhin nakaꞌn plo nzo Me,
orzeꞌ mileꞌ Me mandad,
ded Me kun rë men cheꞌn Me xtu roꞌ lagún,
19 no zeꞌ nguzubi tu maestr lo Jesús,
tu xaꞌ niluꞌ ley kwaꞌn milaꞌ Dios lo Muisés,
no nzhab xaꞌ:
―Maestr,
nzhaklan yiꞌd këꞌn tich go rë plo ya go.
20 Orzeꞌ nzhab Jesús:
―Rë mbëëz kinu lizh,
no rë miyin kinu yo cheꞌn,
per Xgaꞌn Dios Me nu nak tu men yizhyuo,
gat kinut ni plo gaꞌ.
21 Orzeꞌ nzhab xtu men cheꞌn Jesús:
―Gulëz go,
galo laka nzhakacha xuza,
orzeꞌ yiꞌdkëꞌn tich go.
22 Per nzhab Jesús:
―Tuli diꞌkë ticha,
bilaꞌ kaꞌch rë men,
xaꞌ nak nela men ngut baꞌ,
tsaꞌ men ngut bixaꞌ.
Mikwëꞌz Jesús tu yiubi nazheꞌb leꞌn nits
23 No or nkë Jesús leꞌn tu bark,
rë men cheꞌn Me nzha kun lëꞌ Me.
24 No or nzha la bixaꞌ garol saoꞌ nits,
lëꞌchi nguroꞌ tu yiubi nazheꞌb leꞌn nits,
no kun rë bol cheꞌn nits,
nilaꞌ yitlo bark leꞌne,
per lëꞌ Jesús naxnaa,
25 orzeꞌ ngwalixche men cheꞌn Me Me,
nzhab bixaꞌ:
―¡Lëꞌo,
nalaꞌt go yaꞌzyuoꞌ no leꞌn nits!
26 Orzeꞌ nzhab Jesús:
―¿Chon dox nizheb go?
Kubaꞌ nak por gat ñila go Dios beꞌs.
Or midiꞌzh Me kureꞌ,
ngwatsuli Me no mileꞌ Me mandad par kwëz yiubi no nits,
orzeꞌ rëi miaꞌn xe,
27 orzeꞌ xe miaꞌn rë men cheꞌn Me,
no nzhab bixaꞌ lo wech bixaꞌ:
―¿Plo nzë xaꞌ reꞌ se?
¡Haxta yiubi no nits nzhon roꞌ xaꞌ!
Chop men yezh Gadara xaꞌ dox nzho mbi mal laxtoꞌ
28 No or mizhin Jesús xtu roꞌ lagún,
plo ñaꞌn lazh men Gadara,
zeꞌ mizhëꞌl Jesús chop xaꞌ nzho dox mbi mal laxtoꞌ;
nguroꞌ bixaꞌ leꞌn panteón,
no dox nayiꞌlazh bixaꞌ,
kuzeꞌ ni tu men gat nidedt zeꞌ,
29 lëꞌchi nguruzhië bixaꞌ,
nzhab bixaꞌ:
―¿Kwan nzhaklal linul no,
Jesús Xgaꞌn Dios?
¿Chi nzëꞌl par zakzil no dub naga gal zhë or gab Dios xmod gak kun no?
30 No gax laka zeꞌ nzhin tu bëd kuch kiyao;
31 nalats midiꞌzh rë mbi kwaꞌn nzho laxtoꞌ rop rë men reꞌ lo Jesús,
nzhabe:
―Chi lëꞌl kutin no laxtoꞌ rë xaꞌ reꞌ,
neka bilaꞌ bi no laxtoꞌ rë kuch baꞌ.
32 Orzeꞌ nzhab Jesús:
―¡Bizë go!
Or nguroꞌ rë mbi mal zeꞌ laxtoꞌ rop miyiꞌ zeꞌ,
par ñai leꞌn rë kuch zeꞌ,
lëꞌchi ñaoxoꞌn rë ma,
no ngula bima roꞌ tu bilëꞌ plo nak roꞌ nits,
zeꞌ ngwap bima,
33 no or une rë xaꞌ kikina rë kuch zeꞌ kureꞌ,
mikëꞌ bixaꞌ karre,
ña bixaꞌ;
no or mizhin bixaꞌ yezh plo nzho bixaꞌ,
midiꞌzh bixaꞌ rë nak kwaꞌn une bixaꞌ,
no xmod nguloꞌ Jesús rë mbi mal kwaꞌn nguio laxtoꞌ rop men zeꞌ,
34 lëꞌchi rë nak men yezh zeꞌ nguroꞌ bixaꞌ par nzhatsiꞌ bixaꞌ plo nzo Jesús;
no or mizhin bixaꞌ plo nzo Me,
orzeꞌ minaꞌb bixaꞌ roꞌ Jesús zeꞌ.