―Bizak laxtoꞌ xgaꞌn;

lëꞌ rë kwaꞌn nzëꞌb xkil mizheꞌ la lo Dios.

3 Lëꞌchi zeꞌ nzhin pla maestr,

xaꞌ niluꞌ ley cheꞌn Muisés,

orzeꞌ xlaꞌn nzhab bixaꞌ lo wech bixaꞌ:

―¡Nayiꞌ kwaꞌn midiꞌzh xaꞌ reꞌ par Dios!

4 Or une Jesús cho xigab kileꞌ rë xaꞌ reꞌ,

tuli nzhab Me lo bixaꞌ:

―¿Chon tatu gat lëꞌ kwaꞌn kileꞌ go xigab?

5 ¿Kwan más jwals gapa?:

“Lëꞌ rë kwaꞌn nzëꞌb xkil lo Dios mizheꞌ la”,

o gapa:

“Waxche,

no nguzë.”

6 No par ne go,

na Xgaꞌn Dios,

no nak da tu men yizhyuo,

mbaino kinun yalnazhon par cheꞌn rë kwaꞌn nzëꞌb xki men.

Orzeꞌ nzhab Me lo xaꞌ nagakt win reꞌ:

―Waxche,

gulits kwaꞌn naxal lo,

no bizë lizhal.

7 Tuli ngwaxche xaꞌ nagakt win zeꞌ,

mbaino ña xaꞌ lizh xaꞌ,

8 no rë xaꞌ nzhin zeꞌ,

or une bixaꞌ kwaꞌn mileꞌ Jesús,

mizheb bixaꞌ tuli,

orzeꞌ nguzublo kidiꞌzh bixaꞌ,

dox nazhon Dios mbaino nizaꞌ Dios yalnazhon nkaꞌ rë men par leꞌ bixaꞌ kwaꞌn nazhon.

9 No or nguroꞌ Jesús zeꞌ,

une Me tu miyiꞌ xaꞌ lë Mateo,

xaꞌ nikan dimi cheꞌn rey César,

nzob xaꞌ lo mes plo ñatix men dimi cheꞌn rey;

orzeꞌ nzhab Jesús lo xaꞌ:

―Dikë ticha.

Tuli ngwatsuli Mateo,

nzhakë xaꞌ tich Jesús.

10 No or nzob Jesús lo mes lizh Mateo,

no kiyao bixaꞌ,

lëꞌchi zeꞌ mizhin nayax xaꞌ nikan dimi cheꞌn rey César,

kun más rë xaꞌ gat nileꞌt kwaꞌn nzobniꞌ lo ley cheꞌn Muisés;

rë bixaꞌ nzob lo mes kun Jesús,

mbaino kun rë men cheꞌn Me.

11 Or une rë men fariseo kureꞌ,

orzeꞌ nzhab bixaꞌ lo rë men cheꞌn Jesús:

―¿Chon tutsa nzhao maestr cheꞌn go kun rë xaꞌ nikan dimi cheꞌn rey César,

no kun rë men nzëꞌb xki lo Dios?

12 Or mbin Jesús kureꞌ,

nzhab Me:

―Rë men gat nzhaknet,

gat nakiꞌnt xaꞌ doctor,

nab tsa rë xaꞌ nzhakne nakiꞌn doctor.

13 Kuzeꞌ bileꞌ paꞌ go por tseꞌd go kwaꞌn nzhab widiꞌzh cheꞌn Dios reꞌ:

“Na nzhakla,

lats laxtoꞌ go xtu men,

ke par neꞌ go gon lon”,

porke gat nzhalta par kwezha rë xaꞌ nileꞌ kwaꞌn nzhakla Dios;

na nzhal par kwezha rë men nzëꞌb xki lo Dios,

par laꞌ bixaꞌ rë kwaꞌn gat lëꞌ nak bixaꞌ.

14 Orzeꞌ lo Jesús nguzubi pla rë men cheꞌn Juan xaꞌ niliꞌlëiꞌ men leꞌn nits,

par nzhab bixaꞌ:

―Lëꞌ no,

mbaino rë men fariseo,

dox nizo no xlats no or ninaꞌb no lo Dios;

per rë men cheꞌn go,

gat nizot bixaꞌ xlats bixaꞌ par naꞌb bixaꞌ lo Dios.

15 Orzeꞌ nzhab Jesús:

―¿Chi zak zo men xlats men,

naꞌb men lo Dios,

dub nzo xaꞌ gak jwandang cheꞌn zeꞌ?

Per or zhin zhë yubchi miyiꞌ zeꞌ,

orzeꞌse lëꞌ bixaꞌ zo xlats,

naꞌb bixaꞌ lo Dios.

16 No yent cho choꞌ tlëꞌ vestid kub par këꞌ xaꞌ rëmiënd tu vestid goꞌx;

porke nazhëlt lar kub kun lar goꞌx,

porke xekt lar goꞌx,

lëꞌi rëz;

17 no ni nako men vin kub leꞌn tu kwaꞌn goꞌx;

porke lëꞌ vin kub chëz kwaꞌn goꞌx zeꞌ,

orzeꞌ rope nazuꞌtraꞌ.

Kuzeꞌ nakiꞌn yo vin kub leꞌn tu kwaꞌn kubska,

nes par rope zuꞌ.

18 Dub kidiꞌzh Jesús kureꞌ,

lëꞌchi mizhin tu miyiꞌ xaꞌ nileꞌ mandad xid rë men Israel,

tuli ngoꞌt kuslo xaꞌ lo Jesús,

nzhab xaꞌ:

―Lëꞌ xchaꞌpa nzëꞌb ngut,

per chi lëꞌ go yiꞌd mbaino xoꞌb go yaꞌ go yek neꞌ,

lëꞌ neꞌ ruban.

19 Orzeꞌ ngwatsuli Jesús,

ñakë Me tich xaꞌ zeꞌ kun rë men cheꞌn Me.

20 No xid rë men zeꞌ nzha tu unaꞌ,

xaꞌ nzhala tu dusen liꞌn nzhakne,

nizak xaꞌ kwaꞌn,

orzeꞌ nguzubi xaꞌ al tich Jesús par migal xaꞌ xiꞌ xab Me,

21 porke mileꞌ xaꞌ xigab:

“Sol gala xiꞌ xab Jesús namás,

lëꞌda yak.”

22 Tuli miëk Jesús,

no or une Me unaꞌ zeꞌ,

nzhab Me:

―Xchaꞌp,

bizak laxtoꞌ;

nab tsa por ngwayilal da,

lëꞌl niwen la.

Orzeꞌ,

uniwen unaꞌ.

23 No or mizhin Jesús lizh xaꞌ nileꞌ mandad zeꞌ,

une Me kiyoꞌl la musk par yakaꞌch bixaꞌ mizhwin yeꞌn reꞌ,

mbaino dox nibizhyë men,

no kiyoꞌn bixaꞌ,

24 orzeꞌ nzhab Jesús:

―Bizë go lizh go,

porke gat lëꞌt ngut mizhwin yeꞌn reꞌ,

ka naxnaa mëꞌd.

Orzeꞌ mixizhnu rë men Jesús,

25 per or ña rë men zeꞌ,

nguio Jesús plo nax mëꞌd reꞌ,

nguzen Me yaꞌ mëꞌd,

orzeꞌ nguruban mëꞌd mbaino ngwaxche mëꞌd,

26 no nguxoꞌbdiꞌzh kureꞌ rë nak yezh kwaꞌn nzhin nakaꞌn zeꞌ.

27 No or nguroꞌ Jesús zeꞌ,

nzhakë chop men nikal lo tich Jesús,

nibizhyë bixaꞌ nzhab bixaꞌ:

―¡Bilats laxtoꞌ no,

xgaꞌn Dabi!

28 No or nguio Jesús leꞌn tu yoꞌ,

nguzubi rop xaꞌ reꞌ lo Jesús,

orzeꞌ nzhab Jesús lo bixaꞌ:

―¿Chi ñila go,

gak len yani lo go?

Orzeꞌ nzhab bixaꞌ:

―Lëꞌ no ñila ka,

lëꞌ go gak ka leꞌi.

29 Orzeꞌ migal Jesús zalo bixaꞌ,

mbaino nzhab Me:

―Saꞌ gak kun go nela xmod ñila go da.

30 Orzeꞌ ngwani zalo rop bixaꞌ,

no chop-chon nzhab Jesús lo bixaꞌ:

―Yent cho lo gab go kureꞌ.

31 Per mas nguroꞌ bixaꞌ zeꞌ,

tuli mixoꞌb diꞌzh bixaꞌi rë yezh kwaꞌn nzhin nakaꞌn zeꞌ,

kwaꞌn mileꞌ Jesús por lëꞌ bixaꞌ.

32 No kwanti gatsa di nguroꞌ rop xaꞌ miak zalo zeꞌ,

orzeꞌ mizhinnu pla men tu miyiꞌ nagakt diꞌzh lo Jesús,

por nzho mbi mal laxtoꞌ xaꞌ,

33 no or nguloꞌ Jesús mbi mal laxtoꞌ miyiꞌ zeꞌ,

tuli ka nguzublo kidiꞌzh xaꞌ,

no rë men nzhin zeꞌ,

xe miaꞌn bixaꞌ tuli,

no nzhab bixaꞌ:

―¡Laltaꞌ gat ne men tu kwaꞌn seꞌtaꞌ lazh men Israel!

34 Per nzhab men fariseo:

―Lëꞌ Mizhab kwaꞌn nileꞌ mandad lo rë mbi mal,

mizaꞌ yalnazhon nkaꞌ miyiꞌ baꞌ,

kuzeꞌ nzhak nigoꞌ xaꞌ mbi mal laxtoꞌ men.

35 No seꞌgaꞌ nikizë Jesús rë yezh no rë rranch,

kiluꞌ Me xmod nak widiꞌzh nazhon cheꞌn Dios par yo men plo nileꞌ Dios mandad,

kiluꞌ Mei leꞌn rë yoꞌ plo nitseꞌd men Israel widiꞌzh cheꞌn Dios,

mbaino kiliyak Me rë lo yalyizh no yalne kwaꞌn nizak men.

36 Or une Jesús rë men zeꞌ,

dox milats laxtoꞌ Me bixaꞌ,

porke yentraꞌ cho gaknu bixaꞌ,

ngwazha bixaꞌ naban bixaꞌ,

nak bixaꞌ nela rë mbëkxiꞌl kwaꞌn niyent cho nikina gaꞌ,

37 orzeꞌ nzhab Me lo rë men cheꞌn Me:

―Walika,

nzho nayax dox men yizhyuo,

xaꞌ nagat gon xtiꞌzha,

per cheꞌptsa men kinun,

xaꞌ niluꞌ widiꞌzh cheꞌn Dios lo rë men,

xaꞌ nak nela tu yalgoꞌn kwaꞌn une la yats,

no cheꞌptsa mos nzhin par litse.

38 Kuzeꞌ,

nakiꞌn naꞌb go lo Xuza,

Me nak cheꞌn rë yalgoꞌn reꞌ,

par xëꞌl Me más mos par kane.