Mixëꞌl Jesús tu dusen men xaꞌ leꞌ zhiꞌn cheꞌn Me
10
No or ngurezh Jesús za tu dusen xaꞌ mixëꞌl Me par leꞌ rë zhiꞌn nazhon cheꞌn Me,
orzeꞌ mizaꞌ Me yalnazhon nkaꞌ bixaꞌ par koꞌ bixaꞌ mbi mal laxtoꞌ men,
no liyak bixaꞌ men nizak wanei cho yalyizh,
no cho yalne.
2 Seꞌ lë rë za tu dusen apost:
xaꞌ galo laka lë Simón Per,
kun wech xaꞌ xaꞌ lë Ndres;
no Jakob kun wech xaꞌ Juan;
xuz rop xaꞌ reꞌ lë Zebedeo;
3 mbaino Lip kun Bartolomé,
no Max,
kun Mateo xaꞌ mikan dimi cheꞌn rey César;
mbaino Jakob xgaꞌn Alfeo,
no tu xaꞌ lë Lebeo xaꞌ nzhab ska men lë Tadeo;
4 mbaino Simón xaꞌ nzë xid men Kananist,
no Judas Iscariote,
xaꞌ michi Jesús lo rë men par ngut Me.
Jesús mixëꞌl za tu dusen men cheꞌn par miluꞌ bixaꞌ xmod gak men, men cheꞌn Dios
5 Or mixëꞌl Jesús za tu dusen men cheꞌn Me par yaluꞌ bixaꞌ xmod gak men,
men cheꞌn Dios,
kureꞌ mileꞌ Jesús mandad lo bixaꞌ,
nzhab Me:
―Nayat go rë yezh plo nzho rë xaꞌ gat lëꞌt men Israel,
no ni naya go lazh men Samaria.
6 Nabtsa wa go rë yezh plo nzho men Israel,
rë xaꞌ nak nela rë mbëkxiꞌl nguziwan dan gaꞌ,
7 par gab go lo bixaꞌ:
“Bilaꞌ go rë kwaꞌn gat lëꞌ nak go lo Dios;
lëꞌ zhë mizhin la gak go men cheꞌn Dios.”
8 No biliyak go rë men nzhakne,
mbaino bileꞌ go ruban rë men ngut,
no biliyak go rë men nizak yalyizh lepra,
mbaino gulutin go mbi mal laxtoꞌ rë men.
Ka minen yalnazhon reꞌ kaꞌ go;
seꞌska bileꞌ go,
ka bileꞌ go rë kwaꞌn nazhon kun rë men rë plo ya go.
9 Naweiꞌt go dimi or,
no ni dimi plat,
mbaino ni dimi kwaꞌn kobr;
10 Yent kwan weiꞌ go nez,
no ni naweiꞌ go chop nez xab go,
no ni xtu nez yalyid cheꞌn go naweiꞌt go,
mbaino ni tu bar weiꞌt go,
porke xaꞌ nikë zhiꞌn,
ñal zaꞌ men kwaꞌn gao xaꞌ.
11 ’No wanei plo zhin go,
zeꞌ gunabdiꞌzh go plo nzho tu men wen laxtoꞌ;
lizh xaꞌ zeꞌ biyaꞌn go haxta or ya go xtu plo.
12 No or zhin go lizh xaꞌ reꞌ,
guzh go,
lëꞌ Dios leꞌ ya rë bixaꞌ wen,
xaꞌ nzho zeꞌ.
13 No chi niwiꞌ go,
ñal ka bixaꞌ rë widiꞌzh kwaꞌn nzhab go par lëꞌ bixaꞌ,
orzeꞌ lëꞌ widiꞌzh zeꞌ yaꞌn par lëꞌ bixaꞌ.
Per chi gat ñal bixaꞌ widiꞌzh nazhon reꞌ,
orzeꞌ lëꞌi yëk ska lo go.
14 No chi nzho bixaꞌ gat nzhaklat ya go lizh bixaꞌ,
o ni gat nzhakla bixaꞌ gon bixaꞌ widiꞌzh kwaꞌn luꞌ go lo bixaꞌ;
or ya go xtu plo,
guzhib go niꞌ go par gab rë zhen yuo zeꞌ.
Kureꞌ gak nela tu señ gaꞌ,
lëꞌ bixaꞌ nzëꞌb xki lo Dios.
15 Walika kwaꞌn nin,
zhë gab Dios xmod gak kun rë men yizhyuo,
más zakzi bixaꞌ lo rë men yezh Sodoma no lo rë men yezh Gomorra.
Rë men yiꞌ ne men cheꞌn Jesús
16 ’¡Biwiꞌ go!
Lëꞌda xël go nela mbëkxiꞌl gaꞌ,
xid rë men xaꞌ nak nela ma nazheꞌb gaꞌ;
kuzeꞌ gok go natsin nela mbëꞌl gaꞌ,
per gok go nadoꞌ nela palom gaꞌ.
17 No bikina go go lo rë men,
porke lëꞌ rë men chi go lo gustis,
mbaino lëꞌ bixaꞌ kin go leꞌn rë yoꞌ plo nitseꞌd men widiꞌzh cheꞌn Dios,
18 no haxta weiꞌ bixaꞌ go lo rë xaꞌ nak gobiernador,
mbaino lo rë rey,
por nak go men da;
nes par nu rë xaꞌ baꞌ gon xtiꞌzha,
no haxta rë men xaꞌ gat lëꞌt men Israel gon xtiꞌzha.
19 Per or chi bixaꞌ go lo rë xaꞌ nileꞌ mandad,
naleꞌt go xigab xmod diꞌzh go,
o kwan kab go lo bixaꞌ,
porke or diꞌzh go,
Dios ka neꞌ xigab kaꞌ go par gak diꞌzh go lo bixaꞌ lëꞌtsa kwaꞌn ñal,
20 porke gat lëꞌt go diꞌzh lo bixaꞌ;
lëꞌ Sprit cheꞌn Dios Xuz go,
diꞌzh por go.
21 ’Rë men da mis wech xaꞌ,
chi xaꞌ par gat xaꞌ;
no mis xuz xaꞌ chi xin xaꞌ,
mbaino mis xin xaꞌ chi xuz xaꞌ no xnaꞌ xaꞌ,
par gat bixaꞌ.
22 ’No rë men yizhyuo yiꞌ ne go por nak go men da.
Per xaꞌ naroꞌt nez da dubtaꞌ nak xaꞌ men da,
xaꞌ reꞌ gap yalnaban dubtaꞌ kun Dios.
23 Chi tu rë men yezh ruꞌkë tich go,
bizë go xtu yezh;
walika kwaꞌn nin,
ni naga lox go kizë go rë yezh cheꞌn men Israel,
lëꞌ Xgaꞌn Dios,
Me nak tu men yizhyuo,
yubre la xtu wëlt.
24 ’Yent cho tu men más tsak lo xaꞌ nitseꞌd xaꞌ,
mbaino seꞌska,
yent cho tu mos nado más tsak xaꞌ lo xaꞌ nileꞌ mandad xaꞌ.
25 Kuzeꞌ,
nab tsa nakiꞌn gak xaꞌ nitseꞌd nela nak maestr cheꞌn xaꞌ gaꞌ,
no rë mos nado lo xtu men,
nab tsa ñal gak xaꞌ nela men xaꞌ nileꞌ mandad lo xaꞌ.
No chi nidiꞌzh men na Mizhab,
xaꞌ lë Beelzebú,
orzeꞌ seꞌska diꞌzh men go.
Cho lo ñal zheb rë men
26 ’Kuzeꞌ nazhebt go diꞌzh go rë kwaꞌn mbin go nin,
porke yent tu kwaꞌn nagaꞌch midizha lo go nagon men;
mbaino yent tu kwaꞌn xlaꞌn milun lo go naded nagon men.
27 Rë kwaꞌn midizha lo go or yëꞌl,
zhë bidiꞌzh goi lo men;
mbaino rë kwaꞌn midiꞌzha xlaꞌn lo go,
guruzhië goi naye dizde yek yoꞌ lo rë men.
28 Nazhebt go lo xaꞌ nzhut men,
porke nab tsa kwerp nzhut bixaꞌ,
per alm cheꞌn go nagakt gal xaꞌ.
Más wen nab tsa lo Dios bizheb go,
porke Dios gak gut go,
mbaino gak xëꞌl Dios go leꞌn gabil par dubtaꞌ.
29 ’Lëꞌ go nane ka,
dox cheꞌp tsak rë miyin yeꞌn or nido bineꞌ,
per Dios nazhiꞌ bima;
no ni tu bima gat nzhat chi gat lëꞌ por Dios Xuz goi.
30 Per go,
más nazhiꞌ Dios go,
haxta rë yich yek go,
nane Dios pla.
31 Kuzeꞌ nazhebt go,
porke más tsak go lo rë miyin.
Xaꞌ diꞌzh, nak xaꞌ tu men cheꞌn Jesukrist lo rë men
32 ’Kuzeꞌ,
wanei cho tu xaꞌ diꞌzh lo rë men,
lëꞌ xaꞌ nak tu men da,
nu ska da gap lo Xuza Me nzho lo yibëꞌ,
xaꞌ reꞌ nak tu men da;
33 per xaꞌ gab lo rë men,
gat nilibeꞌt xaꞌ da,
seꞌska gapa lo Xuza,
Me nzho lo yibëꞌ,
gat nilibeꞌtska xaꞌ baꞌ.
Jesús nileꞌ, nilëꞌ men
34 ’Nagabt go nzhala par len kwin men wen yizhyuo reꞌ;
na nzhal par len lëꞌ men,
tu xaꞌ kun xtu xaꞌ:
35 Na nzhal par lëꞌ miyiꞌ kun xuz miyiꞌ,
no unaꞌ lëꞌ kun xnaꞌ unaꞌ,
mbaino xix unaꞌ lëꞌ kun xnaꞌyeꞌ.
36 Kuzeꞌ mis kun rë xaꞌ lizh men,
gak xaꞌ yiꞌ ne men.
37 ’Men xaꞌ más leꞌ por xuz o por xnaꞌ ke por da,
nazuꞌt xaꞌ zeꞌ par gak xaꞌ men da;
mbaino xaꞌ más leꞌ por xgaꞌn o por xchaꞌp ke por da,
nazuꞌt ska xaꞌ gak xaꞌ men da.
38 No xaꞌ tula por nak xaꞌ men da,
no naziyël xaꞌ zakzi xaꞌ,
mbaino ni gat xaꞌ,
nazuꞌt ska xaꞌ reꞌ gak xaꞌ tu men da.
39 Mbaino xaꞌ nileꞌ más por kwaꞌn yizhyuo reꞌ,
nagakt ban xaꞌ reꞌ kun Dios;
per xaꞌ más nileꞌ por kwaꞌn nak cheꞌn Dios ke por kwaꞌn yizhyuo reꞌ,
xaꞌ reꞌ ban kun Dios par dubtaꞌ.
Kwan nzhal tu men or nileꞌ xaꞌ tu kwaꞌn wen
(Mr. 9:41)
40 ’Rë men,
xaꞌ niwiꞌ wen lo go por nak go men da,
lon niwiꞌ xaꞌ wen;
no xaꞌ niwiꞌ wen lon,
nu ska lo Xuza niwiꞌ xaꞌ wen,
Me mixëꞌl da lo yizhyuo reꞌ.
41 No tu men,
xaꞌ zaꞌ lizh,
yaꞌn tu xaꞌ nidiꞌzh por Dios,
Dios zaꞌ kwaꞌn kaꞌ xaꞌ nak lizh zeꞌ,
nela kwaꞌn nikaꞌ xaꞌ nidiꞌzh widiꞌzh cheꞌn Dios.
Mbaino seꞌska men,
xaꞌ nizaꞌ lizh,
par yaꞌn tu men xaꞌ nileꞌ kwaꞌn nzhakla Dios,
seꞌska kwaꞌn gal xaꞌ nak lizh zeꞌ,
nela kwaꞌn nikaꞌ men xaꞌ nileꞌ kwaꞌn nzhakla Dios.
42 No wanei cho tu xaꞌ zaꞌ cheꞌp nits nayag go tu men yeꞌn,
xaꞌ nak tu men da;
walika kwaꞌn nin,
por nits kwaꞌn mizaꞌ xaꞌ,
lëꞌ xaꞌ gal tu kwaꞌn nazhon.