Miliyak Jesús tu men mibizh yaꞌ
3
No xtu wëlt nguio Jesús leꞌn yoꞌ plo nitseꞌd men widiꞌzh cheꞌn Dios;
no zeꞌ nzo tu miyiꞌ xaꞌ mibizh yaꞌ.
San Marcos 3:1-19
2 Xe kilaꞌch bixaꞌ par nabei chi lëꞌ Jesús liyak miyiꞌ zeꞌ zhë reꞌ,
nes par gak këꞌ bixaꞌ kixuꞌ Jesús lo rë xaꞌ nak zhiꞌn.
3 Orzeꞌ nzhab Jesús lo miyiꞌ xaꞌ mibizh yaꞌ reꞌ:
―Watso,
guzo garol saoꞌ rë.
4 Mbaino nzhab Jesús lo rë más xaꞌ nzhin zeꞌ:
―¿Kwan nzhab ley cheꞌn Muisés gak leꞌ met,
zhë kwaꞌn nayiꞌ kë men Israel zhiꞌn?
¿Chi tu kwaꞌn wene o tu kwaꞌn nakape?
¿Chi gaknu be tu men par nagat xaꞌ,
o laꞌ be gat xaꞌ?
Per yent cho ngakab,
xe miaꞌn bixaꞌ.
5 Lëꞌchi miëk Jesús nayiꞌ,
miwiꞌ Me lo rë men nzhin nakaꞌn zeꞌ,
mbaino miwin laxtoꞌ Me por tanta mal laxtoꞌ bixaꞌ;
orzeꞌ nzhab Me lo miyiꞌ zeꞌ:
―Bitsigaꞌ yaꞌl.
No mitsigaꞌ miyiꞌy,
mbaino uni wene,
6 per or nguroꞌ rë men fariseo al tich,
orzeꞌ midiꞌzh bixaꞌ kun rë men cheꞌn Herodes,
par xmod gut bixaꞌ Jesús.
Tu bëd men nzhakë tich Jesús
7 Orzeꞌ nguiubchi Jesús kun rë men cheꞌn Me,
par nzha Me roꞌ lagún kwaꞌn ñaꞌn lo yuo cheꞌn men Galilea.
No nayax men Galilea,
mbaino tu bëd men xaꞌ nzë lazh men Judea,
nzhakë bixaꞌ tich Jesús.
8 No nu rë xaꞌ nzë Jerusalén,
kun rë xaꞌ nzë lazh men Idumea,
kun más rë xaꞌ nzë xtu roꞌ youꞌ Jordán,
no haxta rë xaꞌ nzë nakaꞌn plo ñaꞌn yezh Tiro no Sidón;
rë men reꞌ miza plo nzo Jesús,
par gon bixaꞌ rë kwaꞌn nileꞌ Me.
9 Kuzeꞌ mileꞌ Jesús mandad rë men cheꞌn Me,
par list yiꞌdnu bixaꞌ tu bark,
por tanta men,
par nakotip men Me,
10 porke dox men miliyak Jesús,
kuzeꞌ rë xaꞌ nzhakne nilaꞌ kobi bixaꞌ Jesús par gal bixaꞌ taꞌ Jesús.
11 Mbaino rë men xaꞌ nzho mbi mal laxtoꞌ reꞌ,
or une bixaꞌ Jesús,
ngoꞌt kuslo bixaꞌ lo Me,
orzeꞌ nguruzhië bixaꞌ,
nzhab bixaꞌ:
“¡Lu nak Xgaꞌn Dios!”
12 Per mileꞌ Jesús mandad nadiꞌzhtraꞌ bixaꞌ cho nak Me lo rë men.
Ngule Jesús tu dusen men cheꞌn Me, rë xaꞌ leꞌ mandad nela lëꞌ Me
13 Orzeꞌ nkili Jesús yek tu lom,
dizde zeꞌ ngurezh Me cho xaꞌ gak men cheꞌn Me,
orzeꞌ nguzubi bixaꞌ lo Me.
14 Xid rë xaꞌ zeꞌ ngule Me tu dusen xaꞌ kizë kun lëꞌ Me,
no par xëꞌl Me bixaꞌ,
yadiꞌzh bixaꞌ widiꞌzh cheꞌn Dios lo rë men,
15 mbaino par leꞌ bixaꞌ mandad,
roꞌ rë mbi mal laxtoꞌ rë men.
16 No dub tu dusen bixaꞌ lë seꞌ:
Simón,
xaꞌ nzhab Jesús lë Per;
17 no rop wech Jakob kun Juan,
xgaꞌn Zebedeo,
xaꞌ kwaꞌn nguluꞌlë Jesús,
Boanerges (widiꞌzh reꞌ gab:
Xgaꞌn nguziꞌ);
18 no Ndrés,
mbaino Lip,
no Bartol,
no Mateo,
mbaino Max,
no xtu Jakob xgaꞌn Alfeo,
kun Tadeo,
mbaino Simón xaꞌ nzë xid men Kananist,
19 no nu Judas Iscariote,
xaꞌ chi Jesús lo rë men xaꞌ gut Me.
Nzhab men, lëꞌ Jesús nileꞌ rë kwaꞌn por Mizhab
20 Or mizhin Jesús leꞌn tu yoꞌ kun rë men cheꞌn Me,
orzeꞌ dox men migan xtu wëlt plo nzo Me,
no por tanta men,
haxta ni nangakt ngao Me kun rë men cheꞌn Me.
San Marcos 3:20-35
21 Or mbin rë melizh Jesús kureꞌ,
orzeꞌ ngokla bixaꞌ ngazen bixaꞌ Jesús,
porke mileꞌ bixaꞌ xigab,
pas nzhak miyizh xaꞌ reꞌ.
22 No nzë pla xaꞌ dizde Jerusalén,
xaꞌ niluꞌ ley kwaꞌn milaꞌ Dios lo Muisés,
nzhab bixaꞌ:
—Lëꞌ Beelzebú,
mizhab xaꞌ nileꞌ mandad lo rë mbi mal,
nileꞌ nigoꞌ miyiꞌ reꞌ,
rë mbi mal laxtoꞌ rë men.
23 Orzeꞌ ngurezh Jesús rë xaꞌ niluꞌ ley zeꞌ,
par midiꞌzh Me kun kwent lo bixaꞌ,
nes par zobyek bixaꞌi,
nzhab Me:
―¿Xmod koꞌ Mizhab,
xtu tsaꞌ mbi mal xaꞌ,
laxtoꞌ men?
24 Chi tu yezh men nidil kun mis rë men cheꞌn xaꞌ,
orzeꞌ lëꞌ bixaꞌ lox.
25 No chi dil mis men nzho tutsa yoꞌ,
tu xaꞌ kun xtu xaꞌ,
lëꞌ bixaꞌ lox.
26 No chi dil Mizhab kun mis rë mbi mal cheꞌn xaꞌ,
lëꞌ bixaꞌ lox;
orzeꞌ yentraꞌ kwan gak leꞌ xaꞌ.
27 No lizh tu miyiꞌ xaꞌ dox nzhak nidil,
nagakt yo men par liꞌwaꞌn men rë kwaꞌn kinu xaꞌ.
Par gak liwaꞌn men cheꞌn xaꞌ,
nakiꞌn galo laka liꞌb xaꞌ.
28 Walika kwaꞌn nin lo go reꞌ:
Rë kwaꞌn gat lëꞌ nileꞌ men lo Dios,
no rë kwaꞌn gat lëꞌ nidiꞌzh men por Dios;
rëi cheꞌ Dios.
29 Per xaꞌ nidiꞌzh gat lëꞌ por Sprit cheꞌn Dios,
nayotraꞌ zheꞌ cheꞌn xaꞌ,
lëꞌ xaꞌ nzëꞌb xki lo Dios par dubtaꞌ.
30 Kureꞌ nzhab Jesús,
porke lëꞌ bixaꞌ nidiꞌzh:
“Lëꞌ Jesús kinu mbi cheꞌn Mizhab.”
Xnaꞌ Jesús no rë wech Me
31 Orzeꞌ mizhin xnaꞌ Jesús kun rë wech Me,
al tich nzo bixaꞌ,
orzeꞌ mixëꞌl bixaꞌ gavis ya Jesús lo bixaꞌ.
32 No dub kidiꞌzh Jesús lo rë xaꞌ nzhin nakaꞌn lo Me,
lëꞌchi nzhab tu rë xaꞌ zeꞌ:
―Lëꞌo;
lëꞌ xnaꞌ go no rë wech go,
nzhin al tich;
lëꞌ bixaꞌ kibezh go.
33 Orzeꞌ mikab Jesús:
―¿Cho xaꞌ nak xnaꞌn,
no rë wecha?
34 Orzeꞌ miëk Me lo rë men nzhin nakaꞌn zeꞌ,
no nzhab Me: