Kwent cheꞌn xaꞌ nzhaꞌn triu
4
Xtu wëlt nguzublo kiluꞌ Jesús widiꞌzh cheꞌn Dios lo rë men,
roꞌ lagún kwaꞌn ñaꞌn lazh men Galilea.
Zeꞌ dox men migan plo nzo Jesús,
orzeꞌ nkë Me leꞌn tu bark par ña Me xcheꞌp al leꞌn nits.
Orzeꞌ nguzob Me,
no lëꞌ rë men nzhin roꞌ nits.
San Marcos 4:1-20
2 Orzeꞌ nguzublo Jesús,
miluꞌ Me nayax kwaꞌn lo bixaꞌ kun pura kwent.
Kuzeꞌ mizaꞌ Me kwent reꞌ,
nzhab Me:
3 ―Bin go kureꞌ.
Nguroꞌ tu xaꞌ nzhayaꞌn lazh triu nzhacheꞌch xaꞌi.
4 Or ngoꞌn xaꞌi,
cheꞌpe ngob leꞌn nez,
ngula miyin loi ndao mai.
5 No xcheꞌpe ngob lo yuo ke,
no por niyen beꞌs yuo zeꞌ,
lwegaꞌ ngulene.
6 Per or ngulen ngubizh,
migoꞌle;
no por gat kinui beꞌs luch,
mibizhe.
7 No xcheꞌpe ngob xid ya yich;
no or miroꞌb rë ya yich reꞌ,
nangalaꞌt rë kureꞌ ngaroꞌbe,
kuzeꞌ nangazaꞌte.
8 Per máse ngob lo yuo wen,
miroꞌbe no miaxe;
orzeꞌ dox mizaꞌi.
Nzhoi mizaꞌ gal bichiꞌ lazhe,
nzhoi mizaꞌ chon gal lazhe;
mbaino nzhoi mizaꞌ haxta tu gayoꞌ lazhe.
9 Orzeꞌ nzhab Jesús:
―Go kinu nzha par gone,
bin goi.
¿Chon midiꞌzh Jesús kureꞌ?
10 Or miaꞌn nab Jesús,
rë xaꞌ nzhin nakaꞌn lo Me,
kun za tu dusen men cheꞌn Me xaꞌ más nileꞌ mandad,
minaꞌbdiꞌzh bixaꞌ lo Me,
nzhab bixaꞌ:
—¿Kwan gab kwent kwaꞌn midiꞌzh go baꞌ?
11 Orzeꞌ nzhab Jesús:
―Lo go nin rë kwaꞌn nagaꞌch cheꞌn Dios kwaꞌn kinu Me plo nileꞌ Me mandad;
per lo rë xaꞌ nzo al tich,
kun pura kwent nilune lo bixaꞌ,
12 porke,
Ter une bixaꞌi,
per yent cho xigab ngaleꞌ bixaꞌ por lëꞌi;
no ter mbin bixaꞌi,
per nangazobyekt bixaꞌi.
Kuzeꞌ nangalaꞌt bixaꞌ rë kwaꞌn gat lëꞌ nak bixaꞌ,
mbaino nangacheꞌt Dios rë kwaꞌn nzëꞌb xki bixaꞌ lo Me.
Jesús midiꞌzh xmod nak kwent cheꞌn men nzhaꞌn triu
13 Orzeꞌ nzhab Jesús:
―¿Chi lëꞌ go nangazob yekt kwent reꞌ?
Orzeꞌ,
¿xmod zob yek go más kwaꞌn?
14 Men xaꞌ nzhaꞌn zeꞌ nak xaꞌ nidiꞌzh widiꞌzh cheꞌn Dios.
15 No yuo leꞌn nez nak xaꞌ mbin widiꞌzh cheꞌn Dios,
per por nangayilat xaꞌi,
orzeꞌ lwegaꞌ ngwa Mizhab,
mizubchi widiꞌzh cheꞌn Dios kwaꞌn nzho laxtoꞌ xaꞌ.
16 No yuo ke nak xaꞌ mbin widiꞌzh cheꞌn Dios,
dub nizak laxtoꞌ xaꞌ,
17 per por gat ña laxtoꞌ xaꞌ kun rë cheꞌn Dios,
kuzeꞌ or nizak xaꞌ tu kwaꞌn,
o nidiꞌzh men tich xaꞌ por widiꞌzh cheꞌn Dios,
orzeꞌ nilaꞌ xaꞌ Dios.
18 No yuo plo nzhiꞌb ya yich nak xaꞌ nzhon widiꞌzh cheꞌn Dios,
19 per por dox nileꞌ xaꞌ xigab por kwaꞌn nakiꞌn xaꞌ,
no por niwix xaꞌ gap xaꞌ máse,
mbaino por más rë kwaꞌn nizëꞌbla xaꞌ;
kuzeꞌ yent cho kwent nak xaꞌ men cheꞌn Dios.
20 Per yuo wen nak xaꞌ nzhon widiꞌzh cheꞌn Dios,
no nileꞌ xaꞌ kwaꞌn nzhab Dios;
no por mod niban xaꞌ,
nak xaꞌ nela yuo kwaꞌn mizaꞌ tu yalgoꞌn ro,
nzhoi mizaꞌ gal bichiꞌy,
nzhoi mizaꞌ chon gale,
mbaino nzhoi mizaꞌ haxta tu gayoꞌ lazhe.
Kwent cheꞌn tu ki
21 Nu nzhab Jesús:
―Yent cho tu men tsinki tu biani,
orzeꞌ zob xaꞌi xan tu kaj o xan tu loꞌn.
Gat lëꞌ xaꞌ zobe al ya par ziniy dub leꞌn yoꞌ,
San Marcos 4:21-41
22 porke rë kwaꞌn nagaꞌch nilun lo go,
lëꞌi xoꞌbdiꞌzh go lo men.
23 Cho go nzhakla gon kwaꞌn nin,
bizobyek goi.
24 Mbaino nzhab Jesús:
―No bizobyek go kwaꞌn nin reꞌ:
Chi lëꞌ go gone,
orzeꞌ más kwaꞌn gak zobyek go,
25 porke xaꞌ nileꞌ kwaꞌn nzhapa,
ngubizh kun ngubizh más kwaꞌn zobyek xaꞌ;
per xaꞌ gat nileꞌ kwaꞌn nzhapa,
haxta rë kwaꞌn mbin xaꞌ midizha,
yubchi lo xaꞌ.
Kwent cheꞌn lazh tu kwaꞌn nixëꞌn men
26 Mbaino nu nzhab Jesús:
―Plo nileꞌ Dios mandad nak nela tu miyiꞌ kwaꞌn ngoꞌn lazh triu lo yuo cheꞌn.
27 Ño xaꞌ nzhaꞌ xaꞌ no ñaxche xaꞌ;
mbaino ngazaꞌt xaꞌ kwent xmod ngulene no miroꞌb lazh kwaꞌn mixëꞌn xaꞌ zeꞌ.
28 Lëꞌ yuo nileꞌ nilene,
orzeꞌ niruꞌxoꞌb lai,
no niruꞌxoꞌb doi,
orzeꞌ nizaꞌi lazhe.
29 Mbaino or ngwagale mizaꞌi lazhe,
orzeꞌ lëꞌ men ngoꞌne,
lwegaꞌ nilits xaꞌ rë kwaꞌn mizaꞌi,
porke ngol la tiemp yatse.
Kwent cheꞌn tu lazh mostás
30 Orzeꞌ nzhab Jesús:
―¿Kun kwan tutsa nak plo nileꞌ Dios mandad?,
o,
¿kun kwan chëꞌl lal bei,
par ne be xmod nake?
31 Nake nela tu lazh mostás kwaꞌn mixëꞌn tu men lo yuo cheꞌn,
ter nake tu lazh kwaꞌn más kwaꞌn win,
lo rë lazh kwaꞌn nzho yizhyuo.
32 Per or mixëꞌn xaꞌi,
orzeꞌ miroꞌbe,
haxta ngoke tu ya más kwaꞌro xid rë ya nayëꞌ kwaꞌn nzhiꞌb zeꞌ,
haxta miyin michaoꞌ yo cheꞌn lo rë rram cheꞌne.
¿Chon niluꞌ Jesús widiꞌzh cheꞌn Dios kun kwent lo rë men?
33 Kun nayaxraꞌ kwent miluꞌ Jesús widiꞌzh cheꞌn Dios lo rë men,
par ne bixaꞌ xmod nileꞌ Dios kun rë men yizhyuo,
haxta plo ngwazha bixaꞌ mbin bixaꞌi.
34 Kun pura kwenttsa niluꞌ Jesús widiꞌzh cheꞌn Dios lo rë men,
per nab tsa lo rë men cheꞌn Me,
nzhab Me kwan nzhab kad kwent.
Mikwëꞌz Jesús tu yiwbi
35 No or nzhala la yëꞌl,
nzhab Jesús lo rë men cheꞌn Me:
―Chaꞌ go nzha be xtu roꞌ nits baꞌ.
36 Orzeꞌ miaꞌn rë men nzhin zeꞌ,
mbaino lëꞌ rë men cheꞌn Jesús ña bixaꞌ leꞌn bark plo nzob la Jesús;
no nu más rë bark cheꞌn xtu ben men,
ñakë tich Jesús.
37 Dub nzha bixaꞌ leꞌn bark,
lëꞌchi tu yiwbi dox nguroꞌ;
no por tanta niwin nits,
haxta nguioi leꞌn bark no nzhayaꞌz yoꞌi leꞌn nits.
38 No lëꞌ Jesús naxnaa al xan bark,
nakoꞌ Me lo tu almad.
Lëꞌchi milixche bixaꞌ Me,
nzhab bixaꞌ:
―¡Maestr!
¿Chi yent kwan ña laxtoꞌl,
lëꞌbe gat leꞌn nits?
39 Orzeꞌ ngwaxche Jesús,
mikwëꞌz Me mbi,
no nzhab Me lo nits:
―¡Nawintraꞌl!
¡Xe gulëz!
―¿Chon dox nizheb go?
¿Chon naga yila go Dios?
41 Orzeꞌ dox mizheb bixaꞌ,
no nzhab bixaꞌ lo wech bixaꞌ:
―¿Cho xaꞌ reꞌ?
¡Haxta mbi no nits nzhon roꞌ xaꞌ!