Widiꞌzh nazhon cheꞌn Jesukrist kwaꞌn mizobniꞌ Mateo
Ben cheꞌn rë men reꞌ nzë Jesukrist
1
Kureꞌ lë rë men xaꞌ ngok ben cheꞌn Jesukrist,
Me nzë ben cheꞌn rey Dabi,
mbaino nu ben cheꞌn Abraham.
2 Xgaꞌn Abraham ngok Isaac,
lëꞌ xgaꞌn Isaac ngok Jakob,
mbaino lëꞌ xgaꞌn Jakob ngok Judá kun rë wech Judá.
3 No lëꞌ rë xgaꞌn Judá ngok Fares mbaino Zara,
no xnaꞌ bixaꞌ ngok Tamar.
No xgaꞌn Fares ngok Esrom,
mbaino lëꞌ xgaꞌn Esrom ngok Aram.
4 No lëꞌ xgaꞌn Aram ngok Aminadab,
lëꞌ xgaꞌn Aminadab ngok Naasón,
no lëꞌ xgaꞌn Naasón ngok Salmón.
5 Lëꞌ xgaꞌn Salmón ngok Booz,
mbaino lëꞌ xnaꞌ Booz ngok Rahab.
No lëꞌ xgaꞌn Booz ngok Obed,
lëꞌ xnaꞌ Obed ngok Rut.
No lëꞌ xgaꞌn Obed ngok Isaí.
6 Mbaino lëꞌ xgaꞌn Isaí ngok rey Dabi,
no lëꞌ xgaꞌn rey Dabi ngok Salomón,
no lëꞌ xnaꞌ Salomón ngok tsaꞌ Urías.
7 No lëꞌ xgaꞌn Salomón ngok Roboam,
lëꞌ xgaꞌn Roboam ngok Abías,
mbaino lëꞌ xgaꞌn Abías ngok Asa.
8 No lëꞌ xgaꞌn Asa ngok Josafat,
mbaino lëꞌ xgaꞌn Josafat ngok Joram,
no lëꞌ xgaꞌn Joram ngok Uzías.
9 Lëꞌ xgaꞌn Uzías ngok Jotam,
no lëꞌ xgaꞌn Jotam ngok Akaz,
mbaino lëꞌ xgaꞌn Akaz ngok Hezekías.
10 Lëꞌ xgaꞌn Hezekías ngok Manasés,
no lëꞌ xgaꞌn Manasés ngok Amón.
Lëꞌ xgaꞌn Amón ngok Josías.
11 Lëꞌ rë xgaꞌn Josías ngok Jecunías kun rë wech Jecunías.
Leꞌn rë ngubizh zeꞌ ñanu rey Babilonia rë men yezh Judá.
Lazh men zeꞌ ngok bixaꞌ nela rë men nado gaꞌ,
dox nguzakzi bixaꞌ.
12 Or mileꞌ Dios nguroꞌ bixaꞌ lazh men Babilonia,
ñëꞌd bixaꞌ lazh bixaꞌ.
Orzeꞌ lëꞌ xgaꞌn Jecunías ngok Salatiel,
no lëꞌ xgaꞌn Salatiel ngok Zorobabel.
13 Lëꞌ xgaꞌn Zorobabel ngok Abihud,
lëꞌ xgaꞌn Abihud ngok Eliakim,
mbaino lëꞌ xgaꞌn Eliakim ngok Azor.
14 Lëꞌ xgaꞌn Azor ngok Sadok,
lëꞌ xgaꞌn Sadok ngok Akim,
lëꞌ xgaꞌn Akim ngok Eliud.
15 Lëꞌ xgaꞌn Eliud ngok Eleazar,
mbaino lëꞌ xgaꞌn Eleazar ngok Matán,
lëꞌ xgaꞌn Matán ngok Jakob,
16 no lëꞌ xgaꞌn Jakob ngok Che,
xaꞌ ngok tsaꞌ Mari,
no lëꞌ Mari ngok xnaꞌ Jesús,
Me lë Krist.
17 Kuzeꞌ,
dizde zhë cheꞌn Abraham haxta zhë cheꞌn Dabi nded chida tiemp kwaꞌn niban tu men,
orzeꞌ nguio xtu chida tiemp kwaꞌn niban tu men dizde zhë cheꞌn Dabi haxta zhë kwaꞌn ñanu rey Babilonia rë men yezh Judea par lazh men Babilonia.
No dizde zhë kwaꞌn nguroꞌ bixaꞌ lazh men Babilonia haxta zhë kwaꞌn ngol Krist,
nded xtu chida tiemp kwaꞌn niban tu men.
Ngol Jesukrist
18 Seꞌ ngok or ngol Jesukrist:
lëꞌ Mari,
xnaꞌ Jesukrist,
nzo xtiꞌzh kun Che;
per nagat ban bixaꞌ junt,
lëꞌ Mari mbiꞌy xin la por Sprit cheꞌn Dios.
19 Lëꞌ Che xaꞌ ngok tsaꞌ Mari,
ter nak xaꞌ tu miyiꞌ xaꞌ dox nileꞌ kwaꞌn nzobniꞌ lo ley kwaꞌn milaꞌ Dios lo Muisés,
per gat nzhaklat xaꞌ xoꞌbdiꞌzh xaꞌ kwan nak Mari,
orzeꞌ mileꞌ xaꞌ xigab,
xlaꞌn laꞌ xaꞌ Mari.
20 No dub kileꞌ xaꞌ xigab kureꞌ,
lëꞌchi ngurulo tu ganj cheꞌn Dios lo xaꞌ leꞌn mikaꞌl,
nzhab ganj:
―Che,
xgaꞌn Dabi,
nazhebtal banal kun Mari par gak tsaꞌl;
lëꞌ Mari nakxin por Sprit cheꞌn Dios.
21 Lëꞌ unaꞌ gap tu mëꞌd xibyiꞌ,
mbaino kuꞌlël mëꞌd JESÚS;
lëꞌ mëꞌd reꞌ koꞌ rë men cheꞌn Dios lo rë kwaꞌn nzëꞌb xki bixaꞌ.
22 Ngok rë kureꞌ par mileꞌ Dios rë kwaꞌn milaꞌ Dios diꞌzh lo tu rë profet,
xaꞌ midiꞌzh por Dios,
or nzhab Dios:
23 Biwiꞌ go,
lëꞌ tu unaꞌ yeꞌn weiꞌ xin,
no gap unaꞌ tu mëꞌd xibyiꞌ,
mbaino kuꞌlë bixaꞌ mëꞌd Emanuel.
Widiꞌzh reꞌ gab:
Dios nzo kun be.