Ngol Jesús
2
No leꞌn rë ngubizh zeꞌ,
Augusto César mileꞌ mandad,
zoblë rë nak men rë yezh plo nileꞌ xaꞌ mandad.
San Lucas 2:1-24
2 Kureꞌ ngok primer wëlt mileꞌ xaꞌ zoblë men,
or nak Cirenio gobiernador lazh men Siria.
3 No kad men ngwazobniꞌ lë plo ngol bixaꞌ.
4 Kuzeꞌ nguroꞌ Che yezh Nazaret kwaꞌn ñaꞌn lazh men Galilea,
par nzha xaꞌ yezh Belén,
kwaꞌn ñaꞌn lazh men Judea,
plo ngol rey Dabi,
porke ben cheꞌn rey Dabi nzë Che.
5 Junt ngwazobniꞌ Che lë Che kun Mari,
unaꞌ kwaꞌn nak diꞌzh gak tsaꞌ xaꞌ,
mbaino nakxin la Mari.
6 No dub nzhin bixaꞌ zeꞌ,
ngol zhë kwaꞌn gal xin Mari.
7 Or mizhin bixaꞌ plo yaꞌn bixaꞌ,
yentraꞌ lugar ngayaꞌn bixaꞌ,
kuzeꞌ ña bixaꞌ plo nzhin ma,
no zeꞌ ngol xin Mari,
mëꞌd galo,
no michël xaꞌ lar mëꞌd,
orzeꞌ ndix xaꞌ mëꞌd plo nzhao ma.
Rë ganj cheꞌn Dios mbaino rë xaꞌ nikina mbëkxiꞌl
8 No gax yezh Belén,
or yëꞌl zeꞌ,
nzhin pla men dan,
xaꞌ nikina mbëkxiꞌl.
9 Lëꞌchi orzeꞌ ngurulo tu ganj cheꞌn Dios lo bixaꞌ,
no dub plo nzhin bixaꞌ nkë tu biani kwaꞌn maska ñaꞌzbël cheꞌn Señor,
orzeꞌ dox mizheb bixaꞌ,
10 per nzhab ganj lo bixaꞌ:
―Nazhebt go,
no biwiꞌ go,
lëꞌda nzadni tu widiꞌzh wen lo go kwaꞌn leꞌ dox zak laxtoꞌ rë nak men yizhyuo,
11 porke nalyëꞌl reꞌ,
yezh cheꞌn Dabi,
ngol tu mëꞌd kwaꞌn nak Krist no Señor,
Me kwaꞌn koꞌ men lo rë kwaꞌn nzëꞌb xki men lo Dios.
12 Kureꞌ nak nela tu señ gaꞌ,
par ne go rë kwaꞌn kinin,
lëꞌi walika;
lëꞌ go yazhël mëꞌd,
narël mëꞌd lar,
nax mëꞌd plo nzhao ma.
13 Lëꞌchi orzeꞌ,
nguruxoꞌb tu bëd ganj lo yibëꞌ,
kikëꞌ kant lo Dios kwaꞌn nzhab seꞌ:
14 ¡Dox nazhon Dios,
Me nzho lo yibëꞌ,
no lo yizhyuo,
mial laxtoꞌ Dios kun rë men,
rë xaꞌ kwaꞌn niwiꞌ Dios wen lo!
15 No or ña rë ganj lo yibëꞌ,
orzeꞌ nzhab rë xaꞌ nikiꞌna mbëkxiꞌl zeꞌ lo wech bixaꞌ:
―Chaoꞌ nzha be yezh Belén,
par ne be rë kwaꞌn biꞌdne ganj cheꞌn Dios lo be reꞌ.
16 Orzeꞌ nzha bixaꞌ nayen-nayen,
no ngwazhël bixaꞌ Mari no Che,
no mëꞌd yeꞌn nax plo nzhao ma.
17 No or une bixaꞌ mëꞌd yeꞌn,
orzeꞌ mizaꞌ bixaꞌ kwente lo Mari no lo Che,
por kwaꞌn ngwayab ganj lo bixaꞌ por mëꞌd yeꞌn reꞌ.
18 No rë xaꞌ kwaꞌn mbin kureꞌ,
xe miaꞌn bixaꞌ tuli,
por rë kwaꞌn midiꞌzh rë xaꞌ nikina mbëkxiꞌl reꞌ.
19 Mbaino Mari,
rë kureꞌ kiguchaoꞌ xaꞌ laxtoꞌ xaꞌ,
no kileꞌ xaꞌ xigab por lëꞌi.
20 Orzeꞌ rë xaꞌ nikina mbëkxiꞌl zeꞌ,
miëk bixaꞌ,
mbaino kidiꞌzh bixaꞌ nazhon Dios por rë kwaꞌn mbin bixaꞌ no kwaꞌn une bixaꞌ,
porke rëi ngok nela xmod nzhab ka ganj lo bixaꞌ.
Or nguroꞌlë mëꞌd
21 Or nzhap mëꞌd xon ngubizh,
orzeꞌ ngwanu xuz mëꞌd,
mëꞌd,
par nkë señ plo naban mëꞌd;
orzeꞌ nguloꞌlë bixaꞌ mëꞌd JESÚS,
nela xmod nzhab ka ganj lo Mari,
antis di weiꞌxin Mari.
22 No or miza ngubizh cheꞌn Mari,
or gak la yo Mari leꞌn yadoꞌ,
ya mimbe la kwerp cheꞌn xaꞌ,
nela xmod nzobniꞌ lo ley kwaꞌn milaꞌ Dios lo Muisés,
orzeꞌ nzhanu bixaꞌ mëꞌd yadoꞌ kwaꞌn nzob yezh Jerusalén,
par luꞌ bixaꞌ mëꞌd lo Dios.
23 Seꞌ mileꞌ bixaꞌ,
porke seꞌ nzobniꞌ lo ley kwaꞌn milaꞌ Dios lo Muisés:
“Rë mëꞌd miyiꞌ kwaꞌn galo laka gal,
gak par Dios.”
24 No mizaꞌ bixaꞌ tu gon lo Dios,
nela xmod nzobniꞌ ka lo ley cheꞌn Muisés;
chop ngog o chop palom.
25 No leꞌn rë ngubizh zeꞌ,
yezh Jerusalén nzho tu miyiꞌ xaꞌ lë Simeón.
Nambe naban xaꞌ lo Dios,
nileꞌ xaꞌ rë nak kwaꞌn nzhab Dios,
mbaino kimbëz xaꞌ reꞌ,
lëꞌ Dios xëꞌl tu xaꞌ lat rë men Israel,
yaꞌ rë xaꞌ kwaꞌn nidil xaꞌ kun lëꞌ.
No Lëꞌ Sprit cheꞌn Dios nzo kun lëꞌ xaꞌ.
San Lucas 2:25-52
26 Lëꞌ Sprit cheꞌn Dios miluꞌ la lo xaꞌ,
lëꞌ xaꞌ ne Krist,
Me kwaꞌn xëꞌl Dios antis di gat xaꞌ.
27 Kuzeꞌ mbiyꞌ Sprit cheꞌn Dios xaꞌ leꞌn yadoꞌ.
No or mbiyꞌ xuz mëꞌd no xnaꞌ mëꞌd,
mëꞌd leꞌn yadoꞌ,
par leꞌ bixaꞌ kun lëꞌ mëꞌd rë kostumbr kwaꞌn nzobniꞌ lo ley cheꞌn Dios,
28 orzeꞌ ndeꞌx Simeón mëꞌd,
nzhab xaꞌ:
29 O Dios Señor da,
yent kwane bilaꞌ gat da nal,
porke lëꞌl miluꞌla kwan nel lon por Sprit cheꞌnal,
30 porke lëꞌda unela xaꞌ kwaꞌn koꞌ men lo rë kwaꞌn nzëꞌb xki men lo Dios,
31 mëꞌd kwaꞌn mixëꞌlal lo rë nak men,
32 par leꞌ mëꞌd,
ne rë xaꞌ gat lëꞌt men Israel,
xmod koꞌ Dios bixaꞌ lo kwaꞌn nzëꞌb xki bixaꞌ lo Dios.
No por mëꞌd reꞌ,
rë men Israel ya wen.
33 No Che kun xnaꞌ Jesús,
xe miaꞌn bixaꞌ por rë kwaꞌn midiꞌzh Simeón por mëꞌd reꞌ.
34 Orzeꞌ ngurezh Simeón yalnazaꞌk par Che no par Mari xnaꞌ Jesús,
per nu nzhab Simeón lo Mari:
―Biwiꞌ,
por mëꞌd reꞌ,
nayax men Israel lox lo Dios,
mbaino nu nayax bixaꞌ por mëꞌd reꞌ,
lëꞌ bixaꞌ roꞌ lo rë kwaꞌn nzëꞌb xki bixaꞌ lo Dios;
mbaino mëꞌd reꞌ luꞌ lo rë men xmod nak xigab cheꞌn Dios kun rë men,
per nayax men leꞌ nayaꞌ,
gaklat xaꞌ gon xaꞌ kwaꞌn diꞌzh mëꞌd reꞌ.
35 Kureꞌ gak nela tu yalne,
mbaino nela tu yalnawin dox par lu,
Mari.
Por mëꞌd reꞌ,
rubeꞌ xmod nak kad men,
xaꞌ wen no xaꞌ nakap.
36 No nu tu unaꞌ xaꞌ lë Gan nzo zeꞌ;
tu unaꞌ kwaꞌn nidiꞌzh por Dios.
Xaꞌ reꞌ nak xchaꞌp Fanuel,
tu xaꞌ nzë ben cheꞌn Aser.
No dox la ngwagal xaꞌ.
Di ngok jwandang cheꞌn xaꞌ,
gazhtsa liꞌn miban xaꞌ kun xmiyiꞌ xaꞌ,
37 no or nzhap xaꞌ tap gal nzho tap liꞌn,
ngut xmiyiꞌ xaꞌ.
Zhëy-yëꞌle nzho xaꞌ yadoꞌ.
Nzho or gat nzhaot xaꞌ par ninaꞌb xaꞌ lo Dios.
38 No mis orzeꞌ,
nguzubi xaꞌ lë Gan reꞌ,
orzeꞌ nguzublo mizaꞌ xaꞌ xkix lo Dios,
mbaino kidiꞌzh xaꞌ por mëꞌd reꞌ,
no midiꞌzh xaꞌ,
lëꞌ Dios leꞌ,
roꞌ rë men Jerusalén lo rë kwaꞌn nzëꞌb xki bixaꞌ lo Dios,
rë xaꞌ kwaꞌn kimbëz gaknu Dios bixaꞌ.
Miëk bixaꞌ yezh Nazaret
39 No or milox mileꞌ xuz Jesús,
rë nak kwaꞌn nzobniꞌ lo ley kwaꞌn milaꞌ Dios lo Muisés,
orzeꞌ miëk bixaꞌ par lazh men Galilea,
par ña bixaꞌ yezh Nazaret,
plo nak lazh bixaꞌ.
40 Orzeꞌ nzharoꞌb mëꞌd,
mbaino nzharoꞌb xigab cheꞌn mëꞌd;
dox nzhak mëꞌd cheꞌn Dios mbaino nane mëꞌd xmod nak tu men;
no niluꞌ,
lëꞌ Dios kiyaknu mëꞌd.
Jesús nzho leꞌn yadoꞌ
41 No xuz Jesús kun xnaꞌ Jesús,
rë liꞌn ña bixaꞌ yezh Jerusalén,
or nzhal lani Pask.
42 No or nzhap Jesús tu dusen liꞌn,
ngwa rë bixaꞌ lani yezh Jerusalén,
nela xmod nileꞌ ka bixaꞌ.
43 No or ngwalo lani zeꞌ,
miëk xuz Jesús kun xnaꞌ Jesús,
ña bixaꞌ lizh bixaꞌ,
no nanganet bixaꞌ,
miaꞌn mëꞌd yezh Jerusalén.
44 Mileꞌ bixaꞌ xigab,
ñëꞌd ka mëꞌd xid rë xaꞌ ñëꞌd bixaꞌ kun lëꞌ,
no dub tu ngubizh nguzë la bixaꞌ nez,
per or mikwaꞌn bixaꞌ Jesús xid rë melizh bixaꞌ no xid rë xaꞌ nzhakbeꞌ bixaꞌ,
45 per nangazhëlt bixaꞌ mëꞌd.
Orzeꞌ miëk bixaꞌ yezh Jerusalén par nzhakwaꞌn bixaꞌ mëꞌd.
46 Nzha chon ngubizh di niyent mëꞌd,
lëꞌchi ngwazhël bixaꞌ mëꞌd leꞌn yadoꞌ;
nzob mëꞌd xid rë xaꞌ niluꞌ ley,
kiyon mëꞌd kwaꞌn kidiꞌzh bixaꞌ,
no kinabdiꞌzh mëꞌd rë kwaꞌn lo bixaꞌ.
47 No rë xaꞌ kwaꞌn mbin kidiꞌzh mëꞌd,
xe miaꞌn bixaꞌ tuli,
por tanta natsin mëꞌd,
no dox natsin mëꞌd lo rë kwaꞌn nikab mëꞌd.
48 No or une xuz mëꞌd no xnaꞌ mëꞌd plo nzo mëꞌd;
xe miaꞌn bixaꞌ tuli;
orzeꞌ nzhab xnaꞌ mëꞌd:
―Xmëꞌda,
¿chon mileꞌl kureꞌ kun no?
¡Biwiꞌ,
xuzal no da kikwaꞌn no lu,
no dox kileꞌ no xigab cheꞌnal!
49 Orzeꞌ mikab mëꞌd:
―¿Chon kikwaꞌn go da?
Lëꞌda nile xigab,
nane ka go lëꞌda nakiꞌn le rë kwaꞌn nak cheꞌn Xuza.
50 Per nangazobyekt bixaꞌ kwaꞌn midiꞌzh mëꞌd.
51 Orzeꞌ ña mëꞌd kun lëꞌ bixaꞌ lazh bixaꞌ,
plo miban mëꞌd,
no mileꞌ mëꞌd rë kwaꞌn nzhab bixaꞌ.
Per xnaꞌ mëꞌd nguluchaoꞌ rë kureꞌ laxtoꞌ xaꞌ.
52 No nzharoꞌb mëꞌd,
no nzharoꞌb xigab cheꞌn mëꞌd,
no kad ngubizh más niluꞌ nzo Dios kun lëꞌ mëꞌd,
no rë men,
wen niwiꞌ bixaꞌ lo mëꞌd.