Widiꞌzh nazhon cheꞌn Jesukrist kwaꞌn mizobniꞌ San Luk
Mixëꞌl Luk tu yech lo Tioj
1
Nayax men,
xaꞌ nak men cheꞌn Jesukrist,
mizuxkwaꞌ la bixaꞌ kwent cheꞌn kwaꞌn mileꞌ Dios xid be,
San Lucas 1:1-25
2 no nela xmod miluꞌ ka men dizde or galo,
rë xaꞌ kwaꞌn une kureꞌ kun zalo bixaꞌ,
no nu rë xaꞌ kwaꞌn miluꞌ widiꞌzh cheꞌn Jesukrist lo men.
3 Kuzeꞌ,
nu ska da mile xigab këꞌn rë kureꞌ lo yech,
or milox minaꞌb dizha,
miwiꞌn wena-wen,
xmod ngok kwent cheꞌn Jesukrist,
dizde or nagat gal Me,
O Tioj,
lu xaꞌ dox tsak,
4 par ganel,
walika widiꞌzh kwaꞌn miluꞌ men lol,
kwent cheꞌn Jesukrist.
Midiꞌzh tu ganj cheꞌn Dios lëꞌ Juan gal, xaꞌ lilëiꞌ Krist leꞌn nits
5 No or nak Herodes rey lo rë men Judea,
nzho tu ngulëiꞌ xaꞌ lë Zacarías,
tu xaꞌ nzë ben cheꞌn Abías,
tu xaꞌ tiemp.
No unaꞌ cheꞌn xaꞌ lë Sabel,
unaꞌ reꞌ nzë ben cheꞌn ngulëiꞌ Aarón.
6 No wen nikizë bixaꞌ lo Dios,
mbaino nzhon bixaꞌ roꞌ Dios,
nileꞌ bixaꞌ rë kwaꞌn nzhab Señor.
7 Per gat kinut bixaꞌ xin bixaꞌ,
porke lëꞌ Sabel nagakt gap mëꞌd,
mbaino rop bixaꞌ ya ngwagal la.
8 Per ngol tu ngubizh,
lëꞌ ben tsaꞌ ngulëiꞌ Zacarías ngol,
leꞌ zhiꞌn lo Dios,
orzeꞌ Zacarías ngol xaꞌ leꞌ zhiꞌn lo Dios.
9 Leꞌn rë ngubizh zeꞌ,
seꞌ nak kostumbr cheꞌn rë ngulëiꞌ,
lëꞌ Zacarías ngol yo leꞌn yadoꞌ,
par lazh yaꞌl lo Dios.
10 No dub kilazhyaꞌl xaꞌ lo bikoꞌ,
lëꞌ nayax men nzhin tich,
kinaꞌb bixaꞌ lo Dios.
11 Lëꞌchi ngurulo tu ganj cheꞌn Dios lo Zacarías,
al nez lad direch cheꞌn bikoꞌ plo nilazhyaꞌl rë ngulëiꞌ.
12 No or une Zacarías ganj reꞌ,
net xaꞌ kwan leꞌ xaꞌ,
dox mizheb xaꞌ.
13 Orzeꞌ nzhab ganj:
―Zacarías,
nazhebtal,
porke lëꞌ kwaꞌn gunaꞌbal lo Dios,
lëꞌ Me mbin kai,
lëꞌ unaꞌ cheꞌnal Sabel gap tu xmëꞌdal,
mbaino kuꞌlël mëꞌd Juan,
14 no dox zak laxtoꞌl,
mbaino zak laxtoꞌ rë men,
or gal mëꞌd reꞌ,
15 porke lëꞌ mëꞌd reꞌ,
dox tu miyiꞌ gak xaꞌ lo Dios,
no nayot go xaꞌ kwaꞌn nileꞌ nizuzh men,
mbaino dub naga gal mëꞌd reꞌ,
lëꞌ Sprit cheꞌn Dios nzho la laxtoꞌ mëꞌd.
16 No lëꞌ mëꞌd reꞌ,
leꞌ nayax men Israel,
lëꞌ bixaꞌ laꞌ kwaꞌn gat lëꞌt nileꞌ bixaꞌ,
mbaino yëk bixaꞌ lo Dios cheꞌn bixaꞌ.
17 Juan reꞌ yiꞌd galo laka lo Señor kun mis poder kwaꞌn mizaꞌ Sprit cheꞌn Dios nkaꞌ Li,
tu xaꞌ tiemp,
par kwin xuz men wen kun xin xaꞌ,
mbaino par rë men nayiꞌ lazh,
tseꞌd bixaꞌ gon bixaꞌ roꞌ rë xaꞌ nileꞌ kwaꞌn ñal,
nes par zobyek men widiꞌzh cheꞌn Dios,
Me yëꞌd reꞌ.
18 Orzeꞌ minabdiꞌzh Zacarías lo ganj zeꞌ:
―¿Xmod nen chi walika rë kwaꞌn kinel lon?
Porke na dadgol la,
no nu ska unaꞌ da mengol la.
19 Orzeꞌ nzhab ganj:
―Na lë Gabriel,
no nzon lo Dios par len mandad cheꞌn Dios.
Lëꞌ Dios mixëꞌl da par dizha kulu,
nzadnin tu widiꞌzh wen kwaꞌn leꞌ zak laxtoꞌl.
20 No biwiꞌ,
por nangayilal kwaꞌn nin lol,
lëꞌl yaꞌn mud,
nagaktraꞌ diꞌzhal,
haxta ke zhin zhë gak rë kureꞌ.
21 No dub kiyak rë kureꞌ,
no lëꞌ rë men nzhin al tich kimbëz bixaꞌ roꞌ Zacarías,
no kileꞌ bixaꞌ xigab:
“¿Chon zheꞌb xche nzho xaꞌ reꞌ leꞌn yadoꞌ?”
22 No or nguroꞌ Zacarías leꞌn yadoꞌ,
nangaktraꞌ ngadiꞌzh xaꞌ lo rë men.
Orzeꞌ ngwanu laxtoꞌ rë men,
lëꞌ Dios miluꞌ tu kwaꞌn lo xaꞌ leꞌn yadoꞌ,
mbaino maska yaꞌ Zacarías nzhak,
kidiꞌzh xaꞌ kun pura señ,
orzeꞌ miaꞌn xaꞌ mud.
23 No or milox mitsa Zacarías rë ngubizh cheꞌn xaꞌ kwaꞌn nileꞌ xaꞌ zhiꞌn leꞌn yadoꞌ,
orzeꞌ ña xaꞌ lizh xaꞌ.
24 No or nded rë ngubizh zeꞌ,
lëꞌ Sabel,
unaꞌ cheꞌn xaꞌ nak xin la,
no nangaroꞌt unaꞌ lizh unaꞌ dub gaiꞌ mbëoꞌ,
kileꞌ unaꞌ xigab reꞌ:
25 “Lëꞌ Dios mileꞌ kureꞌ kuda,
par naxizhnu raꞌ men da,
por nagapa mëꞌd.”
Tu ganj ngwayab lo Mari, lëꞌ Jesús gal
26 Nzha xoꞌp mbëoꞌ di ngok kureꞌ,
orzeꞌ mixëꞌl Dios ganj Gabriel tu yezh kwaꞌn lë Nazaret,
kwaꞌn ñaꞌn lazh men Galilea,
San Lucas 1:26-56
27 plo nzho tu unaꞌ yeꞌn lë Mari,
nzo xtiꞌzh par ban kun tu miyiꞌ lë Che;
miyiꞌ reꞌ nzë ben cheꞌn rey Dabi.
28 Nguio ganj leꞌn yoꞌ plo nzho Mari,
orzeꞌ nzhab ganj:
―¿Mal Mari?
¡Dios niwiꞌ wen lol,
no Dios nzo kun lu!
29 No or mbin Mari widiꞌzh reꞌ,
net Mari xmod leꞌ Mari,
mileꞌ Mari xigab:
“¿Chon ne xaꞌ baꞌ kureꞌ lon?”
30 Orzeꞌ nzhab ganj:
―Mari,
nazhebtal,
porke nazhon nzhal,
lëꞌ Dios niwiꞌ lol.
31 Nal biwiꞌ,
lëꞌl weiꞌxin,
lëꞌl gap tu mëꞌd xibyiꞌ,
mbaino kuꞌlël mëꞌd JESÚS.
32 Dox tu miyiꞌ tsak gak mëꞌd reꞌ lo Dios,
mbaino lëꞌ mëꞌd reꞌ rulë Xmëꞌd paꞌ Dios,
Me nzho lo yibëꞌ,
no lëꞌ Señor Dios leꞌ,
gak mëꞌd reꞌ rey,
nela ngok Dabi gaꞌ,
tu xaꞌ kwaꞌn ngok mis ben mëꞌd reꞌ;
33 par leꞌ mëꞌd reꞌ mandad par dubtaꞌ lo rë men Israel,
no nayot lox leꞌ mëꞌd reꞌ mandad.
34 Orzeꞌ nzhab Mari lo ganj:
―¿Xmod gak kureꞌ,
porke gat kinutaꞌ miyiꞌ?
35 Orzeꞌ nzhab ganj:
―Lëꞌ Sprit cheꞌn Dios yiꞌd lol,
mbaino kun poder cheꞌn Dios,
dubal yaoꞌ kun xkal cheꞌn Me,
kuzeꞌ lëꞌ mëꞌd gapal baꞌ,
rulë Xmëꞌd paꞌ Dios,
mëꞌd nazhon kwaꞌn leꞌ rë tsa kwaꞌn nzhakla Dios.
36 No biwiꞌ,
nu ska tu bël yeꞌnal,
xaꞌ lë Sabel,
nzha la xoꞌp mbëoꞌ nakxin xaꞌ,
no ter mengol la xaꞌ,
xaꞌ kwaꞌn nidiꞌzh men nagakt gap mëꞌd,
37 porke par Dios,
yent kwan nagak leꞌ Dios.
38 Orzeꞌ nzhab Mari:
―Biwiꞌ go,
Dios nak Me nileꞌ mandad da;
leꞌ Dios kuna nela xmod nel lon baꞌ.
Orzeꞌ ña ganj.
Ngwatsiꞌ Mari ma Sabel
39 No leꞌn rë ngubizh zeꞌ,
nayen nzha Mari plo nzho Sabel,
tu yezh kwaꞌn nzhin leꞌn rë yiꞌ,
kwaꞌn ñaꞌn lazh men Judea.
40 No or nguio Mari lizh Zacarías,
nzhab Mari:
―¿Mal,
Sabel?
41-42 No or mbin Sabel widiꞌzh cheꞌn Mari,
tuli miwin mëꞌd laxtoꞌ Sabel,
orzeꞌ mileꞌ Sprit cheꞌn Dios naye midiꞌzh Sabel lo Mari,
nzhab unaꞌ:
―Nazhon nzhal mileꞌ Dios,
más ke lo rë unaꞌ nzho yizhyuo;
mbaino nu nazhon nzha xmëꞌdal lo Dios.
43 ¿Cho da,
par yiꞌdtswiꞌ xnaꞌ Señor da,
ma da?,
44 porke biwiꞌ,
or mbina midiꞌzhal,
miwin xmëꞌda laxtoꞌn di tanta nizak laxtoꞌ mëꞌd.
45 Nazhon nzhal,
por ngwayilal gak rë widiꞌzh cheꞌn Dios,
kwaꞌn ne ganj lol.
46 Orzeꞌ nzhab Mari:
Kun dub laxtoꞌn,
zan xkix lo Dios por nazhon Me,
47 no nizak laxtoꞌn por Dios da,
Me kwaꞌn nguloꞌ da lo rë kwaꞌn nzëꞌb xkin,
48 porke Dios miwiꞌ lon,
ter nak da nela tu mos nado gaꞌ lo Dios,
tu men kwaꞌn natsakt tuli.
Per biwiꞌ,
dizde nal raꞌ,
rë men kwaꞌn yo yizhyuo,
diꞌzh nazhon nzhan,
49 porke lëꞌ Dios Me kwaꞌn nzhak nileꞌ rë kwaꞌn,
mileꞌ kwaꞌn dox kwaꞌro kuda,
no nazhon lë Me.
50 No nilats laxtoꞌ Dios rë xaꞌ nzhon roꞌ Dios,
dizde xmëꞌd xaꞌ haxta rë xaꞌ gak ben cheꞌn xaꞌ.
51 Mileꞌ Dios kwaꞌn nazhon kun poder cheꞌn Dios.
Mikaꞌn Dios lo rë xigab cheꞌn rë men nizi dox tsak,
52 no ngulutin Dios rë xaꞌ nileꞌ mandad,
par ngulo Dios rë men nadoꞌ xlugar bixaꞌ.
53 No mizaꞌ Dios nayax kwaꞌn wen kaꞌ rë men prob,
no lëꞌ men rrik,
mileꞌ Dios miaꞌn bixaꞌ seꞌtsa.
54 Ngoknu Dios rë men cheꞌn Dios,
rë men Israel;
nangayaꞌlt laxtoꞌ Dios,
lëꞌ Dios nilats laxtoꞌ bixaꞌ,
55 nela xmod milaꞌ ka Dios diꞌzh lo rë xuz be,
xaꞌ tiemp;
lo Abraham,
no lo rë xaꞌ nzë ben cheꞌn xaꞌ.
56 No como chon mbëoꞌ miaꞌn Mari lizh Sabel,
orzeꞌ nguiubre Mari,
ña Mari lizh Mari.
Ngol Juan, xaꞌ mililëiꞌ Krist leꞌn nits
57 No or ngol ngubizh gal xin Sabel,
orzeꞌ ngol xin xaꞌ tu mëꞌd xibyiꞌ.
San Lucas 1:57-80
58 Or mbin rë xaꞌ kwaꞌn nzho gax kun lëꞌ unaꞌ,
no rë melizh unaꞌ,
lëꞌ Dios milats laxtoꞌ unaꞌ,
orzeꞌ nu bixaꞌ nizak laxtoꞌ kun lëꞌ unaꞌ.
59 No or nded xon ngubizh,
ngwa bixaꞌ lo mëꞌd,
mikëꞌ bixaꞌ señ kwaꞌn lë circuncisión zeꞌ mëꞌd,
no nzhakla bixaꞌ ngarolë mëꞌd nela lë xuz mëꞌd,
Zacarías.
60 Orzeꞌ nzhab xnaꞌ mëꞌd:
―Narulët mëꞌd saꞌ,
lëꞌ mëꞌd rulë Juan.
61 Orzeꞌ nzhab bixaꞌ:
―Per yent cho melizhal lë Juan.
62 Orzeꞌ minabdiꞌzh bixaꞌ kun pura señ lo xuz mëꞌd,
par gab xuz mëꞌd xmod rulë mëꞌd.
63 Orzeꞌ minaꞌb xuz mëꞌd tlëꞌ tab win,
mizobniꞌ xaꞌ:
“Lëꞌ mëꞌd lë Juan.”
Orzeꞌ xe miaꞌn rë men tuli.
64 Haxta orzeꞌ,
ngok midiꞌzh Zacarías,
tuli ka nzhab xaꞌ:
“¡Dox nazhon Dios!”
65 Orzeꞌ rë xaꞌ nzhin xaꞌ gax kun lëꞌ,
mizheb bixaꞌ tuli,
no rë xaꞌ nzho rë yezh kwaꞌn nzhin leꞌn rë yiꞌ lazh men Judea,
mbin bixaꞌ rë kureꞌ.
66 No rë xaꞌ zeꞌ,
mileꞌ bixaꞌ xigab:
“¿Kwan leꞌ mëꞌd reꞌ or roꞌb mëꞌd?”,
porke dox nazhon kwaꞌn mileꞌ Dios kun lëꞌ mëꞌd.
Kant kwaꞌn mikëꞌ Zacarías lo Dios
67 Orzeꞌ mileꞌ Sprit cheꞌn Dios midiꞌzh Zacarías,
nzhab xaꞌ:
68 Dox nazhon Dios cheꞌn rë men Israel,
yiꞌdgoꞌ Me be,
lo rë kwaꞌn nzëꞌb xki be.
69 Lëꞌ Dios xëꞌl tu xaꞌ dox kinu poder xaꞌ koꞌ be lo kwaꞌn nazheꞌb.
Xaꞌ reꞌ yiꞌd ben cheꞌn rey Dabi.
70 Lëꞌi gak nela xmod midiꞌzh Dios lo rë men cheꞌn be,
xaꞌ ngok profet,
71 par lat Me be lo rë xaꞌ nidil be,
mbaino par koꞌ xaꞌ be yaꞌ rë xaꞌ kwaꞌn niyiꞌ nine be,
72 par ne be,
lëꞌ Dios seꞌgaka nilats laxtoꞌ rë xuz be,
xaꞌ tiemp,
mbaino par luꞌ Dios,
lëꞌ Me seꞌgaka nitsila kwaꞌn milaꞌ Me diꞌzh lo bixaꞌ.
73 Seꞌ milaꞌ Dios diꞌzh lo xuz be Abraham,
xaꞌ tiemp.
74 Lëꞌ Dios lat be yaꞌ rë men xaꞌ niyiꞌ nine be,
par niyentraꞌ kwan zheb be,
leꞌ be kwaꞌn nzhakla Dios,
75 dub nambe laxtoꞌ be lo Dios,
dub tiemp kwaꞌn naban be nali yizhyuo reꞌ.
76 No lu,
xmëꞌda,
lëꞌl rulë xaꞌ nidiꞌzh por Dios,
Me kwaꞌn nzho lo yibëꞌ,
porke lo Señor yal,
par xaꞌlal nez cheꞌn Señor,
77 par leꞌl ne men cheꞌn Dios,
xmod nak nabantraꞌ bixaꞌ lo kwaꞌn gat lëꞌ,
par roꞌ bixaꞌ lo rë kwaꞌn nzëꞌb xki bixaꞌ,
78 porke por nazhiꞌ Dios men no nizine laxtoꞌ Me men.
Kuzeꞌ,
dizde al yaꞌ lo yibëꞌ yiꞌd Me,
par yani laxtoꞌ men,
nela or ñanilyuo xtu zhë gaꞌ,
79 par zini Me lo rë xaꞌ naban lo yalzi cheꞌn xki bixaꞌ,
mbaino zini Me lo rë xaꞌ nazubxax yalgut tich,
par kuꞌnez Me be plo zi be chul.
80 No nzharoꞌb mëꞌd,
no nzharoꞌb nu mëꞌd rë jwers,
par nileꞌ mëꞌd gan lo rë kwaꞌn gat lëꞌ,
no pura rë plo yent men nguio xaꞌ,
haxta zhë or ngurulo xaꞌ lo rë men Israel.