Jesús nguruban
16
Or nded zhë sabd zeꞌ,
lëꞌ Mari Madalen mbaino xtu Mari xnaꞌ Jakob,
kun unaꞌ lë Salomé;
ngwaziꞌ bixaꞌ aseit nax par chob bixaꞌi kwerp cheꞌn Jesús.
San Marcos 16:1-20
2 No primer zhë cheꞌn sman,
garziꞌl laka laore ngulen laka ngubizh,
nzha rë unaꞌ reꞌ roꞌ baꞌ.
3 Dub nzha bixaꞌ nez,
nzhab tu unaꞌ lo xtu unaꞌ:
―¿Cho gaknu be par kubchi ke,
roꞌ baꞌ se?
4 Per or nzhazhin la bixaꞌ gax,
lëꞌchi une bixaꞌ,
lëꞌ ke zeꞌ nax la tu lad.
No dox kwaꞌro ke zeꞌ.
5 Or nguio bixaꞌ leꞌn baꞌ,
une bixaꞌ tu miyiꞌ xi nak tu lar bëo laka,
nzob lad derech;
orzeꞌ dox mizheꞌb biunaꞌ,
6 orzeꞌ nzhab miyiꞌ xi reꞌ:
―Nazhebt go.
¿Chi Jesús Nazareno,
Me nkë lo krus,
kikwaꞌn go?
Yentraꞌ Me reꞌ,
lëꞌ Me nguruban la.
Biwiꞌ go plo nguxoꞌb Me.
7 Per nal bizë go,
no wayab goi lo rë men cheꞌn Me,
mbaino lo Per;
lëꞌ Me kimbëz la lazh cheꞌn men Galilea;
zeꞌ ne go Me,
nela xmod milaꞌ ka Me diꞌzh.
8 Orzeꞌ nguroꞌ rë unaꞌ zeꞌ karre leꞌn baꞌ,
porke dox mizheb bixaꞌ haxta nixiz bixaꞌ;
per yent cho lo ngab bixaꞌi nez,
porke dox mizheb bixaꞌ.
Ngurulo Jesús lo Mari Madalen
9 No dispwes di nguruban Jesús garziꞌl laka ngubizh galo cheꞌn sman,
orzeꞌ ngurulo Me galo laka lo Mari Madalen,
unaꞌ kwaꞌn nguloꞌ Jesús gazh mbi mal laxtoꞌ.
10 Orzeꞌ lëꞌ unaꞌ ngwayabe lo rë men cheꞌn Jesús,
porke dox niwin laxtoꞌ bixaꞌ.
11 No or mbin bixaꞌ,
lëꞌ Jesús nguruban,
no lëꞌ unaꞌ reꞌ une Me;
per net bixaꞌ ngayila bixaꞌi.
Jesús ngurulo lo xchop men cheꞌn
12 Dispwés di kureꞌ,
ngurulo Jesús xtu mod lo xchop men cheꞌn Me,
or nzo bixaꞌ dan.
13 Orzeꞌ,
rop xaꞌ reꞌ ngwayabe lo más bixaꞌ,
per nangayilatska rë xaꞌ zeꞌi.
Jesús ngurulo lo za chiꞌ bitub men cheꞌn
14 Lult laka ngurulo Jesús lo za chiꞌ bitub men cheꞌn Me or nzob bixaꞌ lo mes;
orzeꞌ ndil Jesús bixaꞌ por gat ñila bixaꞌi,
por tanta nad bixaꞌ,
nangayilat bixaꞌ rë kwaꞌn nzhab,
rë xaꞌ une nguruban Me.
15 Orzeꞌ nzhab Jesús:
―Wa go dub yizhyuo,
par wadiꞌzh go kwaꞌn nazhon cheꞌn Dios reꞌ,
lo kwantsa men.
16 Xaꞌ yila da no gaklëiꞌ xaꞌ,
lëꞌ xaꞌ gal vid nazhon kwaꞌn nizaꞌ Dios;
per xaꞌ nayila da,
lëꞌ Dios zakzi xaꞌ.
17 No rë señ reꞌ leꞌ rë xaꞌ ñila da:
Por lën,
kutin xaꞌ mbi mal;
diꞌzh xaꞌ xtu ben diꞌzh kwaꞌn zaꞌ Dios kaꞌ men;
18 no ter zen xaꞌ mbëꞌl,
o go xaꞌ tu kwaꞌn nileꞌ nzhat men,
per yent kwaꞌn zak bixaꞌ;
no or xoꞌb bixaꞌ yaꞌ bixaꞌ yek rë men nzhakne,
lëꞌ rë men zeꞌ yak.
Jesús ña lo yibëꞌ