Nguruban Jesús
24
No primer zhë cheꞌn sman,
garziꞌl laka ngwa rë unaꞌ roꞌ baꞌ,
no nzhanu bixaꞌ aseit nax kwaꞌn michaoꞌ bixaꞌ,
no nzho zipla unaꞌ xid bixaꞌ.
San Lucas 24:1-35
2 No une bixaꞌ,
lëꞌ ke kwaꞌn nayaoꞌ roꞌ baꞌ,
nax la tu lad;
3 no or nguio bixaꞌ leꞌn baꞌ,
une bixaꞌ yentraꞌ kwerp cheꞌn Señor Jesús,
4 orzeꞌ xe miaꞌn bixaꞌ tuli por kureꞌ,
lëꞌchi,
¡di!
nguruxoꞌb chop miyiꞌ plo nzhin bixaꞌ,
maska ñaz bël xab rop miyiꞌ reꞌ.
5 No por tanta mizheb rë unaꞌ reꞌ,
haxta lo yuo ngoꞌt kuslo biunaꞌ,
no nzhab rop miyiꞌ zeꞌ:
―¿Chon kikwaꞌn go Me naban xid rë men ngut?
6 Yentraꞌ Me reꞌ,
lëꞌ Me nguruban.
Bitsila go xmod midiꞌzh Me lo go,
or stubi nzo Me lazh men Galilea,
7 or midiꞌzh Me:
“Na nak Xgaꞌn Dios,
no nak ska da tu men yizhyuo,
lëꞌ men kwaꞌn más nzëꞌb xki lo Dios zen da,
mbaino këꞌ bixaꞌ da lo krus;
per ngubizh yon,
lëꞌda ruban.”
8 Orzeꞌ mitsila rë unaꞌ zeꞌ widiꞌzh cheꞌn Jesús.
9 No or miëk bixaꞌ di roꞌ baꞌ,
ngwayab bixaꞌ rë kureꞌ lo za chiꞌ bitub men cheꞌn Jesús,
no lo más rë xaꞌ kwaꞌn nzhin zeꞌ.
10 Rë unaꞌ kwaꞌn ngwayab rë kureꞌ lo rë apost nak Mari Madalén,
no Juan,
mbaino Mari xnaꞌ Jakob,
no kun zipla raꞌ unaꞌ.
11 Per rë miyiꞌ reꞌ,
xaꞌ nak men cheꞌn Jesús,
mileꞌ bixaꞌ xigab,
gat lëꞌt xtiꞌzh menaye rë kwaꞌn ngwayab rë unaꞌ reꞌ,
kuzeꞌ nangayilat bixaꞌi.
12 Per orzeꞌ nguroꞌ Per,
karre nzha Per roꞌ baꞌ,
no or ndixni xaꞌ leꞌn baꞌ,
une Per,
nab tsa lar kwaꞌn ngurël Jesús nax tsa zeꞌ.
Lwegaꞌ miëk Per,
net xaꞌ kwan leꞌ xaꞌ por kwan ngok reꞌ.
Kwaꞌn ngok nez yezh Emaús
13 No mis zhë zeꞌ,
nzha chop men cheꞌn Jesús yezh kwaꞌn lë Emaús,
zeꞌ ñaꞌn chiꞌ bitub kilómetro par yezh Jerusalén.
14 Dub nzha rop xaꞌ reꞌ nez,
kizaꞌ bixaꞌ kwent lo wech bixaꞌ,
rë kwaꞌn ngok yezh Jerusalén.
15 No dub kidiꞌzh bixaꞌ rë kureꞌ,
lëꞌchi nguzubi Jesús,
ñazë Jesús kun lëꞌ bixaꞌ.
16 Per mitsaoꞌ Dios lo rop xaꞌ reꞌ,
par nangalibeꞌ bixaꞌ choi,
17 orzeꞌ nzhab Jesús lo bixaꞌ:
―¿Kwan kidiꞌzh go dub nzë go nez?
―¿Chi nab tsa lu nzë zit,
nanetal kwaꞌn laore ngok laka yezh Jerusalén baꞌ?
19 Orzeꞌ nzhab Jesús lo bixaꞌ:
―¿Per kwan ngokx?
Orzeꞌ nzhab bixaꞌ:
―Lëꞌ Jesús xaꞌ nzë yezh Nazaret,
tu xaꞌ midiꞌzh por Dios;
miluꞌ xaꞌ kwaꞌn dox poder cheꞌn Dios kinu xaꞌ,
por rë kwaꞌn mileꞌ xaꞌ,
no por rë kwaꞌn midiꞌzh xaꞌ.
Rë kureꞌ miluꞌ,
walika mixëꞌl Dios xaꞌ,
no milibeꞌ mene.
20 No rë xaꞌ nileꞌ mandad lo rë ngulëiꞌ,
no rë xaꞌ nzo lo no,
michi bixaꞌ Jesús,
lo rë xpen gubier Roma,
par mileꞌ bixaꞌ mandad,
ngut Jesús,
mbaino mikëꞌ bixaꞌ Jesús lo krus.
21 Mbaino,
no kimbëz,
lëꞌ xaꞌ reꞌ xaꞌ mixëꞌl Dios,
par koꞌ rë men Israel yaꞌ xtu ben rë men nakap;
no nalreꞌ nzhala chon ngubizh ngok rë kureꞌ.
22 No nu pla unaꞌ xaꞌ nikizë kun no,
mileꞌ bixaꞌ miaꞌn xe no tuli,
nal garziꞌl reꞌ,
or ne bixaꞌ ngwa bixaꞌ roꞌ baꞌ;
23 une bixaꞌ yentraꞌ kwerp cheꞌn Jesús leꞌn baꞌ,
mbaino nu nguruxoꞌb chop ganj lo bixaꞌ kwaꞌn nzhab:
“Lëꞌ Jesús nguruban.”
24 No ngwatsiꞌ pla rë xpen no roꞌ baꞌ,
no nu bixaꞌ une,
nela xmod midiꞌzh ka rë unaꞌ zeꞌ,
per nanganet bixaꞌ Jesús.
25 Orzeꞌ nzhab Jesús:
―¡Dox naxeen go par zobyek go rë kwaꞌn,
no nazheꞌb nen par yila go rë kwaꞌn midiꞌzh rë profet,
xaꞌ midiꞌzh por Dios nzhala!
26 No,
¿chi gat nakiꞌnt zakzi Krist,
zak Krist rë nak kureꞌ,
antis di ke ruxoꞌb Me leꞌn biani ro,
par leꞌ Me mandad?
27 Orzeꞌ nguzublo kidiꞌzh Jesús,
dizde kwent cheꞌn Muisés,
haxta kwent cheꞌn rë profet xaꞌ midiꞌzh por Dios.
Midiꞌzh Me rë nak plo nzobniꞌ kwent cheꞌn Me.
28 No or nzhazhin bixaꞌ tu yezh win kwaꞌn nzha bixaꞌ,
mileꞌ Jesús nela tu men nzha más zit gaꞌ,
29 per mikwëꞌz bixaꞌ Jesús,
nzhab bixaꞌ:
―Más wen biyaꞌn go kun no,
porke nzhazhëlalyuo,
lëꞌ yëꞌl nzadla la.
Orzeꞌ nguio Jesús par yaꞌn Jesús kun lëꞌ bixaꞌ.
30 No or nguzob bixaꞌ lo mes par gao bixaꞌ,
orzeꞌ nguzen Me pan,
mizaꞌ Me xkix lo Dios,
orzeꞌ michiꞌx Mei no mizaꞌ Mei kaꞌ rop xaꞌ reꞌ.
31 Orzeꞌ mixaꞌl lo bixaꞌ,
milibeꞌ bixaꞌ Jesús;
per mitlo Jesús lo bixaꞌ.
32 Orzeꞌ nzhab tu xaꞌ lo xtu xaꞌ:
―Kuzeꞌ ka,
mizi be tu kwaꞌn leꞌn laxtoꞌ be,
or kidiꞌzh Me rë kwaꞌn nzobniꞌ lo yech lo be.
33 Mis orzeꞌ miëk bixaꞌ par yezh Jerusalén,
plo nzhin za chiꞌ bitub men cheꞌn Jesús kun más rë men,
34 no nzhab más rë xaꞌ nzhin zeꞌ:
―Walika,
nguruban Señor,
porke nuka lo Per ngurulo Me.
35 Orzeꞌ midiꞌzh rop xaꞌ reꞌ,
rë kwaꞌn nguzak bixaꞌ nez,
no xmod ngokbeꞌ bixaꞌ Jesús,
or michiꞌx Jesús pan lo bixaꞌ.
Ngurulo Jesús lo rë men cheꞌn Me
36 No stubi kidiꞌzh bixaꞌ kureꞌ,
lëꞌchi ngurulo Jesús,
nguzo Me garol tsaoꞌ plo nzhin bixaꞌ,
no nzhab Me:
―Chul guzhin go.
San Lucas 24:36-53
37 Orzeꞌ dox mizheb bixaꞌ,
no mileꞌ bixaꞌ xigab,
paste tu mbi cheꞌn tu men ngut une bixaꞌ,
38 orzeꞌ nzhab Jesús:
―¿Chon nizheb go?,
no,
¿chon kwan kileꞌ go xigab leꞌn laxtoꞌ go,
ke gat lëꞌt dai?
39 Biwiꞌ go yaꞌn no niꞌn;
lëꞌi na ka.
Bigal go da par ne goi;
porke lëꞌ tu mbi cheꞌn tu men ngut,
gat kinute bëꞌl no ni wes,
per na biwiꞌu,
lëꞌi kinun.
40 No or milox nzhab Me kureꞌ,
miluꞌ Me yaꞌ Me no niꞌ Me,
41 per rë men cheꞌn Me stubi gat ñilat bixaꞌi,
por tanta nizak laxtoꞌ bixaꞌ;
net bixaꞌ kwan leꞌ bixaꞌ,
orzeꞌ nzhab Jesús:
―¿Kwan tu kwaꞌn kinu go gao be reꞌ?
42 Orzeꞌ mizaꞌ bixaꞌ tlëꞌ mbël kwaꞌn nguꞌy lo ki,
no cheꞌp mizhin ser,
43 no nguzen Jesuze no ndao Mei lo rë bixaꞌ,
44 orzeꞌ nzhab Me:
―Rë kwaꞌn nguzaka reꞌ,
lëꞌi ni ka lo go or stubi nzon kun go;
nakiꞌn gak rë kwaꞌn nzobniꞌ lo ley kwaꞌn milaꞌ Dios lo Muisés por da,
no rë kwaꞌn midiꞌzh rë profet,
rë xaꞌ kwaꞌn midiꞌzh por Dios,
mbaino rë kwaꞌn nzobniꞌ lo Salmos.
45 Orzeꞌ mileꞌ Jesús mixaꞌl yek bixaꞌ,
par zobyek bixaꞌ rë kwaꞌn nzobniꞌ lo Yech cheꞌn Dios,
46 no nzhab Jesús lo bixaꞌ:
―Seꞌ nzobniꞌ:
Lëꞌ Krist nakiꞌn zakzi,
per ngubizh yon lëꞌ Me ruban;
47 no nu nzobniꞌ,
nakiꞌn reꞌch widiꞌzh cheꞌn Me,
par gon rë men xmod nigoꞌ Me men lo kwaꞌn nzëꞌb xki men lo Dios chi lëꞌ men chëꞌ xmod nak men lo Dios,
mbaino yila bixaꞌ Krist;
galo laka yezh Jerusalén zublo gon men kureꞌ.
48 Rë go nak xaꞌ mbin kureꞌ,
no une go rë kwaꞌn ngok por da;
49 no biwiꞌu,
nal lëꞌda xëꞌl kwaꞌn neꞌ Xuza kaꞌ go;
per biyaꞌn go yezh Jerusalén,
haxta or yo Sprit cheꞌn Dios laxtoꞌ go.
Jesús ña lo yibëꞌ
50 Orzeꞌ ñanu Jesús rë men cheꞌn Me haxta yezh Betania,
no ngulits Me yaꞌ Me,
gunaꞌb Me ya rë men cheꞌn Me wen,
51 no dub kidiꞌzh Jesús kureꞌ,
nkili Me lo yibëꞌ haxta mitlo Me.
52 No dispwés di mizaꞌ rë men cheꞌn Me xkix lo Dios,
orzeꞌ miëk bixaꞌ yezh Jerusalén,
dox nizak laxtoꞌ bixaꞌ.
53 No zilitaꞌ,
rë zhë nizo bixaꞌ yadoꞌ,
nidiꞌzh bixaꞌ nazhon Dios no nizaꞌ bixaꞌ xkix lo Me.