Nguruban Jesús
20
No zhë galo laka cheꞌn sman,
dox garziꞌl,
nakao raꞌ ngwa Mari Madalen roꞌ baꞌ plo migaꞌch Jesús,
orzeꞌ une xaꞌ,
lëꞌ ke kwaꞌn nayaoꞌ roꞌ baꞌ,
nax la tu lad.
2 Orzeꞌ karre miëk unaꞌ plo nzho Simón Per kun xtu men cheꞌn Jesús xaꞌ más nichëꞌl Me,
nzhab unaꞌ:
―¡Pas nzho cho nguloꞌ kwerp cheꞌn Señor cheꞌn be leꞌn baꞌ,
no ñanu xaꞌi,
mbaino yent cho nane plo ñanu xaꞌi!
3 Orzeꞌ nzhatswiꞌ Per kun xtu xaꞌ nak men cheꞌn Jesús zeꞌ roꞌ baꞌ.
4 Karre nzha rop bixaꞌ roꞌ baꞌ,
per galo laka xaꞌ zeꞌ mizhin roꞌ baꞌ lo Per.
5 Orzeꞌ ndixni xaꞌ leꞌn baꞌ,
une xaꞌ nax nab tsa lar kwaꞌn ngurël Jesús zeꞌ,
per nangayot xaꞌ leꞌn baꞌ.
6 No gax tich xaꞌ reꞌ mizhin Simón Per,
no tuli nguio Per leꞌn baꞌ,
orzeꞌ une xaꞌ nab tsa lar zeꞌ nax,
7 no nu une xaꞌ,
lar kwaꞌn ngurël yek Jesús or migaꞌch Me,
naxtsai tu lad,
chul laka nayëꞌche gax plo nax lar kwaꞌn ngurël Jesús.
8 Orzeꞌ nu xaꞌ kwaꞌn mizhin galo laka zeꞌ nguio leꞌn baꞌ.
Or une xaꞌ rë kureꞌ,
ngwayila xaꞌi.
9 Ter nzobniꞌ lo Yech cheꞌn Dios,
lëꞌ Jesús nakiꞌn ruban,
per nagat zobyek bixaꞌ kureꞌ.
10 Orzeꞌ ña rë men cheꞌn Me zeꞌ par lizh bixaꞌ.
Ngurulo Jesús lo Mari Madalen
11 No lëꞌ Mari miaꞌn roꞌ baꞌ,
kiyoꞌn xaꞌ;
no dub kiyoꞌn xaꞌ,
ndixni xaꞌ leꞌn baꞌ,
12 orzeꞌ une xaꞌ,
chop ganj nak lar bëo laka;
tu xaꞌ nzob plo una yek Jesús,
mbaino xtu xaꞌ nzob plo una niꞌ Me.
13 Lëꞌchi minabdiꞌzh rop ganj reꞌ lo Mari,
nzhab bixaꞌ:
―Unaꞌ,
¿chon kiyoꞌnal?
Unkab Mari:
―Kiyona porke naneta cho ñanu kwerp cheꞌp Señor da,
no naneta plo ngwalaꞌ bixaꞌi.
14 No laore milox midiꞌzh Mari kureꞌ,
lëꞌchi miëk xaꞌ al tich xaꞌ,
no une xaꞌ,
lëꞌ Jesús nzo zeꞌ,
per nangalibeꞌt xaꞌ chi Jesuze,
15 orzeꞌ nzhab Jesús lo xaꞌ:
―Unaꞌ,
¿chon kiyoꞌnal?
¿Cho kikwaꞌnal?
Per lëꞌ Mari mileꞌ xigab,
xaꞌ nikina rë ya nzhiꞌb zeꞌ xaꞌ reꞌ,
kuzeꞌ nzhab Mari lo xaꞌ reꞌ:
―Lëꞌ go,
chi go mbiꞌy kwerp cheꞌn Señor da,
bineu plo ngwalaꞌ goi,
par yakane.
16 Lëꞌchi nzhab Jesús:
―¡Mari!
Orzeꞌ miëk Mari,
milibeꞌ Mari Jesuze,
no kun widiꞌzh hebreo midiꞌzh Mari:
―¡Rabuni!
(widiꞌzh kwaꞌn gab Maestr).
17 Orzeꞌ nzhab Jesús:
―Nazentaꞌl da,
porke lëꞌda laore biꞌ plo nzho Xuza,
per bizë no guzhe lo rë men da,
lëꞌda biꞌ plo nzho Xuza,
Me nak ska Xuz go;
lo Dios da,
Me nak ska Dios cheꞌn go.
18 Orzeꞌ ngwayab Mari Madalene lo más rë men cheꞌn Jesús,
nzhab xaꞌ,
lëꞌ xaꞌ une Jesús,
mbaino nzhab xaꞌ rë kwaꞌn nzhab Jesús lo xaꞌ.
Ngurulo Jesús lo rë men cheꞌn Me
19 No mis zhë zeꞌ,
or mizhël la lyuo,
zhë galo laka cheꞌn sman,
nzhin rë men cheꞌn Jesús leꞌn yoꞌ,
naye nayaoꞌ roꞌi por nizheb bixaꞌ lo rë men Israel,
xaꞌ nak zhiꞌn.
Lëꞌchi nguio Jesús zeꞌ plo nzhin rë men cheꞌn Me,
no nguzo Me garol saoꞌ plo nzhin bixaꞌ,
no nzhab Me:
―¡Dios leꞌ ya go wen!
Jesús se aparece a los discípulos (Juan 20.19-31)
20 No or midiꞌzh Me kureꞌ,
orzeꞌ miluꞌ Me yaꞌ Me plo nguzob rë klab zeꞌ,
no taꞌ laxtoꞌ Me plo ndid xaꞌ lans,
orzeꞌ dox nizak laxtoꞌ rë men cheꞌn Me or une bixaꞌ Me.
21 Kuzeꞌ xtu wëlt nzhab Jesús:
―¡Dios leꞌ ya go wen!
Mbaino nela mixëꞌl Xuza da,
seꞌska xëla go.
22 Orzeꞌ milabi Me lo rë men cheꞌn Me,
no nzhab Me:
―Yo Sprit cheꞌn Dios laxtoꞌ go,
23 nes par or gab go,
gat nzëꞌbxkitraꞌ tu men,
orzeꞌ Dios micheꞌ la rë kwaꞌn nzëꞌb xki xaꞌ reꞌ;
per rë xaꞌ kwaꞌn gab go,
nacheꞌt Dios kwaꞌn nzëꞌb xki xaꞌ,
orzeꞌ saꞌ ka gake.
Une Max, walika nguruban Jesús
24 Lëꞌ Max nak tu xaꞌ nzho xid dub tu dusen men cheꞌn Jesús,
no nu nzhab men lë xaꞌ:
“Xaꞌ kwach”,
no gat nzot Max kun lëꞌ bixaꞌ or ngurulo Me lo bixaꞌ,
25 kuzeꞌ nzhab bixaꞌ lo Max:
―Lëꞌno une Señor cheꞌn be.
Per unkab Max:
―Chi nanen plo ngwa klab yaꞌ Me,
no chi nakon bikwen yaꞌn zeꞌ,
mbaino chi nayo yaꞌn plo ndid xaꞌ lans,
nayilatne.
26 Or nded xon ngubizh,
xtu wëlt migan rë men cheꞌn Jesús leꞌn yoꞌ zeꞌ,
orzeꞌ nu Max nzho xid bixaꞌ,
no naye nayaoꞌ roꞌ yoꞌ,
orzeꞌ nguio Jesús zeꞌ,
no nguzo Me garol saoꞌ plo nzhin bixaꞌ,
orzeꞌ nzhab Me lo bixaꞌ:
―¡Dios leꞌ ya go wen!
27 Tuli ka nzhab Jesús lo Max:
―Diꞌnu bikwen yaꞌl reꞌ,
no biwiꞌ yaꞌn;
no diꞌnu yaꞌl taꞌ laxtoꞌn reꞌ.
Nagaktraꞌl tu xaꞌ nen par yilai,
sino gok tu xaꞌ ñila da.
28 Mikab Max orzeꞌ:
―¡Go nak Señor da,
mbaino Dios da!
29 Nzhab Jesús:
―Por unel rë kureꞌ,
ngwayilal da.
Per rë xaꞌ ñila da ter gat ne xaꞌ da,
orzeꞌ nazhon nzha rë xaꞌ reꞌ kun Dios.
¿Por kwan mizob Juan kureꞌ lo yech?