Nguruban Jesús
28
Or nded zhë sabd zeꞌ xtu riyëꞌl,
Mari Madalen kun xtu Mari,
ngwatswiꞌ bixaꞌ roꞌ baꞌ plo migaꞌch Jesús.
2 Lëꞌchi miwin tu xo ro,
ngulali tu ganj cheꞌn Dios lo yibëꞌ,
nguzubi ganj reꞌ roꞌ baꞌ,
no mizubchi xaꞌ ke kwaꞌn nayaoꞌ roꞌi,
orzeꞌ nguzob xaꞌ lo ke zeꞌ.
3 Niluꞌ lo ganj reꞌ nela ki cheꞌn tu doꞌziꞌ gaꞌ,
mbaino xab xaꞌ,
bëo laka nela yeg gaꞌ.
4 Or une rë sondad xaꞌ kikina roꞌ baꞌ zeꞌ rë ganj reꞌ,
dox nizheb bixaꞌ maska nixiz bixaꞌ haxta ngwachin bixaꞌ,
miaꞌn bixaꞌ nela men ngut gaꞌ;
5 per nzhab ganj lo rë unaꞌ reꞌ:
―Nazhebt go,
lëꞌda nane ka lëꞌ go kikwaꞌn Jesús,
Me ngut lo krus.
6 Yent raꞌ Me reꞌ,
lëꞌ Me nguruban la,
nela xmod midiꞌzh ka Me lo go,
ter dëꞌ go,
biwiꞌ go plo nguxoꞌb Me.
7 Bizë go tuli,
wayab goi lo rë men cheꞌn Me,
lëꞌ Me nguruban;
no or ya go lazh men Galilea,
biwiꞌ go,
lëꞌ Me nzhubner la lo go;
zeꞌ ne go Me,
kimbëz la Me zhin go;
kureꞌ nzadnin lo go.
8 Orzeꞌ ñaoxoꞌn rë unaꞌ zeꞌ nzhayab bixaꞌi lo rë men cheꞌn Jesús;
dox nizheb bixaꞌ per nu ska dox nizak laxtoꞌ bixaꞌ por kureꞌ.
9 Lëꞌchi,
ngurulo Jesús lo biunaꞌ nez,
no nzhab Me:
“¡Wen ya go!”,
orzeꞌ nguzubi bixaꞌ lo Jesús,
nzhab bixaꞌ lo Me nazhon Me,
no ndeꞌzh bixaꞌ niꞌ Me,
10 orzeꞌ nzhab Jesús:
―Nazhebt go;
wayab go lo rë wecha,
ya bixaꞌ lazh men Galilea;
baꞌ ne bixaꞌ da.
Kwaꞌn midiꞌzh rë xaꞌ mikina roꞌ baꞌ
11 Dub ña rë unaꞌ zeꞌ,
lëꞌchi rë sondad xaꞌ mikina roꞌ baꞌ,
nzha bixaꞌ yezh Jerusalén,
par ngwayab bixaꞌ rë kwaꞌn ngok roꞌ baꞌ,
lo rë ngulëiꞌ xaꞌ nileꞌ mandad lo más rë ngulëiꞌ.
12 Orzeꞌ ngwadiꞌzhnu rë ngulëiꞌ zeꞌ,
rë xaꞌ nzo lo rë men Israel,
par miaꞌn bixaꞌ diꞌzh xmod leꞌ bixaꞌ,
no ndix bixaꞌ nayax dimi,
nkaꞌ rë sondad zeꞌ,
13 mbaino nzhab bixaꞌ:
―Saꞌ guzh go lo rë men:
“Rë xaꞌ nak men cheꞌn Jesús,
yëꞌl mbiꞌd bixaꞌ or naxnaa no,
miliwaꞌn bixaꞌ kwerp cheꞌn Jesús”,
14 no chi lëꞌ Pilat gon kureꞌ,
laꞌu no dizhnu xaꞌ par niyent kwan leꞌ xaꞌ kun go.
15 Orzeꞌ nguzen rë sondad zeꞌ dimi,
no mileꞌ bixaꞌ nela xmod nzhab ka rë xaꞌ reꞌ;
no rë widiꞌzh kwaꞌn michaoꞌ yek rë men reꞌ,
haxta zhë nalzhë,
seꞌgaka nidiꞌzh men Israele.
Kwaꞌn mikaꞌb Jesús lo rë men cheꞌn Me
16 Dub za chiꞌ bitub men cheꞌn Jesús,
ngwa bixaꞌ mont kwaꞌn ñaꞌn lazh men Galilea,
plo nzhab Jesús ya bixaꞌ.
17 Or une bixaꞌ Jesús,
nzho bixaꞌ nzhab lo Me,
lëꞌ Me nazhon,
no nzho bixaꞌ nangayilat chi lëꞌ Mei.
18 No nguzubi Jesús lo bixaꞌ,
nzhab Me:
―Nalse na nile mandad lo yibëꞌ no lo yizhyuo;
19 kuzeꞌ wa go,
gudiꞌzh go xtiꞌzha lo rë lo ben men yizhyuo par gak bixaꞌ men da,
no bililëiꞌ go bixaꞌ por lë Dios Xuz go,
no por lë Xgaꞌn Me,
mbaino por lë Sprit cheꞌn Dios;
20 no nu biluꞌ go lo bixaꞌ,
leꞌ bixaꞌ rë kwaꞌn milen mandad lo go;
no bitsila go,
na nzo kun rë men da dubtaꞌ,
haxta or lox yizhyuo.