Mbiꞌy bixaꞌ Jesús lo Pilat
27
Xtu riyëꞌl garziꞌl laka,
rë ngulëiꞌ xaꞌ nileꞌ mandad kun rë xaꞌ nzo lo rë men Israel,
mikwaꞌn bixaꞌ mod par gut bixaꞌ Jesús.
2 Naliꞌb Jesús mbiꞌy bixaꞌ Me lo Pilat,
xaꞌ nak gobiernador lo rë men Roma.
Judas Iscariote mbit yub xaꞌ xaꞌ
3 Judas,
xaꞌ mito Jesús,
or une xaꞌ nzhab rë ngulëiꞌ xaꞌ nileꞌ mandad,
kun rë xaꞌ nzo lo rë men Israel,
lëꞌ Jesús gat,
dox mizine xaꞌi.
Kuzeꞌ ngwazhireska xaꞌ dub gal bichiꞌ pes dimi plat lo rë xaꞌ reꞌ,
4 no nzhab Judas lo bixaꞌ:
―Dox nzëꞌb xkin lo Dios,
por michiꞌn tu men lo go por dimi,
tu xaꞌ yent kwan nzëꞌb par ñal gat xaꞌ.
Orzeꞌ nzhab rë xaꞌ reꞌ:
―¡Tlëꞌt no mikiꞌlal!
¡Kubaꞌ xkwentalx!
5 Or ngulubi Judas rë dimi zeꞌ leꞌn yadoꞌ,
tuli ka ña xaꞌ,
ngulo xaꞌ doꞌ yën xaꞌ,
yub xaꞌ mbit xaꞌ.
6 Orzeꞌ rë ngulëiꞌ xaꞌ nileꞌ mandad lo más rë ngulëiꞌ,
mikan bixaꞌ dimi zeꞌ,
orzeꞌ nzhab bixaꞌ:
―Dimi reꞌ nzhiꞌb de la,
lëꞌi ngox ngut men;
lo ley cheꞌn be nzobniꞌ,
nagakt yo dimi gat lëꞌ plo nzho dimi cheꞌn yadoꞌ.
7 Orzeꞌ miaꞌn bixaꞌ diꞌzh,
kun dimi zeꞌ,
ziꞌ bixaꞌ tlëꞌ yuo plo lë,
yuo cheꞌn xaꞌ nichaoꞌ rë kwaꞌn bitsiꞌn,
par gaꞌch rë men zit.
8 Kuzeꞌ ngulolë men yuo zeꞌ,
Yuo Ren,
haxta zhë nalzhë,
9 nes par ngok rë widiꞌzh kwaꞌn midiꞌzh profet Jeremías,
tu xaꞌ midiꞌzh por Dios,
or nzhab xaꞌ:
“Nguzen bixaꞌ gal bichiꞌ pes dimi plat,
pres kwaꞌn nzhab rë men Israel tsak men Da.
10 Kun dimi reꞌ,
nguziꞌ bixaꞌ yuo cheꞌn xaꞌ nichaoꞌ rë kwaꞌn bitsiꞌn,
nela xmod mileꞌ ka Dios mandad da.”
Jesús lo Pilat
11 Or michi bixaꞌ Jesús lo Pilat,
xaꞌ nak gobiernador,
nzhab Pilat lo Jesús:
―¿Chi lu nak rey cheꞌn rë men Israel?
Nkab Jesús:
―Yub go kine dai.
12 No or kikëꞌ rë xaꞌ reꞌ kixuꞌ Jesús;
rë ngulëiꞌ xaꞌ más nileꞌ mandad,
kun rë xaꞌ nzo lo rë men Israel,
yent kwan ngakab Me.
13 Lult minaꞌbdiꞌzh Pilat lo Jesús,
nzhab Pilat:
―Taxa,
¿chi gat kiyontal,
dox kwaꞌn kine rë xaꞌ reꞌ,
nakal?
14 Per yent kwan ngakab Jesús,
orzeꞌ xe miaꞌn Pilat tuli,
net xaꞌ kwan leꞌ xaꞌ.
Minaꞌb men, kë Jesús lo krus
15 No kad liꞌn or nzhal lani Pask,
kinu Pilat tu kostumbr,
niliyaꞌ xaꞌ tu men nzho lizhyiꞌb,
dike xaꞌ gab rë men.
16 No nzho tu miyiꞌ lë Barrabás lizhyiꞌb,
tu xaꞌ dox nzhoꞌb xtiꞌzh nakap.
17 Or migan nayax men lo Pilat,
par nabei,
cho xaꞌ liyaꞌ xaꞌ,
kuzeꞌ nzhab Pilat lo rë xaꞌ kikëꞌ kixuꞌ Jesús:
―¿Cho nzhakla go liyan?
¿Chi Jesús Barrabáze,
o Jesús xaꞌ lë Kriste?
18 Saꞌ nzhab Pilat porke ngwanu laxtoꞌ xaꞌ,
lëꞌ rë xaꞌ nak zhiꞌn zeꞌ,
michi Jesús por mal laxtoꞌ bixaꞌ.
19 Dub nzob Pilat plo nileꞌ xaꞌ yalgustis,
mixëꞌl unaꞌ cheꞌn xaꞌ tu abis lo xaꞌ,
nzhab unaꞌ:
“Naleꞌtal ni tu kwaꞌn kun miyiꞌ,
xaꞌ nileꞌ kwaꞌn nzhakla Dios baꞌ;
por lëꞌ xaꞌ,
dox nazheꞌb michaꞌ laxtoꞌn naꞌguxin.”
20 Per lëꞌ rë ngulëiꞌ,
xaꞌ más nileꞌ mandad,
kun rë xaꞌ nzo lo rë men Israel,
mileꞌ bixaꞌ gan,
mikiꞌl bixaꞌ men,
par naꞌb bixaꞌ lo Pilat,
liyaꞌ xaꞌ Barrabás,
no lëꞌ Jesús,
gab bixaꞌ gat.
21 Orzeꞌ nzhab Pilat xtu wëlt lo rë men:
―Di lo rop xaꞌ reꞌ,
¿cho xaꞌ nzhakla go,
liyan?
Nkab rë men:
―¡Barrabáze!
22 Per nzhab Pilat:
―Bai kun Jesús,
xaꞌ nzhab go lë Krist,
¿xmod gak xaꞌ?
Orzeꞌ rë men nkab:
―¡Kë xaꞌ lo krus!
23 Orzeꞌ nzhab Pilat:
―¿Per chon?
¿Kwan tu kwaꞌn gat lëꞌ mileꞌ xaꞌ reꞌ?
Per xtu wëlt nguruzhië rë men:
―¡Kë xaꞌ lo krus!
24 Or une Pilat,
yentraꞌ kwan nzhon rë men,
no haxta kun Pilat,
niyiꞌ la bixaꞌ,
orzeꞌ mileꞌ Pilat mandad ñëꞌd nits,
ndeꞌb yaꞌ xaꞌ dilant lo rë men,
no nzhab xaꞌ:
―Gat lëꞌt yeka xoꞌb kwaꞌn gat miyiꞌ baꞌ;
kubaꞌ xkwent go.
25 Orzeꞌ nkab rë men:
―¡Yek no xoꞌb kwaꞌn gat xaꞌ baꞌ,
mbaino yek rë xmëꞌd no!
26 Orzeꞌse miliyaꞌ Pilat Barrabás,
no lëꞌ Jesús,
mileꞌ xaꞌ mandad,
ngurële tich;
mbaino michi xaꞌ Jesús lo rë sondad cheꞌn xaꞌ par këꞌ bixaꞌ Jesús lo krus.
27 No mbiꞌy rë sondad Jesús roꞌ yalao kwaꞌn lë ‘pretorio’.
Zeꞌ migan pas xoꞌp gayoꞌ sondad román nakaꞌn lo Jesús.
28 Or nguloꞌ bixaꞌ xab Jesús,
migak bixaꞌ Me tu lar naxne,
chigab cheꞌn tu rey gaꞌ.
29 No mizuxkwaꞌ bixaꞌ tu koron yich par mizob bixaꞌi yek Jesús,
mbaino ngulo bixaꞌ tu bar yaꞌ Me lad direch,
orzeꞌ nguzuxib bixaꞌ,
kiyitnu bixaꞌ Me,
nzhab bixaꞌ:
―¡Rey cheꞌn rë men Israel,
par dubtaꞌ ban go!
30 No michuk bixaꞌ lo Jesús,
mbaino mis bar kwaꞌn nzho yaꞌ Me,
mikëꞌ bixaꞌi yek Me.
31 Or milox nguzhitnu bixaꞌ Jesús,
nguloꞌ bixaꞌ lar naxne zeꞌ yen Jesús,
orzeꞌ migak ska bixaꞌ Me xab Me,
orzeꞌ ñanu bixaꞌ Jesús par kë Me lo krus.
Nkë Jesús lo krus
32 Or nzharoꞌ bixaꞌ roꞌ yezh,
mizhëꞌl bixaꞌ tu miyiꞌ yezh Cirene xaꞌ lë Simón,
jwers mileꞌ rë sondad,
mbiꞌy xaꞌ reꞌ krus cheꞌn Jesús.
33 Orzeꞌ ñanu bixaꞌ Jesús plo lë Gólgota.
Widiꞌzh reꞌ gab,
Wes Yek Men Ngut.
34 Zeꞌ mizaꞌ bixaꞌ vin kwaꞌn noch mirra par go Jesús;
per or mileꞌ Me prebe,
nangot Mei.
35 Orzeꞌ mikëꞌ bixaꞌ Me lo krus,
no nguzhit bixaꞌ di cho leꞌ gan xab Me.
36 Zeꞌ nguzob rë sondad kikina par yent cho la Me lo krus.
37 No yek krus cheꞌn Jesús,
mikëꞌ bixaꞌ por kwan ngut Me,
no seꞌ mizob bixaꞌ:
“Xaꞌ reꞌ Jesus,
rey cheꞌn rë men Israel.”
38 No nu chop waꞌn mikëꞌ bixaꞌ lo krus orzeꞌ;
tu xaꞌ lad direch,
no xtu xaꞌ lad izkierd cheꞌn Jesús,
39 No rë xaꞌ nided zeꞌ,
maska nikwin bixaꞌ yek bixaꞌ,
kidiꞌzh bixaꞌ nakap lo Jesús,
40 nzhab bixaꞌ:
―¡Lu kwaꞌn nidiꞌzh,
chilal yadoꞌ,
no chontsa ngwizh,
kuxkwaꞌle xtu wëlt;
nal,
bileꞌ nagattal!
Chi lëꞌi walika,
nakal Xgaꞌn Dios,
nal,
¡gula lo krus baꞌ!
41 Seꞌska midiꞌzh rë xaꞌ reꞌ nakap lo Jesús:
rë ngulëiꞌ xaꞌ nileꞌ mandad,
kun rë xaꞌ niluꞌ ley,
mbaino kun rë xaꞌ nzo lo rë men Israel;
nzhab bixaꞌ:
42 ―Nayax men miliyak xaꞌ,
per kun lëꞌ xaꞌ yent kwan gak leꞌ xaꞌ.
No chi lëꞌ xaꞌ walika nak rey lo rë men Israel,
¡nal la xaꞌ lo krus,
nes par yila be xaꞌ!
43 Nidiꞌzh xaꞌ,
ñila xaꞌ Dios,
nal nabei chi zaknu Dios xaꞌ chi lëꞌ Dios wali nazhiꞌ xaꞌ.
¿Gat lëꞌ xaꞌ nidiꞌzh,
Xgaꞌn Dios xaꞌ?
44 No haxta rop waꞌn,
xaꞌ nikë lo krus tu gaꞌ lad cheꞌn Jesús,
midiꞌzh nakap lo Me.
Or ngut Jesús
45 Dizde garol ngubizh nguzublo mikao dub yizhyuo,
haxta las tres zhë midiꞌy,
46 no mis orzeꞌ,
paste las tres,
naye nguruzhië Jesús,
nzhab Me:
―¡Eloi,
Eloi!,
¿lama sabactani?
(Widiꞌzh reꞌ gab:
¡Dios da!
¡Dios da!,
¿chon milaꞌ nzëꞌb go da?)
47 No pla men nzhin zeꞌ mbin widiꞌzh reꞌ;
orzeꞌ nzhab bixaꞌ:
―Bingole,
Li kibezh xaꞌ reꞌ,
tu xaꞌ mixëꞌl Dios nzhala.
48 Orzeꞌ tuli ngwa tu xaꞌ ngwagazh tlëꞌ sponj leꞌn vin ni;
mizob xaꞌi yek tu yaxtil,
orzeꞌ michi xaꞌi roꞌ Jesús par nguꞌ Mei,
49 per nzhab más rë men:
―Bilaꞌ go nabei,
chi ziyiꞌd Li gaknu xaꞌ.
50 Orzeꞌ xtu wëlt nguruꞌzhië Jesús,
miziꞌ la Me,
ngut Me.
51 Lëꞌchi ngurëzla lar nikë leꞌn yadoꞌ plo lë santuar,
plo más nazhon,
chop lëꞌ ngoke tuli,
di al ya haxta al yët;
no miwin xo,
ngoꞌt bech leꞌn rë ke;
52 mixaꞌl leꞌn rë baꞌ,
nayax rë men cheꞌn Dios nguruban,
53 nguroꞌ bixaꞌ leꞌn baꞌ,
no dispwes di nguruban Jesús,
nguio bixaꞌ yezh Jerusalén,
mbaino une nayax men rë xaꞌ reꞌ.
54 Lëꞌ capitán Roma kun rë sondad cheꞌn xaꞌ,
rë xaꞌ kikina Jesús;
or une bixaꞌ,
lëꞌ xo miwin kun más rë kwaꞌn kiyak,
dox mizheb bixaꞌ,
orzeꞌ nzhab bixaꞌ:
―Walika,
Xgaꞌn Dios miyiꞌ reꞌ.
55 No nayax rë unaꞌ,
xaꞌ ngoknu Jesús,
dizde lazh men Galilea nzaꞌdkë bixaꞌ tich Me;
zit nzhin bixaꞌ,
kiwiꞌ bixaꞌ kwaꞌn nzhak zeꞌ.
56 Xid rë unaꞌ zeꞌ nzo Mari Madalen,
no Mari xnaꞌ Jakob mbaino xnaꞌ Che,
kun xnaꞌ rë xgaꞌn Zebedeo.
Migaꞌch Jesús
57 Or ngula yëꞌl,
orzeꞌ mizhin tu miyiꞌ rrik xaꞌ lë Che,
xaꞌ nzë yezh Arimatea,
no nu xaꞌ men cheꞌn Jesús.
58 Ngwa xaꞌ reꞌ lo Pilat par ngwanaꞌb xaꞌ kwerp cheꞌn Jesús,
orzeꞌ mileꞌ Pilat mandad,
zaꞌ bixaꞌi,
weiꞌ Che.
59 Or mila Che kwerp cheꞌn Jesús lo krus,
michël xaꞌi tu sab nambe kwaꞌn lë lar lino,
60 orzeꞌ mikaꞌch xaꞌ Me leꞌn tu baꞌ kub kwaꞌn nadeꞌn leꞌn ke;
orzeꞌ mitsaoꞌ xaꞌ roꞌi kun tu ke ro,
no ña xaꞌ.
61 No Mari Madalen kun xtu Mari,
nzob bixaꞌ roꞌ baꞌ plo migaꞌch Jesús.
Xaꞌ kikina roꞌ baꞌ plo migaꞌch Jesús
62 Xtu riyëꞌl,
or nded la zhë kwaꞌn nichaoꞌ rë men Israel kwaꞌn nzhao bixaꞌ lani Pask;
rë ngulëiꞌ xaꞌ nileꞌ mandad lo más rë ngulëiꞌ,
kun rë men fariseo,
ngwa bixaꞌ lo Pilat,
63 nzhab bixaꞌ:
―Lëꞌo,
nitsila no,
miyiꞌ xaꞌ nikide men zeꞌ,
or naga gat xaꞌ,
nidiꞌzh xaꞌ,
ngubizh yon di gat xaꞌ,
lëꞌ xaꞌ ruban.
64 Kuzeꞌ nal,
bixëꞌl go pla sondad cheꞌn go par kina roꞌ baꞌ,
haxta za yon ngubizh;
napaꞌ ya rë men cheꞌn xaꞌ,
yaliwaꞌn kwerp cheꞌn xaꞌ,
orzeꞌ diꞌzh rë men cheꞌn xaꞌ,
lëꞌ xaꞌ nguruban.
No kwaꞌn kide xaꞌ men reꞌ,
más gat lëꞌt gake ke or galo.
65 Orzeꞌ nzhab Pilat:
―Biꞌy go dike rë sondad nakiꞌn go,
par kina haxta plo nzhakla go.
66 Orzeꞌ ngwa bixaꞌ roꞌ baꞌ,
no mikëꞌ bixaꞌ sey cheꞌn gobier lo ke kwaꞌn miaoꞌ roꞌ baꞌ zeꞌ,
mbaino mizhin bixaꞌ rë sondad kikina roꞌ baꞌ.