Miaꞌn bixaꞌ diꞌzh xmod zen bixaꞌ Jesús
26
Or milox midiꞌzh Jesús kureꞌ,
nzhab Me lo rë men cheꞌn Me:
2 ―Lëꞌ go nane ka,
nzhak jwalt chop ngubizh par gal lani Pask,
mbaino lëꞌ men chi da,
na Xgaꞌn Dios,
no nak da tu men yizhyuo,
par këꞌ men da lo krus.
3 Leꞌn rë ngubizh zeꞌ,
lo luwe cheꞌn Caifás,
xaꞌ nak yub ngulëiꞌ ro,
zeꞌ migan rë ngulëiꞌ,
rë xaꞌ nileꞌ mandad xid más rë ngulëiꞌ,
no kun rë xaꞌ kwaꞌn niluꞌ ley,
mbaino kun rë xaꞌ nzo lo rë men Israel,
4 par miaꞌn bixaꞌ diꞌzh xmod zen bixaꞌ Jesús xlaꞌn par gut bixaꞌ Me,
no nu nzhab bixaꞌ:
5 ―Naleꞌt bei dub kiyak lani,
par nachëldil be men.
Tu unaꞌ michob aseit nax yek Jesús
6 No or nzo Jesús yezh Betania,
ngwatao Me lizh Simón xaꞌ nguzak tu yalyizh kwaꞌn lë lepra.
7 Or nzob Jesús lo mes,
mizhin tu unaꞌ kun tu bidr ónice kwaꞌn dox tsak;
leꞌne nzho aseit kwaꞌn lë nardo kwaꞌn viv,
no dox tsake,
no michob unaꞌ rëtsai yek Jesús.
8 Or une rë men cheꞌn Jesús kureꞌ,
niyiꞌ bixaꞌ,
no nzhab bixaꞌ:
—¿Chon mitsinu unaꞌ aseit baꞌ?
9 Ngak ngado aseit nax baꞌ nayax dimi,
orzeꞌ ngagaꞌz dimi zeꞌ,
ngakaꞌ rë men yent kwan nzhap.
10 Per or mbin Jesús kureꞌ,
nzhab Me:
―¿Chon niyiꞌ go lo unaꞌ reꞌ?
Dox tu kwaꞌn nazhon mileꞌ unaꞌ por da;
11 rë men yent kwan nzhap,
zilitaꞌ yo bixaꞌ xid go,
per na gat lëꞌt zilitaꞌ zon kun go.
12 Kwaꞌn mileꞌ unaꞌ reꞌ,
or michob unaꞌ aseit nax yeka,
mileꞌ xaꞌi par mizuxkwaꞌ xaꞌ kwerp da or gaꞌch da.
13 Walika kwaꞌn nin;
rë plo diꞌzh men widiꞌzh nazhon cheꞌn Dios por da,
nu ska kwaꞌn nazhon kwaꞌn mileꞌ unaꞌ reꞌ yët,
nes par rë men gon kwaꞌn mileꞌ unaꞌ reꞌ.
Ngox kaꞌ Judas Iscariote par michi xaꞌ Jesús
14 Orzeꞌ,
lëꞌ Judas Iscariote,
xaꞌ nzho xid za tu dusen men cheꞌn Jesús,
ngwa xaꞌ lo rë ngulëiꞌ ro,
par chi xaꞌ Jesús lo rë xaꞌ reꞌ,
15 no nzhab Judas:
―¿Plak kix go kan nes chiꞌn Jesús lo go?
Undix rë xaꞌ reꞌ nkaꞌ Judas,
gal bichiꞌ pes kwaꞌn plat,
16 no dizde orzeꞌ,
mikwaꞌn Judas xmod,
chi xaꞌ Jesús lo rë men zeꞌ.
Lult yëꞌl kwaꞌn ndao xcheꞌ Jesús kun za tu dusen men cheꞌn Me
17 No zhë galo laka cheꞌn lani Pask,
or nzhao men Israel pan yent levadur,
orzeꞌ nguzubi rë men cheꞌn Jesús,
par nzhab bixaꞌ lo Me,
plo chaoꞌ bixaꞌ kwaꞌn gao bixaꞌ yëꞌl lani Pask.
18 Orzeꞌ nzhab Jesús:
―Wa go leꞌn yezh;
zeꞌ yazhëꞌl go tu miyiꞌ,
no guzh go lo xaꞌ:
“Lëꞌ Maestr ne:
Lëꞌ or da nzhazhin la,
no lizhal len lani Pask kun rë men da.”
19 No mileꞌ rë men cheꞌn Me dike xmod nzhab Me;
zeꞌ michaoꞌ bixaꞌ kwaꞌn gao bixaꞌ yëꞌl zeꞌ,
par leꞌ bixaꞌ lani Pask.
20 Or ngula yëꞌl,
nzob Jesús lo mes kun za tu dusen men cheꞌn Me,
21 no dub kiyao bixaꞌ,
nzhab Me:
―Walika kwaꞌn nin,
yub tu rë go reꞌ,
gak xaꞌ chi da lo rë xaꞌ gut da.
22 Orzeꞌ dox miwin laxtoꞌ bixaꞌ,
nguzublo minaꞌbdiꞌzh tu gaꞌ bixaꞌ lo Jesús,
nzhab bixaꞌ:
―Lëꞌ go,
¿chi nai?
23 Per nkab Jesús:
―Mis tu rë xaꞌ kwaꞌn nikë pan cheꞌn leꞌn kwaꞌn nzha̱u̱ne.
24 Lëꞌ Xgaꞌn Dios Me nu nak tu men yizhyuo,
lëꞌ Me gat nela xmod nzobniꞌ ka lo Yech cheꞌn Dios,
per,
¡zheꞌb nalats nzha men chi Me!
Más wen nangalt xaꞌ zeꞌ yizhyuo reꞌ.
25 Orzeꞌ nzhab Judas,
xaꞌ kwaꞌn leꞌ kureꞌ:
―Maestr,
¿chi nai?
Nkab Jesús:
―Mis lu nei.
26 No dub kiyao bixaꞌ,
nguzen Jesús pan,
mizaꞌ Me xkix lo Dios,
orzeꞌ michix Mei,
no mizaꞌ Mei,
kaꞌ rë men cheꞌn Me,
mbaino nzhab Me:
―Kureꞌ nak kwerp da;
guzen goi,
gao go.
27 Orzeꞌ nguzen Me tu vas nits gub;
seꞌska mizaꞌ Me xkix lo Dios,
no mizaꞌ Mei,
kaꞌ rë men cheꞌn Me,
nzhab Me:
―Guꞌ rë go kureꞌ;
28 kureꞌ nak ren da kwaꞌn xon;
por lëꞌi yaꞌn Dios diꞌzh lo rë men da par cheꞌ Dios rë kwaꞌn nzëꞌb xki nayax men lo Me.
29 Lëꞌ da ni lo go,
nagoꞌtraꞌ nits gub xtu wëlt nela xmod kiyoꞌne nalreꞌ;
or goꞌne xtu wëlt kun go plo nileꞌ Dios mandad,
xaꞌla mod gake.
Midiꞌzh Jesús, lëꞌ Per gab, gat niliꞌbeꞌt xaꞌ Jesús
30 Or milox mikëꞌ bixaꞌ tu kant cheꞌn Salmo lo Dios,
orzeꞌ nzha bixaꞌ yek lom plo lë Olivo,
31 orzeꞌ nzhab Jesús lo rë men cheꞌn Me:
―Nal yëꞌl reꞌ,
lëꞌu laꞌ nzëꞌb da,
porke seꞌ nzobniꞌ lo Yech cheꞌn Dios:
“Lëꞌda gut miyiꞌ kwaꞌn nikina mbëkxiꞌl,
no lëꞌ rë mbëkxiꞌl reꞌchbe.”
32 Per or ruban da,
lazh men Galilea kwëza yiꞌd go.
33 Orzeꞌ nzhab Per:
―Ter rë xaꞌ reꞌ,
laꞌ nzëꞌb go,
per nase,
nalata go.
34 Orzeꞌ nzhab Jesús:
―Walika kwaꞌn nin lol,
mis nal yëꞌl reꞌ,
wëlt yon or lox gabal gat niliꞌbeꞌtal da,
orzeꞌ këꞌ tu nguid gai kant.
35 Per gargaꞌl nzhab Per:
―¡Ter tutsa gat da kun go,
per nalata go!
No seꞌska nzhab rë bixaꞌ.
Jesús minaꞌb lo Dios leꞌn huert plo lë Getsemaní
36 Lult ngwa bixaꞌ tu plo lë Getsemaní,
zeꞌ nzhab Jesús lo rë men cheꞌn Me:
―Reꞌga guzob go;
lëꞌ da nzhanaꞌb lo Dios.
37 No or nzhanu Me nab tsa Per,
kun Jakob,
mbaino Juan,
orzeꞌ tuli nguzublo niyentraꞌ jwers Me por tanta nizheb Me,
no netraꞌ Me kwan leꞌ Me,
38 orzeꞌ nzhab Me lo yon xaꞌ reꞌ:
―Nazheꞌb dox nizi da,
nela tu men naxiat gaꞌ;
biyaꞌn go reꞌ,
nagaꞌt go;
bikina go da.
39 Orzeꞌ nguzë Jesús xcheꞌp dilant;
zeꞌ ngoꞌt kuslo Me lo yuo,
no minaꞌb Me lo Dios,
nzhab Me:
―Xuza,
par Lu rëi gak leꞌl.
¿Chi zak kubchil da lo rë kwaꞌn nzadkë ticha reꞌ?
Per gat lëꞌt kwaꞌn nin kuzeꞌ gak,
nab tsa kwaꞌn nzhaklale.
40 Orzeꞌ nguiubre Jesús plo nzhin yon men cheꞌn Me reꞌ;
per une Me,
lëꞌ yon xaꞌ naxnaa la.
Orzeꞌ nzhab Me lo Per:
―¿Chi nguzen la mikaꞌl go?
¿Chi naxekt go ni tu rrat win tsa,
gaꞌna go par kina go da?
41 Bikina go go no gunaꞌb go lo Dios,
par nayachin go lo cheꞌn Mizhab.
Leꞌn laxtoꞌ go nzhakla ka go cheꞌn Dios,
per kwerp cheꞌn go gat nzhaklate.
42 Orzeꞌ ngwanaꞌb Jesús xtu wëlt lo Xuz Me Dios,
nzhab Me:
―Xuza,
chi nagak ded rë kwaꞌn nazheꞌb zaka reꞌ,
gak kwaꞌn nzhaklal.
43 Or nguiubre Jesús,
xtu wëlt naxnaa la rë men cheꞌn Me,
porke dox nzë mikaꞌl lo bixaꞌ.
44 Orzeꞌ milaꞌ Jesús naxnaa bixaꞌ,
wëlt mion ngwanaꞌb Me lo Xuz Me Dios,
seꞌgaꞌ nzhab Me.
45 Lult miëk Me plo nzhin yon men cheꞌn Me,
nzhab Me:
―¿Taxa,
seꞌ gaka naxnaa go no kileꞌ go diskans?
Biwiꞌ go,
lëꞌ or ngol la,
lëꞌ Xgaꞌn Dios,
Me nu nak tu men yizhyuo,
lëꞌ men chi Da lo rë men nzëꞌb xki lo Dios.
46 Waxche go,
chaꞌ go,
roꞌ be reꞌ;
biwiꞌ go,
lëꞌ xaꞌ chi da nzë la baꞌ.
Ngwagaꞌ Jesús
47 Seꞌgaka kidiꞌzh Jesús kureꞌ,
lëꞌchi mizhin Judas,
yub tu xaꞌ nzho xid za tu dusen men cheꞌn Jesús,
kun tu bëd men;
cho bixaꞌ nzen spad no más bixaꞌ nzen yarrot.
Rë xaꞌ reꞌ nzë por mandad cheꞌn rë ngulëiꞌ ro no por rë xaꞌ nzo lo rë men Israel.
48 No xaꞌ chi Jesús,
nzhab xaꞌ,
leꞌ xaꞌi kun tu señ:
“Xaꞌ chiroꞌn taꞌ kwats,
xaꞌ zeꞌi,
guzen go xaꞌ.”
49 Or nguzubi xaꞌ lo Jesús,
nzhab xaꞌ:
―¡Mal maestr!
―Wech,
kwaꞌn nzël,
tuli bileꞌi.
Orzeꞌ nguzubi men,
no nguzen bixaꞌ Jesús,
51 lëꞌchi tu rë xaꞌ nzo kun lëꞌ Me,
nguloꞌ spad cheꞌn,
michoꞌ xaꞌ nzha tu rë mos cheꞌn ngulëiꞌ ro,
52 orzeꞌ nzhab Jesús lo xaꞌ reꞌ:
―Guluꞌchaoꞌ spad cheꞌnal,
¡bilaꞌo unelai!,
porke rë xaꞌ nidil kun spad,
kun lëꞌskai gat xaꞌ.
53 ¿Chi nanetal,
lëꞌda gak naꞌb lo Xuza,
no tuli xëꞌl Me más di tu dusen mil ganj,
par dil kun rë men reꞌ?
54 Per,
¿xmod ka gak widiꞌzh kwaꞌn nzobniꞌ lo Yech cheꞌn Dios,
seꞌka nakiꞌn gak?
55 Orzeꞌ nzhab Jesús lo men nayax zeꞌ:
―¿Chon nzë go kun spad mbaino kun yarrot?
¿Chigab tu men waꞌn zen go?
Zilitaꞌ nguzon lo luwe cheꞌn yadoꞌ,
milun widiꞌzh cheꞌn Dios lo go,
no nangazent go da.
56 Per rë kureꞌ nzhak par gak rë kwaꞌn mizobniꞌ rë profet,
rë xaꞌ midiꞌzh por Dios.
Orzeꞌ,
rë men cheꞌn Jesús mikëꞌ karre,
milaꞌ nzëꞌb bixaꞌ Me.
Mizhin Jesús lo rë gustis men Israel, rë xaꞌ más tsak
57 Orzeꞌ mbiꞌy bixaꞌ Jesús lo Caifás,
ngulëiꞌ ro;
plo nzhin rë xaꞌ niluꞌ ley,
kun rë xaꞌ nzo lo rë men Israel.
58 No lëꞌ Per zit-zit nzhakë tich Jesús,
haxta mizhin xaꞌ lo luwe cheꞌn ngulëiꞌ ro.
Orzeꞌ nguzob Per xid rë xaꞌ nikina yadoꞌ,
par kilaꞌch Per,
nabei kwan paꞌ liꞌnu bixaꞌ Jesús.
59 Rë ngulëiꞌ ro,
no rë xaꞌ nzo lo rë men Israel,
mbaino rë gustis xaꞌ más tsak,
kikwaꞌn bixaꞌ tu men,
këꞌ kixuꞌ Jesús,
tu kwaꞌn ñal gat Me,
par gut bixaꞌ Me.
60 Per yent kwan ngane bixaꞌ nak Jesús,
ter nayax men kikëꞌ kixuꞌ Me.
Per lult mizhin xchop xaꞌ kwaꞌn nzhab:
61 ―Mbin no midiꞌzh xaꞌ baꞌ,
nzhab xaꞌ:
“Na chil yadoꞌ cheꞌn Dios,
mbaino chontsa ngubizh,
kuxkwane xtu wëlt.”
62 Orzeꞌ nguzuli ngulëiꞌ ro,
par nzhab xaꞌ lo Jesús:
―¿Chon gat nikabal?
Biwiꞌ,
kwan kine rë xaꞌ reꞌ nakal.
63 Per yent kwaꞌn ngakab Jesús.
Orzeꞌ minabdiꞌzh ngulëiꞌ ro xtu wëlt,
nzhab xaꞌ:
―Por Dios,
Me naban par dubtaꞌ,
bine lo no,
chi lu ka nak Krist,
Xgaꞌn Dios.
64 Orzeꞌ nzhab Jesús:
―Yub go ne dai.
Per nin lo rë go,
lëꞌ go ne,
Xgaꞌn Dios,
Me nu nak tu men yizhyuo;
lëꞌ Me zob lad direch cheꞌn Dios,
Me nileꞌ mandad lo rëi;
mbaino ne go,
lëꞌ da yal leꞌn tu xkao lo yibëꞌ.
65 Orzeꞌ michëz ngulëiꞌ ro xab,
nela tu señ,
lëꞌ Jesús midiꞌzh tu kwaꞌn nakap par lo Dios.
Orzeꞌse nzhab xaꞌ:
―Rë go mbin,
lëꞌ xaꞌ midiꞌzh tu kwaꞌn nakap lo Dios.
¿Kwan raꞌ gakla be,
ne men,
xtu kwaꞌn nak xaꞌ reꞌ?
Rë go mbin kwaꞌn midiꞌzh xaꞌ.
66 Nal,
¿kwan ne go ñal xaꞌ?
Orzeꞌ nkab rë men zeꞌ:
―Nzhap xaꞌ dol,
no ñal gat xaꞌ por kubaꞌ.
67 Orzeꞌ michuk bixaꞌ lo Jesús,
no ndin men Me;
mitsaoꞌ bixaꞌ lo Me orzeꞌ ndich men roꞌ Me,
68 no nzhab bixaꞌ:
―Chi walika lu nak Krist,
¡guroꞌ divin cho ndinal,
nabei!
Nzhab Per, gat nilibeꞌt xaꞌ Jesús
69 Dub kiyak rë kureꞌ,
lëꞌ Per nzob al tich,
lo luwe,
lëꞌchi nguzubi unaꞌ nak mos cheꞌn ngulëiꞌ ro lo Per,
nzhab unaꞌ:
―Nu ka lu,
nikizëꞌ kun Jesús,
xaꞌ nzë Galilea.
70 Per dilant lo rë nak men nzhin zeꞌ,
nzhab Per lo unaꞌ:
―¡Gat nutaꞌ da!
¡Neta kwan kidiꞌzhal you!
71 Or nguroꞌ Per roꞌ yoꞌ,
une xtu kriad cheꞌn ngulëiꞌ ro Per,
nzhab unaꞌ lo más rë men nzhin zeꞌ:
―¡Lëꞌ nu ka xaꞌ reꞌ,
nikizë kun Jesús Nazareno!
72 Per xtu wëlt mizeꞌt Per Dios,
nzhab Per:
―Lë Dios,
gat nilibeꞌtaꞌ xaꞌ baꞌ.
73 Guzhëla di zeꞌ,
pla rë xaꞌ nzhin zeꞌ nguzubi lo Per,
nzhab bixaꞌ:
―¡Walika,
nukal nak tu rë men cheꞌn xaꞌ baꞌ,
porke dox nakbeꞌi di xmod nidiꞌzhal namás!
74 Orzeꞌ xtu wëlt mizeꞌt xaꞌ Dios,
nzhab xaꞌ:
―¡Lë Dios,
walika,
gat nilibeꞌtaꞌ xaꞌ baꞌ!