Kwent cheꞌn chiꞌ unaꞌ yeꞌn
25
’No nu plo nileꞌ Dios mandad nak nela kwent cheꞌn chiꞌ unaꞌ yeꞌn,
xaꞌ kinu kwaꞌn nizini kun aseit,
par nzha bixaꞌ jwandang.
Dub kimbëz bixaꞌ zhin miyiꞌ xaꞌ nak cheꞌn jwandang zeꞌ,
2 gaiꞌ unaꞌ yeꞌn reꞌ,
xaꞌ naroꞌb laxtoꞌ,
mbaino zigaiꞌ unaꞌ yeꞌn,
xaꞌ natsin.
3 Rë unaꞌ yeꞌn,
xaꞌ naroꞌb laxtoꞌ reꞌ,
nzhanu ka bixaꞌ kwaꞌn nizini,
per nangweiꞌt bixaꞌ xcheꞌp aseit part par yo leꞌn kwaꞌn nizini kwaꞌn nzen bixaꞌ.
4 Per rë unaꞌ natsin reꞌ,
nzhanu bixaꞌ kwaꞌn nizini no part ka nzhanu bixaꞌ xcheꞌp aseit.
5 No por dox milëꞌ xaꞌ nak cheꞌn jwandang reꞌ,
orzeꞌ rë unaꞌ yeꞌn zeꞌ nzë mikaꞌl lo,
no nguzen mikaꞌl bixaꞌ.
6 Paste garol yëꞌl,
mien nibizhyë tu men:
“¡Biwiꞌ go,
lëꞌ xaꞌ nak cheꞌn jwandang mizhin la!
¡Guroꞌ rë go par kwin go kun lëꞌ xaꞌ!”
7 Orzeꞌ rë unaꞌ yeꞌn ngwaxche,
mitsinki bixaꞌ kwaꞌn nizini reꞌ,
8 orzeꞌ nzhab rë unaꞌ yeꞌn,
xaꞌ naroꞌb laxtoꞌ zeꞌ,
lo rë unaꞌ natsin reꞌ:
“Tatu wen gak go,
neꞌ go cheꞌp aseit cheꞌn go kaꞌ no,
porke kwaꞌn kizini no reꞌ,
nzadlox aseit leꞌne.”
9 Orzeꞌ nzhab rë unaꞌ natsin zeꞌ:
“Naneꞌt noi,
nzha ska nagale par no.
Neka waziꞌ goi par go.”
10 No dub nzhaziꞌ rë unaꞌ zeꞌ aseit par lëꞌ bixaꞌ,
lëꞌchi mizhin miyiꞌ gak jwandang cheꞌn zeꞌ,
no za gaiꞌ unaꞌ natsin nguio leꞌn yoꞌ kun lëꞌ miyiꞌ,
orzeꞌ miaoꞌ roꞌ yoꞌ.
11 No guzhëla zeꞌ,
mizhin rë unaꞌ yeꞌn,
rë xaꞌ naroꞌb laxtoꞌ zeꞌ,
roꞌ yoꞌ;
orzeꞌ nzhab bixaꞌ:
“¡Señor,
señor!
¡Bixaꞌl go roꞌ yoꞌ yo no!”
12 Orzeꞌ nzhab miyiꞌ nak cheꞌn jwandang zeꞌ:
“Walika kwaꞌn nin,
nalibeꞌtaꞌ go.”
13 Kuzeꞌ nzhab Jesús:
―Gok go natsin,
porke nanet go cho zhë no ni or yala.
Kwent cheꞌn dimi
14 ’No nu ska,
plo nileꞌ Dios mandad nak nela xmod mileꞌ tu miyiꞌ;
jwaltraꞌ di roꞌ xaꞌ lazh xaꞌ tu tiemp,
ngurezh xaꞌ rë mos cheꞌn xaꞌ par milaꞌ xaꞌ rë dimi cheꞌn xaꞌ,
kë rë xaꞌ reꞌ zhiꞌn kun lëꞌi.
15 ’Lo tu xaꞌ milaꞌ xaꞌ gaiꞌ mile,
no lo xtu xaꞌ milaꞌ xaꞌ chop mile,
mbaino lo xtu xaꞌ milaꞌ xaꞌ tu mile;
lo tu gaꞌ rë mos milaꞌ xaꞌ dimi kwaꞌn zuꞌtsa bixaꞌ,
orzeꞌ nzha xaꞌ nak cheꞌne.
16 No mos kwaꞌn miaꞌnnu gaiꞌ mile,
tuli ka unkë xaꞌ zhiꞌn kun lëꞌi,
no mileꞌ xaꞌ gan xtu gaiꞌ mile.
17 No saꞌ ska mos xaꞌ miaꞌnnu chop mile,
mileꞌ xaꞌ gan xchop mile.
18 Per mos xaꞌ miaꞌnnu tu miltsai,
ndeꞌn xaꞌ tu yeꞌr leꞌn yuo par ngulukaꞌch xaꞌ dimi cheꞌn xaꞌ nileꞌ mandad lo xaꞌ.
19 ’No dox la xche nzhai,
lëꞌchi ñëꞌd xaꞌ nileꞌ mandad lo rë mos,
orzeꞌ ngurezh xaꞌ rë mos cheꞌn xaꞌ par minaꞌb xaꞌ kwent lo tu gaꞌ bixaꞌ.
20 Galo laka,
nded xaꞌ miaꞌnnu gaiꞌ mile,
mizaꞌ xaꞌ zigaiꞌ mile kwaꞌn mileꞌ xaꞌ gan,
no nzhab xaꞌ:
“Lëꞌo,
go milaꞌ gaiꞌ mile lon,
per biwiꞌ go,
lëꞌ xtimi go mileꞌ gan xtu gaiꞌ mile dimás.”
21 Orzeꞌ nzhab xaꞌ nileꞌ mandad lo xaꞌ:
“Lëꞌska lëꞌ kwaꞌn mileꞌl,
mos wenal mbaino nzhonal diꞌzh.
Kun cheꞌptsai,
wen mileꞌl;
lëꞌda ne kwaꞌn más kwaꞌro kaꞌl.
Guded lizha,
no bizak laxtoꞌ kuda.”
22 Orzeꞌ nded xtu mos xaꞌ miaꞌnnu chop mile,
nzhab xaꞌ:
“Lëꞌo,
go milaꞌ chop mile lon,
mbaino lëꞌ xchop mil xine reꞌ kwaꞌn mileꞌi gan.”
23 Orzeꞌ nzhab xaꞌ nileꞌ mandad lo xaꞌ:
“Lëꞌska lëꞌ kwaꞌn mileꞌl,
mos wenal mbaino nzhonal diꞌzh.
Kun cheꞌptsai,
wen mileꞌl;
lëꞌda ne kwaꞌn más kwaꞌro kaꞌl.
Guded lizha,
no bizak laxtoꞌ kuda.”
24 Per or nded mos kwaꞌn miaꞌnnu tu mile,
nzhab mos lo xaꞌ nileꞌ mandad reꞌ:
“Lëꞌo,
na nzhakbeꞌ go,
go nak tu men ninaꞌb kwent dimás,
no nilits go yalgoꞌn plo gat nzhaꞌnt go,
mbaino niguchaoꞌ go kwaꞌn gat lëꞌ cheꞌn go.
25 Kuzeꞌ,
mizheb da lo go,
nguluꞌcha̱u̱a̱ dimi cheꞌn go leꞌn yuo,
per nal lëꞌi reꞌ.”
26 Orzeꞌ nzhab xaꞌ nileꞌ mandad lo mos reꞌ:
“¡Tatu nakapal mbaino jlojal!
Chi lëꞌl nane,
nak da tu men ninaꞌb kwent dimás,
no nilitsa plo gat nzhaꞌnta,
mbaino nigucha̱o̱ kwaꞌn gat lëꞌ cheda,
27 orzeꞌ,
¿chon ska nangagol dimi da bank par ngaleꞌi gan xine?”
28 Orzeꞌ nzhab xaꞌ nileꞌ mandad zeꞌ lo más xaꞌ nzhin zeꞌ:
“Gulat go dub tu mil dimi baꞌ lo xaꞌ,
no bizaꞌ goi kaꞌ mos xaꞌ kinu chiꞌ mile baꞌ,
29 porke xaꞌ mileꞌ lëꞌtsa lëꞌ kun kwaꞌn mizan nkaꞌ xaꞌ,
xaꞌ zeꞌ zan más nayaxe kaꞌ;
per xaꞌ mileꞌ gat lëꞌ kun kwaꞌn mizan nkaꞌ xaꞌ,
ter cheꞌptsa kwaꞌn kinu xaꞌ,
lëꞌi kubchin lo xaꞌ.
30 Orzeꞌ walaꞌ go mos xaꞌ nazuꞌt reꞌ al tich lo nakao,
plo nzho yalnawin no yalne,
haxta kwezh lëi mos.”
Or gab Jesús xmod gak kun tu gaꞌ men
31 ’Or yiꞌd Xgaꞌn Dios,
Me nu nak tu men yizhyuo,
kun rë yalnazhon no kun rë ganj cheꞌn Xuz Me,
par zob Me plo nazhon,
32 mbaino rë men yizhyuo kwin lo Me par lëꞌ Me men cheꞌn Me xid más rë men,
nela nigoꞌ men mbëkxiꞌl xid rë chib;
33 lëꞌ lad direch cheꞌn Me zhin Me rë men cheꞌn Me xaꞌ nak nela mbëkxiꞌl gaꞌ,
no lëꞌ lad skierd cheꞌn Me zhin Me rë men xaꞌ nak nela chib gaꞌ.
34 Orzeꞌ gab rey lo rë xaꞌ nzhin lad direch cheꞌn Me:
“Dëꞌ go,
porke go nak xaꞌ niwiꞌ Xuza wen lo,
par gal go rë kwaꞌn kinu Me par go dizde or naga yuxkwaꞌ yizhyuo,
35 porke or milaꞌn da,
mineꞌ go kwaꞌn nda̱u̱;
no or mizeiꞌ laxtoꞌn,
mineꞌ go kwaꞌn nguꞌn;
mbaino or ngok da nela tu men nzë zit,
mineꞌ go tu plo miaꞌn da;
36 no or niyen xaba,
mineꞌ go kwaꞌn ngoka;
no or ngokne da,
mbiꞌdtswiꞌ go ma da;
mbaino or nguioꞌn lizhyiꞌb,
mbiꞌdtswiꞌ go lon.”
37 Orzeꞌ gab rë xaꞌ mileꞌ kwaꞌn nzhakla Dios:
“Lëꞌo,
¿pok une no milaꞌn go,
no mineꞌ no kwaꞌn ndao go?,
o,
¿pok une no,
mizeiꞌ laxtoꞌ go,
no mineꞌ no kwaꞌn nguꞌ go?,
38 mbaino,
¿pok une no nkizë go nela tu men zit gaꞌ no mineꞌ no tu plo miaꞌn go?,
o,
¿pok miaꞌn go niyent xab go no mineꞌ no kwaꞌn ngok go?,
39 o,
¿pok une no ngokne go,
o nguio go lizhyiꞌb,
mbaino mbiꞌdtswiꞌ no ma go?”
40 Orzeꞌ lëꞌ rey gab:
“Walika kwaꞌn nin,
rë kwaꞌn mileꞌ go por tu rë wecha,
xaꞌ chigab natsakt beꞌs,
kun na mileꞌ goi.”
41 ’Orzeꞌ gab rey lo rë xaꞌ nzhin lad skierd cheꞌn Xaꞌ:
“Chi go lon,
go xaꞌ nzhiꞌb de;
bizë go plo ñol bël kwaꞌn nayot yal,
kwaꞌn ngokxaoꞌ par Mizhab no par rë ganj cheꞌn xaꞌ,
42 porke or milaꞌn da,
nanganeꞌt go kwaꞌn nga̱u̱;
no or mizeiꞌ laxtoꞌn,
nanganeꞌt go kwaꞌn ngoꞌn;
43 no nkizëꞌn nela tu men zit gaꞌ,
no nanganeꞌt go tu plo ngayana;
ngok jwalt xaba,
no nanganeꞌt go lar ngaka;
mbaino ngokne da no nguioꞌn lizhyiꞌb,
nangayiꞌdtsiꞌt go ma da.”
44 Orzeꞌ gab rë men zeꞌ:
“Lëꞌo,
¿pok une no go milaꞌn go,
o nizëiꞌ laxtoꞌ go,
o nkizë go nela tu men zit gaꞌ,
u or ngok jwalt xab go,
o ngokne go o nguio go lizhyiꞌb,
mbaino ngaknut no go?”
45 Orzeꞌ lëꞌ rey gab lo bixaꞌ:
“Walika kwaꞌn nin,
por nangaknu go ni tu rë men nzhin reꞌ,
xaꞌ nileꞌ kwaꞌn nzhapa,
ter chigab natsakt xaꞌ beꞌs,
no por mileꞌ go saꞌ kun lëꞌ bixaꞌ,
kuna mileꞌ goi.”
46 Rë men reꞌ bi plo zakzi bixaꞌ par dubtaꞌ,
mbaino rë xaꞌ mileꞌ kwaꞌn nzhakla Dios,
lëꞌ bixaꞌ ban par dubtaꞌ kun Dios.