Midiꞌzh Jesús, lëꞌ yadoꞌ Jerusalén bil
24
Or nzharoꞌ Jesús leꞌn yadoꞌ,
nguzubi pla rë men cheꞌn Me lo Me,
nzhab bixaꞌ,
tatu chul yadoꞌ reꞌ,
kun más rë yoꞌ cheꞌne,
2 per nzhab Jesús:
―¿Chi niwiꞌ go por chule?
Walika kwaꞌn nin,
lëꞌ zhë zhin,
ni tu rë ke kwaꞌn nakxaoꞌwe reꞌ,
nayaꞌnte tich weche;
rëi bil.
Rë señ kwaꞌn gak or jwaltraꞌ lox yizhyuo
3 Or nzha bixaꞌ yek lom kwaꞌn lë Olivos,
dub nzob Jesús zeꞌ,
lëꞌchi nguzubi nab rë men cheꞌn Me lo Me,
par nzhab bixaꞌ lo Me:
―Bine go lo no,
¿pok gak rë kwaꞌn midiꞌzh go baꞌ?,
no,
¿kwan paꞌ yo yizhyuo or nzhazhin la yëꞌd go xtu wëlt yizhyuo?,
mbaino,
¿kwan paꞌ gak yizhyuo or nzhazhin la loxe?
4 Orzeꞌ nzhab Jesús:
―Neu nakide men go,
5 lëꞌ nayax men yo xaꞌ diꞌzh:
“Na nak Krist”,
no nayax men kide bixaꞌ.
6 Rë plo gon go kidil men,
per yent kwan zheb go,
lëꞌ rë kureꞌ nakiꞌn gak per jwalt raꞌ lox yizhyuo.
7 Lëꞌ tu gubier dil kun xtu gubier,
no tu yezh kun xtu yezh dil,
mbaino rë plo yo yalwin no win xo.
8 Per laore lo yalne reꞌ,
kwaꞌn yo yizhyuo reꞌ,
nela yalne kwaꞌn nine tu unaꞌ gal xin gaꞌ.
9 ’Lëꞌ men zen go no weiꞌ bixaꞌ go lo rë gustis;
lëꞌ bixaꞌ gut go,
mbaino rë men yiꞌ ne go por nak go men da.
10 Leꞌn rë zhë zeꞌ,
nayax men da nayilat raꞌ bixaꞌ da,
mis lëꞌ bixaꞌ chi más bixaꞌ par gut rë xaꞌ nak zhiꞌn bixaꞌ,
mbaino yiꞌ bixaꞌ ne bixaꞌ wech bixaꞌ.
11 No nu yo nayax men,
xaꞌ chigab walika tu profet xaꞌ nidiꞌzh por Dios,
mbaino kide bixaꞌ nayax men.
12 No por dox yar rë xaꞌ laꞌ ley cheꞌn Dios tu lad,
por nayiꞌlazh bixaꞌ,
kuzeꞌ nayax men laꞌ nazinet raꞌ laxtoꞌ bixaꞌ men.
13 Per xaꞌ zo naye lo kwaꞌn ñila xaꞌ Da dub nzhak rë kureꞌ,
xaꞌ reꞌ gap yalnaban dubtaꞌ kun Dios,
14 no dub yizhyuo,
yadiꞌzh men xmod yo men plo nileꞌ Dios mandad,
nes par gon rë lo ben mene,
orzeꞌ lox yizhyuo.
Or gak kureꞌ, ñal këꞌ men karre
15 No nu nzhab Jesús:
—Seꞌ mizobniꞌ profet Daniel.
Tu ngubizh lëꞌ men yalaꞌ tu gon dox gat nambet leꞌn yadoꞌ cheꞌn Dios plo más nazhon.
Xaꞌ goꞌl kureꞌ nakiꞌn zobyek xaꞌi.
16 Orzeꞌ rë men xaꞌ nzho lazh men Judea,
nakiꞌn këꞌ bixaꞌ karre,
bi bixaꞌ dan,
17 no rë xaꞌ nikë yek yoꞌ leꞌn rë ngubizh zeꞌ,
nazaꞌt la bixaꞌ par koꞌ bixaꞌ rë cheꞌn bixaꞌ leꞌn yoꞌ;
18 no rë xaꞌ nzo dan,
nazaꞌt yubre bixaꞌ lizh bixaꞌ yakaꞌ bixaꞌ xab bixaꞌ;
19 mbaino rë unaꞌ nakxin no rë unaꞌ nakaꞌ mëꞌdoꞌ rë zhë zeꞌ,
zheꞌb nalats nzha bixaꞌ.
20 Binaꞌb go lo Dios par nagak kureꞌ rë mbëoꞌ nayag,
no ni zhë kwaꞌn nayiꞌ kë men zhiꞌn,
21 porke dox nazheꞌb kwaꞌn ne men rë zhë zeꞌ,
rë kwaꞌn laltaꞌ nagat ne men dizde nguiuxkwaꞌ yizhyuo,
no ni nayoraꞌ ne mene.
22 Chi lëꞌ Dios nakwëꞌzt raꞌ rë kureꞌ,
rë zhë zeꞌ,
orzeꞌ yot men leꞌ gan loi;
per lëꞌ Dios leꞌ kwëꞌze,
por rë xaꞌ ngule Dios,
nak men cheꞌn Me.
23 ’No chi cho ne lo go,
leꞌn rë ngubizh zeꞌ:
“Biwiꞌ go;
lëꞌ Krist nzo reꞌ”,
o “Lëꞌ Krist baꞌ”,
nayilat goi.
24 Lëꞌ nayax men yo,
kide bixaꞌ men,
gab bixaꞌ lëꞌ bixaꞌ Krist,
no nu gab bixaꞌ,
nidiꞌzh bixaꞌ por Dios;
haxta leꞌ bixaꞌ nayax rë kwaꞌn chigab nazhon par kide bixaꞌ men,
no haxta nu rë men xaꞌ ngule Dios gak men cheꞌn Me,
nzho rriez kide bixaꞌ.
25 Biwiꞌ go,
nes par or gak rë kureꞌ,
non la goi (nane la goi).
26 Kuzeꞌ,
chi cho ne lo go:
“Biwiꞌu,
lëꞌ Krist nzo leꞌn yuo bizh”,
nayilat goi;
o chi ne bixaꞌ lo go:
“Biwiꞌ go,
lëꞌ Me nzo leꞌn yoꞌ reꞌ”,
nayilat ska goi,
27 porke nela or nine men nzhaꞌ tu doꞌziꞌ,
niziniy tu lad no xtu lad lo yibëꞌ,
seꞌtaꞌ ne rë men or yala.
28 Nela or nine men tu plo nidal ngulbech,
zeꞌ sigur ka nax tu ma ngut.
Or yëꞌd Krist xtu wëlt yizhyuo
29 ’Or lox rë yalzi kwaꞌn yo yizhyuo,
orzeꞌ tuli ka kao lo ngubizh,
no nazinit raꞌ mbëoꞌ,
mbaino rë mbël lo yibëꞌ gab;
no haxta xiz rë kwaꞌn nzho lo yibëꞌ.
30 Orzeꞌ luxoꞌb señ cheꞌn Xgaꞌn Dios Me nu nak tu men yizhyuo,
rë ben men yizhyuo goꞌn di zheb or ne bixaꞌ yala leꞌn xkao par len mandad lo rëi,
kun biani ro cheꞌn yalnazhon da.
31 No or yen kwezh tu trompet nayë,
xëla rë ganj Da par kan rë men ngulen dap lad lo yizhyuo,
dizde tu roꞌ haxta xtu roꞌ.
32 ’Or niwiꞌ go lo ya nzhaoꞌ nzë bixiche,
nane la go,
lëꞌ mbëoꞌ nëiꞌ nzhazhin.
33 No seꞌgaꞌ,
or ne go kiyak rë kwaꞌn yizhyuo;
lëꞌ go nane la,
lëꞌda nzhazhin la yal;
nzo la roꞌ yoꞌ.
34 Walika kwaꞌn nin lo go,
rë kureꞌ gak antis dike gat rë men xaꞌ nzho orzeꞌ.
35 Yibëꞌ no yizhyuo lëꞌi lox;
per widiꞌzh da,
par dubtaꞌ yoi.
36 Per rë ngubizh or gak rë kwaꞌn yizhyuo,
yent cho nanei;
ni rë ganj yibëꞌ,
no ni Na;
tugaka Xuza nane poke.
37 ’No nela rë zhë or miban Noé,
seꞌtaꞌ gak zhë or yala.
38 Leꞌn rë zhë zeꞌ,
or naga la yiu nazheꞌb,
ndao men,
nguꞌ men,
ngok jwandang cheꞌn men,
no mizaꞌ men xchaꞌp men ngok jwandang cheꞌn haxta zhë or nguio Noé leꞌn yoꞌya,
39 no ni xigab nangaleꞌ bixaꞌ,
lëꞌchi ngula yiu nazheꞌb,
miloꞌxe rë nak bixaꞌ;
seꞌska rë men nal reꞌ,
ni xigab naleꞌ bixaꞌ,
lëꞌchi ne bixaꞌ ruxoꞌba.
40 Leꞌn rë zhë zeꞌ,
chop miyiꞌ nzo dan;
tu miyiꞌ wë̱i̱ñ,
lëꞌ xtu miyiꞌ yaꞌn;
41 o chop unaꞌ kiyo;
tu unaꞌ wë̱i̱ñ,
lëꞌ xtu unaꞌ yaꞌn.
42 ’Kuzeꞌ bikina go go,
porke nanet go,
zhë or yala.
43 Per nane ka go,
chi tu xaꞌ nak lizh tu yoꞌ,
nzhon xaꞌ cho or yo waꞌn lizh xaꞌ yëꞌl,
lëꞌ xaꞌ kina par yent cho liwaꞌn lizh xaꞌ.
44 Kuzeꞌ bikina go go,
porke lëꞌda yal zhë naleꞌt go xigab.
Mos wen no mos nakap
45 ’Lëꞌ go nane ka,
tu mos nzhon diꞌzh no natsin;
or nizo xaꞌ nileꞌ mandad mos reꞌ par kina lizh xaꞌ,
no zaꞌ mos reꞌ kwaꞌn gao más tsaꞌ mos xaꞌ,
46 wen nzha mos reꞌ,
or yëk xaꞌ nileꞌ mandad xaꞌ,
lëꞌ xaꞌ ne,
kileꞌ ka mos reꞌ kwaꞌn ñal leꞌ xaꞌ.
47 Walika nin lo go,
lëꞌ xaꞌ laꞌ rë nak kwaꞌn kinu xaꞌ lizh xaꞌ yaꞌ mos.
48 Per chi lëꞌ mos reꞌ gak tu mos nakap,
gab mos:
“Lëꞌ xaꞌ nileꞌ mandad da nayëꞌd gat”,
49 orzeꞌ zublo mos zaꞌ laoꞌ más rë tsaꞌ mos xaꞌ,
mbaino zo xaꞌ xid rë nguy par gao xaꞌ no go xaꞌ kun rë nguy,
50 no xaꞌ nileꞌ mandad zeꞌ yëꞌd or naleꞌt mos reꞌ xigab,
51 orzeꞌ dox zakzi xaꞌ mos reꞌ,
no xëꞌl xaꞌ mos plo nzho rë men nikide men;
zeꞌ goꞌn mos di yalne,
haxta kwezh lëi mos.