Jesús midiꞌzh kwaꞌn nak rë men fariseo, no rë xaꞌ niluꞌ ley cheꞌn Muisés
23
Orzeꞌ nzhab Jesús kureꞌ lo rë xaꞌ nzhin zeꞌ no lo rë men cheꞌn Me:
2 ―Rë xaꞌ niluꞌ ley cheꞌn Muisés,
no rë men fariseo,
nzhab bixaꞌ,
lëꞌgaka bixaꞌ niluꞌi nela xmod ñalkai.
3 Nin lo go,
bin go widiꞌzh cheꞌn bixaꞌ,
no bileꞌ go kwaꞌn ne bixaꞌ,
per nagakt go nela lëꞌ bixaꞌ;
nidiꞌzh bixaꞌ tu kwaꞌn,
no xaꞌ kwaꞌn nileꞌ bixaꞌ.
4 Kwaꞌn niluꞌ bixaꞌ lo men nak nela tu kwaꞌn dox neꞌ gaꞌ,
no jwers weiꞌ mene nzhakla bixaꞌ;
mbaino lëꞌ bixaꞌ ni yaꞌ bixaꞌ gat nigo bixaꞌ taꞌi par weiꞌ mene.
5 Seꞌ nileꞌ bixaꞌ par ñaꞌn bixaꞌ wen lo más rë men;
no ño laxtoꞌ bixaꞌ,
kë tu yech lo xchuzh bixaꞌ plo nzobniꞌ widiꞌzh cheꞌn Dios;
no nzhak bixaꞌ lar noꞌl xlox,
nes par gab men,
walika men cheꞌn Dios bixaꞌ.
6 No ño laxtoꞌ bixaꞌ,
galo laka bixaꞌ zob plo nizob rë xaꞌ tsak plo nzhak tu lani no leꞌn rë yoꞌ plo nitseꞌd men widiꞌzh cheꞌn Dios.
7 No nu nzhakla bixaꞌ zen men yaꞌ bixaꞌ dub lo men,
mbaino gab men lo bixaꞌ:
“Maestr”.
8 Per nzhab Jesús lo rë men cheꞌn Me:
―Xid go,
gat ñalt ne men Maestr lo go,
porke tutsa wech rë go por nak go men da;
no tutsa maestr kinu go,
Me nak Krist.
9 No ni nagab go:
“Pa”,
lo tu men gat lëꞌt xuz go,
porke tutsa Xuz go kinu go,
Me nzho lo yibëꞌ.
10 No naziyëlt go kulë men go:
“Maestr”,
porke tutsa Krist nak Maestr cheꞌn go.
11 Men xaꞌ nzhakla gak xaꞌ más tsak xid go,
xaꞌ zeꞌ gak xaꞌ leꞌ kwaꞌn gab go,
12 porke xaꞌ nzhakla gak xaꞌ,
xaꞌ tsak;
lëꞌ Dios layët xaꞌ;
per xaꞌ gat nzhaklat gak xaꞌ,
xaꞌ tsak,
lëꞌ Dios leꞌ gak xaꞌ tu men tsak.
13 Orzeꞌ nzhab Jesús lo rë men niluꞌ ley mbaino lo rë men fariseo:
―¡Nal ne goi,
go xaꞌ niluꞌ ley,
no go,
men fariseo,
chigab walika men wen go!
Net go,
xaꞌl go roꞌ pwert plo nileꞌ Dios mandad par yo más rë men;
no ni mis go nanet yo,
mbaino ni nalaꞌ go yo xtu men,
xaꞌ nzhakla yo.
14 ’¡Nal ne goi,
go xaꞌ niluꞌ ley,
kun go men fariseo!
¡Tatu nazheꞌb nak go!
Nilat go lizh rë unaꞌ ngut xmiyiꞌ,
no xche nileꞌ go ninaꞌb go lo Dios.
Por nak go saꞌ,
más zakzi Dios go.
15 ’¡Nal ne goi,
go xaꞌ niluꞌ ley kun go men fariseo,
chigab walika men wen go!
Nikizë go xtu roꞌ nitsdoꞌ mbaino rë plo nzhin men par leꞌ go gan tseꞌd men widiꞌzh cheꞌn Dios nela go gaꞌ,
no or milox mitseꞌd go bixaꞌ,
más nzhak bixaꞌ xin Mizhab lo go,
kuzeꞌ galo laka bixaꞌ bi leꞌn gabil lo go.
16 ’¡Nal ne goi,
go xaꞌ nak nela tu men nikal lo gaꞌ!,
per nzhakla go luꞌ go nez lo xtu men.
Nzhab go lo rë men,
chi laꞌ tu men diꞌzh,
leꞌ xaꞌ tu kwaꞌn por yadoꞌ,
nzhab go,
yent kwane ter naleꞌt xaꞌi;
per chi laꞌ tu men diꞌzh leꞌ xaꞌ tu kwaꞌn por rë kwaꞌn gor cheꞌn yadoꞌ,
orzeꞌse nakiꞌn leꞌ xaꞌi,
nzhab go.
17 ¡Taxa chi miaoꞌ yek go!
¿Chi gat ñanit lo go?
¿Kwan más tsak?
¿Chi rë kwaꞌn gor cheꞌn yadoꞌi,
o yub yadoꞌ kwaꞌn nileꞌ ñaꞌn nazhon rë kubaꞌi?
18 No nu nzhab go,
chi tu men milaꞌ diꞌzh leꞌ xaꞌ tu kwaꞌn por bikoꞌ cheꞌn yadoꞌ,
gat nakiꞌnt leꞌ xaꞌi;
per chi milaꞌ xaꞌ diꞌzh leꞌ xaꞌ tu kwaꞌn,
por gon kwaꞌn nixoꞌb lo bikoꞌ,
orzeꞌse nakiꞌn leꞌ xaꞌ kwaꞌn milaꞌ xaꞌ diꞌzh.
19 ¡Miaoꞌ yek go mbaino nikal lo go!
¿Kwan más tsak?
¿Chi gone,
o bikoꞌ kwaꞌn nileꞌ ñaꞌn gon nazhone?,
20 porke xaꞌ nilaꞌ diꞌzh,
leꞌ tu kwaꞌn por bikoꞌ,
gat lëꞌt nab por bikoꞌ nidiꞌzh xaꞌi;
nu por rë kwaꞌn nixoꞌb lo bikoꞌ nileꞌ xaꞌi.
21 No rë xaꞌ zeꞌt yadoꞌ or nilaꞌ xaꞌ diꞌzh leꞌ xaꞌ tu kwaꞌn,
no gat lëꞌt nab yadoꞌ kizeꞌt xaꞌ,
nu Dios Me nak cheꞌn yadoꞌ kizeꞌt xaꞌ.
22 Mbaino rë xaꞌ nizeꞌt yibëꞌ or nilaꞌ xaꞌ diꞌzh leꞌ xaꞌ tu kwaꞌn,
gat nabt yibëꞌ nizeꞌt xaꞌ;
nu plo nizob Dios,
no haxta nu Dios,
Me nizob zeꞌ kizeꞌt xaꞌ.
23 ’¡Nal ne goi,
rë go xaꞌ niluꞌ ley,
kun rë go,
men fariseo,
chigab walika men wen go!
Nizaꞌ go diezmo lo Dios cheꞌn rë kwaꞌn nixëꞌn go:
rë yix ment,
no rë anís,
mbaino rë kumin.
Per gat nileꞌt go rë kwaꞌn tsak reꞌ:
leꞌ go kwaꞌn ñal kun kad men,
no lats laxtoꞌ go men,
mbaino ban go nab tsa par Dios.
Galo laka reꞌ kureꞌ ñal leꞌ go kwaꞌn nzobniꞌ lo ley per nayaꞌlt laxtoꞌ go leꞌ go rë más rë kwaꞌn menes tsak.
24 ¡Ter nak go nela men nikal lo gaꞌ,
per nzhakla go,
go luꞌ nez cheꞌn Dios lo más rë men!
Nak go nela tu men nigoꞌ tu nguruꞌzh leꞌn tu vas nits,
per nanet xaꞌ tu ma más kwaꞌro niyëb xaꞌ.
25 ’¡Nal ne goi,
rë go xaꞌ niluꞌ ley kun rë go xaꞌ fariseo,
chigab walika men wen go!
Nizët go tich vas no tich plat,
no lëꞌ yek go ngwazhëi di rë xigab liwaꞌn go,
no naxekt go kaꞌn go lo kwaꞌn nzhakla kwerp cheꞌn go.
26 ¡Men fariseo,
nikal lo go!
Galo laka bizët go leꞌn vas no leꞌn plat,
nes par yaꞌn nambe tiche.
27 ’¡Nal ne goi,
rë go xaꞌ niluꞌ ley,
kun rë go men fariseo,
chigab walika men wen go!
Nak go nela rë baꞌ:
chul niluꞌi al tich,
per al leꞌne,
ngwazhë di hues cheꞌn yintoꞌ,
kun más rë kwaꞌn gat nambe.
28 Saꞌ nak go:
al tich niluꞌ go nela men dox nileꞌ kwaꞌn nzhakla Dios,
no lo rë más men;
per al leꞌn laxtoꞌ go,
zhëi di kwaꞌn nikide go men,
no rë kwaꞌn nayiꞌlazh go lo Dios.
29 ’¡Nal ne goi,
xaꞌ niluꞌ ley,
kun go,
men fariseo,
chigab walika men wen go!
Chul nizuxkwaꞌ go rë baꞌ cheꞌn rë profet xaꞌ midiꞌzh por Dios nzhala,
mbaino rë baꞌ cheꞌn rë men xaꞌ mileꞌ rë kwaꞌn nzhakla Dios,
par nitsila men bixaꞌ.
30 No nidiꞌzh go:
“Chi ngak nzo la be rë zhë or miban rë xaꞌ kwaꞌn midiꞌzh por Dios chi tiemp,
ngalaꞌt be ngut men rë profet zeꞌ.”
31 Por nidiꞌzh go saꞌ,
kubaꞌ niluꞌ tutsa nak go kun rë xaꞌ mbit rë profet zeꞌ.
32 Kuzeꞌ,
¡biloꞌx go kwaꞌn mizublo rë xuz go,
xaꞌ mbit rë men cheꞌn Dios zeꞌ!
33 ’¡Rë go nak nela mbëꞌl gaꞌ!
¡Nzë go ben cheꞌn mbëꞌl nayiꞌ!
Biwiꞌ go xmod leꞌ go gan,
par nalox go leꞌn gabil.
34 Kuzeꞌ,
lëꞌ da xël rë profet da lo go,
xaꞌ nidiꞌzh por Dios,
kun rë xaꞌ dox nzhak,
mbaino rë xaꞌ kwaꞌn niluꞌ xtiꞌzha lo go;
per lëꞌ go gut bixaꞌ,
këꞌ go bixaꞌ lo krus;
no más bixaꞌ chël goi tich leꞌn rë yoꞌ plo nitseꞌd men widiꞌzh cheꞌn Dios;
no nzho bixaꞌ ruꞌkë go tich tu yezh,
xtu yezh,
35 nes par yek go xoꞌb Dios rë ren cheꞌn rë men,
xaꞌ ngut por mileꞌ bixaꞌ rë kwaꞌn nzhakla Dios,
dizde Abel haxta Zacarías,
xgaꞌn Berequías,
xaꞌ ngut lo luwe cheꞌn yadoꞌ plo nzob bikoꞌ,
por mandad cheꞌn rë xuz go.
36 Walika kwaꞌn nin lo go,
Dios naꞌb kwent ren cheꞌn rë xaꞌ reꞌ lo rë men nal reꞌ.
Miwin laxtoꞌ Jesús por men yezh Jerusalén
37 ’¡Yezh Jerusalén,
yezh Jerusalén,
rë men cheꞌnal nzhut rë profet,
xaꞌ nidiꞌzh por Dios,
no nigoꞌ ke bixaꞌ rë men nixëꞌl Dios lo bixaꞌ!
¡Nayax wëlt,
ngoklan tutsa ngazhina bixaꞌ,
nela or niyeꞌzh nguid rë xmëꞌd ma leꞌn xiꞌl ma,
per nayaꞌ mileꞌ bixaꞌ lon!
38 Nal ne bixaꞌi,
lëꞌ yadoꞌ cheꞌnal yaꞌn nzëꞌb.
39 Ya nanetraꞌ bixaꞌ da haxta or zhin zhë gab bixaꞌ:
“¡Wen nzha xaꞌ leꞌ mandad lo be,
xaꞌ mixëꞌl Dios!”