Miluꞌ Jesús xmod nakiꞌn naꞌb men lo Dios
(Mt. 6:9-15; 7:7-11)
11
No ngol tu zhë,
nzo Jesús tu plo,
kinaꞌb Me lo Dios;
no or milox gunaꞌb Me,
nzhab tu rë men cheꞌn Me:
―Señor,
bitseꞌd no par xmod naꞌb no lo Dios,
nela xmod mitseꞌd Juan rë xpen Juan gaꞌ.
San Lucas 11:1-28
2 Orzeꞌ nzhab Jesús:
―Or naꞌb go lo Dios,
seꞌ guzh go:
Xuz no,
Me nzho lo yibëꞌ,
dox nazhon lël.
Nzhaklan zhin zhë,
leꞌl mandad lo yizhyuo reꞌ,
nela xmod nileꞌle lo yibëꞌ gaꞌ.
3 Bineꞌ kwaꞌn gao no nalzhë.
4 Bicheꞌ rë kwaꞌn nzëꞌb xki no lol,
porke nu ka no ñaꞌl laxtoꞌ rë kwaꞌn gat lëꞌ nileꞌ men lo no.
No nalaꞌtal weiꞌ rë kwaꞌn no,
rë kwaꞌn leꞌ,
nzëꞌb xki no Lol,
sino ke guloꞌ no lo rë kwaꞌn gat lëꞌ.
5 No nu nzhab Jesús:
―Gab be,
tu go kinu tu xaꞌ nichëꞌl go,
no zhin xaꞌ lizh go garol yëꞌl,
mbaino ne xaꞌ lo go:
“Wech,
leꞌl prext chon yët kan;
6 porke nzëꞌb mizhin tu xaꞌ nichëla lizha,
mbaino yent kwaꞌn kinun par zhina lo xaꞌ.”
7 No dizde leꞌn yoꞌ,
lëꞌ xaꞌ ne lo go:
“Nakixiantal da mbeeꞌ;
lëꞌ da mitsa̱o̱ la roꞌ yoꞌ,
mbaino lëꞌda nax la kun rë xmëꞌda,
nayaxchetaꞌ nen kwaꞌn kaꞌl.”
8 Nin lo go,
yaxchet xaꞌ por nichëꞌl xaꞌ kun go,
sino ke lëꞌ xaꞌ yaxche no neꞌ xaꞌ kwaꞌn nakiꞌn go,
par nalixolt raꞌ go xaꞌ.
9 Kuzeꞌ nin lo go,
saꞌ binaꞌb go kwaꞌn lo Dios,
no lëꞌ Dios neꞌi;
mbaino saꞌ bikwaꞌn go kwaꞌn lo Dios,
no lëꞌ go yazhële;
no saꞌ ska gurezh go roꞌ yoꞌ,
mbaino lëꞌi xaꞌl,
par zhin kwaꞌn nzhakla go,
10 porke xaꞌ nileꞌ seꞌ or ninaꞌb xaꞌ kwaꞌn lo Dios,
lëꞌ Dios zaꞌi;
no xaꞌ nileꞌ saꞌ,
or nikwaꞌn xaꞌ tu kwaꞌn,
lëꞌ xaꞌ yazhële;
mbaino xaꞌ nileꞌ saꞌ or kwezh xaꞌ roꞌ yoꞌ,
lëꞌi xaꞌl par zhin kwaꞌn nzhakla xaꞌ.
11 ’O,
¿chi nzho tu go kinu tu mëꞌd,
chi ziye la go zaꞌ go tu ke gao mëꞌd,
or ninaꞌb mëꞌd tu yët lo go?
O,
¿chi zizaꞌ go tu mbëꞌl,
or ninaꞌb mëꞌd tu mbël gao mëꞌd lo go?
12 O,
¿chi ziye laxtoꞌ go zaꞌ go tu nixguy or ninaꞌb mëꞌd tu ngo,
gao mëꞌd lo go?
13 No ter men nakap go,
per nane go nizaꞌ go kwaꞌn wen,
par xmëꞌd go;
no ter nak go saꞌ,
¡Dios nazoliaꞌzht (leꞌt Dios nayaꞌ) or naꞌb go Sprit cheꞌn Dios par yo laxtoꞌ go,
por nded nazhiꞌ Dios go!
Jesús no Beelzebú
14 Kigoꞌ Jesús tu mbi mal,
laxtoꞌ tu miyiꞌ xaꞌ miaꞌn mud por mbi reꞌ.
Or nguroꞌi,
nguzublo midiꞌzh xaꞌ reꞌ,
no rë xaꞌ une kureꞌ,
xe miaꞌn bixaꞌ tuli.
15 Per pla men nzhab:
―Lëꞌ xaꞌ baꞌ nigoꞌ mbi mal laxtoꞌ men,
por mandad cheꞌn Beelzebú,
xtu lë Mizhab,
xaꞌ kwaꞌn nileꞌ mandad lo rë mbi mal.
16 Mbaino lëꞌ más men,
gunaꞌb xaꞌ lo Jesús,
leꞌ Me tu kwaꞌn nazhon,
par ne bixaꞌ,
nabei,
chi walika Dios mixëꞌl Jesús.
17 Per lëꞌ Jesús nane la,
kwan kileꞌ bixaꞌ xigab,
orzeꞌ nzhab Me:
―Rë lazh men plo nileꞌ tu gobier mandad,
no or gat nzhin bixaꞌ wen,
orzeꞌ zhin xtu ben xaꞌ nzë xtu plo,
lëꞌ bixaꞌ loꞌx zeꞌ;
mbaino rë lizh men plo gat nzhin men wen,
lëꞌ bixaꞌ lëꞌ.
18 No seꞌska,
chi mis yub Mizhab,
dil kun rë mbi mal cheꞌn xaꞌ,
orzeꞌ,
nagaktraꞌ leꞌ Mizhab rë kwaꞌn nileꞌ xaꞌ.
Kubaꞌ nin lo go,
porke lëꞌ go kidiꞌzh mbël,
ne go,
lëꞌda nigoꞌ mbi mal,
por mandad cheꞌn Beelzebú.
19 No chi lëꞌ go ne,
lëꞌ da nileꞌ mandad cheꞌn Beelzebú,
orzeꞌ,
lo mis go kidiꞌzh nu rë xpen go,
nigoꞌ mbi mal laxtoꞌ rë men,
por mandad cheꞌn Beelzebú.
Kuzeꞌ mis rë xpen go ne kwan ñal go,
por mbël go.
20 Per na nigo mbi mal laxtoꞌ rë men por mandad cheꞌn Dios;
kureꞌse niluꞌ,
lëꞌ Dios mizhin la lo go par lat Me go lo Mizhab,
21 porke or nzho tu miyiꞌ kwaꞌn dox naye,
no kinu xaꞌ yiꞌb par kina xaꞌ lizh xaꞌ,
orzeꞌ yent cho liwaꞌn rë kwaꞌn kinu xaꞌ.
22 Per chi zhin xtu xaꞌ más naye lo xaꞌ reꞌ,
no dil bixaꞌ;
xaꞌ más naye zeꞌ leꞌ gan,
lat rë yiꞌb kwaꞌn kinu xaꞌ reꞌ lizh xaꞌ,
orzeꞌ xaꞌ mileꞌ gan zeꞌ,
kiꞌz rë kwaꞌn ngulat xaꞌ par kaꞌ rë men cheꞌn xaꞌ.
23 ’Kuzeꞌ,
xaꞌ gat nzhaknu da,
xaꞌ zeꞌ nidil kuda;
mbaino xaꞌ gat nidiꞌzh xtizha lo men,
par gak men,
men da,
xaꞌ zeꞌ nichubla men lon.
Mbi mal kwaꞌn ñubre xtu wëlt plo nguroꞌ
24 ’No or niroꞌ tu mbi mal laxtoꞌ tu men,
orzeꞌ nikizëi mont plo ni nits niyen,
nikwaꞌne plo kwëze;
no or gat ñayazhële plo kwëze,
orzeꞌ nileꞌi xigab:
“Lëꞌda yubre ska lizha plo nguroꞌn.”
25 No or nguiubre mbi zeꞌ laxtoꞌ men reꞌ,
nak laxtoꞌ xaꞌ nela leꞌn tu yoꞌ,
naloꞌb nambe gaꞌ,
mbaino rë kwaꞌn leꞌne nzhin chul,
26 orzeꞌ ya mbi zeꞌ,
yakaꞌi xtu gazh mbi más nakap,
par yo rëi laxtoꞌ men reꞌ;
orzeꞌ lëꞌ xaꞌ reꞌ gak más nakap,
ke lëꞌla ngok xaꞌ or galo.
Rë xaꞌ walika nzha wen
27 No or dub kidiꞌzh Jesús rë kureꞌ,
lëꞌchi nguroꞌ tu unaꞌ xid men,
naye nguruzhië unaꞌ,
nzhab unaꞌ:
―¡Wen dox nzha unaꞌ kwaꞌn mizol yizhyuo reꞌ,
xaꞌ kwaꞌn mineꞌ chich nguꞌl!
28 Per nzhab Jesús:
―¡Más wen nzha rë xaꞌ nzhon widiꞌzh cheꞌn Dios,
mbaino nileꞌ bixaꞌ kwaꞌn nzhab Dios!
Rë men xaꞌ minu la lo Dios kinaꞌb, leꞌ Jesús tu kwaꞌn nazhon
29 No más men nzhagan plo nzo Jesús,
orzeꞌ nguzublo kidiꞌzh Me,
nzhab Me:
―Rë men nal reꞌ,
minu la bixaꞌ lo Dios,
mbaino nzhakla bixaꞌ,
ne bixaꞌ tu kwaꞌn nazhon nileꞌ Dios,
per nab tsa kwaꞌn mileꞌ Dios kun Jonás ne bixaꞌ,
San Lucas 11:29-36
30 porke nela kwaꞌn nguzak Jonás gaꞌ une rë men yezh Nínive,
ke lëꞌ Dios mixëꞌl Jonás lo bixaꞌ,
seꞌska kwaꞌn zak da,
na xaꞌ nak Xgaꞌn Dios mbaino nak da tu men yizhyuo,
par ne rë men nal reꞌ,
lëꞌ Dios mixëꞌl da.
31 Or zhin zhë kwaꞌn gab Dios,
xmod gak kun kad men yizhyuo,
orzeꞌ tu unaꞌ xaꞌ mileꞌ mandad,
lo rë xaꞌ nguio plo ñaꞌn lazh men,
kwaꞌn nguzhin al nez al yët,
unaꞌ reꞌ zo par gab unaꞌ kwan ñal rë men nal reꞌ;
porke dizde zit nguroꞌ unaꞌ,
par ngwayon unaꞌ rë widiꞌzh cheꞌn Salomón,
porke Salomón ngok tu men dox nzhak.
Per na kidiꞌzh lo go,
no más tsak da lo Salomón.
32 No rë men yezh Nínive,
nu bixaꞌ zo zhë zeꞌ,
par gab bixaꞌ kwan ñal rë men nal reꞌ,
porke men yezh Nínive milaꞌ bixaꞌ rë kwaꞌn nakap nak bixaꞌ lo Dios,
or mbin bixaꞌ kwaꞌn midiꞌzh Jonás lo bixaꞌ,
mbaino na,
más tsak da lo Jonás.
Biani cheꞌn men
33 No nzhab Jesús:
―No yent cho tsinki tu biani,
orzeꞌ zob xaꞌi tu plo nagaꞌch,
o zob xaꞌi leꞌn tu kaj;
sino ke lëꞌ xaꞌ zobe al ya,
par ziniy lo rë xaꞌ yo leꞌn yoꞌ zeꞌ.
34 Lëꞌ sprit cheꞌn men nak nela tu biani gaꞌ par dub men.
No chi lëꞌ sprit cheꞌnal wen,
dubal ñani orzeꞌ;
per chi lëꞌ sprit cheꞌnal nzhakne,
orzeꞌ dubal nzo lo nakao.
35 Neo,
napaꞌ yal biani kwaꞌn kinu go baꞌ,
orzeꞌ yaꞌn go lo nakao.
36 Per chi dub leꞌn laxtoꞌl nikë biani,
orzeꞌ gakal nela tu biani gaꞌ par zinil lo más rë men.
Nzhab Jesús, zheꞌb nalats nzha rë men fariseo, mbaino rë xaꞌ niluꞌ ley
37 No or milox midiꞌzh Jesús rë kureꞌ,
orzeꞌ ngurezh tu men fariseo Jesús par gao Me lizh xaꞌ.
Orzeꞌ ngwa Jesús.
No or nguio Jesús leꞌn yoꞌ,
nguzob Me lo mes.
San Lucas 11:37-54
38 No men fariseo reꞌ,
xe miaꞌn xaꞌ tuli por nangaleꞌt Jesús rë kwaꞌn milaꞌ rë me tiemp cheꞌn men Israel,
por nangazët Jesús yaꞌ Me or gao Me,
39 per nzhab Jesús:
―Rë go men fariseo,
nizët go tich bas no tich plat,
lëꞌ laxtoꞌ go nzho rë xigab kwaꞌn niliwaꞌn go,
no rë kwaꞌn gat lëꞌ nak go.
40 ¡Nakao nak yek go!
¿Chi nanet go,
Dios mizuxkwaꞌ rë kwaꞌn al tich,
mbaino nu ska rë kwaꞌn al leꞌn?
41 Más wen bizaꞌ go kwaꞌn kinu go,
kaꞌ rë men yent kwan kinu,
nes yaꞌn nambe laxtoꞌ go lo Dios orzeꞌ.
42 ’¡Dox mal nzha go,
men fariseo!,
porke niyix go rë diezmo cheꞌn menta,
no cheꞌn rrud,
mbaino cheꞌn rë nak kwaꞌn nayëꞌ,
kwaꞌn nzhaꞌn go;
mbaino kun rë men gat nileꞌt go kwaꞌn ñal,
mbaino ni gat nazhiꞌ go Dios mbaino ni rë men.
Per kureꞌ galo laka nakiꞌn leꞌ go,
orzeꞌ leꞌ go rë kubaꞌ.
43 ’¡Dox nazheꞌb kwaꞌn zak go,
men fariseo!,
porke ño laxtoꞌ go,
nizob go plo nizob men tsak,
leꞌn yoꞌ plo nitseꞌd men widiꞌzh cheꞌn Dios,
mbaino ño laxtoꞌ go,
lo más men,
zen men yaꞌ go,
kun rop lad yaꞌ xaꞌ.
44 ’¡Dox nazheꞌb kwaꞌn nzadkë tich go,
rë go xaꞌ niluꞌ ley,
kun rë go men fariseo,
chigab walika men wen go!
Lëꞌ go nak nela baꞌ cheꞌn yintoꞌ kwaꞌn mizhëꞌ la,
ter nilo men tiche.
45 Orzeꞌ nzhab tu xaꞌ kwaꞌn niluꞌ ley:
―Maestr,
nu par yek no nzha kwaꞌn midiꞌzhal baꞌ.
46 Orzeꞌ nzhab Jesús:
―¡Nu par go,
xaꞌ niluꞌ ley,
nazheꞌb mal nzha go!,
porke nzhab go lo más men,
weiꞌ xaꞌ kwaꞌn neꞌ dox,
kwaꞌn naxekt men lo;
no go,
ni gat nikwin goi.
47 ’¡Lëꞌ go kixe!,
porke nizuxkwaꞌ go rë ke,
nileꞌ go par tsila men rë profet,
xaꞌ tiemp,
rë xaꞌ kwaꞌn mbit mis rë xuz go xaꞌ tiemp.
48 Kubaꞌ,
niluꞌ tutsa nak go kun rë xuz go,
xaꞌ tiemp,
por rë kwaꞌn mileꞌ bixaꞌ;
lëꞌ bixaꞌ mbit rë profet,
no mis go nizuxkwaꞌ rë ke par nileꞌ go nitsila men rë profet reꞌ.
49 Kuzeꞌ,
midiꞌzh Dios por rë kwaꞌn nane la Dios gak,
nzhab Dios:
“Lëꞌda xël rë profet,
no rë apost,
par diꞌzh bixaꞌ por Da,
per pla rë xaꞌ reꞌ gut go,
no zipla bixaꞌ rukë go tich.”
50 Mbaino nu nzhab Jesús:
—Kuzeꞌ nal,
lo rë go,
Dios ne xmod gak kun go,
por rë ren cheꞌn rë profet,
xaꞌ ngut por Dios,
dizde or mizuxkwaꞌ Dios yizhyuo,
51 dizde ren cheꞌn Abel no haxta ren cheꞌn Zacarías,
xaꞌ ngut lo luwe plo nak bikoꞌ cheꞌn Dios,
nadedtaꞌ lëꞌ Dios naꞌb ka kwent cheꞌn rë xaꞌ reꞌ,
lo rë go.
52 ’Rë go xaꞌ niluꞌ ley,
¡dox mal nzha go!,
porke lëꞌ go kinu la kwaꞌn xaꞌl go,
plo nzho rë kwaꞌn nak cheꞌn Dios,
per nayaꞌ nileꞌ go par yo go,
mbaino nika go par yo xtu men.