Jesús miluꞌ xmod niluꞌ or nileꞌ men tu kwaꞌn wen lo Dios
6
No nzhab Jesús:
―Or leꞌ go tu kwaꞌn wen,
naleꞌt goi namás par ne mene,
porke chi nak go saꞌ,
ni tu kwaꞌn wen naneꞌt Xuz go kaꞌ go,
Me nzho lo yibëꞌ.
2 Kuzeꞌ or gaknu go tu men prob nali,
naxoꞌbdiꞌzht goi lo men,
nela xmod nileꞌ rë xaꞌ chigab walika men wen,
or nizo bixaꞌ leꞌn rë yoꞌ plo nitseꞌd men widiꞌzh cheꞌn Dios,
no leꞌn rë nez,
par diꞌzh men wen tich bixaꞌ namás.
No walika kwaꞌn nin,
yalnak bixaꞌ saꞌ,
nab tsa lo rë men yizhyuo ñaꞌn bixaꞌ wen,
per par lo Dios,
yent kwan gal bixaꞌ.
3 Per go,
or gaknu go tu men yent kwan nzhap,
nadiꞌzht goi ni lo xaꞌ más nichëꞌl go;
4 bileꞌ goi namás,
porke lëꞌ Xuz go Me nzho lo yibëꞌ,
niwiꞌ lo rë kwaꞌn nzhak xlaꞌn,
orzeꞌ lëꞌ Me neꞌ tu kwaꞌn wen kaꞌ go,
por kwaꞌn mileꞌ go baꞌ.
Jesús miluꞌ xmod naꞌb men lo Dios
5 ’Or naꞌb go lo Dios,
naleꞌt go nela xmod nileꞌ rë xaꞌ chigab walika men wen,
rë xaꞌ ño laxtoꞌ ninaꞌb lo Dios,
dub nzoli leꞌn rë yoꞌ plo nitseꞌd men widiꞌzh cheꞌn Dios,
mbaino leꞌn rë nez,
no plo nzhak xbiꞌ,
par xoꞌb xtiꞌzh bixaꞌ namás.
No walika kwaꞌn nin,
yalnak bixaꞌ saꞌ,
nab tsa lo rë men yizhyuo ñaꞌn bixaꞌ wen,
per par lo Dios,
yent kwan gal bixaꞌ.
6 Per go,
or naꞌb go lo Dios,
guyo go leꞌn yoꞌ,
no bitsaoꞌ go roꞌi,
orzeꞌ xlaꞌn binaꞌb go lo Dios Xuz go;
no lëꞌ Xuz go niwiꞌ kwaꞌn kileꞌ go xlaꞌn,
lëꞌ Me neꞌ tu kwaꞌn wen par go dilant lo rë men.
7 No dub kinaꞌb go lo Me,
nadiꞌzht go tutsa kwaꞌn gargaꞌl,
nela nileꞌ rë men,
xaꞌ gat nilibeꞌt Dios.
Lëꞌ bixaꞌ gab,
por nileꞌ bixaꞌ saꞌ,
gon Dios kwaꞌn ninaꞌb bixaꞌ.
8 Kuzeꞌ naleꞌt go nela rë men baꞌ,
porke lëꞌ Xuz go,
Me nzho lo yibëꞌ,
nane la kwan nakiꞌn go,
antis di naꞌb goi lo Me.
9 Or naꞌb go lo Xuz go Dios,
seꞌ guzh go:
Xuz no,
Me nzho lo yibëꞌ,
dox ñal diꞌzh rë men,
nazhon Go;
10 nzhakla no,
rë men yizhyuo ziyël leꞌ Go mandad lo bixaꞌ,
nela xmod nileꞌ Go lo yibëꞌ gaꞌ;
11 bineꞌ Go kwaꞌn gao no,
no kwaꞌn nakiꞌn no zilitaꞌ;
12 biyaꞌl laxtoꞌ Go rë kwaꞌn gat lëꞌ nileꞌ no lo Go;
saꞌ ska yaꞌl laxtoꞌ no rë kwaꞌn gat lëꞌ nileꞌ men lo no.
13 No nalaꞌt Go zenbeꞌ Mizhab no (wiꞌ Mizhab xmod nak no);
guloꞌ Go no lo rë kwaꞌn nzhakla xaꞌ liꞌnu xaꞌ no.
14 ’No chi lëꞌ go yaꞌl laxtoꞌ rë kwaꞌn gat lëꞌ nileꞌ xtu men lo go,
orzeꞌ nu ska Xuz go Me nzho lo yibëꞌ,
yaꞌl laxtoꞌ rë kwaꞌn gat lëꞌ nileꞌ go lo Me,
15 per chi nayaꞌlt laxtoꞌ go rë kwaꞌn gat lëꞌ nileꞌ xtu men lo go,
orzeꞌ nu ska Xuz go Me nzho lo yibëꞌ,
nayaꞌlt ska laxtoꞌ Me rë kwaꞌn nileꞌ go.
Jesús miluꞌ xmod, naꞌb men xlats men lo Dios
16 ’No or naꞌb go lo Dios dub xlats go;
naleꞌt go nalats lo go nela nileꞌ rë xaꞌ chigab walika men wen;
nalats nileꞌ bixaꞌ lo bixaꞌ or ninaꞌb bixaꞌ lo Dios xlats bixaꞌ par ne mene namás.
No walika kwaꞌn nin,
yalnak bixaꞌ saꞌ,
nab tsa lo rë men yizhyuo ñaꞌn bixaꞌ wen,
per par lo Dios,
yent kwan gal bixaꞌ.
17 Per go,
or zo go xlats go lo Dios par naꞌb go lo Me,
bichob go aseit yek go no bizët go lo go,
18 nes par nane rë men,
nzo go xlats go lo Dios;
no Xuz go Dios Me niwiꞌ lo rë kwaꞌn nzhak xlaꞌn;
lëꞌ Me neꞌ tu kwaꞌn wen kaꞌ go por nileꞌ go saꞌ.
Rë kwaꞌn tsak kwaꞌn nzho lo yibëꞌ
19 ’Nakuꞌchaoꞌt go rë kwaꞌn tsak nzho yizhyuo reꞌ,
plo nilox rë kwaꞌn nzhao mbëze,
mbaino nikibëowe,
plo ño rë men waꞌn,
niliwaꞌne;
20 más wen bileꞌo xigab xmod leꞌo kwaꞌn tsak lo Dios,
no por rë kureꞌ gal go tu kwaꞌn lo yibëꞌ kwaꞌn más tsak,
plo nagaot mbëz kwaꞌn,
mbaino ni nakibëowe,
no ni rë waꞌn nayo zeꞌ par liwaꞌne.
21 No plo kinu go kwaꞌn tsak cheꞌn go,
zeꞌ nzo xigab cheꞌn go.
Yalnaban cheꞌn men nak nela tu biani par dub men
22 ’Lëꞌ yalnaban cheꞌn men nak nela tu biani par dub men.
Chi lëꞌ yalnaban kwaꞌn kinul nizini,
orzeꞌ dubal ñani;
per chi gat nizini yalnaban cheꞌnal,
orzeꞌ dubal nzo lo nakao;
23 no chi dubal nzo lo nakao por gat nizini yalnaban cheꞌnal,
orzeꞌ,
¡dox nazheꞌb nzhal!
Dios no dimi
24 ’Yent cho tu mos gak leꞌ zhiꞌn cheꞌn chop xaꞌ nileꞌ mandad lo xaꞌ tutsa or;
porke lëꞌ mos yiꞌ ne tu xaꞌ,
no xtu xaꞌ chizhiꞌ mos;
o roꞌ tu xaꞌ gon mos,
mbaino roꞌ xtu xaꞌ nagont mos.
Kuzeꞌ,
nagakt leꞌ go kwaꞌn nzhakla Dios,
mbaino wix go gap go dimi.
Nzhaknu Dios rë xmëꞌd Me
25 ’Kuzeꞌ nin lo go:
Naleꞌt go beꞌs xigab por kwaꞌn gao go,
o por kwaꞌn go go par ban go;
no ni naleꞌ go dox xigab por kwaꞌn gak go.
¿Chi nanet go,
más tsak yalnaban cheꞌn men lo kwaꞌn nzhao men,
mbaino más tsak men lo xab men?
26 Biwiꞌ go lo rë miyin kwaꞌn nikizë lo yibëꞌ;
naban ma no ni gat nzhaꞌn ma,
mbaino ni gat nikan ma yalgoꞌn,
par kuchaoꞌ ma kwaꞌn gao ma;
per Dios Xuz go Me nzho lo yibëꞌ,
nizaꞌ kwaꞌn nzhao ma.
No,
¿chi nanet go,
más tsak go lo rë miyin?
27 No ter dox nileꞌ go xigab,
¿xmod leꞌ go par ban go xtu or más lo rë liꞌn,
kwaꞌn mineꞌ Dios ban go yizhyuo reꞌ?
28 ’¿Chon nileꞌ go beꞌs xigab plo roꞌ xab go?
Bileꞌ go xigab por rë yeꞌ dan,
xmod niroꞌbe:
Gat nikëte zhiꞌn,
no ni gat nitibe lar.
29 Per ni rey Salomón,
ter dox miar kwaꞌn ngop xaꞌ,
no nangakt xab xaꞌ nela xmod niluꞌ tu yeꞌ gaꞌ.
30 No chi saꞌ nileꞌ Dios niluꞌ rë yix kwaꞌn nzhiꞌb dan nal,
mbaino yëꞌ,
lëꞌi yëk la lo ki,
orzeꞌ,
¿chi naleꞌt Dios más kwaꞌn por go?
Tatu nazheꞌb nak go,
gat nzhont goi,
weꞌtsa ñila go Dios.
31 Kuzeꞌ,
nagabt go nal:
“¿Plo roꞌ kwaꞌn gao be no kwaꞌn go be,
mbaino lar gak be?”,
32 porke kureꞌ nileꞌ rë men,
xaꞌ gat niliꞌbeꞌt Dios;
per go,
lëꞌ Xuz go Me nzho lo yibëꞌ,
nane la,
lëꞌ go nakiꞌn rë kureꞌ.
33 Kuzeꞌ galo laka biwiꞌ go lo Dios por rë kwaꞌn nakiꞌn go,
mbaino ban go nela xmod nzhakla Me,
orzeꞌ lëꞌ Me zilazh rë kwaꞌn nakiꞌn go baꞌ.
34 Kuzeꞌ naleꞌt go beꞌs xigab por rë kwaꞌn nakiꞌn go yëꞌ.
Kad ngubizh nzadnu kwaꞌn nizob xigab yek men,
kuzeꞌ gat ñalt leꞌ go xigab par yëꞌ.