3 ―Nazhon nzha rë men xaꞌ nane,

dox nakiꞌn bixaꞌ Dios,

porke cheꞌn bixaꞌ nak rë kwaꞌn kinu Dios par rë men cheꞌn Me.

4 ’Nazhon nzha rë men xaꞌ nzhoꞌn nalreꞌ;

lëꞌ Dios tsiyal laxtoꞌ bixaꞌ.

5 ’Nazhon nzha rë men xaꞌ niwiꞌ nab tsa lo Dios por rë kwaꞌn nakiꞌn bixaꞌ;

kuzeꞌ lëꞌ bixaꞌ gal kwaꞌn milaꞌ Dios diꞌzh.

6 ’Nazhon nzha rë men,

xaꞌ nizak nela or nilaꞌn tu men gaꞌ,

mbaino nizak xaꞌ nela or nizëiꞌ laxtoꞌ tu men gaꞌ,

por tanta nzhakla xaꞌ ban xaꞌ nela xmod nzhakla Dios gaꞌ,

orzeꞌ dimás zaꞌ Dios kwaꞌn kaꞌ xaꞌ.

7 ’Nazhon nzha rë men xaꞌ nilats laxtoꞌ xtu men;

lëꞌ Dios lats ska laxtoꞌ bixaꞌ.

8 ’Nazhon nzha rë men xaꞌ nambe laxtoꞌ lo Dios;

lëꞌ bixaꞌ ne Dios.

9 ’Nazhon nzha rë men xaꞌ nileꞌ nibin tu men wen kun xtu men;

lë bixaꞌ ruꞌlë xmëꞌd Dios.

10 ’Nazhon nzha rë men,

xaꞌ niyiꞌ men nine men por nileꞌ bixaꞌ kwaꞌn nzhakla Dios;

kuzeꞌ lëꞌ bixaꞌ yo plo nzho yalnazhon cheꞌn Dios.

11 ’Nazhon nzha go or nichaoꞌ yek men tu bëd kwaꞌn gat lëꞌ nak go,

no or dox nakap men lo go,

mbaino or nidiꞌzh men tu bëd kwaꞌn mbël nak go,

por nak go men da.

12 Dox bizak laxtoꞌ go por kubaꞌ;

lëꞌ dox tu kwaꞌro neꞌ Dios kaꞌ go lo yibëꞌ.

Saꞌ nguzak rë men nzhala xaꞌ midiꞌzh por Dios,

rë xaꞌ miban galo lo go.

13 ’Lëꞌ go nak nela zed gaꞌ yizhyuo reꞌ,

per chi lëꞌ zed gat nazhiraꞌ,

orzeꞌ yent kwan zuꞌi;

lëꞌi yubi,

mbaino lo men loi.

14 ’Go nak nela tu ki gaꞌ lo yizhyuo reꞌ,

nela tu yezh nzhin yek tu lom niluꞌ lakai;

15 no yent cho tsinki tu biani par zob xaꞌi leꞌn tu kaj;

lëꞌ xaꞌ zobe al yaꞌ par ziniy lo rë men nzho leꞌñoꞌ.

16 Gok go nela tu biani gaꞌ,

nes par ne men xa naban go,

orzeꞌ lëꞌ men diꞌzh nazhon Xuz go Dios,

Me nzho lo yibëꞌ.

17 ’Naleꞌt go xigab,

nzhala par chila ley kwaꞌn milaꞌ Dios lo Muisés,

o nzhala par kubchin rë widiꞌzh kwaꞌn mikëꞌ rë xaꞌ midiꞌzh por Dios nzhala;

na nzhal par len,

gak rë kwaꞌn nzobniꞌ lo ley,

mbaino par gak rë kwaꞌn mikëꞌ rë xaꞌ midiꞌzh por Dios nzhala.

18 Walika kwaꞌn nin lo go,

dub nzho gaka yibëꞌ no yizhyuo,

rë kwaꞌn nzobniꞌ lo ley gak;

haxta rë kwaꞌn más kwaꞌn win,

rëi gak.

19 Kuzeꞌ,

tu xaꞌ nane la kwaꞌn nzobniꞌ lo ley,

ter más cheꞌptsa niluꞌ tsake,

no chi niluꞌ xaꞌ reꞌ lo men,

gat nakiꞌnt leꞌ men kwaꞌn cheꞌptsa niluꞌ tsak reꞌ,

orzeꞌ xaꞌ reꞌ gak xaꞌ más cheꞌp tsak plo nileꞌ Dios mandad.

Per men nileꞌ rë kwaꞌn nzobniꞌ lo ley,

no niluꞌ xaꞌi lo más men par nu bixaꞌ leꞌi,

orzeꞌ xaꞌ reꞌ dox xaꞌ ro gak xaꞌ plo nileꞌ Dios mandad.

20 Nin lo go,

chi lëꞌ go naleꞌ gan leꞌ go más rë kwaꞌn nzobniꞌ lo ley cheꞌn Muisés lo rë men fariseo,

mbaino lo rë men niluꞌ ley reꞌ,

orzeꞌ por kubaꞌ nayot go plo nileꞌ Dios mandad.

21 No nu nzhab Me:

―Lëꞌ go nane ka,

seꞌ nak widiꞌzh kwaꞌn mbin rë xuz go xaꞌ nzhala:

“Naguttal men,

porke xaꞌ nzhut men,

lëꞌ gustis weiꞌ xaꞌ par kix xaꞌ kwaꞌn mileꞌ xaꞌ.”

22 Per na ni lo go,

wanei cho men,

xaꞌ niyiꞌ kun xtu men,

orzeꞌ lëꞌ gustis gab kwan ñal xaꞌ reꞌ;

no wanei cho men nzhab lo xtu xaꞌ:

“Tont gox”,

guzhë nzëꞌb xki xaꞌ zeꞌ lo gustis xaꞌ más tsak;

mbaino wanei cho nzhab:

“Leꞌn bël loxal”,

lo xtu men,

orzeꞌ por midiꞌzh xaꞌ reꞌ saꞌ,

lëꞌ xaꞌ reꞌ nzho rriez bi leꞌn gabil.

23 ’No chi dub kizaꞌl tu gon lo Dios,

mbaino nanel,

lëꞌl kinu tu kwent kun wechal,

24 orzeꞌ más wen naltaꞌ zaꞌl gon lo Dios,

galo laka watsiyaꞌl laxtoꞌ wechal,

orzeꞌ yubreꞌl,

zaꞌl gon lo Dios.

25 ’No chi weiꞌ tu menal lo gustis,

dub nzha go nez,

bitsiyal laxtoꞌ xaꞌ reꞌ,

nes par nachi xaꞌ lu lo gustis xaꞌ nileꞌ mandad,

napaꞌ weiꞌ xaꞌ reꞌ lu lo xaꞌ nikina lizhyiꞌb;

no xaꞌ nikina lizhyiꞌb reꞌ kol lizhyiꞌb.

26 Walika kwaꞌn nin,

nakoꞌt bixaꞌ lu lizhyiꞌb haxta ke kixal rë kwaꞌn nzëꞌbal.

27 No nzhab Jesús:

―Lëꞌ go mbin la kureꞌ:

“Nabant go kun men gat lëꞌ tsaꞌ go.”

28 Per na ni lo go,

wanei cho tu miyiꞌ niwiꞌ lo tu unaꞌ no niwix xaꞌ ban xaꞌ kun unaꞌ zeꞌ,

guzhë nzëꞌb xki xaꞌ reꞌ lo Dios por kubaꞌ.

29 Kuzeꞌ,

chi lëꞌ zalol lad direch nileꞌ,

nzëꞌb xkil,

neka guloꞌi tuli;

más wen gak jwalt tu plol ke par dubal bi leꞌn gabil.

30 No chi lëꞌ yaꞌl lad direch nileꞌ nzëꞌb xkil,

neka bichoꞌi tuli;

más wen yent xtu plol ke par bi dubal leꞌn gabil.

31 ’No nu mbin la go:

“Wanei cho tu men lëꞌ kun tsaꞌ,

nakiꞌn yats tu yech par gak ban xaꞌ kun xtu men.”

32 Per na ni lo go,

chi tu miyiꞌ lëꞌ kun tsaꞌ,

no chi gat lëꞌ por ngop la unaꞌ reꞌ xtu miyiꞌy,

orzeꞌ kureꞌ leꞌ,

nzëꞌb xki unaꞌ lo Dios,

mbaino miyiꞌ xaꞌ ban kun unaꞌ reꞌ,

por kureꞌ nu ska xaꞌ nzëꞌb xki lo Dios.

33 ’No mbin la go xmod midiꞌzh Dios lo rë xuz go chi tiemp or nzhab Dios:

“Nayaꞌlt laxtoꞌ go,

leꞌ go kwaꞌn milaꞌ go diꞌzh lon.”

34 Per na ni,

nazeꞌt go lë Dios lo ni tu kwaꞌn or ñaꞌn go diꞌzh leꞌ go tu kwaꞌn,

ni por yibëꞌ,

porke lëꞌi nak plo nzob Dios;

35 no ni nazeꞌt go yizhyuo or ñaꞌn go diꞌzh tu kwaꞌn,

porke lëꞌ yizhyuo nak nela plo nizo niꞌ Dios;

no ni nazeꞌt go yezh Jerusalén,

porke lëꞌi nak yezh cheꞌn rey,

Me más tsak.

36 No ni nazeꞌt go yek go or ñaꞌn go diꞌzh leꞌ go tu kwaꞌn,

porke nagakt leꞌ go naguzh o nagats ni tu yich yek go.

37 Nakiꞌn gab go “Yoo”,

o “Aꞌa” namás,

porke chi gab go más kwaꞌn,

cheꞌn Mizhab kuzeꞌ.

38 ’No mbin la go seꞌ nzhab diꞌzh:

“Men kwaꞌn kich zalo xtu men,

seꞌska kix xaꞌi;

mbaino xaꞌ koꞌ kilëi xtu men,

seꞌska kix xaꞌi.”

39 Per na ni,

nagakt go nela men xaꞌ nileꞌ kwaꞌn nakap lo go;

más wen chi nzho tu xaꞌ këꞌ tube taꞌ roꞌ go,

orzeꞌ bizaꞌ go xtu lad.

40 No chi cho men nzhakla chi go lo gustis par lat xaꞌ xkamiset go,

orzeꞌ bilaꞌ go weiꞌ xaꞌ ter nu xkamis go.

41 No chi tu men kiꞌl go par weiꞌ go tu kwaꞌn neꞌ tu kilómetro garol,

neka biꞌy goi chon kilómetro;

42 no wanei cho tu men naꞌb tu kwaꞌn jwers lo go,

bizaꞌ goi;

no cho tu men kiꞌn tu kwaꞌn lo go,

laꞌt go bi xaꞌ nab yaꞌ xaꞌ.

43 ’No nu mbin go seꞌ nzhab diꞌzh:

“Bichizhiꞌ go tsaꞌ men go,

per xaꞌ niyiꞌ nine go,

biyiꞌ ska go,

une go xaꞌ.”

44 Per na ni:

Bichizhiꞌ go xaꞌ niyiꞌ nine go,

no binaꞌb go lo Dios por rë xaꞌ niruꞌkë tich go,

45 nes par gak go xmëꞌd Dios,

Me nzho lo yibëꞌ;

porke Dios nileꞌ niroꞌ ngubizh par niziniy lo rë men wen no lo rë men nakap;

mbaino nila Dios yiu par rë men,

xaꞌ nileꞌ kwaꞌn nzhakla Dios no par rë men xaꞌ nileꞌ kwaꞌn gat lëꞌ lo Me.

46 No chi chizhiꞌ go nab tsa xaꞌ nazhiꞌ go,

¿kwan gab go,

neꞌ Dios tu kwaꞌn wen kaꞌ go,

por nak go saꞌ?,

porke haxta nu rë xaꞌ nikan dimi cheꞌn rey Roma nak saꞌ.

47 No chi nab tsa lo rë melizh go niniꞌ go,

¿kwan gab go,

más wen kwaꞌn kileꞌ go,

par lo rë men,

xaꞌ gat nilibeꞌt Dios?,

porke haxta nu rë xaꞌ nikan dimi cheꞌn rey Roma nak saꞌ.

48 Gok go wen kun rë men,

nela wen Dios Xuz go,

Me nzho lo yibëꞌ,

kun rë men.