9
No nu nzhab Jesús:
―Walika kwaꞌn nin,
pla xaꞌ nzho xid rë men reꞌ,
nagattaꞌ bixaꞌ chi naga ne bixaꞌ,
xmod zhin zhë or luxoꞌb yalnazhon cheꞌn Dios par leꞌ Me mandad.
San Marcos 9:1-13
Or ngubixlo Jesús
2 No nded xoꞌp ngubizh,
nzhanu Jesús nab tsa Per,
no Jakob,
mbaino Juan,
tu lad yek tu yiꞌ ro.
No zeꞌ mizhëꞌ lo Jesús.
3 No xab Jesús miluꞌ bëo laka no ñaz bële;
no per ni tu men yizhyuo naleꞌtaꞌ gan zët tu lar par yaꞌne saꞌ.
4 No zeꞌ ngurulo Li,
rop xaꞌ kun Muisés,
no kidiꞌzh bixaꞌ kun Jesús.
5 Orzeꞌ nzhab Per:
―¡Maestr,
wen dox nzo be reꞌ!
¡Bilaꞌ go chaoꞌ no chon rranch;
tube par go,
xtube par Muisés,
no xtube par Li!
6 Porke dox mizheb rë men cheꞌn Jesús reꞌ,
kuzeꞌ net Per kwan diꞌzh xaꞌ.
7 Orzeꞌ plo nzhin bixaꞌ,
ngula tu xkao yek bixaꞌ,
no mien tu widiꞌzh leꞌn xkao kwaꞌn nzhab:
―¡Xaꞌ reꞌ nak Xgaꞌna xaꞌ nazhiꞌ da!
¡Bin go roꞌ Xaꞌ!
8 Orzeꞌ lwegaꞌ miwiꞌ bixaꞌ nakaꞌn,
yentraꞌ cho ngane bixaꞌ,
nab tsa Jesús nzo.
9 Or ñadla bixaꞌ yek yiꞌ,
orzeꞌ mileꞌ Jesús mandad,
yent plo diꞌzh bixaꞌ kwaꞌn une bixaꞌ,
haxta or ruban Me.
10 Orzeꞌ nguluꞌchaoꞌ bixaꞌi laxtoꞌ bixaꞌ,
no midiꞌzh bixaꞌ entre lëꞌ bixaꞌ,
¿kwan kwaꞌn ruban menx?
11 Orzeꞌ minabdiꞌzh bixaꞌ lo Jesús,
nzhab bixaꞌ:
―¿Chon nidiꞌzh rë xaꞌ niluꞌ ley kwaꞌn milaꞌ Dios lo Muisés,
galo laka Li yiꞌd?
12 Orzeꞌ nzhab Jesús:
―Walika,
lëꞌ Li galo yiꞌd,
no lëꞌ xaꞌ leꞌ yëk rë men lo Dios,
mbaino,
¿chon nzobniꞌ lo Yech cheꞌn Dios,
lëꞌ Xgaꞌn Dios Me nu nak tu men yizhyuo,
kwaꞌn dox zakzi xaꞌ,
no nayilat men xaꞌ?
13 Per na ni lo go,
lëꞌ Li mbiꞌd la,
no rë men mileꞌ kwaꞌn ngokla bixaꞌ kun lëꞌ xaꞌ,
nela xmod nzobniꞌ ka lo Yech cheꞌn Dios,
kwaꞌn nguzak xaꞌ.
Miliyak Jesús tu mbwin nzho tu mbi mal laxtoꞌ
14 No or mizhin bixaꞌ plo nzhin más rë men cheꞌn Me,
une Jesús lëꞌ tu bëd men nzhin la nakaꞌn,
no kichëꞌlroꞌ pla rë men niluꞌ ley kun más rë men cheꞌn Jesús.
San Marcos 9:14-29
15 No or une rë men Jesús,
xe miaꞌn bixaꞌ,
orzeꞌ karre nguzubi bixaꞌ par uniꞌ bixaꞌ lo Jesús,
16 orzeꞌ nzhab Jesús:
―¿Kwan kichëꞌlroꞌ go kun rë xaꞌ baꞌ?
17 Orzeꞌ nzhab tu xaꞌ xid rë men zeꞌ:
―Maestr,
lëꞌda nzëdnu xmëꞌda lol,
porke nzho tu mbi mal laxtoꞌ mëꞌd,
kwaꞌn nileꞌ nagaktaꞌ diꞌzh mëꞌd,
18 porke rë or nizen mbi reꞌ mëꞌd,
haxta niyixkaowe mëꞌd no nigubiy mëꞌd;
orzeꞌ ñax bichiꞌn roꞌ mëꞌd no nidaoꞌlëi mëꞌd,
orzeꞌ niyezh mëꞌd;
no minaꞌbla da lo rë men cheꞌnal par ngagoꞌ bixaꞌ mbi mal reꞌ,
per nangaktaꞌ ngaleꞌ bixaꞌi.
19 Orzeꞌ mikab Me,
no nzhab Me:
―¡Men xaꞌ gat ñilat Dios!
¿Haxta pok zon kun go par yila go Dios?
¿Haxta pok xek da lo go?
¡Dinu xmëꞌdalx!
20 Orzeꞌ mbiꞌy bixaꞌ mbwin lo Jesús;
per or une mbi mal Jesús,
orzeꞌ mileꞌi lwegaꞌ mikao mbwin,
no ngwachin mbwin lo yuo,
orzeꞌ maska ñaxyo mbwin,
no ñax bichiꞌn roꞌ mbwin.
21 Orzeꞌ minaꞌbdiꞌzh Jesús lo xuz mbwin:
―¿Plak nzha di nizak mbwin kureꞌ?
Orzeꞌ nkab xuz mbwin:
―Dizde win mbwine.
22 No nayax wëlt nigobiy mbwin lo bël no leꞌn nits,
par nzhaklai gute mbwin;
per chi zak leꞌl tu kwaꞌn,
bilats laxtoꞌ go no,
no goknu go no.
23 Orzeꞌ nzhab Jesús:
―¿Chon nel:
“Chi zak leꞌle”?,
porke xaꞌ ñila Dios,
¡rëi gak leꞌ xaꞌ!
24 Orzeꞌ lwegaꞌ nguruzhië xuz mbwin,
nzhab xaꞌ:
―¡Na ñilaka lu;
no goknu da,
kwaꞌn nagak yilan!
25 No une Jesús,
tu bëd men nzhazubi karre plo nzo Jesús,
orzeꞌ nayiꞌ midiꞌzh Jesús lo mbi mal zeꞌ,
nzhab Me:
―¡Mbi cheꞌn Mizhab kwaꞌn nileꞌ nzhak sord men no nagaktaꞌ diꞌzh men,
na kileꞌ mandadal,
gurutin laxtoꞌ mbwin reꞌ,
no nayëktraꞌl xtu wëlt lo mbwin!
26 Orzeꞌ nguruꞌzhië mbi mal zeꞌ,
no mileꞌi mikao mbwin xtu wëlt,
no nguzhibe mbwin dox naye,
orzeꞌ nguroꞌi;
no lëꞌ mbwin miaꞌn nela tu men ngut gaꞌ,
haxta rë men nzhin zeꞌ nzhab:
“Ngut mbwin.”
27 Per Jesús nguzen yaꞌ mbwin,
ngoknu Me nguzuli mbwin.
28 Or nguio Jesús leꞌn tu yoꞌ,
orzeꞌ minabdiꞌzh rë men cheꞌn Me lo nab Me,
nzhab bixaꞌ:
―¿Chon nangakt ngagoꞌ no mbi mal baꞌ,
laxtoꞌ mbwin baꞌ?
29 Nkab Jesús:
―Rë lo mbi mal kwaꞌn nak saꞌ,
nagakt roꞌi chi nanaꞌb men xche lo Dios.
Nzhab Jesús xtu wëlt xmod gat Me
30 Or nguroꞌ bixaꞌ zeꞌ,
nded bixaꞌ par lazh men Galilea;
no nanet Jesús,
gon rë men plo nzha Me,
San Marcos 9:30-50
―Lëꞌda nak Xgaꞌn Dios no nak da tu men yizhyuo;
no lëꞌ rë men zen da par chi bixaꞌ da plo gat da;
per ngubizh yon,
lëꞌda ruban.
32 Per lëꞌ rë men cheꞌn Me,
nangazobyekt bixaꞌ widiꞌzh reꞌ,
no nizheb bixaꞌ nganabdiꞌzh bixaꞌ kwane.
Miluꞌ Jesús, cho más tsak
33 Or mizhin bixaꞌ yezh Capernaúm,
no or nzhin la bixaꞌ leꞌn yoꞌ,
nzhab Me lo rë men cheꞌn Me:
―¿Kwan kichëꞌl roꞌ go,
or nzë be nez?
34 Per yent cho ngakab;
porke or nzë bixaꞌ nez,
mis lëꞌ bixaꞌ kichëꞌl roꞌ,
kidiꞌzh bixaꞌ,
nabei cho gak xaꞌ leꞌ mandad xid bixaꞌ.
35 Orzeꞌ nguzob Jesús,
no ngurezh Me dub tu dusen men cheꞌn Me,
orzeꞌ nzhab Me:
―Cho go nzhakla,
gak xaꞌ nileꞌ mandad;
xaꞌ zeꞌ gak xaꞌ lult,
no nela tu mos gaꞌ gak xaꞌ xid go.
36 Orzeꞌ mizo Me tu mëꞌd lo bixaꞌ,
no ndeꞌzh Me mëꞌd,
nzhab Me:
37 ―Men niwiꞌ wen lo mëꞌd win reꞌ por nak mëꞌd reꞌ men da,
gat lëꞌtaꞌ lo mëꞌde,
sino ke lon miwiꞌ xaꞌ wen;
mbaino xaꞌ miwiꞌ wen lon,
gat lëꞌtaꞌ lone,
sino ke lo Xuza Me mixëꞌl da,
miwiꞌ xaꞌ wen.
Xaꞌ gat niyiꞌ nine be, man cheꞌn be ño xaꞌ
38 Orzeꞌ nzhab Juan:
―Maestr,
une no tu xaꞌ kigoꞌ mbi mal,
kizeꞌt xaꞌ lë go.
Orzeꞌ nzhab no lo xaꞌ,
naleꞌtraꞌ xaꞌi,
porke gat lëꞌt men cheꞌn be xaꞌ.
39 Orzeꞌ nzhab Jesús:
―Bilaꞌ go kileꞌ xaꞌi,
porke yent cho tu xaꞌ leꞌ tu zhiꞌn nazhon por lën,
no guzhëla di orzeꞌ,
diꞌzh xaꞌ gat lëꞌ ticha,
40 porke xaꞌ gat niyiꞌ nine be,
man cheꞌn be ño xaꞌ.
41 No kwaliskier men neꞌ cheꞌp nits go go,
por nak go men da,
walika nin,
por kuzeꞌ lëꞌ Dios zaꞌ tu kwaꞌn wen kaꞌ xaꞌ.
Kwan zak tu xaꞌ leꞌ; laꞌ xtu men Dios
42 No nu nzhab Jesús:
―Wanei cho tu xaꞌ leꞌ,
yaꞌl laxtoꞌ xtu xaꞌ Dios,
tu xaꞌ laore ngwayila da;
más wen ya xaꞌ leꞌn nitsdoꞌ,
xoꞌb tu ke ro yën xaꞌ,
nes yachin xaꞌ par gat xaꞌ.
43 No chi lëꞌ yaꞌl nileꞌ nizëꞌb xkil lo Dios;
mejor bichoꞌi.
Más wen gat kinutal rop yaꞌl,
per banal dubtaꞌ kun Dios,
ke par bil leꞌn bël,
rop lad yaꞌl,
plo ñol bël par dubtaꞌ,
44 plo nzhao miyëz men,
no gat ñot nzhat ma;
ni bël gat ñalt.
45 No chi lëꞌ niꞌl nileꞌ nizëꞌb xkil lo Dios,
más wen bichoꞌi.
Más wen banal dubtaꞌ kun Dios kun tutsa niꞌl,
ke par bil plo gat ñalt bël,
kun rop lad niꞌl,
46 plo nzhao miyëz men,
no gat ñot nzhat ma;
ni bël gat ñalt.
47 No chi lëꞌ zalol nileꞌ nizëꞌb xkil lo Dios;
más wen guloꞌi,
mbaino yol plo nileꞌ Dios mandad kun tutsa zalol,
ke par bil kun rop zalol plo ñol bël par dubtaꞌ,
48 plo nzhao miyëz men,
no gat ñot nzhat ma;
ni bël gat ñalt,
49 porke lëꞌ Dios xëꞌl bël xid rë men,
nela nigo men zed lo kwaꞌn gao men gaꞌ.
50 Lëꞌ zed nizuꞌ;
per chi gat nazhiꞌy,
yentraꞌ kwan zuꞌi.
Gok wen go nela zed gaꞌ,
par kwin go wen,
tu go kun xtu go.