¿Cho más tsak xid rë men cheꞌn Dios?
18
Mis orzeꞌ,
nguzubi rë men cheꞌn Jesús,
par minaꞌbdiꞌzh bixaꞌ lo Me:
―¿Cho xaꞌ más tsak xid rë men cheꞌn Dios?
―Walika kwaꞌn nin lo go,
rë go,
chi nachëꞌu xmod nak go,
mbaino nagak go nela mëꞌd reꞌ,
orzeꞌ gakt yo go plo nileꞌ Dios mandad.
4 Men xaꞌ nadoꞌ laxtoꞌ lo Dios nela mëꞌd reꞌ,
xaꞌ reꞌ más tsak plo nileꞌ Dios mandad,
5 no xaꞌ chizhiꞌ tu men,
ter tu xaꞌ yent kwan tsak par lo rë men nela mëꞌd reꞌ,
per por nak xaꞌ tu men da,
orzeꞌ kun na mileꞌ xaꞌi.
Zheꞌb nalats nzha men, xaꞌ leꞌ zëꞌb xki xtu men lo Dios
6 ’No wanei cho tu men leꞌ zëꞌb xki tu men da xaꞌ yent kwan tsak par lo men,
xaꞌ leꞌ kureꞌ ñal gat xaꞌ leꞌn nitsdoꞌ,
dub nikiliꞌb tu ke ro yën xaꞌ.
7 Dox rë kwaꞌn gat lëꞌ nzho yizhyuo,
mbaino yent cho kwëꞌze;
wene namás par zëꞌb xki men lo Dios,
¡per zheꞌb nalats nzha xaꞌ nileꞌ,
nzëꞌb xki xtu men lo Dios!
8 No chi por yaꞌ go o niꞌ go nileꞌ go tu kwaꞌn gat lëꞌ,
par laꞌ go widiꞌzh da,
neka bichoꞌ goi,
porke más wen yent yaꞌ go o tu niꞌ go yizhyuo reꞌ,
per ban go vid nazhon kwaꞌn nizaꞌ Dios par dubtaꞌ,
ke par dub go bi leꞌn gabil par dubtaꞌ.
9 No chi por tu zalo go leꞌ go kwaꞌn leꞌ par laꞌ go widiꞌzh da,
neka guloꞌ goi;
más wen ban go yizhyuo reꞌ vid nazhon dub saꞌ go ke par dub nak go bi leꞌn gabil par dubtaꞌ.
Kwent cheꞌn tu mbëkxiꞌl kwaꞌn nguziwan
10 ’Biwiꞌu,
par naleꞌ go nayaꞌ lo rë men da,
xaꞌ chigab natsakt beꞌs lo rë men,
porke rë ganj kwaꞌn nikina bixaꞌ,
zilitaꞌ ñayab rë kwaꞌn nizak bixaꞌ lo Xuza,
Me nzho lo yibëꞌ.
11 Na,
Xgaꞌn Dios,
no nak Da tu men yizhyuo,
mixëꞌl Dios Da par lo rë men nzëꞌb xki lo Dios par kon bixaꞌ lo rë kwaꞌn nazheꞌb nzho bixaꞌ.
12 No nzhab Jesús:
―¿Cho xigab cheꞌn go?
Chi tu men kinu tu gayoꞌ mbëkxiꞌl,
no chi nguziwan tu ma,
¿chi zilaꞌ xaꞌ nzhin dub tap gal nzho chiꞌn bitap ma,
par yakwaꞌn xaꞌ ma nguziwan zeꞌ?
13 No or yazhël xaꞌ ma,
kwaꞌn nanen,
más zak laxtoꞌ xaꞌ por ma reꞌ,
ke par dub tap gal nzho chiꞌn bitap ma kwaꞌn nzhin ka lo xaꞌ.
14 Seꞌska Xuz go Me nzho lo yibëꞌ,
gat nzhaklat Me yitlo ni tu rë men da,
rë xaꞌ chigab natsakt beꞌs.
Biyaꞌl laxtoꞌ go rë kwaꞌn gat lëꞌ nileꞌ xtu men lo go
(Lc. 17:3)
15 ’No chi lëꞌ wech go mileꞌ tu kwaꞌn gat lëꞌ lo go,
bidiꞌzh roptsa go,
guzh go gat lëꞌt kwaꞌn mileꞌ xaꞌ.
No chi mizi xaꞌ kwaꞌn nak xaꞌ,
orzeꞌ guzhë mileꞌ go gan,
gak yo xaꞌ xid go xtu wëlt.
16 No chi nangazi xaꞌ kwaꞌn nak xaꞌ,
orzeꞌ gurezh go xtu men o xchop xaꞌ par gon bixaꞌ kwan yaꞌn go.
17 No chi nane xaꞌ gon xaꞌ kwaꞌn nak xaꞌ,
orzeꞌ gurezh go rë men yadoꞌ;
no chi ni saꞌ nane xaꞌ zi xaꞌ kwan nak xaꞌ,
orzeꞌ nachëꞌlt raꞌ go kun lëꞌ xaꞌ,
no gop go kwent xaꞌ nela tu men gat nzhont widiꞌzh cheꞌn Dios,
o nela tu men nikan dimi cheꞌn rey.
18 ’Walika kwaꞌn nin lo go;
rë nak kwaꞌn nzëꞌb xki men,
kwaꞌn yaꞌl laxtoꞌ go lo yizhyuo reꞌ,
nu ska Dios yaꞌl laxtoꞌ rë nak kureꞌ;
no rë kwaꞌn gat lëꞌ kwaꞌn nayaꞌlt laxtoꞌ go cheꞌn rë men yizhyuo reꞌ,
nayuꞌbchitskai lo Dios lo yibëꞌ.
19 ’No nu walika kwaꞌn nin reꞌ,
chi chop go yaꞌn tutsa kwaꞌn yizhyuo reꞌ par naꞌb goi lo Xuza Me nzho lo yibëꞌ,
orzeꞌ lëꞌ Me neꞌ kwaꞌn naꞌb go lo Me,
20 porke plo nzo chop tsa go o chon go par naꞌb go tu kwaꞌn lo Xuza por nak go men Da,
orzeꞌ zeꞌ nzon kun go.
21 Orzeꞌ nguzubi Per lo Jesús,
nzhab Per:
―Lëꞌo,
¿mási pla wëlt leꞌ wecha kwaꞌn gat lëꞌ lon,
no nakiꞌn yaꞌl laxtoꞌn kwaꞌn mileꞌ xaꞌ?
¿Chi haxta gazh wëlte?
22 Orzeꞌ nzhab Jesús:
―Gat lëꞌt saꞌi;
lëꞌi nak haxta nagakt lab met pla wëlte.
Kwent cheꞌn tu xaꞌ nanet yaꞌl laxtoꞌ kwaꞌn mileꞌ men lo
23 ’Plo nileꞌ Dios mandad nak nela tu rey xaꞌ ngunaꞌb kwent plak nzëꞌb tugaꞌ rë mos cheꞌn xaꞌ.
24 No or nguzublo rey kinaꞌb xaꞌ kwent,
ngwanu bixaꞌ lo rey tu mos xaꞌ nzëꞌb más di tu miyon pes pura kwaꞌn plat.
25 No lëꞌ mos reꞌ gat kinut mos dimi par kix xaꞌ rë kwaꞌn nzëꞌb xaꞌ,
orzeꞌ mileꞌ rey mandad,
do mos reꞌ nela tu ma gaꞌ kun rë lizh xaꞌ,
mbaino kun rë kwaꞌn kinu xaꞌ,
por rë kwaꞌn nzëꞌb xaꞌ.
26 Orzeꞌ ngoꞌt kuslo mos reꞌ,
mileꞌ xaꞌ nalats lo rey,
nzhab xaꞌ:
“Lëꞌo,
bilats laxtoꞌ go da,
gulëz go xcheꞌp,
lëꞌda kix ka rë kwaꞌn nzëꞌba lo go.”
27 Orzeꞌ milats laxtoꞌ rey xaꞌ,
nzhab rey:
“Bilaꞌ nakixtraꞌle,
yentraꞌ kwan nzëꞌbal lon”,
no miliyaꞌ rey xaꞌ.
28 Milox nguroꞌ xaꞌ reꞌ lizh rey,
lëꞌchi mizhëꞌl xaꞌ xtu tsaꞌ mos xaꞌ,
nzëꞌb neꞌ reꞌ lo xaꞌ reꞌ dimi kwaꞌn nileꞌ men gan chon mbëoꞌ garol nikë men zhiꞌn,
per nguzen xaꞌ yën neꞌ reꞌ,
mitsiꞌ xaꞌi no nzhab xaꞌ:
“¡Xaxa udix kwaꞌn nzëꞌbal lon!”
29 Orzeꞌ ngoꞌt kuslo neꞌ reꞌ lo xaꞌ,
nalatsa mileꞌ neꞌ lo xaꞌ,
mbaino nzhab neꞌ:
“¡Bilats laxtoꞌ go da,
gulëz go xcheꞌp,
lëꞌda kix ka rë kwaꞌn nzëꞌba lo go!”
30 Per nangaziyëlt xaꞌ,
lëꞌla ngulo xaꞌ neꞌ lizhyiꞌb haxta kix neꞌ kwaꞌn nzëꞌb neꞌ lo xaꞌ.
31 Or une más rë mos cheꞌn rey kureꞌ,
dox miwin laxtoꞌ bixaꞌ,
orzeꞌ ngwayab bixaꞌi lo rey.
32 Or mbin rey kureꞌ,
orzeꞌse miyiꞌ rey no ngurezh rey mos nakap reꞌ,
no nzhab rey:
“¡Mos mal laxtoꞌ,
tatu nazheꞌb nakal!
Na miaꞌl laxtoꞌ rë kwaꞌn nzëꞌbal lon por miwiꞌn nalats mileꞌl lon.
33 Ñal ngalats ka laxtoꞌl tsaꞌ mosal baꞌ nela xmod milen kun lu gaꞌ.”
34 No por dox miyiꞌxian rey,
tuli michi xaꞌ mos reꞌ lo rë xaꞌ nikina lizhyiꞌb par zakzi bixaꞌ mos reꞌ haxta kix mos reꞌ rë kwaꞌn nzëꞌb mos.
35 No nu nzhab Jesús:
―Seꞌska linu Xuza Me nzho lo yibëꞌ,
tugaꞌ go,
chi nayaꞌl laxtoꞌ go rë kwaꞌn gat lëꞌ nileꞌ xtu men lo go,
per nakiꞌn leꞌ goi kun dub laxtoꞌ go.