Or ngubixlo Jesús
17
Unded xoꞌp ngubizh,
ngwanu Jesús Per,
no Jakob,
mbaino Juan wech Jakob,
yek tu yiꞌ ro.
2 Zeꞌ,
ngubixlo Jesús dilant lo bixaꞌ:
miluꞌ lo Me nela biani cheꞌn ngubizh gaꞌ,
no xab Me bëo laka no ñaz bële.
3 Lëꞌchi ¡di!,
nguroꞌxoꞌb Li,
rop xaꞌ kun Muisés,
kidiꞌzh bixaꞌ kun Jesús.
4 Orzeꞌ nzhab Per:
―¡Lëꞌ go,
wen dox nzo be reꞌ!
Chi nzhakla go,
cha̱u̱ chon rranch reꞌ;
tube par go,
xtube par Muisés,
no xtube par Li.
5 Dub kidiꞌzh Per kureꞌ,
lëꞌchi ¡di!,
maska ñaꞌzbël tu xkao ngula yek bixaꞌ,
ngwani dub plo nzhin bixaꞌ;
leꞌn xkao zeꞌ mien tu widiꞌzh kwaꞌn nzhab seꞌ:
―¡Xaꞌ reꞌ Xgaꞌna,
Xaꞌ nazhiꞌ da!,
dox nizak laxtoꞌn por lëꞌ Xaꞌ;
¡bin go roꞌ Xaꞌ!
6 Or mbin yon men cheꞌn Jesús widiꞌzh reꞌ,
tuli ngoꞌt kuslo bixaꞌ lo yuo,
dox mizheb bixaꞌ,
7 orzeꞌ nguzubi Jesús lo bixaꞌ,
migal Me bixaꞌ,
no nzhab Me:
―Waxche go,
nanzhebt go.
8 Or ngulits bixaꞌ lo bixaꞌ,
yentraꞌ cho nak,
nab tsa Jesús nzo zeꞌ.
9 No dub ñadla bixaꞌ yek yiꞌ zeꞌ,
nzhab Me lo yon xaꞌ reꞌ:
―Yent cho lo diꞌzh go kwaꞌn une go reꞌ,
haxta or ruban Xgaꞌn Dios,
Me nu nak tu men yizhyuo.
10 Orzeꞌ minabdiꞌzh bixaꞌ kureꞌ lo Me:
―¿Chon nidiꞌzh rë xaꞌ niluꞌ ley cheꞌn Muisés,
galo laka Li yiꞌd?
11 Orzeꞌ nzhab Jesús:
―Walika,
galo Li yiꞌd,
par leꞌ xaꞌ yëk rë men lo Dios,
12 per na ni lo go,
lëꞌ Li mbiꞌd la,
no maska bixaꞌ ngon roꞌ Li,
lëꞌla miliꞌnu bixaꞌ Li kwaꞌn nzhakla bixaꞌ.
Seꞌska leꞌ men kun Xgaꞌn Dios,
Me nu nak tu men yizhyuo.
13 Orzeꞌ mizobyek yon men cheꞌn Me,
ka Juan xaꞌ mililëiꞌ men leꞌn nits,
mizeꞌt Me.
Miliyak Jesús tu miyiꞌ nzen tu mbi mal
14 Or mizhin Jesús plo nzhin nayax men,
nguzubi tu miyiꞌ plo nzo Jesús,
no nguzuxib xaꞌ lo Me,
nzhab xaꞌ:
15 ―Lëꞌ go,
bilats laxtoꞌu xgaꞌna,
dox nalats kwaꞌn nizak xaꞌ,
tutsa or nikao xaꞌ maska ñëk xaꞌ;
nayax wëlt ñachin xaꞌ plo nzhab xaꞌ leꞌn bël o leꞌn nits.
16 Na mbiꞌdnu la xaꞌ lo rë men cheꞌn go,
per nangaleꞌt bixaꞌ gan,
nganiwen xgaꞌna.
17 Orzeꞌ nzhab Jesús:
―¡Taxa nagat yila go rë kwaꞌn nin lo go!
¡Tatu nad go par yila go rë kwaꞌn nazhon cheꞌn Dios!
¡Dox kixek da lo go,
nagat zobyek go rë kwaꞌn nin lo go!
Orzeꞌ nzhab Jesús:
―¡Dinu xmëꞌdal reꞌ!
18 Orzeꞌ mileꞌ Jesús mandad,
roꞌ mbi mal zeꞌ laxtoꞌ miyiꞌ zeꞌ;
no tuli miak miyiꞌ dizde zhë zeꞌ.
19 Or nzo Me tu lad,
nguzubi rë men cheꞌn Me lo Me par nzhab bixaꞌ:
―¿Chon nangakt ngagoꞌ no mbi mal laxtoꞌ miyiꞌ zeꞌ?
20 Orzeꞌ nzhab Jesús:
―Por ña-ñëꞌd xigab cheꞌn go kun Diose.
Walika kwaꞌn nin lo go,
chi kwaꞌn ñila go Dios ngak nela tu lazh mostas gaꞌ,
or gab go lo yiꞌ baꞌ:
“Yubchi,
bizë xtu plo”,
no lëꞌi yubchi,
no yent cho tu kwaꞌn nagak leꞌ go.
21 Lëꞌ mbi mal kwaꞌn ngulon laxtoꞌ miyiꞌ zeꞌ,
nayot roꞌi chi nanaꞌb men lo Dios xche,
no xlats men.
Jesús midiꞌzh xtu wëlt xmod gat Me
22 Dub nzho Jesús lazh men Galilea kun rë men cheꞌn Me,
nzhab Me lo bixaꞌ:
―Na,
Xgaꞌn Dios,
nu nak Da tu men yizhyuo,
lëꞌ rë men zen da no weiꞌ bixaꞌ da lo rë xaꞌ nileꞌ mandad.
23 Lëꞌ bixaꞌ gut da,
per ngubizh yon,
lëꞌda ruban.
Orzeꞌ dox miwin laxtoꞌ rë men cheꞌn Me por kureꞌ.
Dimi kwaꞌn nigan par yadoꞌ
24 Or mizhin Jesús kun rë men cheꞌn Me yezh Capernaúm,
zeꞌ nguzubi pla miyiꞌ lo Per,
rë xaꞌ nikan dimi par yadoꞌ,
nzhab bixaꞌ:
―¿Taxa chi gat nizaꞌt Maestr cheꞌnal dimi par yadoꞌ?
25 Nkab Per:
―Lëꞌi nizaꞌ ka Xaꞌ.
Or nguio Per leꞌn yoꞌ,
tuli ka nzhab Jesús:
―Di xigab cheꞌnal Simón,
¿xmod nileꞌ rë rey yizhyuo reꞌ?
¿Cho lo nikan bixaꞌ dimi?
¿Chi mis lo rë xin xaꞌi,
o lo xaꞌ rë mene?
26 Orzeꞌ nzhab Per:
―Lo xaꞌ rë mene.
Orzeꞌ nzhab Me: