Minaꞌb pla men fariseo no pla men saduceo, leꞌ Jesús tu kwaꞌn nazhon
16
Nguzubi pla rë men fariseo kun zipla men saduceo lo Jesús,
nzhakla bixaꞌ zenbeꞌ bixaꞌ Me (wiꞌ bixaꞌ xmod nak Me),
nabei chi walika Dios mixëꞌl Me;
kuzeꞌ nzhakla bixaꞌ,
luꞌ Jesús tu kwaꞌn nazhon leꞌ Dios,
2 orzeꞌ nzhab Jesús lo bixaꞌ:
―Or mizhëlyuo,
chi naxne niluꞌ lo yibëꞌ,
nzhab go:
“Biwiꞌ,
gat lëꞌt kwaꞌn la yiu yëꞌ,
lëꞌ lo yibëꞌ niluꞌ naxne”;
3 no or garziꞌl nzhab go:
“Biwiꞌ,
nadedt lëꞌ yiu la,
dox nazhon niluꞌ xkao lo yibëꞌ.”
No chi nilibeꞌ go rë señ kwaꞌn ño lo yibëꞌ,
¿chon nalibeꞌo rë kwaꞌn nazhon kileꞌ Dios rë zhë reꞌ?
4 Men nakap go,
gat nileꞌt go kwaꞌn nzhakla Dios,
mbaino nal nzhakla go,
ne go tu kwaꞌn nazhon leꞌ Dios.
Per nanet goi;
nab tsa kwaꞌn nazhon kwaꞌn mileꞌ Dios kun Jonás,
ne go.
Orzeꞌ milaꞌ Jesús rë men zeꞌ,
nzha Me xtu plo.
Levadur cheꞌn men fariseo
5 Or nded Jesús kun rë men cheꞌn Me xtu roꞌ lagún,
no miaꞌl laxtoꞌ bixaꞌ ngweiꞌ bixaꞌ kwaꞌn gao bixaꞌ,
6 orzeꞌ nzhab Me lo bixaꞌ:
―Ne go,
nazen go levadur cheꞌn rë men fariseo,
no cheꞌn rë men saduceo.
7 Orzeꞌ nzhab bixaꞌ lo wech bixaꞌ:
―Ne xaꞌ kubaꞌ lo be,
pas por nangayiꞌdnu be kwaꞌn gao bei.
8 Per nane la Jesús cho xigab kileꞌ bixaꞌ,
kuzeꞌ nzhab Me:
―¿Chon dox kileꞌ go xigab por gat nzadnut go kwaꞌn gao be?
¡Dox wëꞌ ñila go da!
9 ¿Chi gat zobyek go kwaꞌn nin baꞌ?,
no,
¿chi miaꞌl la laxtoꞌ go kwan ngok kun gaiꞌ tsa pan no ngole ndao gaiꞌ mil men,
mbaino zipla kardore miaꞌn sobr?
10 No,
¿chi nu miaꞌl laxtoꞌ go kwan ngok kun gazh tsa pan,
no tap mil men ndaowe,
no pla kardore miaꞌn sobr?
11 ¿Chon nanganut laxtoꞌ go kwaꞌn midizha lo go,
gat lëꞌt pan midizha?
Kwaꞌn nin lo go,
ne go nayëꞌde go rë kwaꞌn nak rë men fariseo no men saduceo;
lëꞌ bixaꞌ nak nela levadur kwaꞌn nitsibech kwaꞌn gaꞌ.
12 Orzeꞌ mizobyek bixaꞌ,
gat lëꞌt levadur cheꞌn pan midiꞌzh Jesús;
kwaꞌn midiꞌzh Me nak rë kwaꞌn niluꞌ rë men fariseo kun men saduceo lo más rë men.
Nzhab Per, lëꞌ Jesús nak Krist
13 Or mizhin Jesús kun rë men cheꞌn Me yezh Cesarea plo nileꞌ Lip wech Herodes mandad,
orzeꞌ minaꞌbdiꞌzh Jesús lo rë men cheꞌn Jesús,
nzhab Me:
―¿Cho da nzhab men?
14 Orzeꞌ nzhab rë men cheꞌn Me:
―Nzho men nidiꞌzh,
go Juan xaꞌ miliꞌlëiꞌ men leꞌn nits;
más bixaꞌ nzhab,
go Li;
no xtu ben men nidiꞌzh go Jeremías,
o xtu rë xaꞌ midiꞌzh por Dios nzhala.
15 Orzeꞌ nzhab Jesús:
―Go gaꞌ,
¿cho da nileꞌ go xigab?
16 Tuli mikab Simón Per,
nzhab xaꞌ:
―Go Krist,
Xgaꞌn Dios,
Me kinu yalnaban par dubtaꞌ.
17 Orzeꞌ nzhab Jesús:
―Wen nzhal,
Simón xgaꞌn Jonás;
gat lëꞌt men miluꞌi lol,
lëꞌ Xuza Me nzho lo yibëꞌ miluꞌi lol.
18 Na ni,
lël rulë Per (kwaꞌn gab ke ro),
mbaino lo ke reꞌ cha̱o̱wa̱ yadoꞌ da xaꞌ nak rë men da,
no per ni Mizhab naleꞌt gan chil yadoꞌ reꞌ.
19 No lu zo lo rë men da:
Rë kwaꞌn nzhaklal gak lo yizhyuo reꞌ,
lëꞌ Dios ziyël leꞌi;
no rë kwaꞌn gat nzhaklatal gak lo yizhyuo reꞌ,
nagakte.
20 Orzeꞌ mileꞌ Jesús mandad lo rë men cheꞌn Me,
par yent cho lo diꞌzh bixaꞌ,
lëꞌ Me Krist.
Jesús nzhab, lëꞌ Jesús gat
21 Dizde zhë zeꞌ nguzublo Jesús midiꞌzh Jesús lo rë men cheꞌn Jesús,
nakiꞌn ya Me yezh Jerusalén.
Zeꞌ zakzi rë men Me,
rë xaꞌ nak zhiꞌn lo rë men Israel,
no kun rë ngulëiꞌ xaꞌ nileꞌ mandad lo más rë ngulëiꞌ,
mbaino kun rë xaꞌ niluꞌ ley cheꞌn Muisés;
no nu nzhab Me:
―Lëꞌ bixaꞌ gut da,
per ngubizh yon lëꞌda ruban.
22 Orzeꞌ nguloꞌ Per Jesús tu lad,
nzhab Per:
―Lëꞌ go,
¡Dios lats laxtoꞌ go!
¡Nayot laꞌ Dios zak go rë kubaꞌ!
23 Per miëk Jesús lo Per,
nzhab Me:
―¡Chi lon Mizhab!
¡Ka nzhaklal chil da lo kwaꞌn gat lëꞌ;
kwaꞌn nzhaklal,
gat lëꞌt lo Dios nzëi;
xigab cheꞌn men kubaꞌ!
24 Orzeꞌ nzhab Me lo rë men cheꞌn Me:
―Chi nzhakla tu go yiꞌdkë go ticha,
bilaꞌ go kwaꞌn nzhakla go yizhyuo reꞌ,
no biye laxtoꞌ go ter gat go por nak go men da,
orzeꞌse diꞌkë go ticha.
25 Xaꞌ nane gak men da por nizheb xaꞌ gat xaꞌ,
lëꞌ xaꞌ lox lo Dios;
per xaꞌ niye laxtoꞌ gat por nak xaꞌ men da,
lëꞌ xaꞌ ban dubtaꞌ lo Dios,
26 no,
¿kwan zuꞌ par tu men,
ter cheꞌn xaꞌ dub yizhyuo,
per lo Dios lëꞌ xaꞌ lox?
27 Na,
Xgaꞌn Dios no nak Da tu men yizhyuo,
nadedte lëꞌ da yal xtu wëlt kun yalnazhon cheꞌn Xuza,
no kun rë ganj cheꞌn Me,
orzeꞌ zan kwaꞌn gal kad men por rë kwaꞌn mileꞌ bixaꞌ,
wanei chi kwaꞌn wene o kwaꞌn nakape.
28 Walika kwaꞌn nin lo go,
nzho pla go nzo reꞌ,
naban gaka go lëꞌ go ne or yala kun rë yalnazhon Da par len mandad.