¿Kwan nileꞌ, ñaꞌn gat nambe men lo Dios?
15
Yezh Jerusalén nzë pla men fariseo,
kun pla men,
xaꞌ niluꞌ ley cheꞌn Muisés;
nguzubi bixaꞌ lo Jesús,
nzhab bixaꞌ:
2 ―¿Chon gat nizet rë men cheꞌnal yaꞌ bixaꞌ or nzhao bixaꞌ;
gat nileꞌt bixaꞌ rë kostumbr kwaꞌn milaꞌ rë men cheꞌn be,
xaꞌ tiemp?
3 Orzeꞌ nkab Jesús:
―Nu ska go,
¿chon gat nileꞌ go kwaꞌn nzobniꞌ lo Yech cheꞌn Dios,
lëꞌla rë kostumbr cheꞌn men tiemp nileꞌ go?,
4 porke seꞌ nzobniꞌ lo Yech cheꞌn Dios:
“Gop kwent xuzal mbaino xnaꞌl”,
mbaino:
“Men ke xuz o xnaꞌ,
gat xaꞌ reꞌ tuli.”
5 Per go nzhab:
“Lëꞌ men gak ka gab lo xuz o lo xnaꞌ:
Nagakt gaknun go;
lëꞌ rë kwaꞌn kinun,
lëꞌi mizala par Dios”,
6 namás par nileꞌ go,
gat nakiꞌntraꞌ gaknu men xuz men o xnaꞌ men.
Wen go par nileꞌ go,
natsaktraꞌ kwaꞌn mileꞌ Dios mandad.
Más nileꞌ go por rë kwaꞌn michaoꞌyek rë men tiemp.
7 ¡Tatu nazheb nak go,
chigab walika men wen go!
Kuzeꞌ ka,
por go mizobniꞌ Isaías widiꞌzh reꞌ lo yech:
8 Rë men reꞌ;
ka lo ya nidiꞌzh bixaꞌ,
nazhiꞌ xaꞌ da,
per leꞌn laxtoꞌ bixaꞌ,
yent kwan nizeꞌn bixaꞌ por Da.
9 Yent kwan zuꞌ nidiꞌzh bixaꞌ nazhon Da,
mbaino rë kwaꞌn niluꞌ bixaꞌ lo men,
pura kwaꞌn nichaoꞌyek mene.
10 Orzeꞌ ngurezh Me rë men lo Me,
nzhab Me:
―Bin go kureꞌ no bizobyek goi:
11 Gat lëꞌt por kwaꞌn nzhao men nileꞌ ñaꞌn gat nambe men lo Dios;
por widiꞌzh kwaꞌn niroꞌ roꞌ men,
nileꞌ ñaꞌn gat nambe men lo Dios.
12 Orzeꞌ nguzubi rë men cheꞌn Jesús lo Jesús,
nzhab bixaꞌ:
―¿Chi une go,
lëꞌ rë men fariseo miyiꞌ or mbin bixaꞌ rë kwaꞌn midiꞌzh go?
13 Orzeꞌ nzhab Jesús:
―Rë ya kwaꞌn nangaxëꞌnt Xuza,
Me nzho lo yibëꞌ,
lëꞌi yiꞌb dub luche.
14 Nachëꞌlt go kun rë men baꞌ.
Ter nak bixaꞌ nela men nikal lo gaꞌ,
per zak bixaꞌ lëꞌ bixaꞌ luꞌ nez lo rë xaꞌ nakao nak yek lo rë cheꞌn Dios,
per gakt luꞌ tu men nikal lo nez lo xtu xaꞌ nikal lo,
porke lëꞌ rop bixaꞌ yachin leꞌn tu yeꞌr.
15 Orzeꞌ nzhab Per:
―Bineo lo no kwan gab widiꞌzh baꞌ.
16 Orzeꞌ nzhab Jesús:
―¿Taxa nu go,
gat nizobyekt kureꞌ?
17 ¿Chi nanet go,
kwaꞌn nzhao met nibi laxtoꞌ met,
orzeꞌ niroꞌi or ña met biꞌx?
18 Per rë widiꞌzh gat lëꞌ kwaꞌn niroꞌ roꞌ men,
leꞌn laxtoꞌ men nzëi;
kureꞌse nileꞌ ñaꞌn gat nambe men lo Dios,
19 porke dizde leꞌn laxtoꞌ men nzë rë xigab gat lëꞌ reꞌ:
Rë kwaꞌn nzhut men men;
no rë kwaꞌn ban men kun tsaꞌ xtu men o kun xaꞌ gat lëꞌ tsaꞌ men;
mbaino rë kwaꞌn niliwaꞌn men;
no rë kwaꞌn nileꞌ nikëꞌ men kixuꞌ men;
mbaino rë kwaꞌn niye men Dios.
20 Rë kureꞌ nileꞌ,
ñaꞌn gat nambe men lo Dios,
no gat lëꞌt por gao men dub beꞌd yaꞌ mene.
Tu unaꞌ cananea dox ñila Dios
21 Or nguroꞌ Jesús zeꞌ,
nzha Me al nez plo nzhin yezh Tiro no yezh Sidón.
22 Zeꞌ nzho tu unaꞌ ben rë xaꞌ cananea;
or une unaꞌ Jesús,
tuli nguzubi unaꞌ no nguruzhië unaꞌ,
nzhab unaꞌ:
―¡Lëꞌo Xgaꞌn Dabi,
bilats laxtoꞌu da!
¡Lëꞌ tu mbi mal nzen xchaꞌpa,
dox kizakziy unaꞌ!
23 Per nangakabt Jesús lo unaꞌ,
orzeꞌ nguzubi rë men cheꞌn Jesús lo Jesús par minaꞌb bixaꞌ lo Me,
nzhab bixaꞌ:
―Bichubla go unaꞌ baꞌ,
lëꞌ unaꞌ nzadkë tich be,
nibizhyë unaꞌ.
24 Orzeꞌ nzhab Jesús lo unaꞌ zeꞌ:
―Per Dios mixëꞌl da nab tsa par gaknun rë men Israel,
xaꞌ nak nela rë mbëkxiꞌl ma nguziwan dan gaꞌ.
25 Per nguzuxib unaꞌ reꞌ lo Jesús,
no nzhab unaꞌ:
―¡Lëꞌo,
kinaꞌba lo go,
gaknu go da!
26 Orzeꞌ nzhab Jesús:
―Gat ñalt kwe men yët lo xmëꞌd men,
par zaꞌ xaꞌi gao mbëk.
27 Per nkab unaꞌ:
―Walika goi;
per nu ka mbëk nikan rë biyo yeꞌn kwaꞌn nzhab xan mes,
cheꞌn xaꞌ nak cheꞌn ma.
28 Orzeꞌ nzhab Jesús:
―¡Ay unaꞌyo,
luse dox ñilal da!
Kwaꞌn unaꞌbal baꞌ,
lëꞌi gak.
No mis orzeꞌ,
miak xchaꞌp unaꞌ.
Miliyak Jesús nayax men nzhakne
29 Or nguroꞌ Jesús zeꞌ,
mizhin Me nez roꞌ lagún cheꞌn men Galilea,
orzeꞌ nkë Me yek tu lom,
zeꞌ nguzob Me.
30 No zeꞌ migan dox nayax men lo Jesús.
Xid rë men zeꞌ nzho rë xaꞌ nzhanu men nzhakne,
xaꞌ nagakt zë,
xaꞌ nikal lo,
mbaino xaꞌ nagakt diꞌzh,
xaꞌ maꞌnk,
no más rë men nzhakne;
rë xaꞌ reꞌ mizhinu men lo Jesús,
no rë bixaꞌ miliyak Jesús.
31 Xe miaꞌn rë men tuli or une bixaꞌ men nagakt diꞌzh,
nzhudiꞌzh;
no men maꞌnk uniwen;
men nagakt zë,
nizë;
no men nikal lo,
miwiꞌ.
Orzeꞌ nzhab rë men,
dox nazhon Dios cheꞌn rë men Israel.
Mizaꞌ Jesús kwaꞌn ndao tap mil miyiꞌ
32 Orzeꞌ ngurezh Jesús rë men cheꞌn Me,
nzhab Me:
―Nilats laxtoꞌn rë men reꞌ,
reꞌ yon ngubizh nzhin bixaꞌ lon,
no gat kinut bixaꞌ kwaꞌn gao bixaꞌ.
Gat nzhaklata bi bixaꞌ xlats bixaꞌ,
nzha ska yazha bixaꞌ nez.
33 Orzeꞌ nzhab rë men cheꞌn Jesús:
―¿Per plo yakaꞌ be kwaꞌn gao rë nak men reꞌ?
No plo nzhin be reꞌ,
yent lizh mene.
34 Orzeꞌ minaꞌbdiꞌzh Jesús lo bixaꞌ:
―¿Pla pan kinu go?
―Gazhtsai,
no pla mbël win ―nkab bixaꞌ.
35 Or mileꞌ Me mandad,
nguzob rë men zeꞌ lo yuo,
36 nguzen Me za gazh pan zeꞌ kun pla mbël zeꞌ.
Or milox mizaꞌ Me xkix lo Dios por lëꞌi,
michix Mei no mizaꞌ Mei,
kaꞌ rë men cheꞌn Me,
par ndiꞌz bixaꞌi gao rë men zeꞌ.
37 Rë men ndao haxta plo ngwazhë bixaꞌ,
no or milox ndao bixaꞌ,
mikan raꞌ bixaꞌ zigazh kardor rë bilao kwaꞌn milaꞌ bixaꞌ.
38 Rë xaꞌ ndao zeꞌ,
nab tsa xaꞌ miyiꞌ,
paste tap mil bixaꞌ,
no ngalabt bixaꞌ rë unaꞌ no ni rë mëꞌd.
39 Orzeꞌ ngulunez Jesús rë men,
no lëꞌ Me nkë leꞌn tu bark par nzha Me rë yezh kwaꞌn nzhin lazh men Magdala.