¿Kwan nileꞌ, nzhak gat nambet men lo Dios?
7
Pla men fariseo kun zipla xaꞌ niluꞌ ley kwaꞌn milaꞌ Dios lo Muisés,
nguzubi bixaꞌ nakaꞌn lo Jesús.
Rë xaꞌ reꞌ nzë yezh Jerusalén.
San Marcos 7:1-23
2 No une bixaꞌ,
pla men cheꞌn Jesús kiyao bixaꞌ dub beꞌd yaꞌ bixaꞌ orzeꞌ midiꞌzh bixaꞌ:
“Gat ñalte.”
3 (Seꞌ mbiꞌd yek bixaꞌ,
porke rë men fariseo,
nela más rë men Israel xaꞌ más delikad por ley cheꞌn Muisés,
dox nabe laxtoꞌ bixaꞌ.
Chi nazëtt xaꞌ yaꞌ xaꞌ,
nagaot xaꞌ,
par leꞌ xaꞌ rë kostumbr cheꞌn rë xuz xaꞌ,
xaꞌ tiemp.
4 No or ñëꞌd xaꞌ di lo xbiꞌ,
nagaot xaꞌ chi nagaz xaꞌ galo,
par leꞌ xaꞌ kostumbr cheꞌn bixaꞌ;
mbaino más rë kostumbr kwaꞌn kinu bixaꞌ,
nela nizët bixaꞌ rë vas no rë jarr,
mbaino rë traxt cheꞌn xaꞌ kwaꞌn yiꞌb brons;
no haxta loꞌn kwaꞌn nzhaꞌ bixaꞌ nizët bixaꞌ.)
5 Kuzeꞌ rë men fariseo kun rë xaꞌ niluꞌ ley,
minaꞌbdiꞌzh bixaꞌ lo Jesús:
―¿Chon nzhao rë men cheꞌnal dub beꞌd yaꞌ bixaꞌ,
gat nileꞌt bixaꞌ rë kostumbr cheꞌn rë men nzhala?
6 Orzeꞌ nzhab Jesús:
―¡Mbël gox!
Walika kwaꞌn midiꞌzh Dios por Isaías por go or mizobniꞌ Isaías kureꞌ:
Rë men reꞌ;
nidiꞌzh bixaꞌ nazhiꞌ bixaꞌ da,
per niyent kwan nizeꞌn bixaꞌ kun laxtoꞌ bixaꞌ.
7 Yent cho kwent nidiꞌzh bixaꞌ nazhon Da;
porke rë kwaꞌn niluꞌ bixaꞌ por Da,
pura cheꞌn mene.
8 Porke go,
tu lad nilaꞌ go cheꞌn Dios,
namás par nileꞌ go kostumbr cheꞌn men.
9 No nu nzhab Jesús:
―¡Walika natsin go par nitsinu go cheꞌn Dios namás,
par nileꞌ go rë kostumbr cheꞌn go!,
10 porke seꞌ midiꞌzh Muisés:
“Gop kwent xuzal mbaino xnaꞌl”,
no,
“Cho xaꞌ ke xuz xaꞌ o xnaꞌ xaꞌ,
ñal gat xaꞌ zeꞌ.”
11 Per go nzhab:
“Lëꞌ men gak ka gab lo xuz o lo xnaꞌ:
Nagakt gaknun lu,
porke rë kwaꞌn kinun,
lëꞌi mizala par Dios.”
12 Kuzeꞌ nalaꞌt go gaknu men xuz men o xnaꞌ men.
13 Por rë kostumbr cheꞌn go,
nileꞌ go natsaktraꞌ widiꞌzh cheꞌn Dios,
no nzho más rë kwaꞌn,
kwaꞌn nileꞌ go.
14 Orzeꞌ ngurezh Jesús rë men,
par nzhab Me:
―Bin rë go kureꞌ,
no bizobyek goi:
15 Gat lëꞌt por kwaꞌn nzhao men o por kwaꞌn nzho men,
nzhak gat nambe men lo Dios,
sino por kwaꞌn gat lëꞌ nzho laxtoꞌ mene.
16 Cho go nzob nzha,
bin goi.
17 No or milaꞌ Jesús rë nak men zeꞌ,
nguio Me leꞌn yoꞌ,
orzeꞌ nzhab rë men cheꞌn Me lo Me:
―¿Kwan gab widiꞌzh kwaꞌn miluꞌ go baꞌ?
18 Orzeꞌ nzhab Me:
―¿Taxa nu go,
nagakt zobyek go kureꞌ?
¿Chi gat nanet go,
yent cho tu kwaꞌn nzhao men,
nileꞌ ñaꞌn gat nambet men lo Dios?,
19 porke rë kwaꞌn nzhao men,
gat nibite corazón cheꞌn men,
sino ke lëꞌi nibi laxtoꞌ men,
orzeꞌ niroꞌskai or ña xaꞌ biꞌx.
―Xigab gat lëꞌ kwaꞌn niroꞌ dizde laxtoꞌ men,
kureꞌ nileꞌ,
nzhak gat nambet men lo Dios,
21 porke laxtoꞌ men niroꞌ rë xigab gat lëꞌ reꞌ:
Rë xigab ban men kun kwaliskier xtu men,
rë xigab liwaꞌn men cheꞌn xtu men,
no gut xaꞌ men;
22 mbaino rë xigab zen men unaꞌ cheꞌn xtu men,
rë xigab gap men kwaꞌn dimás,
rë xigab dox gat lëꞌ,
rë xigab kide men xtu men,
rë xigab ban men kun tu men xtu men,
rë xigab wix men gap men kwaꞌn kinu xtu men,
rë widiꞌzh nakap nidiꞌzh men Dios,
rë xigab marian,
mbaino rë xigab kwaꞌn yent yek.
23 Rë kwaꞌn gat lëꞌ reꞌ niroꞌ laxtoꞌ men,
no por lëꞌi,
ñaꞌn gat nambet men lo Dios.
Tu unaꞌ zit minaꞌb, gaknu Jesús unaꞌ
24 Di zeꞌ nguroꞌ Jesús par nzha Me lazh men Tiro mbaino par lazh men Sidón.
Orzeꞌ nguio Me leꞌn tu yoꞌ par nanet men Me,
per nangakt ngayukaꞌch Me.
San Marcos 7:24-37
25 Lwegaꞌ,
mbin tu unaꞌ,
lëꞌ Jesús nzho zeꞌ;
no unaꞌ reꞌ kinu tu mëꞌd unaꞌ,
nzho tu mbi mal laxtoꞌ mëꞌd.
Orzeꞌ mizhin unaꞌ lo Jesús,
no ngoꞌt kuslo unaꞌ lo Jesús.
26 No unaꞌ reꞌ tlëꞌt men Israel xaꞌ,
lëꞌ xaꞌ nzë yezh sirofenicia.
Dox ngunaꞌb unaꞌ lo Jesús par koꞌ Me mbi mal laxtoꞌ xmëꞌd unaꞌ,
27 orzeꞌ nzhab Jesús lo unaꞌ:
―Bilaꞌ gao rë xmëꞌd Dios galo;
porke gat ñalt,
kubi men lo mbëk rë kwaꞌn kiyao rë xmëꞌd Dios.
28 Orzeꞌ nzhab unaꞌ:
―Walika goi Señor,
per no ska ño mbëk xan mes plo nzhao rë xmëꞌd Dios,
par gao ma rë biyo yeꞌn kwaꞌn nzhab lo yuo.
29 Orzeꞌ nzhab Jesús:
―Por kwaꞌn nel reꞌ,
bizë;
naleꞌtraꞌl xigab,
lëꞌ mbi mal nguroꞌ la laxtoꞌ xmëꞌdal.
30 No or nguiubre unaꞌ par lizh unaꞌ,
lëꞌ xmëꞌd unaꞌ nax la lo loꞌn,
no lëꞌ mbi mal nguroꞌ la laxtoꞌ mëꞌd.
Miliyak Jesús tu men sord no gat niroꞌlant kwaꞌn nidiꞌzh xaꞌ
31 Orzeꞌ nguroꞌ Jesús lazh men Tiro,
no nded Me lazh men Sidón mbaino lazh men Decápolis,
par mizhin Me roꞌ lagún kwaꞌn ñaꞌn lazh men Galilea.
32 Zeꞌ ñanu pla men tu miyiꞌ sord,
no gat nirolant kwaꞌn nidiꞌzh xaꞌ;
no kwaꞌn dox minaꞌb bixaꞌ lo Jesús,
par xoꞌb Me yaꞌ Me yek miyiꞌ reꞌ.
33 Orzeꞌ nguloꞌ Jesús miyiꞌ reꞌ tu lad xid rë men,
par ngulo Me bikwen yaꞌ Me leꞌn nzha miyiꞌ reꞌ,
orzeꞌ michuk Me par migal Me lo luzh miyiꞌ reꞌ kun nzhuk cheꞌn Me,
34 orzeꞌ ngulits Me lo Me lo yibëꞌ,
no miziꞌ laxtoꞌ Me,
nzhab Me:
―¡Efata!
(Widiꞌzh reꞌ gab:
“Bixaꞌl”).
35 No mis orzeꞌ,
mixaꞌl nzha xaꞌ no nguruban luzh xaꞌ,
midiꞌzh xaꞌ klar laka.
36 Orzeꞌ milaꞌ Jesús diꞌzh,
yent cho lo gab bixaꞌi;
per ter mileꞌ Jesús mandad,
nadiꞌzht bixaꞌi,
ngont bixaꞌi,
más midiꞌzh bixaꞌi.
37 Orzeꞌ dox xche miaꞌn kiwiꞌ rë xaꞌ nzhin zeꞌ por kwaꞌn ngok reꞌ,
orzeꞌ nzhab bixaꞌ:
―¡Rë kwaꞌn niliyak Jesús!
Haxta rë men sord,
nzhon kwaꞌn;
mbaino rë men nagakt diꞌzh,
nzhudiꞌzh xaꞌ.