―Bikina go go lo rë men fariseo,

napaꞌ nu go yeꞌd xmod nak bixaꞌ;

porke nak bixaꞌ chigab men walika nzhon roꞌ Dios,

2 porke yent ni tu kwaꞌn nagaꞌch midizha lo go nagon men;

mbaino yent ni tu kwaꞌn xlaꞌn milun lo go naded nagon mene.

3 No rë nak kwaꞌn nidiꞌzh go lo nakao,

zhë laka gon mene;

no rë kwaꞌn nidiꞌzh go xlaꞌn leꞌn yoꞌ,

lëꞌ xtu men kuzhyëi dizde yek yoꞌ al ya.

4 No nzhab Jesús:

―Kinin lo go,

rë go xaꞌ nichëla;

nazhebt go ne go xaꞌ nzhut men,

porke nab tsa kubaꞌ gak leꞌ xaꞌ.

5 Per na ni cho lo más ñal zheb go:

Lo Dios bizheb go,

porke lëꞌ Dios,

dispwés di gat men,

Dios gak leꞌ mandad,

yo men leꞌn bël.

Nab tsa lo Dios bizheb go.

6 ’Nane ka go,

dox cheꞌp tsak rë miyin yeꞌn or nido bineꞌ,

per nikë ka laxtoꞌ Dios bineꞌ.

7 No chi lëꞌ Dios nikë laxtoꞌ miyin yeꞌn,

¿chi nanet go,

más nazhiꞌ Dios go?,

porke haxta rë yich yek go nane Dios pla.

Kuzeꞌ nazhebt go,

porke lo rë miyin,

go más tsak.

8 ’Kidizha lo rë go,

xaꞌ kwaꞌn xëꞌlroꞌ lo rë men:

“Na men cheꞌn Jesús”,

nu ska da,

xaꞌ nak Xgaꞌn Dios nu nak da tu men yizhyuo,

gapa lo rë ganj cheꞌn Dios:

“Lëꞌ xaꞌ baꞌ nak tu men da”,

9 per xaꞌ naxëꞌlroꞌ lo rë men,

nak xaꞌ tu men da,

orzeꞌ,

nu ska da gap lo rë ganj cheꞌn Dios:

“Gat lëꞌtaꞌ men da xaꞌ baꞌ.”

10 ’No chi diꞌzh men tu kwaꞌn gat lëꞌ por da,

mbaino na nak Xgaꞌn Dios nu nak da tu men yizhyuo,

per Dios cheꞌ kwaꞌn nzëꞌb xki xaꞌ reꞌ por kureꞌ;

per tu xaꞌ diꞌzh kwaꞌn gat lëꞌ por Sprit cheꞌn Dios,

nayotraꞌ zheꞌ kwaꞌn nzëꞌb xki xaꞌ por kureꞌ.

11 ’No or chi men go lo rë xaꞌ kwaꞌn nileꞌ mandad leꞌn rë yoꞌ plo nitseꞌd men widiꞌzh cheꞌn Dios,

o lo rë xaꞌ nak nela rey gaꞌ,

o lo rë xaꞌ nak nela gobiernador gaꞌ,

o lo rë gustis xaꞌ más nileꞌ mandad;

per leꞌt go xigab xmod kab go lo bixaꞌ,

o kwan diꞌzh go lo bixaꞌ,

12 porke or diꞌzh go lo bixaꞌ,

lëꞌ Sprit cheꞌn Dios ne lo go xmod diꞌzh go lo bixaꞌ.

13 No xid rë men nayax zeꞌ,

nguroꞌ tu xaꞌ nzhab lo Jesús:

―Maestr,

guzh lo wecha,

neꞌ tlëꞌ yuo kwaꞌn milaꞌ xuza par gal da.

14 Per nzhab Jesús:

―Lëꞌ you,

yent cho mizo da xid go,

par kobeꞌn o par kiꞌza kwaꞌn xid go.

15 Nu nzhab Jesús:

―Bikina go go,

nawixt go gap go más kwaꞌn di lo rë kwaꞌn nakiꞌn go,

lo yizhyuo reꞌ,

porke gat lëꞌtaꞌ baꞌ nzë yalnaban par men.

16 Orzeꞌ mizaꞌ Jesús kwent reꞌ lo bixaꞌ,

nzhab Me:

―Nguio tu men rrik,

mbaino rë yuo cheꞌn xaꞌ nded mizaꞌi,

17 orzeꞌ mileꞌ xaꞌ rrik reꞌ xigab:

“¡Neta kwan len,

porke gat kinutaꞌ plo kucha̱u̱ rë yalgoꞌn reꞌ!”

18 Guzhë la zeꞌ mileꞌ xaꞌ xigab:

“¡Neka kwan len!

Lëꞌda chil lizha par cha̱u̱ tu kwaꞌn más kwaꞌro,

par kucha̱u̱ rë yalgoꞌn reꞌ,

mbaino rë kwaꞌn kinun.”

19 Orzeꞌ mileꞌ xaꞌ xigab:

“Nalse nzho kwaꞌn ga̱u̱wa̱ nayax liꞌn;

xchë nakëtraꞌ zhiꞌn;

ga̱u̱ mbaino goꞌn,

nazhon nzhan.”

20 Per nzhab Dios lo xaꞌ:

“¿Chi miaoꞌ yekal kwan kileꞌl?

Nanetal,

nal yëꞌl reꞌ,

lëꞌl gat,

no rë kwaꞌn kinuchaoꞌwal baꞌ,

¿par choi?”

21 Saꞌ nizak men nitsiyar yalrrik yizhyuo reꞌ,

per lo Dios,

yent kwan kinu xaꞌ.

22 Orzeꞌ nzhab Jesús lo rë men cheꞌn Me:

―Kuzeꞌ nin lo go,

leꞌt go xigab por kwaꞌn gao go par ban go,

no ni por xab go kwaꞌn gak go,

23 porke más tsak bid cheꞌn go lo kwaꞌn gao go;

no más tsak kwerp cheꞌn go lo xab go.

24 Biwiꞌ go lo rë nga,

gat nzhaꞌnt ma mbaino gat nikant ma yalgoꞌn,

per lëꞌ Dios nizaꞌ kwaꞌn nzhao ma;

mbaino go,

¡más tsak go ke rë miyin!

25 O,

¿cho tu go por dox nileꞌ go xigab,

gak roꞌb go zigarol metr dimás?

26 No chi ni tu kwaꞌn win nagakt leꞌ go,

orzeꞌ,

¿chon nileꞌ go xigab por rë kwaꞌn nagan,

rë kwaꞌn nagakt leꞌ go?

27 ’Biwiꞌ go xmod niroꞌb yeꞌ,

nabe niluꞌi nabé,

nela tu men or nzhak xaꞌ tu lar chul gaꞌ;

no nin lo go,

ni rey Salomón,

nangabet xaꞌ nela xmod nabé niluꞌ tu yeꞌ gaꞌ.

28 No chi lëꞌ Dios nileꞌ,

chul niluꞌ rë yeꞌ cheꞌn rë yix dan,

kwaꞌn nixek tutsa ngubizh,

orzeꞌ nibizhe,

orzeꞌ nikan mene par yëke,

or nichaoꞌ bixaꞌ pan par nzhao bixaꞌ,

pwes Dios más gak libeꞌ go ke nela xmod niluꞌ tu yeꞌ gaꞌ.

¿Chon gat ñilat go beꞌs,

lëꞌ Dios neꞌ kwaꞌn gak go?

29 Nin lo go,

naleꞌt go xigab por kwaꞌn gao go,

no ni por kwaꞌn go go,

30 porke rë men yizhyuo,

dox nileꞌ bixaꞌ xigab por rë kureꞌ;

per go kinu Xuz go,

Me kwaꞌn nane la,

lëꞌ go nakiꞌn rë kureꞌ.

31 Mejor bileꞌ go xigab,

kwaꞌn go,

galo laka rë kwaꞌn nazhon cheꞌn Dios,

orzeꞌ Dios zilazh rë kwaꞌn nakiꞌn go yizhyuo reꞌ.

32 ’Rë go,

xaꞌ dox nazhiꞌ da,

naleꞌt go beꞌs xigab,

porke lëꞌ Xuz be Dios neꞌ rë kwaꞌn nakiꞌn be.

33 Kuzeꞌ bito go rë kwaꞌn kinu go yizhyuo reꞌ,

par zaꞌ goi kaꞌ rë men gat kinui,

nes par gap go yalnazaꞌk kwaꞌn nayot lox lo yibëꞌ,

porke baꞌ,

yent cho liwaꞌne,

mbaino ni nagao mbëze,

34 porke plo kinu go kwaꞌn tsak,

zeꞌ nzo xigab chego.

35-36 ’Guzo go list,

nalaꞌt go yal biani cheꞌn go,

nela xmod nileꞌ rë mos,

xaꞌ kimbëz yëꞌd miyiꞌ xaꞌ gak jwandang cheꞌn,

nes par or zhin xaꞌ reꞌ,

lwegaꞌ xaꞌl rë mos roꞌ pwert.

37 Wen nzha rë mos xaꞌ nzo list kikina,

or yëꞌd xaꞌ kwaꞌn nileꞌ mandad bixaꞌ.

Walika nin lo go,

lëꞌ xaꞌ leꞌ zob rë mos lo mes,

no mis xaꞌ nileꞌ mandad reꞌ,

kiꞌz kwaꞌn gao rë xaꞌ reꞌ lo mes.

38 Wanei,

ter garol yëꞌl yëꞌd xaꞌ reꞌ,

o garziꞌl lakai,

per yazhël xaꞌ rë mos kikina ka bixaꞌ,

orzeꞌ nazhon nzha rë mos reꞌ.

39 Bin go kureꞌ:

Chi tu xaꞌ nak lizh tu yoꞌ,

nzhon la cho or yo waꞌn lizh xaꞌ,

sigurka nalaꞌt xaꞌ yo waꞌn lizh xaꞌ.

40 Nuska go,

nakiꞌn zo go list;

porke na yal,

or naleꞌt go xigab.

41 Orzeꞌ minabdiꞌzh Per lo Jesús,

nzhab xaꞌ:

―Señor,

¿chi nab par yek no nzha kubaꞌ,

o nu par rë men nzhai?

42 Orzeꞌ nzhab Jesús:

―Mos nzhon diꞌzh mbaino natsin,

xaꞌ reꞌ nizo xaꞌ nileꞌ mandad par kina lizh xaꞌ,

mbaino rë cheꞌn xaꞌ,

no par zaꞌ mos reꞌ,

kwaꞌn gao más tsaꞌ mos xaꞌ,

or nilaꞌn rë xaꞌ reꞌ.

43 Wen nzha mos nzhon diꞌzh,

or yëꞌd xaꞌ nileꞌ mandad,

or ne xaꞌ lëꞌ mos reꞌ kileꞌ ka kwaꞌn nzhab xaꞌ.

44 Walika kwaꞌn nin lo go,

lëꞌ xaꞌ nileꞌ mandad reꞌ,

laꞌ rë nak kwaꞌn kinu xaꞌ,

par kina mos kwaꞌn nzhon diꞌzh reꞌ.

45 Per chi lëꞌ mos reꞌ leꞌ xigab:

“Lëꞌ xaꞌ nileꞌ mandad yëꞌd gaat xaꞌ lizh xaꞌ”,

orzeꞌ zublo kin xaꞌ rë mos miyiꞌ no rë mos unaꞌ,

no gao dox xaꞌ mbaino go xaꞌi haxta zuzh xaꞌ,

46 orzeꞌ lëꞌ xaꞌ nileꞌ mandad reꞌ,

yëꞌd or naleꞌt mos reꞌ xigab,

orzeꞌ chix xaꞌ mos reꞌ tuli,

nela nzhak kun rë mos xaꞌ gat nzhon diꞌzh.

47 ’No mos xaꞌ nane la,

kwan nzhakla xaꞌ nileꞌ mandad xaꞌ,

per gat nileꞌt xaꞌ por leꞌ xaꞌi,

orzeꞌ dox kin xaꞌ mos reꞌ,

haxta plo nagakraꞌi;

48 per mos xaꞌ nileꞌ rë kwaꞌn gat ñal,

sin nane mos,

chi ñal zakzi mos por lëꞌi,

por kubaꞌ cheꞌptsa zakzi mos.

Xaꞌ kwaꞌn milaꞌ Dios nayax kwaꞌn lo,

pwes nayax ska kwaꞌn naꞌb Dios kwent lo xaꞌ por kureꞌ;

mbaino xaꞌ kwaꞌn mizo Dios par leꞌ mandad,

nu ska lo xaꞌ naꞌb Dios kwent nayax kwaꞌn.

49 No nzhab Jesús:

―Na nzhal nela tu men kwaꞌn tsinki yizhyuo reꞌ;

¡oj zinkigai nzhaklan!

50 Nakiꞌn deꞌda lo tu kwaꞌn nazheꞌb,

mbaino dox trixt nizi da,

haxta or lox deꞌda lo kwaꞌn nazheꞌb reꞌ.

51 ¿Chi nileꞌ go xigab nzhala par len,

kwin men wen yizhyuo reꞌ?

Per gat lëꞌt saꞌi;

na nzhal par len lëꞌ men,

52 porke reꞌ par dilant,

gaiꞌ xaꞌ nzho leꞌn tu yoꞌ,

lëꞌ bixaꞌ lëꞌ;

chon xaꞌ dil kun chop xaꞌ,

no chop xaꞌ dil kun chon xaꞌ.

53 Lëꞌ xuz xaꞌ kun xgaꞌn xaꞌ,

no lëꞌ xgaꞌn xaꞌ kun xuz xaꞌ;

no lëꞌ xnaꞌ xaꞌ lëꞌ kun xchaꞌp xaꞌ,

no xchaꞌp xaꞌ lëꞌ kun xnaꞌ xaꞌ;

lëꞌ xix xaꞌ lëꞌ kun xnaꞌyeꞌ xaꞌ,

no lëꞌ xnayeꞌ xaꞌ lëꞌ kun xix xaꞌ.

54 Nu nzhab Jesús lo nayax men:

―Or ne go nzhakxaoꞌ xkao al ya,

orzeꞌ nzhab go:

“Lëꞌ yiu la”,

mbaino nila ka yiu;

55 no or nzhakidan mbi dizde al yët,

orzeꞌ nzhab go:

“Lëꞌ nëiꞌ gak”,

no saꞌ ka nzhake.

56 ¡Tatu nazheꞌb nak go,

chigab walika men wen go!

No chi lëꞌ go nilibeꞌ señ lo yibëꞌ no lo yizhyuo;

orzeꞌ,

¿chon gat nizobyek go rë kwaꞌn nileꞌ Dios nal reꞌ?

57 ’No,

¿chon nawiꞌ mis go,

kwan rë kwaꞌn ñal leꞌ go?

58 Chi ne tu xaꞌ nzhap go dol por tu kwaꞌn mileꞌ go,

no weiꞌ xaꞌ go lo gustis por kureꞌ,

no dub nzha go lo gustis,

bikwaꞌn go mod par tsiyal go laxtoꞌ xaꞌ,

par nachi xaꞌ go lo gustis,

porke lëꞌ gustis leꞌ mandad yo go lizhyiꞌb;

59 porke sigur ka,

naroꞌt go lizhyiꞌb haxta ke kix go rë kwaꞌn nzëꞌb go.