Mikan men cheꞌn Jesús triu zhë kwaꞌn nayiꞌ kë men Israel zhiꞌn
12
Tu zhë kwaꞌn nayiꞌ kë men Israel zhiꞌn,
nzhaded Jesús kun rë men cheꞌn Me plo ngoꞌn men triu.
No mer orzeꞌ nilaꞌn bixaꞌ,
orzeꞌ nguzublo kikib bixaꞌ do cheꞌn triu no ndao bixaꞌi.
2 Per or une pla men fariseo kureꞌ,
orzeꞌ nzhab bixaꞌ lo Jesús:
―Biwiꞌ,
lëꞌ rë men cheꞌnal kileꞌ kwaꞌn gat ñalt leꞌ bixaꞌ,
zhë kwaꞌn nayiꞌ kë men Israel zhiꞌn.
3 Orzeꞌ nzhab Jesús:
―¿Chi nagat goꞌl go plo nzobniꞌ kwaꞌn mileꞌ Dabi,
tu or milaꞌn xaꞌ kun rë men cheꞌn xaꞌ?
4 Nguio xaꞌ leꞌn yoꞌ cheꞌn Dios,
no ndao bixaꞌ pan kwaꞌn nizaꞌ men par gon cheꞌn Dios,
no pan reꞌ gat ñalt gao bixaꞌi,
no ni rë men cheꞌn xaꞌ;
nab tsa rë ngulëiꞌ ñal gawe.
5 O,
¿chi nagat goꞌl go kwaꞌn nzobniꞌ lo ley kwaꞌn milaꞌ Dios lo Muisés,
xmod nileꞌ rë ngulëiꞌ leꞌn yadoꞌ,
zhë kwaꞌn nayiꞌ kë men Israel zhiꞌn?
Mbaino gat nileꞌt bixaꞌ diskans zhë zeꞌ,
no gat nayiꞌte par lëꞌ bixaꞌ.
6 Per na ni lo go,
reꞌ nzo tu xaꞌ más tsak lo yadoꞌ.
7 Per go nazobyekt go widiꞌzh kwaꞌn nzobniꞌ reꞌ:
“Gat nzhaklata neꞌu go gon Da;
kwaꞌn nzhaklan,
lats laxtoꞌ go tsaꞌ men go.”
Per chi ngazobyek go widiꞌzh reꞌ,
orzeꞌ nangakëꞌt go kixuꞌ men yent kwan nak.
8 Lëꞌ Xgaꞌn Dios Me nu nak tu men yizhyuo,
gak gab Me lo rë men,
kwan ñal leꞌ men,
zhë kwaꞌn nayiꞌ kë rë men Israel zhiꞌn.
Tu miyiꞌ xaꞌ mibizh yaꞌ
9 Or milaꞌ Jesús rë men zeꞌ,
nguio Me leꞌn tu yoꞌ plo nitseꞌd men Israel widiꞌzh cheꞌn Dios.
10 No zeꞌ,
nzob tu miyiꞌ xaꞌ mibizh tu yaꞌ,
no pla men Israel xaꞌ nzhin zeꞌ,
kikwaꞌn bixaꞌ mod par këꞌ bixaꞌ kixuꞌ Jesús,
kuzeꞌ nzhab bixaꞌ lo Me:
―¿Chi nzhab ley cheꞌn Muisés,
gak liyakal tu men zhë kwaꞌn nayiꞌ kë rë men Israel zhiꞌn?
11 Orzeꞌ nzhab Jesús:
―Cho tu men xid go kinu tu mbëkxiꞌl,
no chi lëꞌ ma la leꞌn tu zo,
zhë kwaꞌn nayiꞌ kë go zhiꞌn,
¿gat lëꞌo koꞌ ma orzeꞌ,
chi tlëꞌ ma zake zhë zeꞌ?
12 ¿Chi nanet go,
más tsak tu men lo tu ma?
Kuzeꞌ,
gak ka leꞌ men kwaꞌn wen,
ter zhë kwaꞌn nayiꞌ kë go zhiꞌn.
13 Orzeꞌ nzhab Me lo xaꞌ mibizh yaꞌ zeꞌ:
―Bitsigaꞌ yaꞌl.
No or mitsigaꞌ xaꞌ yaꞌ xaꞌ,
tuli miake,
ngoke nela nak ka xtu yaꞌ xaꞌ.
14 Per or nguroꞌ rë men fariseo zeꞌ,
orzeꞌ midiꞌzh rë bixaꞌ xmod leꞌ bixaꞌ par gut bixaꞌ Jesús.
Jesús nak Me ngule Dios, leꞌ rë kwaꞌn nzhakla Dios
15 Per or ngwanu laxtoꞌ Jesús kwan kileꞌ rë men fariseo zeꞌ xigab,
tuli nguroꞌ Me zeꞌ,
no dox men nzhakë tich Me,
mbaino miliyak Me rë lo yalyizh kwaꞌn nizak rë men zeꞌ,
16 no nu mileꞌ Me mandad lo rë men,
naxoꞌbdiꞌzht bixaꞌ kwaꞌn nileꞌ Me,
17 nes par ngok widiꞌzh kwaꞌn midiꞌzh Isaías,
tu xaꞌ midiꞌzh por Dios chi tiemp or nzhab xaꞌ:
18 Biwiꞌ go,
lëꞌ mos da reꞌ,
xaꞌ kwaꞌn ngulen,
no xaꞌ nazhiꞌ da;
nizak laxtoꞌn por lëꞌ xaꞌ;
lëꞌ Sprit da zan kaꞌ xaꞌ,
par luꞌ xaꞌ lo rë men xmod koꞌ Dios rë lo men lo rë kwaꞌn gat lëꞌ.
19 Nachëꞌlroꞌt xaꞌ kun men,
no ni nakuzhië xaꞌ lo men,
mbaino ni nagon men chi xaꞌ leꞌn nez.
20 Gat nayaꞌt xaꞌ kun rë men xaꞌ cheꞌptsa ñila Dios,
mbaino nakubchit xaꞌ men,
xaꞌ peꞌn nzo lo Dios,
lëꞌla más chi xaꞌ men lo Dios,
21 no rë men xaꞌ gat lëꞌt men Israel yila widiꞌzh cheꞌn xaꞌ reꞌ.
Nzhab rë men fariseo, lëꞌ Jesús nigoꞌ mbi mal por Mizhab
22 No ngwanu bixaꞌ tu miyiꞌ lo Jesús,
tu xaꞌ nzen tu mbi mal;
nikal lo xaꞌ mbaino mud xaꞌ;
orzeꞌ miliyak Jesús miyiꞌ reꞌ,
ngwani lo xaꞌ no midiꞌzh xaꞌ.
23 No rë nak xaꞌ nzhin zeꞌ,
xe miwiꞌ bixaꞌ tuli,
orzeꞌ kinaꞌbdiꞌzh bixaꞌ lo wech bixaꞌ:
―¿Chi gat lëꞌt xaꞌ reꞌ Xgaꞌn Dabi?
24 Or mbin rë men fariseo kureꞌ,
orzeꞌ nzhab bixaꞌ:
―Lëꞌ xaꞌ reꞌ nigoꞌ mbi mal laxtoꞌ men por mandad cheꞌn Beelzebú,
yub Mizhab kwaꞌn nileꞌ mandad lo rë mbi mal.
25 Per lëꞌ Jesús nane la cho xigab kileꞌ bixaꞌ,
orzeꞌ nzhab Me:
―Rë gobier,
chi gat nzhin bixaꞌ wen kun rë men cheꞌn xaꞌ,
lëꞌ bixaꞌ lëꞌ;
seꞌska rë men yezh,
chi gat nzhin bixaꞌ wen,
lëꞌ bixaꞌ lëꞌ;
mbaino seꞌska rë men kun rë xaꞌ lizh xaꞌ.
26 Seꞌska,
chi dil yub Mizhab,
kun rë mbi mal cheꞌn xaꞌ,
lëꞌ bixaꞌ bil.
27 No chi na nigoꞌ mbi mal laxtoꞌ men por Beelzebú,
xaꞌ nak yub Mizhab,
orzeꞌ,
¿chi nu rë men cheꞌn go nigoꞌ mbi mal laxtoꞌ men por Beelzebú?
Kuzeꞌ,
por diꞌzh yix go,
lo mis men cheꞌn go ne kwan ñal go.
28 Per chi na nigoꞌ mbi mal laxtoꞌ rë men por Sprit cheꞌn Dios;
kureꞌ niluꞌ,
lëꞌ Dios mizhin la lo go,
par lat Me go yaꞌ Mizhab.
29 ’¿Xmod leꞌ tu men,
yo xaꞌ lizh tu miyiꞌ xaꞌ dox nzhak nidil,
par liwaꞌn xaꞌ rë kwaꞌn kinu miyiꞌ reꞌ?
Nakiꞌn galo laka liꞌbdoꞌ xaꞌ miyiꞌ,
par gak lat xaꞌ rë cheꞌn miyiꞌ reꞌ.
30 ’Kuzeꞌ,
xaꞌ gat nzhaknu da,
xaꞌ zeꞌ nidil kuda;
mbaino xaꞌ gat nidiꞌzh xtiꞌzha lo men,
par gak men,
men da,
xaꞌ zeꞌ nichubla men lon.
31 ’Kuzeꞌ nin lo go,
gak zheꞌ rë kwaꞌn nzëꞌb xki men lo Dios,
no rë widiꞌzh gat lëꞌ kwaꞌn nidiꞌzh men lo Dios.
Per tu men nidiꞌzh kwaꞌn gat lëꞌ por Sprit cheꞌn Dios,
ya nayotraꞌ zheꞌ kwaꞌn nzëꞌb xki men reꞌ.
32 No cho tu xaꞌ diꞌzh Da gat lëꞌ,
Na,
Me nak Xgaꞌn Dios mbaino nak Da tu men yizhyuo,
gak zheꞌ kwaꞌn nzëꞌb xki xaꞌ reꞌ;
per xaꞌ diꞌzh tu kwaꞌn gat lëꞌ tich Sprit cheꞌn Dios,
nayotraꞌ zheꞌ kwaꞌn nzëꞌb xki men reꞌ,
ni lo yizhyuo reꞌ mbaino ni lo yizhyuo kwaꞌn laore yo.
Niliꞌbeꞌ men ya por xlë kwaꞌn nizaꞌi
33 ’Chi lëꞌo kinu tu ya wen,
xlë wenska zaꞌi;
per chi kinu go tu ya yent kwan zuꞌ,
xlë zuꞌtska zaꞌi.
Nakbeꞌ ya por xlë kwaꞌn nizaꞌi.
34 ¡Rë go nak nela rë mbëꞌl nayiꞌ gaꞌ!
¿Xmod diꞌzh go kwaꞌn wen,
lëꞌ go men nakap?
Rë widiꞌzh kwaꞌn gat lëꞌ kwaꞌn nzho laxtoꞌ go,
kuzeꞌ niroꞌ roꞌ go.
35 Men wen,
kwaꞌn wen nidiꞌzh xaꞌ,
porke kwaꞌn wen nzho laxtoꞌ xaꞌ;
no men nakap,
kwaꞌn nakap ska nidiꞌzh xaꞌ,
porke kwaꞌn nakap nzho laxtoꞌ xaꞌ.
36 No walika kwaꞌn nin reꞌ,
zhë kwaꞌn gab Dios xmod gak kun kad men yizhyuo,
rë widiꞌzh kwaꞌn gat lëꞌ kwaꞌn midiꞌzh bixaꞌ dub miban bixaꞌ yizhyuo reꞌ,
rëi naꞌb Dios kwent lo bixaꞌ.
37 Por rë widiꞌzh kwaꞌn niroꞌ roꞌ go,
ne Dios xa nak go,
chi men wen go,
o men nakap go.
Kinaꞌb rë men nakap, leꞌ Jesús tu kwaꞌn nazhon
38 Orzeꞌ pla rë men fariseo kun pla rë maestr xaꞌ niluꞌ ley cheꞌn Muisés,
nzhab bixaꞌ lo Jesús:
―Maestr,
nzhakla no,
ne no leꞌl tu kwaꞌn nazhon.
39 Orzeꞌ nzhab Jesús lo bixaꞌ:
―Minu la go lo Dios,
mbaino nak go lo Dios nela rë xaꞌ nileꞌ burr tsaꞌ gaꞌ;
kuzeꞌ kinaꞌb go ne go tu kwaꞌn nazhon,
per nanet goi.
Nabtsa kwaꞌn mileꞌ Dios nguzak profet Jonás ne go.
40 Nela nguio Jonás laxtoꞌ mbël,
chon ngubizh no chon yëꞌl,
seꞌska yo Xgaꞌn Dios,
Me nu nak tu men yizhyuo,
chon ska ngubizh no chon ska yëꞌl,
yo Me plo más naꞌch leꞌn yuo.
41 No rë men yezh Nínive,
or gab Dios xmod gak kun kad men yizhyuo,
lëꞌ nu bixaꞌ zo par gab bixaꞌ lo Dios kwaꞌn nak go,
par más zakzi Dios go;
porke rë men yezh Nínive zeꞌ,
milaꞌ bixaꞌ rë kwaꞌn gat lëꞌ nak bixaꞌ lo Dios or ngwadiꞌzh Jonás widiꞌzh cheꞌn Dios lo bixaꞌ;
no biwiꞌ go,
na kidiꞌzh lo go,
no más tsak da lo Jonás.
42 No tu unaꞌ xaꞌ mileꞌ mandad lazh men Seba,
or gab Dios xmod gak kun kad men yizhyuo,
lëꞌ nu unaꞌ zo kun rë men nal reꞌ,
par gab unaꞌ rë kwaꞌn nak go par más zakzi Dios go;
porke dox zit nguroꞌ unaꞌ lazh unaꞌ par ngwayon unaꞌ rë widiꞌzh kwaꞌn nzhak Salomón;
no biwiꞌ go,
na kidiꞌzh lo go,
no más tsak da lo Salomón.
Mbi cheꞌn Mizhab kwaꞌn ñëk xtu wëlt laxtoꞌ men
43 ’No or niroꞌ tu mbi mal laxtoꞌ tu men,
orzeꞌ nikiꞌzëi mont plo ni nits niyen,
kikwaꞌne plo kwëze;
no or gat ñayazhële plo kwëze,
44 orzeꞌ nileꞌi xigab:
“Lëꞌda yëkska lizha plo nguroꞌn.”
No or yëk mbi mal zeꞌ laxtoꞌ men reꞌ,
nak laxtoꞌ xaꞌ nela leꞌn tu yoꞌ,
plo naloꞌb nambe gaꞌ,
mbaino rë kwaꞌn leꞌne nzhin chul,
45 orzeꞌ ya mbi zeꞌ,
yakaꞌi xtu gazh mbi más nakap,
par yo rëi laxtoꞌ men reꞌ;
orzeꞌ lëꞌ men reꞌ gak más nakap,
ke lëꞌla xmod nak xaꞌ galo.
No seꞌska zak rë men nakap,
xaꞌ nzhin lo yizhyuo nal reꞌ.
Xnaꞌ Jesús kun rë wech Me
46 Dub kidiꞌzh Jesús kureꞌ lo rë men,
lëꞌchi mizhin xnaꞌ Jesús kun rë wech Me,
nzhin bixaꞌ tich,
nzhakla bixaꞌ diꞌzh bixaꞌ kun lëꞌ Me.
47 Orzeꞌ ngwayab tu men lo Jesús:
―Lëꞌ xnaꞌ go no rë wech go nzo al tich,
nzhakla bixaꞌ diꞌzh bixaꞌ kun go.
48 Orzeꞌ nzhab Jesús lo xaꞌ zeꞌ:
―¿Cho xnaꞌn,
no cho rë wecha?
49 Orzeꞌ miluꞌ Me rë men cheꞌ Me,
xaꞌ nizikë tich Me,
no nzhab Me: