Jesús mbaino Juan xaꞌ niliꞌlëiꞌ men leꞌn nits
11
No or milox nzhab Jesús lo za dusen men cheꞌn Me xmod leꞌ bixaꞌ zhiꞌn nazhon cheꞌn Me,
orzeꞌ nguroꞌ Me zeꞌ par nzhaluꞌ Me widiꞌzh cheꞌn Dios rë yezh kwaꞌn ñaꞌn lazh men Galilea.
2 No Juan xaꞌ nililëiꞌ men leꞌn nits,
dub nzho xaꞌ lizhyiꞌb,
mbin xaꞌ rë kwaꞌn nazhon nileꞌ Jesús,
Me nak Krist,
kuzeꞌ mixëꞌl xaꞌ pla men cheꞌn xaꞌ,
3 par ngwanaꞌbdiꞌzh bixaꞌ lo Jesús,
chi lëꞌka Jesús nak Krist,
o kwëz bixaꞌ zhin xtu men.
4 Orzeꞌ nzhab Jesús:
―Wayab go lo Juan rë kwaꞌn une go no rë kwaꞌn mbin go;
5 guzh go,
rëꞌ xaꞌ nikal lo,
niwiꞌ;
no rë men nagakt zë,
nizë;
mbaino rë xaꞌ nizak yalyizh kwaꞌn lë lepra,
nzhakwen;
no rë xaꞌ sord,
nixaꞌl nzha;
mbaino rë men ngut,
niruban;
no rë xaꞌ yent kwan nzhap,
lëꞌ bixaꞌ nzhon widiꞌzh nazhon cheꞌn Dios,
no niroꞌ bixaꞌ lo rë kwaꞌn nzëꞌb xki bixaꞌ lo Dios.
6 ¡Dox wen nzha rë xaꞌ nayot laꞌ,
yila da!
7 No or ña rë xaꞌ mixëꞌl Juan,
orzeꞌ nguzublo kidiꞌzh Jesús kwent cheꞌn Juan lo rë men,
nzhab Me:
―Or ngwa go leꞌn yuo bizh,
¿cho une go baꞌ?
¿Chi une go tu men xaꞌ nileꞌ chop xigab or nileꞌ xaꞌ tu kwaꞌn,
nela tu yaxtil kwaꞌn nikwin mbi rë lad?
8 Chi nangane go tu xaꞌ saꞌ,
¿cho ska xaꞌ une gox?
o,
¿une go tu xaꞌ nak lar wen?
Per rë xaꞌ nzhak lar wen,
nab tsa lizh rë rey nine men rë xaꞌ baꞌ.
9 ¿Per cho ka une gox?
¿Chi une go tu profet,
xaꞌ nidiꞌzh por Dios?
Na ni walika,
más tsak xaꞌ une go baꞌ lo tu profet,
xaꞌ nidiꞌzh por Dios,
10 porke kwent cheꞌn Juan reꞌ nizeꞌt ley cheꞌn Dios,
plo nzobniꞌ:
Biwiꞌ,
antis di yiꞌdal,
galo laka tu xaꞌ xëla par kuxkwaꞌ nez dedal.
11 Walika kwaꞌn nin lo go,
xid rë men yizhyuo,
rë profet xaꞌ midiꞌzh por Dios,
Juan más tsak lo bixaꞌ;
per xid rë men da,
plo nileꞌ Dios mandad,
xaꞌ más cheꞌp tsak,
más tsak xaꞌ reꞌ lo Juan.
12 ’Dizde zhë nguzublo kidiꞌzh Juan widiꞌzh cheꞌn Dios haxta nalzhë reꞌ,
nab tsa men xaꞌ nileꞌ tutsa xigab gak leꞌ gan yo plo nileꞌ Dios mandad;
nab tsa rë xaꞌ nileꞌ jwers yo,
nak cheꞌne.
13 Rë profet xaꞌ midiꞌzh por Dios,
no rë kwaꞌn nzobniꞌ lo ley,
haxta zhë cheꞌn Juan namás midiꞌy.
14 Ter yila go kureꞌ o nayilat goi,
or midiꞌzh Dios por rë profet cheꞌn Me,
xëꞌl Me Li,
mbaino Juan nak xaꞌ mizeꞌt Me orzeꞌ.
15 Chi lëꞌ go kiyon kwaꞌn kinin,
bizobyek goi.
16 ’Per nal,
¿kun cho chëꞌlala rë men nal?
Nak bixaꞌ nela pla rë mbwin nizob leꞌn nez plo nzhak xbiꞌ par niyit bimbwin;
seꞌ nidiꞌzh bimbwin lo zipla rë mbwin kwaꞌn nzhin zeꞌ:
17 “¿Chon nanet go kit go kun no?
Mbiꞌl no bizhi,
no nangolniꞌt go;
mbaino mikëꞌ no kant nalats,
per nangoꞌnt go”,
18 porke mbiꞌd Juan,
xaꞌ nizo xlats nayax wëlt,
par nidiꞌzh xaꞌ lo Dios,
mbaino gat nzhot xaꞌ vin;
no nzhab go:
“Mbi cheꞌn Mizhab nzho laxtoꞌ xaꞌ.”
19 Per na nzhala lo go,
nzha̱o̱wa̱ mbaino nzhoꞌn,
no ne go lon:
“¿Chon nzhao doxal,
no nzhol vin?
¡No nichëꞌlal kun rë men xaꞌ nikan dimi cheꞌn rey César,
mbaino kun rë xaꞌ gat nileꞌt kwaꞌn nzobniꞌ lo ley cheꞌn Muisés!”
Per kwaꞌn nilun mbaino kwaꞌn niluꞌ Juan,
niluꞌ lëꞌtsa lëꞌ kwaꞌn nidiꞌzh no,
por rë men nzhone no naban xaꞌ xmod nidiꞌzh no.
Rë yezh plo nzho rë xaꞌ nangayilat Jesukrist
20 Orzeꞌ nguzublo kidiꞌzh Jesús por rë kwaꞌn gat lëꞌ nak rë men xaꞌ nzho rë yezh plo mileꞌ Me nayax kwaꞌn nazhon,
per nangalaꞌt bixaꞌ rë kwaꞌn gat lëꞌ nak bixaꞌ lo Dios,
kuzeꞌ nzhab Jesús:
21 ―¡Zheꞌb nalats nzha go,
men yezh Korazín,
no men yezh Betsaida!
Chi lo rë men yezh Tiro,
no lo rë men yezh Sidón,
ngalen rë nak kwaꞌn nazhon kwaꞌn milen xid go,
orzeꞌ rë men zeꞌ ngayila da mbaino ngalaꞌ bixaꞌ rë kwaꞌn gat lëꞌ nak bixaꞌ lo Dios,
no ngak bixaꞌ lar nagats,
mbaino ngazob bixaꞌ leꞌn kubde,
par luꞌ bixaꞌ,
lëꞌ bixaꞌ nizi,
nzëꞌb xki bixaꞌ lo Dios.
22 Kuzeꞌ,
or gab Dios xmod gak kun kad men yizhyuo,
más zakzi Dios men yezh Korazín no men yezh Betsaida ke rë men yezh Tiro no yezh Sidón.
23 No rë go men yezh Capernaúm,
¿chi nileꞌ go xigab bi go lo yibëꞌ plo nzho Dios?
Gat lëꞌt saꞌi.
Na ni,
¡lëꞌ go bi leꞌn bël!,
porke chi yezh Sodoma ngalen rë kwaꞌn nazhon kwaꞌn milen lo go,
orzeꞌ seꞌgaka ngabin yezh zeꞌ haxta nalzhë reꞌ.
24 Kuzeꞌ nin lo go,
zhë kwaꞌn gab Dios xmod gak kun rë men yizhyuo,
más zakzi Dios go,
lo rë men yezh Sodoma.
Dëꞌ go lon par xax go
25 Orzeꞌ nzhab Jesús lo Xuz Me Dios:
―Dios,
xkix Go,
Payëꞌ,
Me nileꞌ mandad yibëꞌ no yizhyuo,
porke nguluꞌkaꞌch Go kureꞌ lo rë xaꞌ nzhak,
no lo men natsin;
mbaino nguluꞌxoꞌb Goi lo rë men nadoꞌ,
xaꞌ nak nela tu mëꞌd gaꞌ.
26 Walikai Xuza,
porke saꞌ ngokla Go.
27 ’Lëꞌ Xuza milaꞌ rë kwaꞌn yaꞌn,
no yent cho niliꞌbeꞌ Xgaꞌn Xuza,
nab tsa Xuza nilibeꞌ;
no yent cho nilibeꞌ Xuza,
nab tsa Xgaꞌn Me nilibeꞌ,
kun rë xaꞌ ngule Xgaꞌn Xuza,
par libeꞌ bixaꞌ Xuza.
28 Dëꞌ go lon,
rë go xaꞌ ngwazha naban lo rë kwaꞌn nizak go;
na le xax go loi.
29 No bitseꞌd go leꞌ go kwaꞌn nin,
no bitseꞌd go xmod nak da,
porke na nak tu men nadoꞌ laxtoꞌ,
mbaino nizine laxtoꞌn go,
orzeꞌ lëꞌ alm cheꞌn go xax lo rë kwaꞌn nizak go,
30 porke rë kwaꞌn nikaꞌba lo go,
naxax laka leꞌ goi;
no rë kwaꞌn nilan diꞌzh lo go,
gat nagant leꞌ goi.