Mixëꞌl Jesús chon gal nzho chiꞌ xaꞌ yadiꞌzh widiꞌzh cheꞌn Dios
10
Or milox midiꞌzh Jesús rë kureꞌ,
ngule Jesús zi xchon gal nzho chiꞌ men par mixëꞌl Me chop gaꞌ bixaꞌ nez plo ya Me,
rë yezh no rë plo nak diꞌzh ya Me,
San Lucas 10:1-24
―Walika,
dox nayax yalgoꞌn,
per rë xaꞌ nikan yalgoꞌn,
pla tsa bixaꞌ;
kuzeꞌ binaꞌb go lo xaꞌ nak cheꞌn yalgoꞌn par xëꞌl xaꞌ más xaꞌ kan yalgoꞌn.
3 Wa go nal,
biwiꞌ go lëꞌda mixël go,
nela mbëkxiꞌl xid rë xaꞌ nak nela ma nazheꞌb gaꞌ.
4 Naweiꞌt go ni tu bols,
no ni dimi,
ni xtu nez yalyid cheꞌn go;
no ni nakwëz go nez,
diꞌzhnu go men.
5 Or yo go lizh tu men,
galo laka seꞌ guzh go:
“Dios leꞌ,
kwin men chul xaꞌ nzho reꞌ.”
6 No chi zeꞌ nzho men,
xaꞌ ño laxtoꞌ wiꞌ Dios wen lo xaꞌ,
orzeꞌ lëꞌ kwan midiꞌzh go yaꞌn par lëꞌ xaꞌ;
per chi nayo laxtoꞌ xaꞌ,
wiꞌ Dios wen lo xaꞌ,
orzeꞌ lëꞌ kwaꞌn nazhon kwaꞌn midiꞌzh go,
nayaꞌnte lo xaꞌ.
7 Biyaꞌn go yoꞌ plo wiꞌ men wen lo go,
no dao go no guꞌ go rë kwaꞌn neꞌ xaꞌ,
porke xaꞌ nikë zhiꞌn,
ñal gax kaꞌ xaꞌ;
no nayaꞌnt go tu yoꞌ xtu yoꞌ,
mbaino tutsa plo biyaꞌn go haxta or roꞌ go,
ya go xtu plo.
8 No or zhin go yezh plo wiꞌ men wen lo go,
dao go kwaꞌn neꞌ xaꞌ,
9 no biliwen go rë nak men nzhakne nzho zeꞌ,
no guzh go lo men,
leꞌ zhë mizhin la,
gak xaꞌ men cheꞌn Dios.
10 Per chi zhin go tu yezh plo nawiꞌ men wen lo go,
guroꞌ go nez,
no guzh go:
11 “Haxta zhen yuo lazh go,
kwaꞌn nkë niꞌ no,
nal lëꞌi kwib no par ne go,
lëꞌ go mileꞌ nayaꞌ lo Dios;
per bin go kureꞌ,
lëꞌ zhë mizhin la gak rë men,
men cheꞌn Dios,
per go nagakt goi.”
12 Kuzeꞌ kinin lo go,
or gab Dios xmod gak kun kad men yizhyuo,
más zakzi rë men yezh reꞌ,
ke rë men yezh Sodoma.
Rë yezh kwaꞌn nzho rë men xaꞌ gat ñilat Jesukrist
13 No nu nzhab Jesús:
―¡Zheꞌb nalats nzha go,
men yezh Corazín,
kun rë men yezh Betsaida!
Dox mileꞌ Dios kwaꞌn nazhon xid go,
¡per yent kwan ngazuꞌi par go!
No chi rë men yezh Tiro kun rë men yezh Sidón ngane rë yalnazhon baꞌ,
orzeꞌ lëꞌ bixaꞌ ngayila Dios,
no ngak bixaꞌ lar nagats,
no ngazob bixaꞌ leꞌn kubde,
par luꞌ bixaꞌ,
lëꞌ bixaꞌ nizi,
nzëꞌb xki bixaꞌ lo Dios.
14 Kuzeꞌ,
or gab Dios xmod gak kun kad men yizhyuo,
más zakzi Dios go,
ke rë men yezh Tiro kun yezh Sidón.
15 No rë go,
men yezh Capernaúm,
¿chi nileꞌ go xigab,
bi go lo yibëꞌ plo nzho Dios?
Per nabit go,
sino ke,
¡lëꞌ go bi leꞌn gabil!
16 Orzeꞌ nzhab Jesús lo rë men cheꞌn Me:
―Rë xaꞌ yila kwaꞌn diꞌzh go,
orzeꞌ na ngwayila xaꞌ;
mbaino xaꞌ nangayilat kwaꞌn diꞌzh go,
orzeꞌ na nangayilat xaꞌ;
no xaꞌ nangayilat da,
orzeꞌ nangayilat xaꞌ Xuza,
Me kwaꞌn mixëꞌl da.
Or nguiubre za chon gal nzho chiꞌ men
17 No za chon gal nzho chiꞌ xaꞌ kwaꞌn mixëꞌl Jesús,
nguiubre bixaꞌ,
nizak laxtoꞌ bixaꞌ,
nzhab bixaꞌ:
―Señor,
haxta rë mbi mal nzhon roꞌ no,
or nizeꞌt no lë go.
18 Orzeꞌ nzhab Jesús lo bixaꞌ:
―Walikai,
porke na une lëꞌ Mizhab ngob lo yibëꞌ,
nela tu doꞌziꞌ gaꞌ.
19 Biwiꞌ go,
na mineꞌ kwaꞌn kaꞌ go par leꞌ go mandad lo rë mbi mal,
kwaꞌn nak nela mbëꞌl nayiꞌ gaꞌ mbaino nela nixguy nayiꞌ gaꞌ,
nes par leꞌ go,
cheꞌptsa (biꞌch laka) gak Mizhab lo go,
mbaino yent kwaꞌn zak go.
20 Per nazakt laxtoꞌ go por nzhon mbi mal roꞌ go;
más wen bizak laxtoꞌ go,
lëꞌ lë go nzobniꞌ la lo yibëꞌ.
Nizak laxtoꞌ Jesús
21 Orzeꞌ mileꞌ Sprit cheꞌn Dios,
dox nizak laxtoꞌ Jesús,
orzeꞌ nzhab Me:
―Payëꞌ,
dox nazhonal,
Lu Me nileꞌ mandad lo yibëꞌ no lo yizhyuo,
porke ngulukaꞌchal rë kureꞌ lo rë men natsin,
no lo rë men nzhak;
mbaino miluꞌle lo rë xaꞌ nak nela mëꞌd gaꞌ.
Saꞌ mileꞌl Payëꞌ,
porke saꞌ nguio laxtoꞌl.
22 Orzeꞌ nzhab Jesús lo rë men nzhin zeꞌ:
—Lëꞌ Xuza mineꞌ rë nak kwaꞌn kinu Me kan.
Mbaino yent cho nane cho Da,
nab tsa Xuza nanei.
No yent cho nane cho nak Xuza,
nab tsa Da nanei,
no nab tsa rë xaꞌ nzhaklan lun,
cho nak Xuza,
lëꞌ bixaꞌ nei.
23 Orzeꞌ miëk Jesús,
no miwiꞌ Me lo nab tsa rë men cheꞌn Me,
orzeꞌ nzhab Me:
―Wen nzha go,
por miluꞌ Dios lo go,
rë nak kwaꞌn kiyak nal reꞌ,
24 porke nin lo go,
nayax rë profet,
xaꞌ midiꞌzh por Dios chi tiemp,
kun rë xaꞌ ngok rey;
dox ngokla bixaꞌ ngane bixaꞌ kwaꞌn une go nal reꞌ,
per nanganet bixaꞌi;
no ngokla bixaꞌ ngon bixaꞌ,
kwaꞌn mbin go nal reꞌ,
per nangont bixaꞌi.
Kwent cheꞌn tu men Samaria
25 Lëꞌchi nguzubi tu xaꞌ niluꞌ ley lo Jesús,
par zenbeꞌ xaꞌ Jesús (wiꞌ xaꞌ xmod nak Jesús),
nabei chi walika nzhak Me,
kuzeꞌ nzhab xaꞌ:
―Maestr,
¿xmod len par ban da dubtaꞌ lo Dios?
San Lucas 10:25-42
26 Orzeꞌ nzhab Jesús:
―¿Kwan nzobniꞌ lo ley,
mbaino xmod nizobyekle?
27 Orzeꞌ nzhab xaꞌ niluꞌ ley zeꞌ:
―“Bichizhiꞌ Dios cheꞌnal,
dub laxtoꞌl,
no kun dub lal,
mbaino kun rë jwers cheꞌnal,
no kun rë xigab cheꞌnal.
No bichizhiꞌ xtu men nela lu ka.”
28 Orzeꞌ nzhab Jesús:
―Wenka kwaꞌn nel;
chi lëꞌl leꞌ kubaꞌ,
lëꞌl ban lo Dios par dubtaꞌ.
29 Per xaꞌ niluꞌ ley zeꞌ,
nzhakla namás par gab men,
dox nzhak xaꞌ,
kuzeꞌ nzhab xaꞌ:
―¿Cho xaꞌ ñal chizhiꞌ da,
nela da ka?
30 Orzeꞌ nzhab Jesús:
―Tu miyiꞌ nguroꞌ yezh Jerusalén par nzha xaꞌ yezh Jericó,
no nez nguroꞌ pla waꞌn lo xaꞌ,
kwaꞌn milat rë cheꞌn xaꞌ,
haxta xab xaꞌ;
no ndin waꞌn xaꞌ,
orzeꞌ peꞌn nak xaꞌ milaꞌ waꞌn xaꞌ.
31 Orzeꞌ,
lëꞌska nez plo nax xaꞌ reꞌ,
nded tu ngulëiꞌ,
no or une ngulëiꞌ miyiꞌ miweꞌ reꞌ,
maska nded nkaꞌn ngulëiꞌ,
ña ngulëiꞌ.
32 Seꞌska xtu xaꞌ kwaꞌn nzhaknu ngulëiꞌ,
or une xaꞌ,
lëꞌ miyiꞌ reꞌ naxbi,
nu ska xaꞌ maska nded nez xaꞌ,
ña xaꞌ.
33 Per nded xtu xaꞌ nez zeꞌ,
tu xaꞌ nzë lazh men Samaria.
Or une xaꞌ,
miyiꞌ naxbi reꞌ,
milats laxtoꞌ xaꞌ miyiꞌ reꞌ,
34 orzeꞌ nguzubi xaꞌ lo miyiꞌ reꞌ,
no mileꞌ xaꞌ rumed plo miweꞌ xaꞌ reꞌ kun aseit no kun bin;
no michël xaꞌ lar plo miweꞌ xaꞌ reꞌ,
orzeꞌ mixoꞌb xaꞌ miyiꞌ reꞌ,
tich ma cheꞌn xaꞌ,
par mbiyꞌ xaꞌ xaꞌ reꞌ tu plo yaꞌn xaꞌ;
zeꞌ mikina xaꞌ miyiꞌ reꞌ.
35 No xtu riyëꞌl,
nguloꞌ xaꞌ kwaꞌn nileꞌ tu men gan,
cheꞌn chop ngubizh lo zhiꞌn,
mizaꞌ xaꞌi kaꞌ xaꞌ nak cheꞌn yoꞌ zeꞌ,
orzeꞌ nzhab xaꞌ:
“Bikina miyiꞌ reꞌ,
no chi lëꞌl leꞌ gaxt más dimi por lëꞌ xaꞌ,
or yubren,
kixne.”
36 Orzeꞌ nzhab Jesús lo xaꞌ niluꞌ ley reꞌ:
―No nal,
di lo yon xaꞌ reꞌ,
¿cho xaꞌ kwaꞌn michizhiꞌ xaꞌ kwaꞌn undin waꞌn zeꞌ,
nela lëꞌka xaꞌ?
37 Orzeꞌ nzhab xaꞌ niluꞌ ley reꞌ:
―Xaꞌ kwaꞌn milats laxtoꞌ men kwaꞌn ndin waꞌn zeꞌi.
Orzeꞌ nzhab Jesús lo xaꞌ:
―Bizë,
no saꞌ ska bileꞌ.
Jesús ngwatsiꞌ ma Mart, no ma Mari
38 No or nzha Jesús nez kun rë men cheꞌn Me,
mizhin Me tu yezh win,
zeꞌ nibëz tu unaꞌ lë Mart,
no ngurezh unaꞌ Jesús lizh unaꞌ.
39 Mart kinu tu bël lë Mari.
Or mizhin Jesús,
nguzubi Mari xan niꞌ Jesús par kiyon Mari kwaꞌn kidiꞌzh Jesús,
40 per Mart dox ñen laxtoꞌ xaꞌ,
kileꞌ xaꞌ rë kwaꞌn roꞌ yarde,
kuzeꞌ nguzubi Mart,
nzhab Mart lo Jesús:
―Señor,
¿chi gat niwiꞌtal?,
lëꞌ bëla milaꞌ nab da roꞌ yarde reꞌ.
¡Guzh,
gaknu unaꞌ da!
41 Orzeꞌ nzhab Jesús: