Miliwen Jesús mos cheꞌn tu men Roma, tu xaꞌ nileꞌ mandad lo tu gayoꞌ sondad
7
No or milox midiꞌzh Jesús lo rë men,
orzeꞌ ña Me yezh Capernaúm.
San Lucas 7:1-10
2 Yezh reꞌ nibëz tu xaꞌ nileꞌ mandad lo tu gayoꞌ sondad román,
kinu xaꞌ tu mos cheꞌn xaꞌ,
no dox nazhiꞌ xaꞌ mos reꞌ;
mbaino nzhakne neꞌ,
mer gat neꞌ.
3 Or mbin xaꞌ nileꞌ mandad reꞌ,
kidiꞌzh men nikizë Jesús gax zeꞌ,
orzeꞌ mixëꞌl xaꞌ pla xaꞌ nzo lo men Israel,
par ngwayab bixaꞌ yiꞌd Jesús,
liwen mos cheꞌn xaꞌ reꞌ.
4 No or mizhin rë xaꞌ reꞌ plo nzo Jesús,
gargaꞌl kiyab bixaꞌ:
—Chaꞌo ña be par gaknu go xaꞌ nileꞌ mandad zeꞌ,
5 porke dox nazhiꞌ xaꞌ reꞌ,
rë be men Israel;
mbaino lëꞌ xaꞌ reꞌ mizuxkwaꞌ tu yoꞌ plo nitseꞌd be widiꞌzh cheꞌn Dios yezh reꞌ.
6 Orzeꞌ nzha Jesús kun lëꞌ bixaꞌ.
Per or nzhazhin la bixaꞌ gax lizh xaꞌ reꞌ,
orzeꞌ mixëꞌl xaꞌ nileꞌ mandad reꞌ pla rë xaꞌ kwaꞌn nichëꞌl xaꞌ par ngwayab bixaꞌ lo Jesús:
―Señor,
zit go gat lëꞌ,
porke gat ñalta da par yiꞌd go lizha.
7 Kuzeꞌ ni nangaye laxtoꞌn ngayal yuba lo go;
namás bileꞌ go mandad por xtiꞌzh go,
yak mos da.
8 Porke nu ka da,
nzhona roꞌ xaꞌ nileꞌ mandad lon,
no kinu ska men nilen mandad or gapa lo tu xaꞌ:
“Wa”,
lëꞌ xaꞌ ya;
no or gapa lo xtu xaꞌ:
“Dëꞌ”,
lëꞌ xaꞌ yëꞌd.
Mbaino or gapa lo tu mos da,
leꞌ xaꞌ tu kwaꞌn,
lëꞌi leꞌ xaꞌ.
9 No or mbin Jesús widiꞌzh reꞌ,
xe miaꞌn Me,
orzeꞌ miwiꞌ Me lo rë xaꞌ nzhakë tich Me,
no nzhab Me:
―Walika kwaꞌn nin lo go,
per ni tu men Israel gat nen yila widiꞌzh da nela xaꞌ reꞌ.
10 No or nguiubre rë xaꞌ kwaꞌn mixëꞌl xaꞌ nileꞌ mandad reꞌ,
lëꞌ mos cheꞌn xaꞌ miak la.
Jesús mileꞌ nguruban xgaꞌn tu unaꞌ ngut xmiyiꞌ
11 No xtu riyëꞌl,
nzha Jesús tu yezh kwaꞌn lë Naín kun rë men cheꞌn Me,
no nayax men nzhakë tich Me.
San Lucas 7:11-35
12 No or nzhazhin Jesús roꞌ yezh reꞌ,
lëꞌchi une Me nzhakaꞌch men tu yintoꞌ.
No yintoꞌ reꞌ,
tutsa miyiꞌ nak xgaꞌn tu unaꞌ kwaꞌn ngut xmiyiꞌ.
No dox men yezh zeꞌ nzhakaꞌch bixaꞌ xgaꞌn unaꞌ reꞌ.
13 No or une Jesús unaꞌ reꞌ,
milats laxtoꞌ Me unaꞌ,
orzeꞌ nzhab Me lo unaꞌ:
―Nagoꞌntraꞌl.
14 Orzeꞌ nguzubi Jesús,
migal Jesús taꞌ kwaꞌn nzhoꞌb yintoꞌ lo,
orzeꞌ xe ngulëz rë xaꞌ nzhanu yintoꞌ,
orzeꞌ nzhab Jesús lo yintoꞌ:
―Miyiꞌ xi,
lëꞌda ni lol:
¡Waxche!
15 Orzeꞌ nguzob miyiꞌ xaꞌ ngut reꞌ,
mbaino nguzublo kidiꞌzh miyiꞌ,
orzeꞌ nzhab Jesús lo xnaꞌ miyiꞌ:
“Lëꞌ xgaꞌnal reꞌ.”
16 No or une rë men kureꞌ,
mizheb bixaꞌ,
orzeꞌ nguzublo kidiꞌzh bixaꞌ dox nazhon Dios,
mbaino nzhab bixaꞌ:
―¡Dox tu profet ro,
xaꞌ nidiꞌzh widiꞌzh cheꞌn Dios,
mizhin lo be!
No nzhab bixaꞌ:
—¡Nzatsiwiꞌ Dios rë men cheꞌn Dios!
17 No rë xaꞌ nzë lazh men Judea kun rë xaꞌ nzho nakaꞌn rë yezh kwaꞌn ñaꞌn zeꞌ,
mbin bixaꞌ kwaꞌn mileꞌ Jesús.
Rë men kwaꞌn mixëꞌl Juan
18 No rë xpen Juan ngwayab lo Juan,
rë kwaꞌn nileꞌ Jesús xid rë men,
no or ngurezh Juan chop xpen xaꞌ,
19 orzeꞌ mixëꞌl xaꞌ rop rë xaꞌ reꞌ par wayab bixaꞌ lo Jesús:
“¿Chi lu ka nak Krist,
kwaꞌn nak diꞌzh yiꞌd lo no,
o kwëz no yiꞌd xtu xaꞌ?”
20 No or mizhin rop xpen Juan reꞌ plo nzo Jesús,
orzeꞌ nguzubi bixaꞌ,
nzhab bixaꞌ:
―Lëꞌ Juan xaꞌ nililëiꞌ men leꞌn nits,
mixëꞌl no par nabdiꞌzh no lol,
¿chi lu ka nak Krist kwaꞌn nak diꞌzh yiꞌd,
o kwëz no yiꞌd xtu xaꞌ?
21 No mis orzeꞌ,
dox men nzhakne kiliwen Jesús,
no nu rë xaꞌ nizak yalnawin,
no rë xaꞌ nzho mbi mal laxtoꞌ,
no haxta rë xaꞌ nikal lo,
mileꞌ Jesús miwiꞌ bixaꞌ,
22 orzeꞌ nzhab Jesús lo rë xpen Juan:
―Wayab go lo Juan rë kwaꞌn une go,
no rë kwaꞌn mbin go.
Guzh go,
lëꞌ rë men nikal lo,
niwiꞌ;
no rë men nagakt zë,
nizë;
no rë xaꞌ nizak yalyizh kwaꞌn lë lepra,
nimbe bixaꞌ;
no rë men sord,
nixaꞌl nzha;
no rë men ngut,
niruban;
mbaino rë men proba,
kiyon widiꞌzh nazhon cheꞌn Dios.
23 ¡No nazhon nzha men yila da dubtaꞌ!
24 No or ña rë xaꞌ mixëꞌl Juan,
orzeꞌ nguzublo kidiꞌzh Jesús kwent cheꞌn Juan lo rë men,
nzhab Me:
―¿Cho xaꞌ kwaꞌn ngwatsiꞌ go lo,
plo nak yuo bizh zeꞌ?
¿Chi lo tu xaꞌ ña-ñëꞌd xigab cheꞌne,
nela yix kwaꞌn nzhuweiꞌ mbi rë plo?
25 No chi gat lëꞌt kubaꞌ une go,
¿kwan ska une go orzeꞌ?
¿Chi une go tu miyiꞌ nak lar wen?
Per nane ka go,
cho rë xaꞌ kwaꞌn nzhak lar wen,
rë xaꞌ zeꞌ nzho lizh rë rey,
plo nzho bixaꞌ mod nzhakla bixaꞌ.
26 ¿Per cho ska xaꞌ ngwatsiꞌ go lo?
¿Chi ngwatsiꞌ go lo tu men nak profet,
xaꞌ nidiꞌzh por Dios?
Na ni,
lëꞌ xaꞌ kwaꞌn ngwatsiꞌ go lo reꞌ,
más tsak xaꞌ ke lo tu profet,
27 porke kwent cheꞌn Juan reꞌ,
nidiꞌzh Yech cheꞌn Dios or nzhabe seꞌ:
Biwiꞌ,
lë Da xëꞌl xaꞌ diꞌzh xtizha dilant lol,
par kuxkwaꞌ xaꞌ laxtoꞌ rë men par gon bixaꞌ roꞌ Dios.
28 Nin lo go,
xid rë men yizhyuo,
nangayotaꞌ tu xaꞌ más tsak lo Juan.
Per rë xaꞌ más natsakt,
xid rë xaꞌ nzho plo nileꞌ Dios mandad,
nak rë xaꞌ kwaꞌn más tsak lo Juan.
29 Or mbin rë nak men kureꞌ,
rë xaꞌ kwaꞌn mililëiꞌ Juan leꞌn nits,
no haxta rë men nikan dimi cheꞌn rey,
milibeꞌ bixaꞌ,
dox ñal kwaꞌn nileꞌ Dios.
30 Per rë men fariseo no rë xaꞌ niluꞌ ley,
mileꞌ bixaꞌ nayaꞌ lo rë kwaꞌn ngokla Dios par lëꞌ bixaꞌ,
porke nangaziyëlt bixaꞌ ngaklëiꞌ bixaꞌ xmod nzhab Juan.
31 Orzeꞌ nzhab Jesús lo rë xaꞌ zeꞌ:
―¿Xmod gapa nak rë men nal;
nela kun cho chëla bixaꞌ?
32 Nak bixaꞌ nela rë mbwin,
kwaꞌn nzhin leꞌn nez plo nzhak xbiꞌ,
kiyab mbwin lo wech mbwin kwaꞌn nzhin zeꞌ:
“¿Chon nanet go ngolniꞌ go or kiyoꞌl no bizhi,
no ni nangoꞌnt go or kikëꞌ no kant nalats?”
33 Porke mbiꞌd Juan,
xaꞌ nililëiꞌ men leꞌn nits,
gat nzhawt xaꞌ yët no gat nzhot xaꞌ bin,
no nzhab go:
“Mbi mal nzho laxtoꞌ xaꞌ.”
34 No or nzhala,
nak da Xgaꞌn Dios mbaino nak da men yizhyuo,
nzha̱o̱wa̱ no nzhoꞌn,
no ne go:
“Biwiꞌ,
nzhao choꞌl,
mbaino nzho choꞌl kwaꞌn;
no nichëꞌlal kun rë men nikan dimi cheꞌn rey no kun rë men más nzhoꞌb xtiꞌzh nzëꞌb xki.”
35 Per bitsila go,
rë xaꞌ kwaꞌn ñila widiꞌzh cheꞌn Dios,
niluꞌ walika nazhone por xmod naban bixaꞌ.
Ngwatao Jesús lizh Simón, tu men fariseo
36 No ngurezh tu men fariseo Jesús,
par gao Jesús lizh xaꞌ;
orzeꞌ ngwa Jesús,
no or nguio Me lizh xaꞌ,
nguzob Me lo mes.
San Lucas 7:36-50
37 No yezh zeꞌ nzho tu unaꞌ kwaꞌn más nzhoꞌb xtiꞌzh dox nzëꞌb xki.
Or mbin unaꞌ,
lëꞌ Jesús nzhatao lizh men fariseo reꞌ,
orzeꞌ mizhinnu unaꞌ tu bot win zhëi di aseit nax,
mbaino tsak doxe,
haxta nu bot kwaꞌn nzhoi reꞌ,
dox tsak.
38 No or nguzo unaꞌ xan niꞌ Jesús,
dub kiyoꞌn unaꞌ,
orzeꞌ migazh unaꞌ kun nits nzhoꞌn unaꞌ niꞌ Me,
no dub kichiroꞌ unaꞌi,
kitsibizh unaꞌi kun yich yek unaꞌ;
no nu michoꞌn unaꞌ aseit nax niꞌ Me.
39 No or une xaꞌ fariseo zeꞌ kureꞌ,
xaꞌ kwaꞌn ngurezh Jesús lizh,
mileꞌ xaꞌ xigab:
“Chi lëꞌ xaꞌ reꞌ walika nak tu profet,
xaꞌ nidiꞌzh por Dios,
lëꞌ xaꞌ nganu la,
cho unaꞌ kwaꞌn kigal niꞌ xaꞌ,
tu unaꞌ zheꞌb nzëꞌb xki.”
40 Orzeꞌ nzhab Jesús lo xaꞌ fariseo reꞌ:
―Simón,
nzhaklan ganin tu kwaꞌn lol.
Orzeꞌ nzhab Simón:
―Bineu xkwane,
Maestr.
41 Orzeꞌ nzhab Jesús:
―Nguio chop men,
nzëꞌb dimi lo tu xaꞌ kwaꞌn nileꞌ prexte.
Tu xaꞌ nzëꞌb dimi kwaꞌn nileꞌ men gan tu liꞌn garol lo pura zhiꞌn,
lëꞌ xtu xaꞌ nzëꞌb dimi kwaꞌn nileꞌ men gan,
pas como chop mbëoꞌ,
di lo zhiꞌn.
42 No nangaleꞌt rop xaꞌ gan ngayix bixaꞌi lo xaꞌ nak cheꞌne,
orzeꞌ milats laxtoꞌ xaꞌ nak cheꞌn dimi zeꞌ rop xaꞌ zeꞌ.
Orzeꞌ nzhab Jesús:
―¿Di lo rop xaꞌ zeꞌ,
cho xaꞌ más nazhiꞌ xaꞌ kwaꞌn nak cheꞌn dimi zeꞌ?
43 Orzeꞌ nzhab Simón:
―Zaka,
xaꞌ kwaꞌn más nayax dimi nzëꞌb zeꞌi.
Orzeꞌ nzhab Jesús:
―Lëꞌka kwaꞌn nel.
44 Orzeꞌ miwiꞌ Jesús lo unaꞌ zeꞌ,
mbaino nzhab Me lo Simón:
―¿Chi niwiꞌl lo unaꞌ reꞌ?
Or nguioꞌn lizhal,
nanganeꞌtal nits par yët niꞌn,
per lëꞌ unaꞌ reꞌ migazh niꞌn kun nits nzhoꞌn xaꞌ,
no mitsibizh xaꞌi kun mis yichyek xaꞌ.
45 Nangachiroꞌtal taꞌ kwatsa or mizhiꞌna lizhal,
per unaꞌ reꞌ,
dizde mizhin xaꞌ lon,
kichiroꞌ xaꞌ niꞌn,
no haxta nal stubi kichiroꞌ xaꞌi.
46 Nangachoꞌbtal aseit nax yeka,
per lëꞌ unaꞌ reꞌ michoꞌbe niꞌn.
47 Kuzeꞌ nin lol,
lëꞌ rë kwaꞌn zheꞌb nzëꞌb xki unaꞌ reꞌ,
mizheꞌ la lo Dios,
porke dox nazhiꞌ xaꞌ Dios.
Per men kwaꞌn nagat zaꞌ kwent cho paꞌ xtol xaꞌ micheꞌ Dios,
cheꞌp tsa nazhiꞌ xaꞌ reꞌ Dios.
48 Orzeꞌ nzhab Jesús lo unaꞌ reꞌ:
―Lëꞌ rë kwaꞌn nzëꞌb xkil lo Dios,
lëꞌi mizheꞌ la.
49 Orzeꞌ rë xaꞌ kwaꞌn nzhin lo mes zeꞌ,
nguzublo kiyab bixaꞌ lo wech bixaꞌ:
―¿Cho xaꞌ reꞌ?
¡Haxta nu rë kwaꞌn nzëꞌb xki men lo Dios,
nicheꞌ xaꞌ!
50 Per nu nzhab Jesús lo unaꞌ reꞌ:
―Por ngwayilal da,
lëꞌl nguroꞌ la lo rë kwaꞌn nazheꞌb nzadkë tichal.
Nal,
dub bizë,
bizak laxtoꞌ.