Mikan men cheꞌn Jesús triu zhë kwaꞌn nayiꞌ kë men Israel zhiꞌn
6
No tu ngubizh kwaꞌn nileꞌ men Israel diskans,
nzhaded Jesús kun rë men cheꞌn Me plo nzhaꞌn men triu.
No por nilaꞌn bixaꞌ,
nguzublo kikib bixaꞌ do cheꞌne,
no kigoꞌ bixaꞌ lazhe par kiyao bixaꞌi,
San Lucas 6:1-16
―¿Chon nileꞌ go kwaꞌn gat ñal,
zhë kwaꞌn nayiꞌ kë men Israel zhiꞌn?
3 Orzeꞌ nzhab Jesús:
―¿Chi nagat goꞌl go plo nikë kwaꞌn mileꞌ Dabi tu zhë or milaꞌn xaꞌ kun rë xpen xaꞌ?,
4 or nguio xaꞌ leꞌn yoꞌ cheꞌn Dios par ndao xaꞌ pan kwaꞌn mizaꞌ men par gon lo Dios,
no ngwatao xaꞌi no mizaꞌ xaꞌi gao rë xpen xaꞌ,
no lëꞌ pan zeꞌ nab tsa rë ngulëiꞌ gak gawe.
5 No nu nzhab Jesús lo bixaꞌ:
―Na Xgaꞌn Dios mbaino nak da tu men yizhyuo,
kinun poder par len mandad,
kwan ñal leꞌ men zhë kwaꞌn nayiꞌ kë men Israel zhiꞌn.
Tu miyiꞌ kwaꞌn ngut tu lad yaꞌ, lad direch
6 Or ngol xtu zhë kwaꞌn nayiꞌ kë men Israel zhiꞌn,
nguio Jesús leꞌn yoꞌ plo nitseꞌd men widiꞌzh cheꞌn Dios,
no nguzublo kiluꞌ Jesús widiꞌzh cheꞌn Dios lo rë men nzhin zeꞌ.
Zeꞌ nzo tu miyiꞌ kwaꞌn ngut tu lad yaꞌ lad direch.
7 No zeꞌ,
nzo pla xaꞌ niluꞌ ley kun rë men fariseo,
kilaꞌch bixaꞌ,
nabei chi liwen Jesús xaꞌ reꞌ,
zhë kwaꞌn nayiꞌ kë men Israel zhiꞌn,
nes par kinu bixaꞌ tu kwaꞌn gab bixaꞌ,
nak Jesús.
8 Per lëꞌ Jesús nane la cho xigab kileꞌ rë men reꞌ,
kuzeꞌ nzhab Jesús lo miyiꞌ nzhakne reꞌ:
―Watsuli,
guded garol tsaoꞌ reꞌ.
―Nzhaklan nabdiꞌzha tu kwaꞌn lo go:
¿Kwan más ñal leꞌ met zhë kwaꞌn nayiꞌ kë men Israel zhiꞌn?
¿Chi tu kwaꞌn wene o tu kwaꞌn male?
¿Chi koꞌ be tu men lo tu kwaꞌn nazheꞌb nizak xaꞌ,
o laꞌ be gat xaꞌ?
10 Orzeꞌ miwiꞌ Jesús lo rë xaꞌ nzo nakaꞌn plo nzo Me,
mbaino nzhab Me lo miyiꞌ ngut yaꞌ reꞌ:
―Bitsigaꞌ yaꞌl.
Orzeꞌ,
mitsigaꞌ miyiꞌ yaꞌ miyiꞌ,
mbaino miake.
11 Per rë xaꞌ niluꞌ ley kun rë men fariseo nded niyiꞌxian bixaꞌ,
orzeꞌ nzhab bixaꞌ lo wech bixaꞌ:
“Nal,
¿kwan liꞌnu be Jesús?”
Ngule Jesús tu dusen apost cheꞌn Me
12 Leꞌn rë ngubizh zeꞌ,
ngwa Jesús yek tu yiꞌ par gunaꞌb Me lo Dios,
orzeꞌ dub yëꞌl gunaꞌb Me lo Dios.
13 Or ngwanilyuo,
ngurezh Me rë xaꞌ kizikë tich Me,
no xid rë xaꞌ reꞌ ngule Me tu dusen rë xaꞌ nguloꞌlë Me apost.
14 Tu rë xaꞌ reꞌ lë Simón,
xaꞌ kwaꞌn nu ngurulë Me Per;
no xtu xaꞌ lë Ndres,
wech Simón;
no Jakob mbaino Juan;
no Lip,
no Tol;
15 orzeꞌ Mateo no Max;
mbaino Jakob xgaꞌn Alfeo;
no Simón xaꞌ nguio xlad men Kananist;
16 no Judas,
xgaꞌn Jakob;
mbaino xtu Judas Iscariote,
kwaꞌn michi Jesús lo rë men kwaꞌn mbit Me.
Miluꞌ Jesús widiꞌzh cheꞌn Dios lo nayax men
17 Or ngula Jesús yek yiꞌ zeꞌ kun rë men cheꞌn Me,
orzeꞌ ngulëz Me lo tu lach,
no zeꞌ miza tu bëd xaꞌ kizikë tich Me,
mbaino nu nayax xaꞌ nzë rë yezh cheꞌn lazh men Judea no rë xaꞌ nzë yezh Jerusalén,
kun nayax xaꞌ nzho roꞌ nitsdoꞌ cheꞌn yezh Tiro mbaino kun rë men yezh Sidón.
Rë men reꞌ nzhin par gon bixaꞌ widiꞌzh cheꞌn Jesús no par liwen Jesús yalyizh cheꞌn bixaꞌ;
San Lucas 6:17-36
18 no miak rë xaꞌ kwaꞌn nzhakne por mbi mal.
19 Kuzeꞌ rë nak men zeꞌ nzhakla namás gal xaꞌ kwerp cheꞌn Jesús,
porke kwerp cheꞌn Jesús niroꞌ rë yalnazhon kwaꞌn niliwen rë men nzhakne.
Kwaꞌn walika tsak lo Dios
20 Orzeꞌ miwiꞌ Jesús lo rë men cheꞌn Me,
nzhab Me:
―Rë go,
xaꞌ prob nal reꞌ,
wen nzha go;
porke lëꞌ go ya nzho la yaꞌ Dios.
21 ’No go,
xaꞌ nilaꞌn nal reꞌ,
wen nzha go,
porke lëꞌ Dios neꞌ kwaꞌn naꞌb go lo Me.
’No go,
xaꞌ nzhoꞌn nal reꞌ,
wen nzha go,
porke kaxcheꞌptsa lëꞌ go zak laxtoꞌ.
22 ’No wen nzha go,
go xaꞌ niyiꞌ men nine nal reꞌ,
no or nigotin xaꞌ go xid bixaꞌ,
no or niye xaꞌ go,
no nidiꞌzh xaꞌ go,
rë kwaꞌn gat walit nak go,
por nak go men da.
23 Bizak laxtoꞌ go zhë zeꞌ,
haxta wats go,
porke lëꞌ Dios neꞌ tu kwaꞌn tsak kaꞌ go por rë kwaꞌn nilinu men go;
porke saꞌ ska nguzak rë profet,
rë xaꞌ kwaꞌn midiꞌzh por Dios chi tiemp.
24 ’Per zheꞌb nalats nzha go,
rë go xaꞌ rrik nal reꞌ;
porke lëꞌ go kinu la rë kwaꞌn gap go par dubtaꞌ.
25 ’No zheꞌb nalats nzha go,
rë go xaꞌ ndao la haxta plo une,
porke lëꞌ zhë zhin,
lox go di yalnilaꞌn.
’Mbaino zheꞌb nalats nzha rë go,
xaꞌ nizak laxtoꞌ nal reꞌ,
per lëꞌ zhë zhin,
lëꞌ go goꞌn di yalnawin haxta plo nagakraꞌi.
26 ’Zheꞌb nalats nzha go,
por nidiꞌzh men dox tsak go nal reꞌ;
porke saꞌ ska midiꞌzh men lo rë xaꞌ kwaꞌn chigab walika profet cheꞌn Dios,
per ka mbële.
Chizhiꞌ be rë xaꞌ niyiꞌ nine be
(Mt. 5:38-48; 7:12)
27 ’Per rë go xaꞌ nzhon kwaꞌn nin,
bichizhiꞌ go rë xaꞌ nidil go,
no bileꞌ go wen lo rë xaꞌ niyiꞌ nine go;
28 no gunaꞌb go lo Dios,
ya bixaꞌ wen,
rë xaꞌ kwaꞌn nizhiꞌbde go,
mbaino nu binaꞌb go lo Dios por rë xaꞌ kwaꞌn nileꞌ nakap lo go.
29 No cho tu xaꞌ këꞌ tube taꞌ roꞌ go,
bilaꞌ go ter nu xtu lad këꞌ xaꞌi,
no chi cho lat chiket cheꞌn go,
bilaꞌ go weiꞌ xaꞌ ter nu kamis cheꞌn go.
30 Xaꞌ naꞌb tu kwaꞌn lo go,
bizaꞌ goi,
mbaino xaꞌ zen tu kwaꞌn nak cheꞌn go,
nagabt go lo xaꞌ zhire ska xaꞌi.
31 Bileꞌ go kun rë men nela xmod nzhakla go leꞌ men kun go.
32 ’No chi nazhiꞌ go nab tsa rë men kwaꞌn nazhiꞌ go,
¿xmod leꞌ go tu kwaꞌn wen chi nak go saꞌ?,
porke haxta rë men más nzëꞌb xki,
nak saꞌ.
33 No chi nileꞌ go wen lo nab tsa rë xaꞌ nileꞌ wen kun go,
¿xmod leꞌ go tu kwaꞌn wen chi nak go saꞌ?,
porke haxta rë men más nzëꞌb xki,
nak saꞌ.
34 Mbaino chi lëꞌ go leꞌ prext kwaꞌn kaꞌ nab tsa rë men xaꞌ zak go niluꞌ ka kixe,
orzeꞌ,
¿xmod leꞌ go tu kwaꞌn wen chi leꞌ go saꞌ?,
porke nu ska haxta rë men más nzëꞌb xki,
nileꞌ bixaꞌ prext kwaꞌn kaꞌ guchin bixaꞌ,
orzeꞌ kimbëz bixaꞌ zhire ska xaꞌ zeꞌi.
35 Per rë go,
ñal chizhiꞌ go rë xaꞌ nikwaꞌn dil kun go,
no bileꞌ go wen;
no bileꞌ go prext kwaꞌn kaꞌ men sin nakwëz go kix xaꞌi,
nes par neꞌ Dios tu kwaꞌn dox tsak kaꞌ go,
no par luꞌ go nak go xmëꞌd Dios,
Me kwaꞌn nzho lo yibëꞌ,
porke Dios nazhiꞌ haxta rë xaꞌ gat nizaꞌt xkix lo Dios,
no rë xaꞌ minu la yentraꞌ kwan tsak,
nazhiꞌ Dios.
36 Kuzeꞌ,
nakiꞌn lats laxtoꞌ go xtu men nela Xuz go Dios nizine laxtoꞌ Me go.
Nadiꞌzhtal kwan ñal xtu men
37 ’Nagabt go kwan ñal tu xaꞌ nzhap dol,
nes par naleꞌ Dios kix go kwaꞌn nak go;
mbaino nanaꞌbt go zakzi Dios xtu men por kwaꞌn nak xaꞌ,
nes par Dios nazakzit ska go por xmod nak go.
Más wen biyaꞌl laxtoꞌ go kwaꞌn nileꞌ men lo go,
nes par Dios cheꞌ rë kwaꞌn nzëꞌb xki go.
San Lucas 6:37-49
38 No bizaꞌ go kwaꞌn kaꞌ men,
nes par Dios zilazh mase kaꞌ go,
haxta yaꞌn sobre;
nela xmod nizaꞌ goi kaꞌ men,
seꞌ ska neꞌ Diose kaꞌ go.
39 No nu mizaꞌ Jesús tu kwent reꞌ:
―¿Chi zak tu men nikal lo,
luꞌ xaꞌ nez lo xtu xaꞌ nikal lo?
¿Gat rop bixaꞌ yachin leꞌn tu zo?
40 No yent cho tu men más nzhak lo maestr cheꞌn xaꞌ,
sino ke or lox tseꞌd xaꞌ,
lëꞌ xaꞌ gak nela xaꞌ kwaꞌn miluꞌi lo xaꞌ.
41 ’¿Chon niwiꞌl por tu kwaꞌn nak xtu men,
mbaino lëꞌ rë kwaꞌn más nazheꞌb nakal gat niwiꞌtal?
Kureꞌ nak nela tu yix win kwaꞌn nzho lo wechal,
no lëꞌ yix ro kwaꞌn nzho lol gat niwiꞌtal.
42 ¿Chon nzhabal lo wechal:
“Bilaꞌ kon yix win kwaꞌn nzho lol reꞌ”,
no chi gat nizital,
más tu kwaꞌro nzho lol?
¡Tatu nazheꞌb nakal,
chigab walika men wenal!
Mejor galo laka nguloꞌ kwaꞌn nzho lol baꞌ,
nes par gak koꞌl kwaꞌn nzho lo wechal baꞌ.
Nakbeꞌ ya por xlë kwaꞌn nizaꞌi
43 ’No yent cho tu ya wen zaꞌ rë xlë nazuꞌt,
mbaino ni rë ya kwaꞌn nazuꞌt,
zaꞌ xlë wen,
44 porke kad ya nakbeꞌ por xlë kwaꞌn nizaꞌi,
porke gat nikant men nzhaoꞌ leꞌn ya yich,
no yent cho choꞌ tu rosim gub lo tu ya zhiiꞌ.
45 Lëꞌ menaye nidiꞌzh pura rë kwaꞌn ñal,
porke kwaꞌn wen nzho laxtoꞌ xaꞌ;
mbaino lëꞌ men nakap nidiꞌzh pura kwaꞌn gat lëꞌ,
porke kureꞌ nzho laxtoꞌ xaꞌ,
porke kwaꞌn nzho laxtoꞌ men,
kuzeꞌ nidiꞌzh men.
Chop simient
46 No nzhab Jesús:
―¿Chon nine go lon:
“Señor,
Señor”,
mbaino gat nileꞌt go kwaꞌn nin?
47 Nal nin lo go,
xmod nak men kwaꞌn nizubi lon,
mbaino nileꞌ xaꞌ kwaꞌn nzhapa.
48 Nak xaꞌ nela tu men michaoꞌ tu yoꞌ.
Galo laka ndeꞌn xaꞌ naꞌch lo ke,
zeꞌ michaoꞌ xaꞌ simient cheꞌne.
No or miroꞌb youꞌ,
dub jwers nkë nits taꞌ yoꞌ reꞌ,
no per ni nangawine,
porke lëꞌi nzob lo ke.
49 Per xaꞌ nzhon xtizha namás,
no gat nileꞌt xaꞌ kwaꞌn nzhapa,
nak xaꞌ nela tu xaꞌ michaoꞌ tu lizh plo pura yuo,
gat nayet nzobe,
porke nangachaoꞌt xaꞌi kun simient.
No or miroꞌb youꞌ,
dub jwers nkë nits taꞌi,
orzeꞌ michil nitse.