Nadiꞌzht go kwan ñal tu men por kwan nileꞌ xaꞌ
(Lc. 6:37-38, 41-42)
7
’Nagabtal kwan ñal tu men or nileꞌ xaꞌ tu kwaꞌn gat lëꞌ,
nes par nazakzi Diosal or nul nileꞌi,
2 porke or niniꞌl tich tu men por xmod nak xaꞌ,
saꞌ ska leꞌ Dios kun lu.
3 ¿Chon nilaꞌchal por yix kwaꞌn nzho zalo xtu men,
no chi nanetal,
lëꞌ tu kwaꞌn más kwaꞌro nzho zalol?
4 No chi más tu kwaꞌro nzho zalol,
¿xmod gabal lo wechal:
“Dinu lol,
kon yix”?
5 ¡Tatu nazheꞌb nakal,
chigab walika men wenal!
Galo laka guloꞌ yix ro kwaꞌn nzho lol baꞌ,
nes par gak wiꞌl wen no koꞌl yix kwaꞌn nzho zalo wechal baꞌ.
6 ’Nazaꞌt go kwaꞌn nazhon cheꞌn Dios kaꞌ rë xaꞌ gat nzhont nzho Dios,
par nayëk bixaꞌ dil bixaꞌ kun go,
orzeꞌ loꞌx bixaꞌ go tuli.
Mbaino nazaꞌt go rë kwaꞌn tsak cheꞌn Dios par kaꞌ wanei cho xaꞌ gat nambet laxtoꞌ lo Dios;
nayot laxtoꞌ bixaꞌ yalnazhon cheꞌn Dios,
nitsinu bixaꞌi.
Rë kwaꞌn naꞌb go lo Dios, lëꞌi gap go
(Lc. 11:9-13; 6:31)
7 No nzhab Jesús:
―Dubtaꞌ binaꞌb go kwaꞌn nakiꞌn go lo Dios,
lëꞌ Me neꞌi;
dubtaꞌ bikwaꞌn goi lo Dios,
lëꞌ Me leꞌ yazhël go kwaꞌn nakiꞌn go;
mbaino zilitaꞌ bikweꞌzh go roꞌ yoꞌ,
lëꞌ Dios xaꞌle,
8 porke tu men ninaꞌb tu kwaꞌn lo Dios,
lëꞌ Dios zaꞌi;
mbaino xaꞌ nikwaꞌn tu kwaꞌn,
lëꞌ xaꞌ yazhële por Dios;
no xaꞌ nikweꞌzh roꞌ yoꞌ,
lëꞌ Dios xaꞌle.
9 O,
¿cho tu go,
zaꞌ tu ke gao xmëꞌd go or ninaꞌb mëꞌd tu yët gao mëꞌd lo go?;
10 o,
¿chi zizaꞌ go tu mbëꞌl gao mëꞌd or ninaꞌb mëꞌd tu mbël gao mëꞌd?
11 No chi nzhak go nizaꞌ go kwaꞌn wen par xin go ter nileꞌ go kwaꞌn gat lëꞌ lo Dios,
per Xuz go Diose,
Me nzho lo yibëꞌ,
más nzhak Me nizaꞌ Me kwaꞌn wen kaꞌ rë men,
xaꞌ ninaꞌbe lo Me.
12 ’Chi seꞌ nazhiꞌ Dios go,
seꞌska bileꞌ go kun men,
nela xmod nzhakla go leꞌ men kun go gaꞌ;
porke kureꞌ nzobniꞌ lo ley cheꞌn Muisés;
no seꞌgaꞌ midiꞌzh rë profet,
rë xaꞌ midiꞌzh por Dios nzhala.
Pwert naya
13 ’Bileꞌ paꞌ go por yo go roꞌ puert naya,
porke pwert mbaino nez kwaꞌn ña par gabil,
dox naxene,
no dox nayax men ño zeꞌ;
14 per naya nez no naya pwert kwaꞌn ña plo nzho Dios,
Me nizaꞌ yalnaban par dubtaꞌ kaꞌ men;
kuzeꞌ cheꞌptsa men ño zeꞌ.
Nakbeꞌ ya por xlë kwaꞌn nizaꞌi
15 ’Bikina go go lo rë xaꞌ chigab walika nidiꞌzh por Dios;
ter niluꞌ nadoꞌ bixaꞌ nela tu mbëkxiꞌl gaꞌ,
per leꞌn laxtoꞌ bixaꞌ nak bixaꞌ nela tu ma nazheꞌb gaꞌ,
16 per por zhiꞌn kwaꞌn nileꞌ bixaꞌ,
liꞌbeꞌ go cho men bixaꞌ;
lëꞌ go nane ka,
gat nikët gub lo cho la ya,
no ni nzhaoꞌ gat nikëte lo ya yich.
17 Kuzeꞌ rë ya wen nizaꞌ xlë wen,
mbaino rë ya nazuꞌt,
xlë nazuꞌt ska nizaꞌi,
18 porke tu ya wen zaꞌte xlë nazuꞌt,
no ni tu ya nazuꞌt nazaꞌte xlë wen.
19 No rë nak ya kwaꞌn gat nizaꞌt xlë wen,
lëꞌi roꞌg no yoi lo ki par yole.
20 Saꞌ ska por kwaꞌn nileꞌ bixaꞌ,
ne go cho men bixaꞌ.
Gat lëꞌt rë men yo plo nileꞌ Dios mandad
21 ’Gat lëꞌt rë xaꞌ nine lon:
“¡Señor,
señor!”,
yo plo nileꞌ Dios mandad;
lëꞌi nab tsa rë xaꞌ nileꞌ kwaꞌn nzhakla Xuza Me nzho lo yibëꞌ,
yo zeꞌ.
22 Zhë zeꞌ,
nayax men ne lon:
“¡Señor,
señor!
No midiꞌzh widiꞌzh cheꞌn go lo men,
no por yalnazhon cheꞌn go nguloꞌ no mbi mal laxtoꞌ rë men,
mbaino nayax kwaꞌn nazhon mileꞌ no por yalnazhon cheꞌn go.”
23 Per orzeꞌ lëꞌda gap:
“Laltaꞌ gat libeꞌn go;
yubchi go lon,
¡rë go xaꞌ milaꞌ ley cheꞌn Dios tu lad,
nayiꞌlazh go!”
Chop xaꞌ michaoꞌ tu gaꞌ lizh
24 ’Kuzeꞌ,
rë xaꞌ nzhon xtiꞌzha no nileꞌ xaꞌ kwaꞌn nzhapa,
men zeꞌ nak nela tu men natsin,
kwaꞌn michaoꞌ tu lizh yek tu ke ro.
25 No or ngula tu yiubi nazheꞌb,
miroꞌb youꞌ,
naye ndin nits taꞌ yoꞌ zeꞌ,
per ni nangayalai,
por nzobe lo ke.
26 Per rë xaꞌ nzhon xtiꞌzha,
no gat nileꞌt xaꞌ kwaꞌn nzhapa,
rë men zeꞌ nak nela tu men yent xigab kwaꞌn michaoꞌ tu lizh lo pura yux.
27 No or ngula yiubi nazheꞌb,
miroꞌb youꞌ,
naye ndin nits taꞌ yoꞌ zeꞌ,
ngubixchei,
orzeꞌ milaoꞌwe.