Rë unaꞌ kwaꞌn ngoknu Jesús
8
No dispwés di ngok rë kureꞌ,
nikizë Jesús kun dub tu dusen men cheꞌn Me,
nayax yezh no rë rranch win,
kidiꞌzh Jesús widiꞌzh nazhon cheꞌn Dios par xmod gak men,
men cheꞌn Dios.
San Lucas 8:1-21
2 No nu zipla unaꞌ ngoknu Jesús.
Xid rë unaꞌ reꞌ nzho unaꞌ kwaꞌn miliwen Jesús yalyizh cheꞌn,
kun zipla unaꞌ kwaꞌn nguloꞌ Jesús mbi mal laxtoꞌ.
Tu rë unaꞌ reꞌ lë Mari Madalén;
unaꞌ kwaꞌn nguroꞌ gazh mbi mal laxtoꞌ.
3 No xtu rë unaꞌ reꞌ lë Juan xaꞌ nak unaꞌ cheꞌn Chuza,
miyiꞌ kwaꞌn nzo lo rë kwaꞌn nak cheꞌn gobiernador Herodes;
no xtu unaꞌ reꞌ lë San;
no nguio más rë unaꞌ kwaꞌn ngoknu Jesús kun rë kwaꞌn nak cheꞌn biunaꞌ.
Kwent cheꞌn xaꞌ nzhaꞌn
4 No nayax men kwaꞌn nzho rë yezh kwaꞌn nzhin nakaꞌn zeꞌ,
nguroꞌ bixaꞌ par ngwatsiꞌ bixaꞌ lo Jesús,
no or migan nayax men plo nzo Jesús,
orzeꞌ mizaꞌ Jesús kwent cheꞌn men nzhaꞌn triu,
nzhab Me:
5 ―Nguroꞌ tu miyiꞌ,
nzhayaꞌn xaꞌ lazh triu,
no or micheꞌch xaꞌ lazhe,
plai ngob leꞌn nez,
no milo men loi,
mbaino ndao miyine.
6 No mase ngob lo yuo ke,
no or ngulene,
lwegaꞌ mibizhe,
porke yent gop zeꞌ.
7 No mase ngob leꞌn ya yich,
no ngulene junt kun rë ya yich,
no ngalaꞌt ya yich ngaroꞌbe,
orzeꞌ ngute.
8 No xcheꞌpe ngob lo yuo wen,
orzeꞌ miroꞌbe,
no dox mizaꞌi.
Tu lazhe mizaꞌ xtu gayoꞌi dimás.
No or milox midiꞌzh Jesús kureꞌ,
orzeꞌ naye midiꞌzh Me,
nzhab Me:
―¡Chi lëꞌl mbine,
bizobyeke!
¿Chon midiꞌzh Jesús kwent reꞌ?
9 Orzeꞌ minabdiꞌzh rë men cheꞌn Me lo Me,
nzhab bixaꞌ:
—¿Kwan gab kwent kwaꞌn mizaꞌ go baꞌ?
10 Orzeꞌ nzhab Jesús:
―Lo go nin rë kwaꞌn nagaꞌch kwaꞌn kinu Dios plo nileꞌ Dios mandad;
per lo más men nidizha kun pura kwent lo bixaꞌ,
par ne bixaꞌi,
per nangalibeꞌt bixaꞌi;
no par gon bixaꞌi,
per nangazobyekt bixaꞌi.
Kiyab Jesús kwan gab kwent cheꞌn men nzhaꞌn
11 No nzhab Jesús:
—No nal,
lëꞌda ni lo go kwan gab kwent baꞌ.
Lëꞌ widiꞌzh cheꞌn Dios nak nela lazh kwaꞌn nzhaꞌn men.
12 Lëꞌ lazh triu kwaꞌn ngob leꞌn nez,
nak nela tu men kwaꞌn mbin widiꞌzh cheꞌn Dios,
per ña Mizhab nizubchiy laxtoꞌ xaꞌ,
par nayila xaꞌi,
no par naroꞌ xaꞌ lo kwaꞌn nazheꞌb nzho xaꞌ.
13 No lëꞌ kwaꞌn ngob lo yuo ke,
nak nela men mbin widiꞌzh cheꞌn Dios,
no ngwayila xaꞌi,
nizak laxtoꞌ xaꞌ,
per gat nzot xaꞌ naye lo cheꞌn Dios.
Ñila xaꞌi cheꞌp,
per or nizak xaꞌ tu kwaꞌn nazheꞌb,
orzeꞌ nilaꞌ xaꞌ Dios.
14 Mbaino lëꞌ lazh triu kwaꞌn ngob leꞌn ya yich,
nak rë men mbin widiꞌzh cheꞌn Dios,
per cheꞌp gaꞌ cheꞌp gaꞌ,
ñaꞌl laxtoꞌ xaꞌi,
por rë xigab kwaꞌn nileꞌ xaꞌ,
xmod ban xaꞌ,
mbaino por ño laxtoꞌ xaꞌ leꞌ xaꞌ kwaꞌn nzhakla xaꞌ,
no por niwix xaꞌ gap xaꞌ dimi;
kuzeꞌ gat nileꞌt xaꞌ kwaꞌn nzhakla Dios leꞌ xaꞌ.
15 Mbaino lëꞌ lazh triu kwaꞌn ngob leꞌn yuo wen,
nak nela men kwaꞌn mbin widiꞌzh cheꞌn Dios kun dub laxtoꞌ xaꞌ,
no ngwayila xaꞌi,
no miaꞌne laxtoꞌ xaꞌ.
Mbaino ter nizak xaꞌ rë kwaꞌn nazheꞌb,
per nileꞌ xaꞌ rë kwaꞌn nzhakla Dios leꞌ xaꞌ.
Orzeꞌ nak xaꞌ nela tu ya xlë,
kwaꞌn dox nizaꞌ xlë wen.
Kwent cheꞌn tu biani
16 No nu nzhab Jesús:
―Yent cho tsinki tu biani no tsaoꞌ xaꞌ loi,
o zob xaꞌi lo yuo xan loꞌn,
sino ke al ya zob xaꞌi,
par ziniy lo rë xaꞌ yo leꞌn yoꞌ,
17 porke yent tu kwaꞌn nagaꞌch,
naroꞌ al tich;
no ni kwaꞌn xlaꞌn,
naded gon men,
sino ke rëi roꞌ al tich.
18 ’Kuzeꞌ,
biwiꞌ go xmod leꞌ go,
por rë kwaꞌn nidizha lo go;
porke rë xaꞌ kwaꞌn nzhakla zobyek,
mbaino leꞌ rë kwaꞌn nidizha,
rë xaꞌ reꞌ xaꞌ nzhaknu Dios,
par más zobyek bixaꞌi;
per xaꞌ gat nzhaklat beꞌs zobyek kwaꞌn nidizha,
haxta cheꞌp tsa kwaꞌn nileꞌ xaꞌ xigab,
ya nane la xaꞌ,
per lëꞌi yubchi lo xaꞌ.
Rë wech Jesús kun xnaꞌ Me
19 Orzeꞌ nzha xnaꞌ Jesús,
kun rë wech Jesús plo nzo Me,
per nangakt ngazubi bixaꞌ lo Me,
porke dox nayax men nzhin zeꞌ,
20 orzeꞌ ngwayab tu men lo Jesús:
―Lëꞌ xnaꞌ go mbaino rë wech go nzo al tich,
nzhakla bixaꞌ diꞌzh bixaꞌ kun go.
21 Per nzhab Jesús:
―Lëꞌ xnaꞌn mbaino rë wecha,
nak rë xaꞌ kwaꞌn nzhon widiꞌzh cheꞌn Dios,
mbaino nileꞌ bixaꞌ kwaꞌn nzhakla Dios.
Mikwëꞌz Jesús tu yiubi nazheꞌb leꞌn nits
22 Tu ngubizh,
nkë Jesús leꞌn tu bark kun rë men cheꞌn Me,
no nzhab Me:
―Chaoꞌ nzha be xtu roꞌ nits.
Orzeꞌ nzha bixaꞌ.
San Lucas 8:22-39
23 No or nzha la bixaꞌ leꞌn nits,
no nguzen mikaꞌl Jesús,
lëꞌchi nguzublo tu yiubi nazheꞌb leꞌn nits,
orzeꞌ nguzublo nguio nits leꞌn bark,
no mer yaꞌzyoꞌi.
24 Orzeꞌ ngwalixche bixaꞌ Jesús,
nzhab bixaꞌ:
―¡Maestr,
Maestr,
lëꞌ bark nzhakla yaꞌzyoꞌ leꞌn nits!
Orzeꞌ ngwaxche Jesús,
no naye midiꞌzh Me lo mbi,
no lo rë bol cheꞌn nits,
no ngulëz yiubi,
xe miaꞌn rëi.
25 Orzeꞌ nzhab Jesús lo rë men cheꞌn Me:
―Ñal más yila go da.
Per rë bixaꞌ mizheb,
no xe miaꞌn bixaꞌ tuli,
orzeꞌ nzhab bixaꞌ lo wech bixaꞌ:
―¿Cho xaꞌ reꞌ?
¡Haxta lo mbi,
no lo nits nidiꞌzh xaꞌ,
mbaino nzhone kwaꞌn nzhab xaꞌ!
Tu men lazh men Gadara tu xaꞌ nzho nayax mbi mal laxtoꞌ
26 Orzeꞌ mizhin bixaꞌ lazh men Gadara,
kwaꞌn nzhin xtu roꞌ nits dilant lazh men Galilea.
27 No or ngula Jesús bark,
orzeꞌ nguzubi tu men yezh zeꞌ lo Jesús,
tu xaꞌ kwaꞌn dox nzhala nzho mbi mal laxtoꞌ.
No kacheꞌ xaꞌ,
mbaino ni gat nzho xaꞌ lizh xaꞌ,
leꞌn panteón nzho xaꞌ.
28 No or une xaꞌ Jesús,
nguzuxib xaꞌ lo Jesús,
no naye nguruzhië xaꞌ,
nzhab xaꞌ:
―¿Kwan nizakal kuda,
Jesús Xgaꞌn Dios,
Me nzho lo yibëꞌ?
¡Kinaꞌba lol,
zakzital da!
29 Seꞌ nzhab mbi mal zeꞌ lo Jesús,
porke lëꞌ Jesús mileꞌ mandad,
par liyaꞌ mbi mal zeꞌ miyiꞌ reꞌ.
Nayax wëlt,
nilinu rë mbi reꞌ miyiꞌ reꞌ kwaꞌn nzhaklai,
no ter niliꞌb men yaꞌ xaꞌ,
no niꞌ xaꞌ kun kaden,
no ter nikina men xaꞌ par nayent plo ya xaꞌ,
per nichoꞌ xaꞌ kaden,
nixëk xaꞌ,
orzeꞌ nizhinu rë mbi mal xaꞌ,
plo niyent cho nak.
30 Orzeꞌ nzhab Jesús lo xaꞌ reꞌ:
―¿Xmod lël?
Orzeꞌ nzhab xaꞌ:
―Lëꞌda lë Legión.
―Naxëꞌltal no,
plo nazheꞌb naꞌch no nakao.
32 No zeꞌ nzhin nayax kuch,
kiyao ma taꞌ tu lom,
no gunaꞌb rë mbi mal zeꞌ,
laꞌ Jesús biy leꞌn rë kuch kwaꞌn nzhin zeꞌ,
orzeꞌ nguziyël Jesús.
33 Orzeꞌ nguroꞌ rë mbi mal laxtoꞌ miyiꞌ reꞌ,
par ñai leꞌn rë kuch,
orzeꞌ mikëꞌ bima karre,
ngula bima roꞌ bilëꞌ plo nak roꞌ nits,
zeꞌ ngwap rë kuch.
34 No rë xaꞌ kwaꞌn kikina rë kuch reꞌ,
or une bixaꞌ kureꞌ,
mikëꞌ bixaꞌ karre,
ngwayab bixaꞌi lo rë men yezh zeꞌ,
no lo rë xaꞌ nzho dan.
35 Orzeꞌ rë men ngwatswiꞌ,
por kwan mbin xaꞌ ngok reꞌ;
or mizhin men plo nzo Jesús,
une bixaꞌ miyiꞌ kwaꞌn nzhak miyizh zeꞌ,
lëꞌ xaꞌ wen la,
mbaino nak xab la xaꞌ,
nzob xaꞌ xan niꞌ Jesús,
orzeꞌ rë men mizheb tuli.
36 No rop xaꞌ kwaꞌn une,
xmod uniwen xaꞌ kwaꞌn ngok miyizh zeꞌ,
midiꞌzh bixaꞌi,
lo más rë men kwaꞌn ngwatswiꞌ zeꞌ,
37 kuzeꞌ gunaꞌb rë nak men,
kwaꞌn nzho rë yezh kwaꞌn ñaꞌn lazh men Gadara,
nzhab bixaꞌ,
roꞌ Jesús zeꞌ,
porke dox nizheb bixaꞌ lo Jesús.
Orzeꞌ nkë Jesús leꞌn bark,
par ña Me kun rë men cheꞌn Me.
38 No miyiꞌ kwaꞌn miliyaꞌ mbi mal zeꞌ,
gunaꞌb xaꞌ lo Jesús,
yakë xaꞌ tich Jesús;
per nzhab Jesús lo xaꞌ:
39 ―Biyëk lizhal,
no guzh lo rë men,
rë kwaꞌn mileꞌ Dios kun lu.
Orzeꞌ ña miyiꞌ zeꞌ,
dub lazh men Gadara,
midiꞌzh xaꞌ,
lëꞌ Jesús miliwen xaꞌ.
Xchaꞌp Jairo no tu unaꞌ kwaꞌn migal xab Jesús
40 No or miëk Jesús di xtu roꞌ nits,
rë men nzhin zeꞌ,
nizak laxtoꞌ or mizhin Jesús lo bixaꞌ,
porke lëꞌ bixaꞌ kimbëz lo la.
San Lucas 8:40-56
41 Lëꞌchi,
zeꞌ mizhin tu xaꞌ lë Jairo,
nak xaꞌ tu men xaꞌ nileꞌ mandad leꞌn yoꞌ plo nitseꞌd men widiꞌzh cheꞌn Dios,
orzeꞌ tuli nguzuxib xaꞌ xan niꞌ Jesús,
kinaꞌb xaꞌ ya Jesús lizh xaꞌ,
42 porke mer gat,
tutsa xchaꞌpyeꞌn xaꞌ kwaꞌn nzhap xaꞌ,
nzhap la mëꞌd tu dusen liꞌn.
No dub nzha Jesús lizh mëꞌd reꞌ,
nayax men nzhakë tich Me,
haxta kigotip men Jesús.
43 Xid rë men reꞌ,
nzho tu unaꞌ kwaꞌn nzhakne,
nzhala tu dusen liꞌn nizak xaꞌ kwaꞌn.
Miloꞌx xaꞌ rë kwaꞌn kinu xaꞌ,
lo rë doctor,
no yent cho doctor ngaliwen xaꞌ.
44 No nguzubi unaꞌ reꞌ al tich Jesús,
par migal unaꞌ punt xab Me,
no mis orzeꞌ ngulëz ren kwaꞌn nizak unaꞌ.
45 Orzeꞌ nzhab Jesús:
―¿Cho migal taꞌn?
Rë men nzhab,
yent cho migale,
orzeꞌ nzhab Per:
―Maestr,
ka rë men kitaoꞌw go,
no kicheꞌp xaꞌ go rë lad.
¿Chon kinabdiꞌzh go:
“Cho migal da”?
46 Per gargaꞌl nzhab Jesús:
―Nzho ka cho migal taꞌn,
lëꞌ da mizi,
por yalnazhon kwaꞌn kinun,
lëꞌ tu men miak.
47 No or une unaꞌ reꞌ,
nagaktraꞌ kaꞌch unaꞌ kureꞌ,
maska nixiz unaꞌ,
nguzuxib unaꞌ xan niꞌ Jesús,
no mixëꞌl roꞌ unaꞌ lo rë men,
nzhab unaꞌ:
—Na migal punt xab Jesús,
mbaino lwegaꞌ miak da.
48 Orzeꞌ nzhab Jesús:
―Xchaꞌp,
lëꞌl ngokwen la por ngwayilal da,
nal bizë,
no bizak laxtoꞌ.
49 Stubi raꞌ kidiꞌzh Jesús,
orzeꞌ mizhin tu xaꞌ kwaꞌn nzho lizh Jairo,
nzhab xaꞌ lo Jairo:
―Lëꞌ mizhwin cheꞌnal ngut la;
bilaꞌ nayiꞌdnutraꞌl Maestr.
50 No or mbin Jesús kureꞌ,
orzeꞌ nzhab Me lo Jairo:
―Nazhebtal,
na gaknu mizhwin,
lëꞌ mizhwin cheꞌnal yak ka.
51 No or mizhin bixaꞌ lizh Jairo,
yentraꞌ cho ngalaꞌ Jesús ngaded al leꞌn,
nab tsa Per no Jakob mbaino Juan no xuz mizhwin,
kun xnaꞌ mizhwin nguio al leꞌn.
52 No maska kiyoꞌn rë men di yalnawin,
kigal bixaꞌ laz bixaꞌ por mizhwin reꞌ,
per nzhab Jesús lo rë men:
―Nagontraꞌ go;
gat lëꞌt ngut mizhwin,
lëꞌ mizhwin ka naxnaa.
53 Per kixizhnu rë men Jesús,
porke nane bixaꞌ lëꞌ mizhwin ngut la.
54 Orzeꞌ nguzen Jesús yaꞌ mizhwin,
no naye nzhab Me:
―¡Mizhwina,
waxche!