Jesús miluꞌ, gat ñalt lëꞌ men kun tsaꞌ men
19
Or milox midiꞌzh Jesús rë kureꞌ,
orzeꞌ nguroꞌ Me lazh men Galilea,
nzha Me lazh men Judea,
xtu roꞌ youꞌ Jordán nez plo nilen ngubizh.
2 Tu bëd men nzhakë tich Me;
zeꞌ miliyak Me rë men nzhakne xaꞌ nzho xid rë men zeꞌ.
3 Orzeꞌ nguzubi pla men fariseo lo Jesús par zenbeꞌ bixaꞌ Me (wiꞌ bixaꞌ xmod nak Me),
kuzeꞌ nzhab bixaꞌ:
―Lo ley cheꞌn Muisés,
¿chi zak laꞌ tu miyiꞌ tsaꞌ xaꞌ por wanei kwan tu kwaꞌn?
4 Per nzhab Jesús:
―¿Chi nagat goꞌl go lo Yech cheꞌn Dios,
plo nzobniꞌ,
dizde galo laka,
or ngulo Me rë kwaꞌn,
Dios ngulo miyiꞌ no unaꞌ par ban bixaꞌ tutsa?
5 No nu seꞌ nzobniꞌ lo Yech cheꞌn Dios:
“Por unaꞌ,
lëꞌ miyiꞌ laꞌ xuz no xnaꞌ par ban xaꞌ tutsa kun tsaꞌ xaꞌ,
mbaino rop xaꞌ gak tutsa men.”
6 No gat lëꞌtraꞌ chop xaꞌ,
lëꞌ xaꞌ ngok tutsa men.
Kuzeꞌ,
miyiꞌ xaꞌ mizo Dios tsaꞌ,
nagaktraꞌ lëꞌ xaꞌ kun tsaꞌ xaꞌ.
7 Orzeꞌ nzhab rë xaꞌ reꞌ lo Jesús:
―¿Chon ska mileꞌ Muisés mandad:
“Yats tu yech par zaꞌ miyiꞌy kaꞌ unaꞌ,
nes gak laꞌ xaꞌ unaꞌ”?
8 Orzeꞌ nzhab Jesús:
―Por niyent kwan gon goi,
kuzeꞌ nguziyël Muisés laꞌ nzëꞌb go tsaꞌ go,
per or galo gat lëꞌt saꞌi.
9 Per na ni lo go,
cho laꞌ nzëꞌb unaꞌ cheꞌn,
no gat lëꞌt por milibeꞌ la unaꞌ miyiꞌy or naga ban unaꞌ kun miyiꞌ reꞌ,
no chi ban miyiꞌ kun xtu unaꞌ,
nzëꞌb xki xaꞌ lo Dios orzeꞌ.
No nu ska,
xaꞌ ban kun unaꞌ reꞌ,
nzëꞌb xki ska xaꞌ lo Dios.
10 Orzeꞌ nzhab rë men cheꞌn Jesús:
―Chi lëꞌi saꞌ nak kwent cheꞌn men nzhap unaꞌ,
neka más wen nakwaꞌnt xaꞌ unaꞌ.
11 Orzeꞌ nzhab Jesús:
―Gat lëꞌt rë go gak zobyek kureꞌ,
nab tsa rë xaꞌ mileꞌ Dios gak zobyeke,
zobyeke.
12 Per nzho miyiꞌ nagakt gap unaꞌ,
dizde or ngol xaꞌ,
nak xaꞌ saꞌ;
no nzho miyiꞌ,
nagakt gap unaꞌ,
por men mileꞌ xaꞌ saꞌ;
mbaino nzho miyiꞌ gakt ska gap unaꞌ,
par leꞌ bixaꞌ rë zhiꞌn nazhon cheꞌn Dios kwaꞌn nileꞌ bixaꞌ.
Kuzeꞌ,
xaꞌ gak zobyek kureꞌ,
lëꞌ xaꞌ zobyeke.
Unaꞌb Jesús ya rë mëꞌd wen
13 No ngwanu rë men rë mëꞌd lo Jesús par xoꞌb Me yaꞌ Me yek bimëꞌd,
mbaino naꞌb Me ya rë mëꞌd wen,
orzeꞌ nalaꞌt rë men cheꞌn Me zubi rë mëꞌd lo Me,
14 per nzhab Me lo rë men cheꞌn Me:
―Bilaꞌ go yiꞌd rë mëꞌd baꞌ lon,
nakaꞌnt go lo bimëꞌd,
porke plo nileꞌ Dios mandad,
nak cheꞌn rë men,
xaꞌ nak nela mëꞌd gaꞌ.
15 Or miloꞌx mixoꞌb Me yaꞌ Me yek rë mëꞌd zeꞌ,
nzha Me xtu plo.
Tu miyiꞌ xi, dox rrik
16 Lëꞌchi nguio lo Jesús,
mizhin tu miyiꞌ xi,
nzhanaꞌbdiꞌzh miyiꞌ lo Me,
nzhab miyiꞌ:
―Maestr,
¿cho kwaꞌn nakiꞌn len par nen,
lëꞌ da ban dubtaꞌ lo Dios?
17 Orzeꞌ nzhab Jesús:
―¿Chon minaꞌbdiꞌzhal lon,
kwan wen?
Nabtsa Dios wen.
Chi nzhaklal banal dubtaꞌ lo Dios,
bileꞌ rë nak kwaꞌn nzobniꞌ lo ley cheꞌn Muisés.
18 Orzeꞌ nzhab miyiꞌ reꞌ:
―¿Cho paꞌ kwaꞌne?
Mikab Jesús:
―Nagutal men,
nabantal kun unaꞌ gat lëꞌ tsaꞌl,
no naliwaꞌntal,
mbaino nakëꞌtal kixuꞌ xaꞌ yent kwan nak,
19 gop kwent xuzal mbaino xnaꞌl,
no bichizhiꞌ xtu men nela lu ka.
20 Orzeꞌ nzhab miyiꞌ xi reꞌ:
―Rë kureꞌ mile la,
dizde or win da.
¿Kwan raꞌ más jwalt len?
21 Orzeꞌse nzhab Jesús kureꞌ:
―Chi walika nzhaklal gakal tu men nileꞌ rëi lo Dios,
bito rë nak kwaꞌn kinul,
orzeꞌ bizaꞌi,
kaꞌ rë xaꞌ yent kwan kinu,
nes gapal yalrrik lo yibëꞌ;
orzeꞌ dikë ticha.
22 Or mbin miyiꞌ xi kureꞌ,
dub niwin laxtoꞌ xaꞌ,
ña xaꞌ,
porke dox rrik xaꞌ.
23 Orzeꞌ nzhab Jesús lo rë men cheꞌn:
―¡Walika kwaꞌn kinin lo go,
dox nagan,
yo tu rrik plo nileꞌ Dios mandad!
24 Xtu wëlt nin lo go,
más jwals ded tu kamey xan tu yaguj,
ke par yo tu rrik plo nileꞌ Dios mandad.
25 Or mbin rë men cheꞌn Me kureꞌ,
xe miaꞌn bixaꞌ tuli,
orzeꞌ nzhab bixaꞌ lo wech bixaꞌ:
―Chi lëꞌi sbaꞌ,
¡pas yent cho men leꞌ gan,
roꞌ lo rë kwaꞌn nazheꞌb nzho men!
26 Orzeꞌ xe miwiꞌ Jesús lo bixaꞌ,
no nzhab Jesús:
―Par rë men,
nzho kwaꞌn nagakt leꞌ men;
per Dios,
yent cho tu kwaꞌn nagakt leꞌ Dios.
27 Orzeꞌ nzhab Per:
―Biwiꞌu,
no milaꞌ rë kwaꞌn,
par nzadkë no tich go;
nal,
¿kwan gal no por kureꞌ?
28 Mikab Jesús:
―Walika kwaꞌn nin lo go,
xtu yizhyuo kwaꞌn laore yo,
or zob Xgaꞌn Dios Me nu nak tu men yizhyuo,
par leꞌ Me mandad;
no rë go xaꞌ mbidkë ticha,
seꞌska zob za tu dusen go,
par kubeꞌ go lo dub tu dusen ben men Israel.
29 No rë xaꞌ laꞌ lizh,
o wech,
o bizan,
o xuz o xnaꞌ,
o xmëꞌd,
o yuo cheꞌn;
por nak xaꞌ men da;
no xtu gayoꞌ wëlt más nayaxe gap xaꞌ lo yizhyuo reꞌ;
no lo xtu yizhyuo kwaꞌn laore yo,
ya nayotraꞌ gat xaꞌ.
30 Per nayax xaꞌ galo,
xaꞌ zeꞌ gak xaꞌ lult;
no xaꞌ lult gak xaꞌ galo.