Kwent cheꞌn pla mos
20
’Nu nak plo nileꞌ Dios mandad nela tu xaꞌ nak cheꞌn tlëꞌ yuo.
Garziꞌl laka nguroꞌ xaꞌ,
ngwakwaꞌn xaꞌ mos par kë zhiꞌn lo yuo plo kinu xaꞌ ya gub cheꞌn xaꞌ,
2 no miaꞌn xaꞌ diꞌzh plak kix xaꞌ kaꞌ rë mos zeꞌ tu ngubizh zhiꞌn;
orzeꞌ mixëꞌl xaꞌ rë mos zeꞌ plo nzhiꞌb ya gub cheꞌn xaꞌ.
3 No mis zhë zeꞌ,
paste las nueve garziꞌl,
xtu wëlt ngwa xaꞌ.
Or une xaꞌ lo xbiꞌ,
zipla xaꞌ yent kwan kileꞌ,
ka nzhin zeꞌ,
4 orzeꞌ nzhab xaꞌ kinu zhiꞌn zeꞌ:
“Nu go wa zhiꞌn plo nzhiꞌb ya gub da,
na kix kaꞌ go kwaꞌn ñal.”
Orzeꞌ nu bixaꞌ nzha zhiꞌn.
5 No xtu wëlt ngwa xaꞌ nak cheꞌn yuo zeꞌ,
paste nzhala garol zhë,
no nu ngwa xaꞌ paste nzhala las tres zhë,
no seꞌgaꞌ mileꞌ xaꞌ.
6 No lult or par lox la ngubizh,
ngwa xaꞌ paste las cinco guzhe ngwakwaꞌn xaꞌ más mos kë nzhin cheꞌn xaꞌ,
lëꞌchi une xaꞌ zipla xaꞌ ka nzhin zeꞌ,
orzeꞌ nzhab xaꞌ kinu zhiꞌn reꞌ:
“¿Chon dub zhë nzhin go reꞌ,
yent kwan kileꞌ go?”
7 Orzeꞌ nkab rë mos reꞌ:
“Yent cho ngaleꞌ no par kë no zhiꞌn.”
Orzeꞌ nzhab xaꞌ reꞌ:
“Sas go,
nu go wa zhiꞌn plo nzhiꞌb ya gub da.”
8 No or mizhëlyuo,
nzhab xaꞌ nak cheꞌn rë ya gub zeꞌ lo mos xaꞌ nileꞌ mandad lo más rë mos:
“Gurezh rë mos par gudix kaꞌ bixaꞌ;
guzublo kun rë xaꞌ nguio lult lo zhiꞌn,
orzeꞌ lult gudix kaꞌ rë xaꞌ nguio galo laka lo zhiꞌn.”
9 Or nguzubi rë mos kwaꞌn nguio lo zhiꞌn paste las cinco guzhe,
ngox nkaꞌ bixaꞌ kwaꞌn nzhax kaꞌ tu men nikë zhiꞌn dub zhë.
10 Or nguzubi rë mos kwaꞌn nkë zhiꞌn dub zhë,
mileꞌ bixaꞌ xigab,
más ngax kaꞌ bixaꞌ;
per tugaꞌ bixaꞌ ngox kaꞌ kwaꞌn nzhax kaꞌ tu men tu ngubizh zhiꞌn.
11 Kuzeꞌ,
or nguzen bixaꞌ dimi,
nguzublo midiꞌzh bixaꞌ gat lëꞌ lo xaꞌ nak cheꞌn zhiꞌn zeꞌ,
12 nzhab bixaꞌ:
“Rë mos,
xaꞌ nkë zhiꞌn tutsa or,
lal ndix go nkaꞌ no kun lëꞌ bixaꞌ,
mbaino dub zhë nkë no zhiꞌn no dub lo nëiꞌ.”
13 Orzeꞌ nzhab xaꞌ nak cheꞌn zhiꞌn lo tu rë xaꞌ zeꞌ:
“Wen da kun lu;
ni tu kwaꞌn gat lëꞌ milen kun lu.
¿Chi gat lëꞌt saꞌ miaꞌn be,
kixa kaꞌl cheꞌn tu ngubizh zhiꞌn?
14 Guzen kwaꞌn ngox kaꞌl baꞌ,
bizë;
porke na nzhakla kixa kaꞌ xaꞌ nguio lult lo zhiꞌn nela kwaꞌn ndixa kaꞌl gaꞌ.
15 Na gak le kwaꞌn nzhaklan kun dimi da,
o,
¿chi niyiꞌl por wen da kun men?”
16 Kuzeꞌ,
xaꞌ lult gak xaꞌ galo,
no xaꞌ galo gak xaꞌ lult.
Xtu wëlt midiꞌzh Jesús, lëꞌ Me gat
17 Dub nzha Jesús nez yezh Jerusalén,
lëꞌchi tu lad ngurezh Me za tu dusen men cheꞌn Me,
nzhab Me:
18 ―Biwiꞌ go,
lëꞌ be nzha yezh Jerusalén;
na Xgaꞌn Dios no nu nak da tu men yizhyuo;
baꞌ lëꞌ rë men chi da lo rë ngulëiꞌ xaꞌ nileꞌ mandad lo más rë ngulëiꞌ,
no lo rë maestr xaꞌ niluꞌ ley cheꞌn Muisés;
orzeꞌ lëꞌ bixaꞌ naꞌb gat da.
19 No chi bixaꞌ da lo rë men gat lëꞌt men Israel;
lëꞌ rë xaꞌ reꞌ xizhnu da,
no chël bixaꞌi ticha,
mbaino këꞌ bixaꞌ da lo krus;
per ngubizh yon lëꞌda ruban.
Kwaꞌn ngunaꞌb tu unaꞌ par rop xgaꞌn xaꞌ
20 Orzeꞌ,
lo Jesús nguzubi xnaꞌ rop xgaꞌn Zebedeo,
Jakob no Juan,
tuli ngoꞌt kuslo unaꞌ par naꞌb unaꞌ leꞌ Me tu kwaꞌn,
21 orzeꞌ nzhab Jesús lo unaꞌ:
―¿Kwan nzhaklal len por lu?
Orzeꞌ mikab unaꞌ:
―Or gak go rey,
leꞌ go mandad,
nzhaklan zob tugaꞌ xgaꞌna reꞌ kad taꞌ go.
22 Per nzhab Jesús:
―Nanet go kwan kinaꞌb go;
¿chi zo go kwaꞌn nala kwaꞌn goꞌn?
Orzeꞌ mikab bixaꞌ:
―Lëꞌi gak ka go no.
23 Orzeꞌ nzhab Jesús:
―Ter go go kwaꞌn nala kwaꞌn goꞌn,
per gat lëꞌt na kubeꞌ cho zob kad taꞌn;
nab tsa Xuza nane cho rë xaꞌ gak zob taꞌn.
24 Or mbin zichiꞌ men cheꞌn Jesús kureꞌ,
orzeꞌ niyiꞌ bixaꞌ lo Jakob no lo Juan,
25 per ngurezh Jesús za chiꞌ xaꞌ reꞌ par nzhab Me:
―Lëꞌ go nane ka,
xmod nak rë xaꞌ nileꞌ mandad xid rë men gat lëꞌt men Israel,
dox naye nikë xaꞌ men zhiꞌn;
mbaino rë xaꞌ ro,
xaꞌ nzho xid bixaꞌ,
kwaꞌn nzhakla bixaꞌ nilinu bixaꞌ men,
26 per go,
nagakt go saꞌ;
porke xaꞌ nzhakla leꞌ mandad xid go,
xaꞌ zeꞌ gak nela tu mos gaꞌ xid go;
27 mbaino xaꞌ nzhakla gak xaꞌ galo xid go,
xaꞌ zeꞌ gak xaꞌ lult,
nela tu mos nado lo xtu men gaꞌ,
28 porke na ni,
ter nak da Xgaꞌn Dios,
no nak da tu men yizhyuo;
per nagaxëꞌlt Dios da par len mandad lo rë men;
lëꞌda nzhal par len kwaꞌn ne bixaꞌ,
mbaino haxta gat da por lëꞌ bixaꞌ,
par kixa rë kwaꞌn nzëꞌb xki bixaꞌ lo Dios.
Jesús mileꞌ miwiꞌ chop men nikal lo
29 Or nzharoꞌ la Jesús yezh Jericó kun rë men cheꞌn Me,
no nayax men nzhakë tich Me;
30 lëꞌchi roꞌ nez zeꞌ nzob chop men nikal lo.
Or mbin bixaꞌ lëꞌ Jesús nzhaded zeꞌ,
tuli nguruzhië bixaꞌ:
―¡Lëꞌ go,
Xgaꞌn Dabi,
bilats laxtoꞌ go no!
31 Orzeꞌ niyiꞌ rë men nguruzhyë bixaꞌ,
per más naye nguruzhië bixaꞌ,
nzhab bixaꞌ:
―¡Lëꞌ go,
Xgaꞌn Dabi,
bilats laxtoꞌ go no!
32 Orzeꞌ ngulëz Jesús,
no ngurezh Me rop xaꞌ nikal lo reꞌ,
mbaino nzhab Me lo bixaꞌ:
―¿Kwan nzhakla go len kun go?
33 Orzeꞌ mikab bixaꞌ:
―Lëꞌ go,
nzhakla no leꞌ go yani lo no.
34 No milats laxtoꞌ Jesús bixaꞌ,
migal Me lo bixaꞌ,
lëꞌchi tuli ngwaniy,
orzeꞌ nzhakë bixaꞌ tich Me.