Nguio Jesús yezh Jerusalén nela tu rey gaꞌ
21
Nzhazhin la Jesús yezh Jerusalén,
per galo mizhin Me tu yezh win yezh kwaꞌn lë Betfagé;
gax mont Olivos ñaꞌne.
Zeꞌ mixëꞌl Me chop men cheꞌn Me,
2 nzhab Me lo bixaꞌ:
―Wa go yezh win kwaꞌn nzhin nali laka reꞌ;
or zhin go plo nikidoꞌ tu burr gol kun tu burrit,
bixëk go ma no diꞌnu go ma,
3 no chi naꞌbdiꞌzh tu men:
“¿Plo weiꞌ go burr baꞌ?”,
orzeꞌ guzh go:
“Lëꞌ Señor nakiꞌn ma,
no lëꞌ xaꞌ zhire ska ma lwegaꞌ”,
orzeꞌ lëꞌ xaꞌ laꞌ yiꞌdnu go ma,
4 nes ngok kwaꞌn midiꞌzh tu profet,
xaꞌ kwaꞌn midiꞌzh por Dios,
or nzhab xaꞌ:
5 Guzh go lo rë men yezh Sion:
“Biwiꞌu;
lëꞌ rey cheꞌn go nzë,
tu xaꞌ nadoꞌ,
Nzob xaꞌ tich tu burrit.”
6 No ngwa rop men cheꞌn Jesús zeꞌ,
mileꞌ bixaꞌ nela xmod nzhab Jesús lo bixaꞌ,
7 ñadnu bixaꞌ burr gol zeꞌ kun xmëꞌd ma plo nzo Jesús,
no mixoꞌb bixaꞌ xab bixaꞌ tich ma par nguzob Jesús ma.
8 Dox nayax men nzha zeꞌ,
kiyix bixaꞌ xab bixaꞌ nez;
nzho bixaꞌ kichoꞌ rram ya,
par kiyix bixaꞌi plo nzhaded Jesús,
9 Rë xaꞌ nzhubner plo nzha Jesús kun rë xaꞌ nzhakë tich Me,
kibizhyë bixaꞌ,
nayë nzhab bixaꞌ:
―¡Par dubtaꞌ yo Xgaꞌn Dabi!
¡Wen nzha xaꞌ mixëꞌl Dios!
¡No par dubtaꞌ nzho Me nzho lo yibëꞌ!
10 No or nguio Jesús yezh Jerusalén,
net men kwan leꞌ men di tanta nizak laxtoꞌ men,
nzhab bixaꞌ lo wech bixaꞌ:
―¿Cho xaꞌ baꞌ?
11 Mikab más rë men nzha kun lëꞌ Me:
―Lëꞌ Jesuze,
xaꞌ nidiꞌzh por Dios,
no yezh Nazaret nzë xaꞌ,
kwaꞌn ñaꞌn lazh men Galilea.
Jesús nguloꞌtin rë xaꞌ nileꞌ xbiꞌ lo luwe cheꞌn yadoꞌ
12 Or nguio Jesús lo luwe cheꞌn yadoꞌ,
nguloꞌtin Me rë xaꞌ nileꞌ xbiꞌ zeꞌ,
no michixche Me rë mes cheꞌn rë xaꞌ nichiꞌl dimi;
no michixche Me rë plo nizob rë xaꞌ nito palom,
13 orzeꞌ nzhab Me lo bixaꞌ:
―Seꞌ nzobniꞌ:
“Lëꞌ lizha ñal gak plo naꞌb men Lon”,
¡per go kileꞌi nela plo nibin waꞌn gaꞌ!
14 No zeꞌ nguzubi rë xaꞌ nikal lo,
no rë xaꞌ koꞌj lo Jesús,
no miliyak Me bixaꞌ,
15 orzeꞌ niyiꞌ rë ngulëiꞌ xaꞌ nileꞌ mandad lo más ngulëiꞌ;
kun rë xaꞌ niluꞌ ley cheꞌn Muisés or une bixaꞌ rë kwaꞌn nazhon kwaꞌn kileꞌ Jesús,
no nu haxta rë mëꞌd kibizhyë,
lo luwe cheꞌn yadoꞌ,
midiꞌzh bimëꞌd:
“¡Par dubtaꞌ yo Xgaꞌn Dabi!”,
16 orzeꞌ nzhab rë xaꞌ zeꞌ lo Jesús:
―Biwiꞌ,
¿chi gat kiyontal kwan kidiꞌzh rë mëꞌd baꞌ?
―Lëꞌi kiyon ka —mikab Jesús— ¿Chi nagat goꞌl go kwaꞌn nzobniꞌ lo Yech cheꞌn Dios?,
widiꞌzh kwaꞌn nzhab:
Widiꞌzh cheꞌn rë mbwin,
No kun widiꞌzh cheꞌn mëdoꞌ kwaꞌn nzho chich,
Mileꞌl,
nu bixaꞌ midiꞌzh,
nazhon Dios.
17 Orzeꞌ milaꞌ Jesús rë men zeꞌ,
nguroꞌ Me zeꞌ,
ña Me yezh Betania plo miteꞌd Me yëꞌl kun rë men cheꞌn Me.
Mibizh ya nzhaoꞌ
18 No xtu riyëꞌl,
dub seꞌ ñëꞌd Me di yezh Jerusalén,
lëꞌchi mbiꞌd tu yalnilaꞌn Me.
19 No roꞌ nez une Me tu ya nzhaoꞌ,
no ngwatswiꞌ Me,
nabei chi nikë xlë loi per pura la nzhiꞌbe,
orzeꞌ nzhab Jesús:
―Ya nayotraꞌ yiꞌd men gao men xlë lo ya reꞌ.
No mis orzeꞌ,
tuli mibizh ya nzhaoꞌ zeꞌ.
20 Or une rë men cheꞌn Jesús kureꞌ,
miaꞌn xe bixaꞌ tuli,
no nzhab bixaꞌ:
―¡Tatu mibizh ya nzhaoꞌ reꞌ tuli!
21 Orzeꞌ nzhab Jesús:
―Walika kwaꞌn nin lo go,
chi lëꞌ go ñila widiꞌzh cheꞌn Dios,
no naleꞌt go chop xigab,
orzeꞌ lëꞌ nu go leꞌ kwaꞌn milen kun ya nzhaoꞌ baꞌ,
no haxta gab go lo yiꞌ baꞌ:
“Chi baꞌ,
bizë haxta leꞌn nits”,
no lëꞌi gak.
22 Kuzeꞌ nin,
rë kwaꞌn naꞌb go lo Dios,
wayila goi namás,
lëꞌ Dios neꞌi.
Minabdiꞌzh bixaꞌ, cho mixëꞌl Jesús
23 Or milox midiꞌzh Jesús widiꞌzh reꞌ,
nguio Me lo luwe cheꞌn yadoꞌ,
no dub kiluꞌ Me widiꞌzh cheꞌn Dios zeꞌ,
nguzubi rë xaꞌ nileꞌ mandad lo rë ngulëiꞌ,
kun rë xaꞌ nzo lo rë men Israel,
plo nzo Me,
no nzhab bixaꞌ:
―¿Cho mileꞌ mandadal kileꞌl rë kureꞌ;
no cho mixëꞌlal par leꞌle?
24-25 Orzeꞌ mikab Jesús:
―Nu da,
naꞌbdiꞌzh ska tu kwaꞌn lo go.
Bineo,
¿cho mixëꞌl Juan xaꞌ miliꞌlëiꞌ men leꞌn nits?
¿Chi Dios mixëꞌl xaꞌ,
o mene?
No chi lëꞌ go ne choi,
orzeꞌ ganin,
cho mileꞌ mandad da,
kilen rë kureꞌ.
Orzeꞌ kidiꞌzh bixaꞌ lo wech bixaꞌ:
―¿Chi gab be?:
“Diose”,
orzeꞌ lëꞌ xaꞌ ne lo be:
“¿Chon ska nangayila go Juan?”;
26 no chi gab be:
“Men mixëꞌl xaꞌ”,
nazheꞌb be par be,
porke rë men zak,
Juan tu xaꞌ midiꞌzh por Dios.
27 Orzeꞌ mikab bixaꞌ lo Jesús:
―Nanet no cho mixëꞌl xaꞌ.
Orzeꞌ nzhab Jesús:
―Nuska da,
nanita cho mixëꞌl da kilen rë kureꞌ.
Kwent cheꞌn tu xaꞌ kinu chop xgaꞌn
28 Orzeꞌ nzhab Jesús:
―¿Xmod nileꞌ go xigab por kureꞌ?
Tu miyiꞌ kinu chop xgaꞌn,
nzhab xaꞌ lo xgaꞌn galo xaꞌ:
“Xgaꞌn,
wa zhiꞌn lo yuo plo nzhiꞌb ya gub cheꞌn be.”
29 Mikab xgaꞌn xaꞌ:
“¡Nayata!”;
per guzhëla zeꞌ xtu xigab mileꞌ miyiꞌ,
ngwa miyiꞌ.
30 No seꞌ ska nzhab xuz bixaꞌ lo xtu xgaꞌn xaꞌ,
per miyiꞌ reꞌ nzhab:
“Lëꞌo,
lëꞌda ya ka”,
no nangat miyiꞌ.
31 No di lo rop miyiꞌ reꞌ,
¿cho miyiꞌ mbin roꞌ xuz?
Mikab bixaꞌ:
―Miyiꞌ mileꞌ xaꞌ mandad galo lakai.
Orzeꞌ nzhab Jesús:
―Walika kwaꞌn nin lo go,
rë xaꞌ nikan dimi cheꞌn Roma,
kun rë unaꞌ leꞌn kai (kwaꞌ gal),
galo laka bixaꞌ yo lo go plo nileꞌ Dios mandad,
32 porke Juan xaꞌ miliꞌlëiꞌ men leꞌn nits,
mbiꞌdluꞌ lo go xmod ban go nali lo Dios,
no nangont go roꞌ xaꞌ;
per rë xaꞌ nikan dimi cheꞌn rey kun rë unaꞌ leꞌn kai (kwaꞌ gal),
ngwayila bixaꞌ xtiꞌzh Juan.
Per go,
ter une go kureꞌ,
per nangalaꞌt go rë kwaꞌn gat lëꞌ kwaꞌn nak go orzeꞌ ngayila go xaꞌ.
Kwent cheꞌn pla mos nakap
33 ’Gon go xtu kwent reꞌ:
Nguio tu miyiꞌ,
mixëꞌn ya gub lo yuo cheꞌn;
mitsaoꞌ xaꞌ nakaꞌn roꞌi,
no mizuxkwaꞌ xaꞌ tu plo tsiꞌ xaꞌ gub cheꞌn xaꞌ,
nu mizuxkwaꞌ xaꞌ tu plo ya par kina xaꞌi.
Saꞌ milaꞌ xaꞌi par gaꞌn xtu mene,
orzeꞌ nguroꞌ xaꞌ xche,
nzha xaꞌ xtu lazh men.
34 Or ngol tiemp mizaꞌi,
mixëꞌl xaꞌ nak cheꞌne pla mos par naꞌb xaꞌ lo xaꞌ ngoꞌne zeꞌ kwaꞌn ñal xaꞌ.
35 Per rë xaꞌ ngoꞌn yuo cheꞌn xaꞌ,
nguzen bixaꞌ rë mos zeꞌ;
tu mos michël bixaꞌi tich,
xtu mos mbit bixaꞌ,
no xtu mos mbit bixaꞌ kun ke.
36 Orzeꞌ mixëꞌl xaꞌ nak cheꞌn yuo zeꞌ,
más nayax mos ke lëꞌla or galo,
per saꞌ ska milinu bixaꞌ rë mos zeꞌ.
37 Lult,
mixëꞌl xaꞌ tugaka xgaꞌn xaꞌ kwaꞌn kinu xaꞌ,
mileꞌ xaꞌ xigab:
“Roꞌ xgaꞌnase gon rë xaꞌ baꞌ.”
38 Per or une rë xaꞌ ngoꞌn yuo zeꞌ,
xgaꞌn xaꞌ nak cheꞌne,
nzhab bixaꞌ lo wech bixaꞌ:
“Xaꞌ reꞌ yaꞌnu rë kureꞌ;
chaꞌo gut be xaꞌ nes yaꞌnu be rë cheꞌn xaꞌ.”
39 Orzeꞌ nguzen bixaꞌ miyiꞌ reꞌ,
nguloꞌ bixaꞌ miyiꞌ leꞌn ya gub,
orzeꞌ mbit bixaꞌ miyiꞌ.
40 No nal,
or yëꞌd xaꞌ nak cheꞌn ya gub zeꞌ,
¿kwan liꞌnu xaꞌ rë xaꞌ ngoꞌn yuo cheꞌn xaꞌ?
41 Orzeꞌ nzhab bixaꞌ:
―Lëꞌ xaꞌ yëꞌd dub xian xaꞌ par loꞌx xaꞌ rë men nakap kwaꞌn ngoꞌn yuo cheꞌn xaꞌ,
mbaino lëꞌ xaꞌ zaꞌ yuo gaꞌn xtu ben men;
rë xaꞌ reꞌse zaꞌ kwaꞌn ñal gal xaꞌ,
kad or zaꞌ ya gub cheꞌn xaꞌ.
42 Orzeꞌ nzhab Jesús lo bixaꞌ:
—¿Chi nagat goꞌl go kureꞌ kwaꞌn nzobniꞌ lo Yech cheꞌn Dios?:
Lëꞌ ke kwaꞌn ngulubi rë xaꞌ nichaoꞌ yoꞌ,
lëꞌi ngok ke kwaꞌn nzen dub yoꞌ;
kureꞌ mileꞌ Dios par rë men wiꞌ xe.
43 Kuzeꞌ nin lo go,
por gat nzhont go roꞌ xaꞌ mixëꞌl Dios lou,
nazotraꞌ go kina go rë men cheꞌn Dios;
xaꞌla men zo,
rë xaꞌ nzhon roꞌ Dios.
44 Mbaino ke kwaꞌn ngulubi go reꞌ,
rë xaꞌ yachin loi,
lëꞌ xaꞌ xix;
per chi lëꞌi gab yek tu men,
de laka leꞌi xaꞌ.
45 Or mbin rë men,
xaꞌ nileꞌ mandad lo ngulëiꞌ,
kun men fariseo,
widiꞌzh reꞌ;
ngwanu laxtoꞌ bixaꞌ,
par yek bixaꞌ nzha kwaꞌn midiꞌzh Jesús.
46 Mis orzeꞌ ngokla bixaꞌ ngazen bixaꞌ Jesús,
per nangaleꞌt bixaꞌi por men mizheb bixaꞌ,
porke rë men nzhin zeꞌ zak,
lëꞌ Jesús nak tu profet,
xaꞌ nidiꞌzh por Dios.