Jesús mileꞌ ngubixlo nits, ngoke vin
2
Chon ngubizh nzha di ngok kureꞌ,
nguio tu jwandang yezh Caná kwaꞌn ñaꞌn lazh men Galilea.
No zeꞌ nzo xnaꞌ Jesús,
2 mbaino nu lo Jesús no lo rë men cheꞌn Me ngwane bixaꞌ par ngwa jwandang zeꞌ.
3 No or milox vin kwaꞌn kiyo rë men lo jwandang zeꞌ,
orzeꞌ nzhab xnaꞌ Jesús lo Me:
―Milox kwaꞌn kiyo rë men reꞌ.
4 Orzeꞌ nzhab Jesús:
―Lëꞌ go unaꞌ,
¿chon kine go kubaꞌ lon?
Gat gal or da.
El milagro en Caná (Juan 2.1-12)
5 Orzeꞌ nzhab xnaꞌ Jesús lo rë xaꞌ nizhin yeꞌn lo rë men:
―Bileꞌ go rë kwaꞌn ne Jesús lo go.
6 Zeꞌ nzhin xoꞌp re ke kwaꞌn nzho nits kwaꞌn nizen rë men Israel par nzhak nambe bixaꞌ lo Dios.
No kad tu rë re reꞌ nzhuweiꞌye pas tu gayoꞌ litr nits.
7 Orzeꞌ nzhab Jesús lo rë xaꞌ nizhin yeꞌn lo men:
―Bichizhë go rë re baꞌ di nits.
―Nal walaꞌ go cheꞌpe lo xaꞌ kwaꞌn nzo kileꞌ mandad lo jwandang baꞌ,
par leꞌ xaꞌ prebe.
Orzeꞌ ngwalaꞌ bixaꞌi.
9 Orzeꞌ mileꞌ xaꞌ nileꞌ mandad lo jwandang reꞌ preb cheꞌp nits kwaꞌn ngubixlo ngok vin reꞌ,
per nanet xaꞌ reꞌ plo nguroꞌ vin reꞌ,
nab tsa rë xaꞌ nizhin yeꞌn lo men nane kureꞌ.
Orzeꞌ ngurezh xaꞌ nileꞌ mandad lo jwandang reꞌ miyiꞌ xaꞌ nzhak jwandang cheꞌn reꞌ,
10 par nzhab xaꞌ:
―Rë men galo laka vin wen nzho bixaꞌ,
no or nilox nizaꞌ bixaꞌi go men,
orzeꞌ nigoꞌ bixaꞌ vin korrient;
per lu se,
lult laka nguloꞌl vin kwaꞌn más wen.
11 Kureꞌ galo laka yalnazhon kwaꞌn mileꞌ Jesús yezh Caná kwaꞌn ñaꞌn lazh men Galilea,
par miluꞌ Me xmod nak yalnazhon cheꞌn Me;
kuzeꞌ haxta nu rë men cheꞌn Jesús ngwayila bixaꞌ Me más.
12 Dispwés di kureꞌ,
orzeꞌ nzha Jesús kun xnaꞌ Me,
kun rë wech Me mbaino kun rë men cheꞌn Me,
par yezh Capernaúm;
zeꞌ miaꞌn bixaꞌ pla raꞌ ngubizh.
Jesús nguloꞌtin rë xaꞌ nileꞌ xbiꞌ lo luwe cheꞌn yadoꞌ
13 No lëꞌ lani Pask cheꞌn men Israel nzhazhin la,
par tsila bixaꞌ yëꞌl kwaꞌn mileꞌ Dios ngut dox nayax men egipto;
lani zeꞌ nzha Jesús par yezh Jerusalén.
Jesús en el patio del templo (Juan 2.13-25)
14 No or mizhin Me leꞌn yadoꞌ ro zeꞌ,
une Me,
zeꞌ nzhin rë xaꞌ nileꞌ xbiꞌ lo luwe cheꞌn yadoꞌ,
nito bixaꞌ ma:
ngoꞌna,
mbëkxiꞌla,
mbaino paloma;
no rë xaꞌ nichiꞌl dimi cheꞌn rë men zit.
15 Or une Jesús kureꞌ,
orzeꞌ mizuxkwaꞌ Me tu bins kun doꞌ par nguloꞌtin Me rë men reꞌ al tich kun rë ma cheꞌn bixaꞌ;
no zhagaꞌ micheꞌch Me dimi cheꞌn rë xaꞌ nichiꞌl dimi reꞌ,
no haxta rë mes cheꞌn bixaꞌ michixche Me.
16 No lo rë xaꞌ nito palom zeꞌ nzhab Me:
―¡Guloꞌtin go rë kureꞌ!
¡Naleꞌt go lizh Xuza nela plo nzhak xbiꞌ gaꞌ!
17 Orzeꞌ mitsila rë men cheꞌn Me rë widiꞌzh kwaꞌn nzobniꞌ lo Yech cheꞌn Dios kwaꞌn nzhab seꞌ:
“Niyiꞌxian da por kwaꞌn kileꞌ men kun lizhal;
lëꞌda gat por lëꞌi.”
18 Orzeꞌ pla men Israel xaꞌ nak zhiꞌn,
minaꞌbdiꞌzh lo Jesús,
nzhab bixaꞌ:
―¿Kwan tu kwaꞌn nazhon leꞌl lo no par ne no,
walika kinul kwaꞌn par leꞌl mandad,
par leꞌl rë kureꞌ?
19 Orzeꞌ nzhab Jesús:
―Bichil go yadoꞌ reꞌ,
no zixchon ngubizh lëꞌda zuxkwaꞌ skai xtu wëlt.
20 Orzeꞌ nzhab rë men Israel zeꞌ:
―Por choꞌ bixoꞌp liꞌn nguiuxkwaꞌ yadoꞌ reꞌ,
mbaino lu ne,
¡chon tsa ngubizh kuxkwaꞌle xtu wëlt!
21 Per yadoꞌ kwaꞌn midiꞌzh Jesús lo rë men Israel zeꞌ nak yub kwerp cheꞌn Me.
22 Kuzeꞌ,
or nguruban Jesús,
mitsila rë men cheꞌn Me widiꞌzh reꞌ,
no ngwayila bixaꞌ kwaꞌn nzobniꞌ lo Yech cheꞌn Dios no rë kwaꞌn midiꞌzh Jesús.
Jesús nane xmod nak rë men
23 No or nzo Jesús yezh Jerusalén dub kiyak lani Pask cheꞌn rë men Israel,
nayax men ngwayila widiꞌzh cheꞌn Me porke une bixaꞌ rë señ nazhon kwaꞌn mileꞌ Jesús zeꞌ.
24 Per nangayilat Jesús rë men zeꞌ,
porke nane Me xmod nak rë men.
25 Gat nakiꞌnt Me cho gab xmod nak tu men lo Me,
porke lëꞌ Jesús ya nane la cho xigab nileꞌ rë men.