Rë kwaꞌn mileꞌ rë apost cheꞌn Jesukrist
Nzhab Jesukrist lo rë men cheꞌn Me, lëꞌ Sprit cheꞌn Dios yo laxtoꞌ bixaꞌ
1
Tioj,
xaꞌ nichëla,
lo primer yech kwaꞌn mixëla lol,
mizobniꞌn rë kwaꞌn mileꞌ Jesús,
no rë kwaꞌn miluꞌ Me,
dizde or galo laka,
2 haxta zhë kwaꞌn ña Jesús lo yibëꞌ.
No antis di bi Me,
por Sprit cheꞌn Dios miluꞌ Jesús lo rë apost,
rë kwaꞌn nakiꞌn leꞌ bixaꞌ,
rë xaꞌ kwaꞌn ngule Me.
3 No dispwés di ngut Jesús,
miluꞌ Me lëꞌ Me nguruban.
No dub choꞌ ngubizh,
nayax wëlt ngurulo Jesús lo rë men cheꞌn Me,
par ne bixaꞌ,
walika,
nguruban Me.
No nu miluꞌ Me xmod nileꞌ Dios mandad lo rë men.
4 No or stubi nzo Jesús kun rë apost,
mileꞌ Me mandad,
naroꞌt bixaꞌ yezh Jerusalén,
nzhab Me:
―Gulëz go,
zhin rë kwaꞌn milaꞌ Xuza diꞌzh par go,
no kureꞌ yanila lo go.
5 Walika,
lëꞌ Juan mililëiꞌ men kun nits,
per go,
zipla ngubizh lëꞌ go gaklëiꞌ kun Sprit cheꞌn Dios.
Jesús ña lo yibëꞌ
6 Orzeꞌ,
rë xaꞌ nzhin kun Jesús,
gunaꞌbdiꞌzh bixaꞌ lo Me,
nzhab bixaꞌ:
―Señor,
¿chi mizhin la gaknul no,
rë no men Israel,
nes par yubre mis tu rë no reꞌ leꞌ mandad lazh no?
7 Orzeꞌ nzhab Jesús:
―Gat ñalt ne go zhë o tiemp kwaꞌn nab tsa Xuza nane,
porke lëꞌ Me nileꞌ mandad.
8 Per or yo Sprit cheꞌn Dios laxtoꞌ go,
orzeꞌ gaknu Me go par yaluꞌ go xtizha rë plo.
Galo laka,
zublou yezh Jerusalén,
no rë yezh kwaꞌn ñaꞌn lazh men Judea,
mbaino dub lazh men Samaria,
orzeꞌ dub yizhyuo.
9 No or milox midiꞌzh Jesús rë widiꞌzh reꞌ,
nkili Me yibëꞌ;
no dub niwiꞌ lo rë xaꞌ nzhin zeꞌ,
mitlo Me leꞌn tu xkao,
no nanganetraꞌ bixaꞌ Jesús.
10 No dub kiwiꞌ bixaꞌ lo yibëꞌ xmod ña Jesús,
lëꞌchi nguruxoꞌb chop ganj nak lar bëo laka,
plo nzhin bixaꞌ,
11 orzeꞌ nzhab rop ganj zeꞌ:
―Men Galilea,
¿chon xe kiwiꞌ go lo yibëꞌ?
Lëꞌ Jesús Me nguzo xid go baꞌ,
no Me kwaꞌn une go ña lo yibëꞌ nal,
nela xmod une go ña Jesús nal reꞌ,
seꞌska yubre Me xtu wëlt.
Nguio Matías xlugar Judas
12 Orzeꞌ miëk bixaꞌ par Jerusalén dizde yek lom kwaꞌn lë Olivos,
no lom zeꞌ ñaꞌn gax roꞌ yezh Jerusalén,
nela tu tant kwaꞌn nilaꞌ ley cheꞌn Muisés,
zë men zhë kwaꞌn nileꞌ men Israel diskans.
13 Or mizhin bixaꞌ yezh Jerusalén,
ña bixaꞌ kwart al ya yek yoꞌ chop pis.
Zeꞌ nzo Per,
no Jakob,
no Juan,
mbaino Ndres,
no Lip,
no Max,
no Tol,
mbaino Mateo,
no Jakob xgaꞌn Alfeo,
kun Simón xaꞌ nguio xlad men cananist,
no Judas wech Jakob.
14 Rë xaꞌ reꞌ,
dubtaꞌ nibin bixaꞌ par ninaꞌb bixaꞌ lo Dios,
kun rë unaꞌ,
mbaino kun rë wech Jesús,
no kun Mari xnaꞌ Jesús.
15 No leꞌn rë ngubizh zeꞌ,
nguzo Per garol tsaoꞌ plo nzhin bixaꞌ,
como tu gayoꞌ nzho gal men cheꞌn Jesús,
orzeꞌ nzhab Per lo bixaꞌ:
16 ―Nin lo go wech no bizan,
men Israel;
rë kwaꞌn ngok reꞌ,
midiꞌzh la Dabi por Sprit cheꞌn Dios,
or midiꞌzh Dabi kwent cheꞌn Judas,
xaꞌ mileꞌ entreg Jesús lo rë xaꞌ nguzen Me.
17 No Judas,
mis tu rë xpen be ngok xaꞌ,
mbaino mileꞌ xaꞌ tutsa zhiꞌn kun be,
18 per nguzen xaꞌ dimi kwaꞌn ngox kaꞌ xaꞌ por mal kwaꞌn mileꞌ xaꞌ,
no kun dimi reꞌ nguziꞌ xaꞌ tlëꞌ yuo,
orzeꞌ ngula xaꞌ al yek xaꞌ,
no ngurez laxtoꞌ xaꞌ,
nguroꞌ rë xtrip xaꞌ.
19 No or mbin rë men yezh Jerusalén,
seꞌ ngok,
kuzeꞌ nguloꞌlë bixaꞌ yo zeꞌ Acéldama,
widiꞌzh reꞌ gab,
yo ren,
20 porke seꞌ nzobniꞌ lo yech kwaꞌn lë Salmos:
Yaꞌn nzëꞌb lizh xaꞌ;
yent cho yo leꞌne,
mbaino:
Xtu xaꞌ yo xlugar xaꞌ.
21 ’No nal,
nakiꞌn kwe be lo mis tu rë xaꞌ kwaꞌn nkizë kun be,
rë ngubizh kwaꞌn nguzinu Señor Jesús be,
par yo xlugar Judas.
22 No nakiꞌn nkizë xaꞌ reꞌ kun be dizde zhë kwaꞌn mililëiꞌ Juan men leꞌn nits,
haxta or ña Jesús lo yibëꞌ;
par gaknu xaꞌ reꞌ be,
diꞌzh be lo rë men,
lëꞌ Jesús nguruban.
23 Orzeꞌ ngule bixaꞌ chop miyiꞌ,
tu xaꞌ kinu chop lë;
tu lë xaꞌ lë Che Barsabás,
xtube lë Justo.
No xtu miyiꞌ lë Matías.
24 Orzeꞌ,
seꞌ minaꞌb bixaꞌ lo Dios:
―O Señor,
Lu kwaꞌn nzhakbeꞌ laxtoꞌ rë nak men;
biluꞌ cho miyiꞌ kwaꞌn kwel,
lo rop xaꞌ reꞌ,
25 par zen xaꞌ zhiꞌn reꞌ,
gak xaꞌ apost,
leꞌ xaꞌ rë zhiꞌn kwaꞌn milaꞌ Judas,
par ña Judas lugar plo ñal xaꞌ.
26 Orzeꞌ nguzhit bixaꞌ dado,
par ne bixaꞌ cho yaꞌn xlugar Judas.
No lëꞌ Matías ngol swert,
nguio xid za chiꞌ bitub apost cheꞌn Jesukrist.