Jesús ngurulo lo za gazh men cheꞌn Me
21
Nzha pla raꞌ ngubizh di ngok rë kureꞌ,
ngurulo Jesús xtu wëlt lo rë men cheꞌn Me,
plo nikë lagún kwaꞌn ñaꞌn lazh men Tiberias.
Seꞌ ngurulo Me.
Jesús en el mar de Galilea (Juan 21.1-25)
2 Rë nak rë xaꞌ reꞌ nzhin:
Simón Per,
no Max xaꞌ nzhab men lë Kwach,
kun Natanael xaꞌ nzë yezh Caná kwaꞌn ñaꞌn lazh men Galilea,
no nu rop xgaꞌn Zebedeo kun xchop rë men cheꞌn Jesús.
3 Nzhab Simón Per lo bixaꞌ:
―Lëꞌda nzhatsen mbël.
Unkab rë xaꞌ zeꞌ:
―Nu no ya kun lu.
Orzeꞌ nzha bixaꞌ leꞌn tu bark,
per yëꞌl zeꞌ,
ni tu mbël nangazent bixaꞌ.
4 No ya nzënilyuo la,
lëꞌchi roꞌ lagun zeꞌ ngurulo Jesús,
per nangalibeꞌt rë men cheꞌn Me chi lëꞌ Mei.
5 Minaꞌbdiꞌzh Jesús lo bixaꞌ,
nzhab Me:
―Lëꞌ go xgaꞌn,
¿chi nagat zen go ni tu mbël?
Unkab bixaꞌ:
―Ni tu ma.
6 Orzeꞌ nzhab Jesús:
―Gulubiu yex lad direch taꞌ bark,
lëꞌ go zen ma.
Saꞌ mileꞌ bixaꞌ,
no haxta ni naxekt bixaꞌ ngagoꞌ bixaꞌ yex mbël zeꞌ leꞌn nits por dox zhëi di mbël.
7 Orzeꞌ tu men cheꞌn Jesús xaꞌ más nichëꞌl Jesús,
nzhab xaꞌ lo Per:
―¡Lëꞌla Señor cheꞌn be xaꞌ baꞌ!
No or mbin Simón Per,
lëꞌi Jesús,
tuli ngok xaꞌ xab xaꞌ kwaꞌn nguloꞌ xaꞌ par unkë xaꞌ zhiꞌn,
tuli ngula xaꞌ leꞌn nits,
nzha xaꞌ lo Jesús.
8 No zipla rë men cheꞌn Me,
ñëꞌd bixaꞌ leꞌn bark,
kizubxax bixaꞌ yex kwaꞌn zhë di mbël,
no plo ñëꞌd bixaꞌ par roꞌ yuo bizh,
nzhoi pas tu gayoꞌ metr.
9 No or ngula bixaꞌ bark zeꞌ,
une bixaꞌ,
nzhin la ki zeꞌ,
no kiyay mbël loi no pan.
10 Orzeꞌ nzhab Jesús lo bixaꞌ:
―Dinou pla mbël kwaꞌn laore nguzen go baꞌ.
11 Kuzeꞌ nkë Simón Per leꞌn bark par mizubxax xaꞌ yex kwaꞌn nzho mbël zeꞌ haxta roꞌ nits,
mbaino zhëi di mbël ro;
nzho paste tu gayoꞌ nzho choꞌ bichiꞌ bichon ma leꞌne;
no ter dox nayax mbël per nangarëzt yex zeꞌ.
12 Orzeꞌ nzhab Jesús lo bixaꞌ:
―Dëꞌu gaosiꞌl go.
No ni tu rë men cheꞌn Me,
nangayetla,
ngab:
“¿Cho go gaꞌ?”
Lëꞌ bixaꞌ nane la,
lëꞌi lëꞌ Me.
13 No tuli nguzubi Jesús lo bixaꞌ,
mizaꞌ Me pan par gao rë men cheꞌn Me;
no seꞌ gaꞌ mizaꞌ Me mbël par gao rë men cheꞌn Me.
14 Kureꞌ nak wëlt mion ngurulo Jesús lo rë men cheꞌn Me dizde or nguruban Me.
Midiꞌzh Jesús kun Simón Per
15 No or milox ndaosiꞌl bixaꞌ,
orzeꞌ minaꞌbdiꞌzh Jesús lo Simón Per,
nzhab Me:
―Simón,
xgaꞌn Jonás,
¿chi más ka nazhiꞌl da lo rë men reꞌ?
Orzeꞌ nzhab Per:
―Señor;
Go nane ka,
nichëla kun Go.
Nzhab Jesús orzeꞌ:
―Bikina rë men da,
xaꞌ nak nela mbëkxiꞌl yeꞌn gaꞌ.
16 Wëlt rop minaꞌbdiꞌzh Jesús,
nzhab Me:
―Simón,
xgaꞌn Jonás,
¿chi walipaꞌ nazhiꞌl da?
Orzeꞌ nzhab Per:
―Señor;
go nane ka,
lëꞌda nichël ka kun Go.
Orzeꞌ nzhab Jesús:
―Bikina rë men da,
xaꞌ nak nela mbëkxiꞌl gaꞌ.
17 No wëlt mion,
minaꞌbdiꞌzh Jesús lo Per,
nzhab Me:
―Simón,
xgaꞌn Jonás,
¿chi walikal nichëꞌlal kuna?
Orzeꞌ miwin laxtoꞌ Per por nzhab Jesús kureꞌ,
orzeꞌ nzhab Per:
―Lëꞌi walika Señor;
rëi nane Go,
lëꞌ Go nane ka lëꞌda nichël ka kun Go.
Orzeꞌ nzhab Jesús:
―Bikina rë men da xaꞌ nak nela mbëkxiꞌl gaꞌ.
18 Walika kwaꞌn nin lol,
or xil,
nzhak xabal par yal plo nzhaklal;
per or gakal mengol,
chiꞌlal yaꞌl no xtu men gak xabal,
weiꞌ xaꞌ lu plo gat nzhaklatal yal.
19 Kureꞌ midiꞌzh Jesús lo Per,
par midiꞌzh Me xmod gat Per,
mbaino por kubaꞌ diꞌzh men,
lëꞌ Dios nazhon.
Orzeꞌ nzhab Me lo Per:
―Diꞌkë ticha.
Kwent cheꞌn tu men cheꞌn Jesús, xaꞌ más nichëꞌl Me
20 No or miëk Per,
une Per nzhakë men cheꞌn Jesús xaꞌ más nichëꞌl Me tich bixaꞌ.
Xaꞌ reꞌ nguzobkë taꞌ Jesús or lult ndao xcheꞌ Me kun rë men cheꞌn Me,
no xaꞌ reꞌ xaꞌ kwaꞌn nzhab lo Jesús:
“Señor,
¿cho chi go lo rë men?”
21 No or une Per xaꞌ reꞌ,
orzeꞌ nzhab Per lo Jesús:
―Lëꞌo,
¿xmod yazë xaꞌ reꞌ gaꞌ?
22 Orzeꞌ nzhab Jesús lo Per:
―Chi nzhaklan seꞌgaka ban xaꞌ reꞌ haxta or yala xtu wëlt,
¿kwane par lu gaꞌ?
Lu diꞌkë ticha namás.
23 No widiꞌzh reꞌ mireꞌch xid rë men cheꞌn Jesukrist,
mileꞌ bixaꞌ xigab,
lëꞌ men cheꞌn Jesús reꞌ,
nayot gat xaꞌ,
per lëꞌ Jesús gat nzhabt,
nayot gat xaꞌ,
sino ke nzhab Me:
“Chi nzhaklan ban xaꞌ reꞌ haxta or yala xtu wëlt,
¿kwane par lu gaꞌ?”
24 No mis men cheꞌn Jesús reꞌ,
midiꞌzh rë kureꞌ,
no mis lëꞌ xaꞌ mizobniꞌy lo yech;
no nane be,
walika rë kwaꞌn mizobniꞌ xaꞌ.
25 No mileꞌ Jesús nayaxraꞌ rë kwaꞌn nazhon kwaꞌn gat nzobniꞌt lo yech reꞌ,
no chi ngazobniꞌ rëi,
nagalt dub yizhyuo par kwin rë libr plo ngazobniꞌ rë kureꞌ.