Yech kwaꞌn mixëꞌl Pab lo rë men cheꞌn Jesukrist, xaꞌ nzho yezh Roma
Ma go wech no bizan, ¿chi wen ka go?
1
Na Pab,
nak da tu mos nado lo Jesukrist.
Dios ngurezh da,
no ngule Me da par gak da tu apost,
tu xaꞌ mixëꞌl Dios,
par lun widiꞌzh nazhon cheꞌn Me lo rë men.
2 No nzhala,
milaꞌ Dios widiꞌzh reꞌ lo rë xaꞌ midiꞌzh por lëꞌ Me,
no rë xaꞌ zeꞌ midiꞌzh widiꞌzh reꞌ lo be,
nela xmod mizobniꞌ bixaꞌi lo yech kwaꞌn mikëꞌ bixaꞌ.
3 No rë widiꞌzh reꞌ nidiꞌzhe Xgaꞌn Dios,
Me nzë ben cheꞌn Dabi,
tu men yizhyuo,
4 per por Sprit cheꞌn Dios,
nak Jesukrist Xgaꞌn Dios,
no por yalnazhon cheꞌn Dios,
nguruban Jesukrist,
Me nileꞌ mandad be.
5 Por Jesukrist,
mileꞌ Dios dox wen kuda or ngule Me da par lun widiꞌzh cheꞌn Me,
par rë men yizhyuo yila Me no gon bixaꞌ roꞌ Me.
6 No xid rë men reꞌ,
ngurezh Dios go,
nes par nu go gak men cheꞌn Me.
7 Kixëla yech reꞌ lo rë go,
go xaꞌ nzho yezh Roma.
Dios nazhiꞌ go,
no ngurezh Dios go par gak go nab tsa par Dios.
Lëꞌ Xuz be Dios,
kun Jesukrist,
Me nileꞌ mandad be,
gaknu go par zi go wen dizde leꞌn laxtoꞌ go.
Nileꞌ Pab xigab, yatswiꞌ xaꞌ ma rë men Roma
8 Galo laka por Jesukrist,
nizan xkix lo Dios por kad go,
porke rë plo nzhon men lëꞌ go ñila Jesukrist,
no dox wen nidiꞌzh men go.
9 Dios nane ka,
zilitaꞌ ninaꞌba lo Me por go,
Dios Me nzhona roꞌ kun dub laxtoꞌn,
no nilun widiꞌzh nazhon cheꞌn Me kwaꞌn nidiꞌzh por Jesukrist.
10 Zilitaꞌ kinaꞌba lo Dios par yiꞌdtswiꞌn ma go,
nabei chi lëꞌi nzhakla Dios,
11 porke dox nzhaklan yiꞌdtswiꞌn ma go,
par gaknun go,
más roꞌb go lo rë cheꞌn Dios,
nes par zo go más wen kun Dios;
12 seꞌ leꞌ be par gaknu be rë guchin be,
por xmod ñila kad be tutsa widiꞌzh nazhon cheꞌn Dios por Jesukrist.
13 Rë go wech no bizan,
nzhaklan gon go,
dox pazhë raꞌ nzhaklan yiꞌdtswiꞌn ma go,
per nagakte,
porke nzho kwaꞌn nalaꞌt lene.
Kuzeꞌ nzhaklan yala,
nes par nu rë xaꞌ kwaꞌn nagat yila widiꞌzh cheꞌn Dios,
yila bixaꞌi,
nela xmod milen xtu plo xid rë xaꞌ gat lëꞌt men Israel.
14 Dios mixëꞌl da yalun widiꞌzh cheꞌn Me lo rë men,
ter lo xaꞌ dox nzhake,
o lo xaꞌ nazuꞌt;
o lo xaꞌ natsin,
o lo xaꞌ naxenla.
15 Kuzeꞌ,
nu lo rë go,
xaꞌ nzho yezh Roma;
dox nzhaklan lun widiꞌzh reꞌ lo go.
Widiꞌzh nazhon cheꞌn Dios nileꞌ, niroꞌ men lo kwaꞌn gat lëꞌt
16 Gat nitulataꞌ dizha widiꞌzh nazhon cheꞌn Dios por Jesukrist,
porke chi lëꞌ rë men yilai,
lëꞌi nak yalnazhon kwaꞌn kinu Dios,
par roꞌ rë men lo rë kwaꞌn nzëꞌb xki bixaꞌ,
wanei choi,
men Israele o men gat lëꞌt men Israele.
17 Lëꞌ widiꞌzh cheꞌn Dios por Jesukrist,
seꞌ nzhabe,
namás yila be Dios par mbe be lo Dios,
nela xmod nzobniꞌ ka lo Yech cheꞌn Dios:
“Chi yila tu men widiꞌzh cheꞌn Dios,
namás por kureꞌ lëꞌ xaꞌ ban.”
Rë men nzëꞌb xki lo Dios
18 Dios xëꞌl kwaꞌn zakzi rë men dizde lo yibëꞌ,
rë xaꞌ kwaꞌn gat ñilat nzho Dios,
mbaino par rë xaꞌ kwaꞌn naban nela xmod nizaꞌ la bixaꞌ.
No por naban bixaꞌ lo kwaꞌn gat lëꞌ,
nitseꞌd bixaꞌ más rë men,
nes par naleꞌ rë men reꞌ kwaꞌn nzhakla Dios.
19 No wenawen nane xaꞌ xmod nak Dios,
no xmod nilibeꞌ men Dios,
porke lëꞌ Dios mizini la yek bixaꞌ.
20 Zak ka libeꞌ men Dios chi zen men yek men por rë kwaꞌn mizuxkwaꞌ Dios,
pues namás dizde nguiuxkwaꞌ yizhyuo,
kubaꞌ niluꞌ xmod nak Dios mbaino xmod nak yalnazhon cheꞌn Dios kwaꞌn nayot lox,
ter naga ne men Dios.
Kuzeꞌ yent cho gak gab lo Dios:
“Neta xmod nak kwan nileꞌl.”
21 No ter milibeꞌ bixaꞌ Dios,
per nangawiꞌt bixaꞌ lo Dios nela xmod ñale,
no ni nangazaꞌ bixaꞌ xkix lo Dios,
lëꞌla ngwazhë yek bixaꞌ di xigab gat lëꞌ,
no tuli nakao miaꞌn yek bixaꞌ.
22 Nidiꞌzh bixaꞌ lëꞌ bixaꞌ xaꞌ nzhak,
per lëꞌ bixaꞌ ngok xaꞌ más yent kwan nzhon.
23 Maska bixaꞌ ngab nazhon Me kwaꞌn walika Dios,
Me naban par dubtaꞌ,
lëꞌla lo rë winab nguzuxib bixaꞌ,
cheꞌn rë men nzhat,
no haxta lo rë winab cheꞌn rë miyin,
mbaino cheꞌn rë ma kwaꞌn nizë nazubxax,
ngok dios cheꞌn bixaꞌ.
24 Kuzeꞌ milaꞌ Dios,
mileꞌ bixaꞌ rë xigab gat lëꞌt kwaꞌn nzho yek bixaꞌ zeꞌ;
kuzeꞌ miban bixaꞌ kun xaꞌ gat lëꞌt tsaꞌ bixaꞌ,
mileꞌ bixaꞌ kwaꞌn gat lëꞌ kun kwerp cheꞌn bixaꞌ.
25 No maska bixaꞌ ngayila widiꞌzh cheꞌn Dios,
lëꞌla kwaꞌn gat wali ngwayila bixaꞌ;
nguzuxib bixaꞌ lo kwaꞌn michaoꞌ Dios,
no mileꞌ bixaꞌ lani cheꞌn rë kureꞌ lugardi ngazuxib bixaꞌ lo Dios Me michaoꞌ rë kureꞌ,
par ngaleꞌ bixaꞌ kwaꞌn nzhakla Dios,
Dios Me ñal diꞌzh men wen par dubtaꞌ.
26 Kuzeꞌ milaꞌ Dios leꞌ bixaꞌ rë kwaꞌn nileꞌ,
nitula men.
Haxta nguio pla unaꞌ xid bixaꞌ michëꞌ biunaꞌ xmod nak bixaꞌ,
lugar di ban bixaꞌ kun miyiꞌ,
lëꞌla kun mis tsaꞌ unaꞌ bixaꞌ ño laxtoꞌ bixaꞌ.
27 Nuska nguio pla miyiꞌ,
milaꞌ bixaꞌ unaꞌ cheꞌn bixaꞌ,
no nazheꞌb nguio laxtoꞌ bixaꞌ tsaꞌ miyiꞌ bixaꞌ.
Miyiꞌ kun miyiꞌ miban bixaꞌ,
no por miban bixaꞌ saꞌ,
Dios mixëꞌl yalyizh kwaꞌn ñal bixaꞌ.
28 No por nangayot laxtoꞌ bixaꞌ yo Dios yek bixaꞌ,
kuzeꞌ milaꞌ Dios,
nileꞌ bixaꞌ xigab gat lëꞌ,
par leꞌ bixaꞌ kwaꞌn gat ñalt.
29 Kuzeꞌ ngwazhë yek bixaꞌ di pura xigab gat lëꞌ kun xigab nakap no yalniwix,
mbaino ño laxtoꞌ bixaꞌ leꞌ bixaꞌ rë lo kwaꞌn gat lëꞌ reꞌ:
niwix bixaꞌ cheꞌn xtu men,
no nzhut bixaꞌ men,
no nidil bixaꞌ par kwin bixaꞌ part,
no nikide bixaꞌ wech bixaꞌ,
no or nzhon bixaꞌ nileꞌ men tu kwaꞌn gat lëꞌ,
más nichaoꞌ yek bixaꞌi,
no lwegaꞌ nidiꞌzh bixaꞌ kwent cheꞌn xtu men.
30 No men diꞌzhyix bixaꞌ,
no niyiꞌ bixaꞌ nine bixaꞌ Dios,
no nila roꞌ bixaꞌ,
no marian bixaꞌ,
mbaino nidiꞌzh bixaꞌ lëꞌ bixaꞌ más nzhak lo rë men;
no zilitaꞌ nileꞌ bixaꞌ xigab xmod leꞌ bixaꞌ más kwaꞌn mal,
no gat nzhont bixaꞌ roꞌ xuz bixaꞌ ni roꞌ xnaꞌ bixaꞌ.
31 Nak bixaꞌ men yent kwan nizobyek,
no gat nileꞌt bixaꞌ kwaꞌn ñaꞌn bixaꞌ diꞌzh,
no gat nizinet la bixaꞌ ni tu men mbaino gat nilast laxtoꞌ bixaꞌ men.
32 No nane bixaꞌ kwan nzobniꞌ lo ley cheꞌn Dios,
rë xaꞌ nikizë saꞌ,
ñal gat bixaꞌ;
no ter nzhon bixaꞌi,
zilitaꞌ nikizë bixaꞌ saꞌ,
no nizak laxtoꞌ bixaꞌ or nine bixaꞌ nikizë xtu men saꞌ.