Mizhin Pab tu yezh win kwaꞌn lë Malta kwaꞌn nzhin leꞌn nitsdoꞌ
28
No or miteꞌd la no rë kwaꞌn nazheꞌb reꞌ,
or mizhin no zeꞌ,
mbin no,
lëꞌ yezh win zeꞌ lë Malta.
2 Mbaino rë men nzho zeꞌ,
dox wen mileꞌ bixaꞌ kun no;
mizoꞌl bixaꞌ tu ki ro par bizh no,
porke dox nzo yiu no nayag zeꞌ.
3 Orzeꞌ ngwakaꞌ Pab tu deꞌzh ya bizh,
no or mixoꞌb xaꞌi lo bël,
por yalnazhoꞌ cheꞌne,
leꞌn zeꞌ nguroꞌ tu mbëꞌl nayiꞌ ndao ma yaꞌ Pab,
mbaino nzentip ma yaꞌ xaꞌ.
4 Or une rë men nzho yezh zeꞌi,
lëꞌ mbëꞌl nikinal yaꞌ Pab,
orzeꞌ kidiꞌzh bixaꞌ lo wech bixaꞌ:
―¡Pas segur xaꞌ nzhut men xaꞌ reꞌ!
Ter mileꞌ xaꞌ gan leꞌn nitsdoꞌ,
lëꞌ xaꞌ kix kwaꞌn mileꞌ xaꞌ,
porke lëꞌ naxnax cheꞌn be dox nazhon.
5 Per nguzhiꞌb Pab yaꞌ Pab par ngob ma lo bël,
no yent kwan ngazak xaꞌ.
6 No xe kimbëz lo rë men nzhin zeꞌ,
nabei cho or ziki xaꞌ,
o yachin xaꞌ tuli gat xaꞌ.
Xchë xe niwiꞌ rë men zeꞌ,
yent kwan kizak xaꞌ,
orzeꞌ xtu mod mileꞌ bixaꞌ xigab,
nzhab bixaꞌ:
―¡Pas tu dios xaꞌ reꞌ!
7 Gax zeꞌ nax yuo cheꞌn tu xaꞌ lë Publio,
xaꞌ zeꞌ más tsak xid rë men yezh Malta reꞌ.
Dox wen miwiꞌ xaꞌ lo no,
kuzeꞌ mbiyꞌ xaꞌ no lizh xaꞌ plo nguio no chon ngubizh;
dox wen mileꞌ xaꞌ kun no,
yent kwan ngok jwalt no lizh xaꞌ.
8 No lëꞌtsa orzeꞌ nzhakne xuz Publio,
tuli nax xaꞌ.
Nizak xaꞌ xlëꞌ,
mbaino yalnzhao.
Orzeꞌ nguio Pab lo xaꞌ,
no minaꞌb Pab lo Dios por lëꞌ xaꞌ,
no or migal Pab xaꞌ,
lwegaꞌ miak xaꞌ.
9 No or mbin rë men nzho yezh zeꞌ kureꞌ,
orzeꞌ rë men nzhakne ngwa lo Pab;
no rë xaꞌ miak.
10 No dox wen mileꞌ men yezh zeꞌ kun no,
no or ngol nguroꞌ no zeꞌ,
mineꞌ bixaꞌ rë kwaꞌn nakiꞌn no par nez.
Mizhin Pab yezh Roma
11 Or nzha chon mbëoꞌ nzha nzho no yezh Malta reꞌ,
orzeꞌ nkë no leꞌn tu bark kwaꞌn nzë yezh Alejandría,
miteꞌde mbëoꞌ nayag plo nguio no reꞌ,
mbaino nikë winab cheꞌn chop dios yeke kwaꞌn lë Castor no Pólux.
12 Or mizhin no yezh kwaꞌn lë Siracusa,
zeꞌ miaꞌn no chon ngubizh.
13 Orzeꞌ nguroꞌ no,
nkiya no par yezh Regio.
No xtu riyëꞌl,
nguroꞌ tu mbi al nez plo nzë no,
no ngubizh mirop,
mizhin no yezh Puteoli.
14 Zeꞌ mizhëꞌl no xpla men cheꞌn Jesukrist no mbiyꞌ bixaꞌ no lizh bixaꞌ,
ngulëz no tu sman lo bixaꞌ.
Zeꞌ nguroꞌ no par nzha no yezh Roma.
15 No or mbin rë men cheꞌn Jesukrist xaꞌ nzho yezh Roma,
lëꞌ no nzhazhin la,
orzeꞌ mbiꞌdkinez bixaꞌ no haxta yezh Foro cheꞌn Apio,
no yezh kwaꞌn lë Chon Taberna,
par mizhëꞌl no kun lëꞌ bixaꞌ zeꞌ.
No or une Pab rë xaꞌ reꞌ,
mizaꞌ Pab xkix lo Dios,
no miroꞌbla Pab.
16 No or mizhin no yezh Roma,
lwegaꞌ ngwalaꞌ capitán rë xaꞌ nzho lizhyiꞌb zeꞌ lo xtu komandant xaꞌ nileꞌ mandad yezh Roma.
No nguziyël comandant reꞌ,
ña Pab lizh Pab,
no tutsa sondad nzhakë par kina Pab.
Kidiꞌzh Pab widiꞌzh cheꞌn Jesukrist yezh Roma
17 Or nzha chon ngubizh mizhin Pab yezh Roma,
orzeꞌ ngurezh Pab rë men Israel xaꞌ nak zhiꞌn kwaꞌn nzho zeꞌ.
Or nguzhin bixaꞌ lo Pab,
orzeꞌ nzhab Pab:
―Wecha,
yent kwan milen lo rë men cheꞌn be,
no ni gat nzhapa naleꞌtraꞌ go rë kwaꞌn milaꞌ rë xuz be xaꞌ nzhala.
No dub seꞌ,
michi rë men cheꞌn be da yezh Jerusalén lo rë men Roma.
18 Per or une bixaꞌ yent kwan nak da,
orzeꞌ ngokla bixaꞌ ngaliyaꞌ bixaꞌ da,
porke miwiꞌ bixaꞌ yent kwan nak da par ñal gat da.
19 Per net rë men Israel kwaꞌn nzho baꞌ,
ngaliyaꞌ bixaꞌ da.
Kuzeꞌ por lëꞌ bixaꞌ mileꞌ,
gunaꞌba lëꞌ rey César kubeꞌ kwent da,
per gat lëꞌt kuzeꞌ dizha tu kwaꞌn nak rë men da.
20 Kuzeꞌ ngurezha go,
par ne go,
mbaino par gon go kwan dizha.
Naliꞌb da kun kaden reꞌ,
namás por ñilan nela xmod ñila rë men Israel;
lëꞌ rë men ngut ruban.
21 Orzeꞌ nzhab rë men nzhin zeꞌ:
―Yent cho tu yech gat zhin lo no por rë xaꞌ nak zhiꞌn lazh men Judea,
por kwaꞌn nakal;
no ni tu wech be gat yiꞌd,
ne tu kwaꞌn gat lëꞌ nakal.
22 Per nal nzhakla no gon no kwaꞌn ne yubal;
porke nzhon no,
rë plo nidiꞌzh men nakap tich rë kwaꞌn niluꞌl,
rë kwaꞌn nagat gon men baꞌ.
23 No miaꞌn bixaꞌ diꞌzh tu ngubizh,
luꞌ Pab widiꞌzh cheꞌn Dios por Jesukrist lo bixaꞌ.
Zhë zeꞌ,
dox migan men Israel plo nzho Pab.
No dub zhë zeꞌ,
miluꞌ Pab lo men,
chi nagon men roꞌ Dios,
nazheꞌbe.
Kuzeꞌ rë men une,
walika lëꞌ Dios mixëꞌl Jesús,
como lëꞌla xmod nzob ka lo ley kwaꞌn milaꞌ Dios lo Muisés,
mbaino nela xmod midiꞌzh ka rë xaꞌ midiꞌzh por Dios nzhala.
24 Nzho men zeꞌ mileꞌ xigab walika kwaꞌn midiꞌzh Pab,
mbaino nzho xaꞌ mileꞌ xigab gat walite.
25 No por nangaleꞌ bixaꞌ tutsa xigab,
nguzublo ña bixaꞌ;
maska nzhab Pab:
―Kuzeꞌ ka,
seꞌ midiꞌzh Sprit cheꞌn Dios,
or midiꞌzh Me por profet Isaías lo rë men cheꞌn be,
chi tiemp,
or nzhab Me:
26 Wa,
wadiꞌzh lo rë men yezh reꞌ;
guzh lo bixaꞌ:
Ter gon go xtizha,
per nazobyekt goi;
no ter xe wiꞌ go lo rë kwaꞌn lun lo go,
per nalibeꞌt go kwane,
27 porke dox nad laxtoꞌ rë men reꞌ,
nayaoꞌ nzha bixaꞌ,
mbaino nayaoꞌ lo bixaꞌ.
Chi nangak bixaꞌ saꞌ,
lëꞌ bixaꞌ nganei mbaino ngon bixaꞌi,
no ngalibeꞌ bixaꞌi dub la bixaꞌ,
orzeꞌ ngayëk bixaꞌ lon par ngaliwena bixaꞌ.
28 Orzeꞌ nzhab Pab:
―Biwiꞌ go,
dizde nal,
lëꞌ Dios zaꞌ xtu mod ban cho la men,
mbaino lëꞌ rë men reꞌ zobyeke.
29 No or milox midiꞌzh Pab kureꞌ lo bixaꞌ,
orzeꞌ nkanez rë men zeꞌ;
no dub ña bixaꞌ,
dox kichëlroꞌ bixaꞌ.
30 No chop liꞌn komplet,
ndix Pab plo nguio Pab yezh reꞌ,
no dox wen mileꞌ Pab lo rë men kwaꞌn ngwatswiꞌ lo xaꞌ.
31 Lo rë nak men zeꞌ,
naye nidiꞌzh Pab,
nazheꞌbe chi lëꞌ bixaꞌ nagon roꞌ Dios,
mbaino miluꞌ Pab widiꞌzh cheꞌn Señor Jesukrist dub lo rë nak men kwaꞌn nzhin zeꞌ,
nangayot ngazheꞌb Pab miluꞌ xaꞌi lo rë men zeꞌ,
no yent cho ngaka miluꞌ Pabe.