Or nguio Sprit cheꞌn Dios laxtoꞌ rë men cheꞌn Jesukrist
2
Or mizhin ngol lani Pask,
tutsa junt nzhin rë men cheꞌn Jesukrist leꞌn tu yoꞌ,
2 no di repent,
ngurezh tu rruid naye kwaꞌn nzë lo yibëꞌ,
nela tu mbi naye dox gaꞌ,
nguioi dub leꞌn yoꞌ plo nzhin bixaꞌ.
3 Orzeꞌ al ya yek kad bixaꞌ,
nguluxoꞌb tugaꞌ bël kwaꞌn nak nela luzh men gaꞌ.*
4 Orzeꞌ nguio Sprit cheꞌn Dios laxtoꞌ rë bixaꞌ,
no nguzublo kidiꞌzh bixaꞌ rë lo widiꞌzh,
nela xmod nzhakla Sprit cheꞌn Dios,
diꞌzh bixaꞌ.
5 No leꞌn rë ngubizh zeꞌ,
yezh Jerusalén nzhin nayax men Israel,
rë xaꞌ kwaꞌn nzhon widiꞌzh cheꞌn Muisés;
rë plo nguroꞌ bixaꞌ par nzë bixaꞌ lani Pask yezh Jerusalén.
6 Or mbin men rruid ro reꞌ,
migan rë nak bixaꞌ zeꞌ;
no xe kiwiꞌ bixaꞌ,
mbaino net bixaꞌ chon,
porke kad bixaꞌ kiyon kidiꞌzh rë men cheꞌn Jesukrist widiꞌzh kwaꞌn ngolnu bixaꞌ.
7 No por net bixaꞌ kwan leꞌ bixaꞌ por kwaꞌn kiyak reꞌ,
orzeꞌ kidiꞌzh bixaꞌ:
―Per rë men reꞌ nzë lazh men Galilea.
8 Mbaino,
¿chon ska kiyon be kidiꞌzh bixaꞌ widiꞌzh kwaꞌn ngolnu kad be?,
9 porke reꞌ nzhin rë men nzë lazh men Partia,
no xaꞌ nzë lazh men Media,
no xaꞌ nzë lazh men Elam,
mbaino xaꞌ nzë lazh men Mesopotamia,
no xaꞌ nzë lazh men Judea,
mbaino xaꞌ nzë lazh men Capadocia,
no xaꞌ nzë lazh men Ponto,
no rë men xaꞌ nzë lazh men Asia;
10 no xaꞌ nzë lazh men Frigia,
no xaꞌ nzë lazh men Panfilia,
mbaino xaꞌ nzë lazh men Egipto,
no xaꞌ nzë lazh men Libia kwaꞌn nzhin gax lazh men Cirene,
kwaꞌn ñaꞌn lo yuo cheꞌn men Africa;
no rë men yezh Roma,
rë xaꞌ kwaꞌn nzho reꞌ.
No nzho bixaꞌ kwaꞌn gat lëꞌt men Israel per nzhon bixaꞌ widiꞌzh cheꞌn Muisés,
kun rë xaꞌ dizde ngol,
nak men Israel.
11 No nzho xaꞌ nzë lazh men Creta,
mbaino xaꞌ nzë lo yuo Arabia;
mbin no kidiꞌzh bixaꞌ yalnazhon cheꞌn Dios kun widiꞌzh kwaꞌn nidiꞌzh kad no.
12 No rë bixaꞌ net bixaꞌ kwan leꞌ bixaꞌ xigab,
orzeꞌ kinabdiꞌzh tugaꞌ bixaꞌ lo wech bixaꞌ,
nzhab bixaꞌ:
―¿Kwan kureꞌ nal?
13 Per nzho men kixizhnu rë men cheꞌn Jesukrist,
nzhab bixaꞌ:
―Ka nizuzh rë xaꞌ baꞌ.
Midiꞌzh Per lo rë men
14 Orzeꞌ ngwatso Per kun za chiꞌ bitub men cheꞌn Jesukrist,
par midiꞌzh Per naye,
nzhab Per:
―Biwiꞌ go men Judea,
no rë xaꞌ nzho yezh Jerusalén;
bin go widiꞌzh kwaꞌn ganin lo go nal reꞌ.
15 Gat nizuzht rë xaꞌ reꞌ,
nela xmod nileꞌ go xigab gaꞌ,
porke garziꞌl nal,
laore las nueve,
16 sino ke rë kwaꞌn kiyak reꞌ,
lëꞌi midiꞌzh la profet Joel,
or midiꞌzh xaꞌ seꞌ por Dios:
17 Rë zhë lult,
seꞌ gak,
nzhab Dios,
lëꞌda xëꞌl Sprit da,
par yo laxtoꞌ rë lo men,
no xgaꞌn xaꞌ kun xchaꞌp xaꞌ,
lëꞌda le diꞌzh bixaꞌ,
rë kwaꞌn nagat gak.
Mbaino len,
rë xaꞌ xi kwaꞌn nzho xid bixaꞌ,
lëꞌ bixaꞌ ne rë kwaꞌn,
no rë men ngol,
lëꞌ bixaꞌ chaꞌ laxtoꞌ.
18 No xëla Sprit da yo laxtoꞌ rë men da;
miyiꞌy no unaꞌi,
no diꞌzh bixaꞌ por na.
19 Al ya lo yibëꞌ ne go,
gak rë kwaꞌn yaꞌn xe men tuli,
no lo yizhyuo ne go rë señ,
no ren,
no bël,
mbaino zhen.
20 No gak nakao lo ngubizh;
no lo mbëoꞌ lëꞌi luꞌ nela ren gaꞌ.
Nakiꞌn rë kureꞌ gak antis di ke zhin zhë cheꞌn Señor,
or luꞌ Me biani cheꞌn Me kwaꞌn maska ñaꞌzbël,
no gab Me xmod gak kun kad men,
zhë kwaꞌn ne men,
laltaꞌ rë kwaꞌn nagat ne men.
21 No rë xaꞌ nibezh lë Dios or ninaꞌb bixaꞌ lo Dios,
lëꞌ Dios kubchi rë kwaꞌn nzëꞌb xki bixaꞌ.
22 No nu nzhab Per:
―Rë go,
men Israel;
bin go widiꞌzh kwaꞌn nin reꞌ.
Lëꞌ Dios miluꞌ la lo go,
cho nak Jesús kwaꞌn nzë Nazaret,
por rë zhiꞌn nazhon kwaꞌn mileꞌ Jesús,
zhiꞌn kwaꞌn mileꞌ miaꞌn go xe;
no por rë señ nazhon kwaꞌn mileꞌ Jesús lo go.
Lëꞌ Dios mizaꞌ poder kaꞌ Jesús,
mbaino mis go une la rë kureꞌ.
23 Per lëꞌ miyiꞌ reꞌ,
por rë xigab cheꞌn Dios,
no por rë kwaꞌn nzhakla Dios gak,
nguzen go miyiꞌ,
no mikëꞌ go xaꞌ lo krus,
mbit rë men mal xaꞌ.
24 Per mileꞌ Dios nguruban xaꞌ,
nguloꞌ Dios xaꞌ yaꞌ la mwert,
porke nangakt ngakwëꞌz la mwert xaꞌ reꞌ par dubtaꞌ,
25 porke Dabi midiꞌzh la kwent cheꞌn Jesús,
or nzhab Dabi:
Zilitaꞌ unen nzol dilant lon,
Señor,
porke Lu nzo lad direch da,
par niyent kwan zheb da.
26 Kuzeꞌ,
nizak laxtoꞌn,
mbaino roꞌn nikëꞌ kant dub nizak laxtoꞌn,
porke lu leꞌ,
ruban da or gat da.
27 No nalaꞌtal yaꞌn da leꞌn baꞌ,
no ni nalaꞌl yëb kwerp da,
por nak da tu xpenal kwaꞌn más nzhon roꞌl.
28 Miluꞌl xmod ban da par dubtaꞌ,
no nileꞌl,
nizak laxtoꞌn,
or nzol kuda.
29 No nzhab Per:
―Lëꞌ go wech,
walika kwaꞌn nin;
nzhala ngut rey Dabi,
mbaino migaꞌch xaꞌ,
no baꞌ cheꞌn xaꞌ nane be plo nax,
haxta zhë nalzhë.
30 Dabi ngok profet,
midiꞌzh xaꞌ por Dios,
mbaino nane Dabi,
lëꞌ Dios milaꞌ diꞌzh lo xaꞌ,
lëꞌ Dios leꞌ rey lo mis tu rë xaꞌ nzë ben cheꞌn xaꞌ kwaꞌn ngurulë Krist,
par zob xlugar xaꞌ.
31 Miluꞌ Dios rë kureꞌ lo rey Dabi,
kuzeꞌ nzhab xaꞌ,
lëꞌ Krist ruban,
no ni nalaꞌ Dios yaꞌn alm cheꞌn Krist leꞌn baꞌ,
no ni nalaꞌ Dios,
yëb kwerp cheꞌn Krist.
32 Kuzeꞌ mileꞌ Dios,
nguruban Jesukrist;
no nak no men cheꞌn Me kwaꞌn une ngut Me,
no une no nguruban Me.
33 Ngurezh Dios Jesukrist,
ña Me lo yibëꞌ.
No baꞌ nzob Jesukrist lad direch cheꞌn Dios,
plo nileꞌ Me mandad.
No mizaꞌ Dios Sprit cheꞌn Dios nkaꞌ Jesukrist par rë men cheꞌn Me,
porke seꞌ milaꞌ Dios diꞌzh par Jesukrist.
No nal,
Jesukrist mixëꞌl Sprit cheꞌn Dios par nguio laxtoꞌ no,
lëꞌi rë kwaꞌn une go,
no rë kwaꞌn mbin go nal reꞌ.
34 No Dabi,
nangakilit lo yibëꞌ,
per lëꞌ Dabi nzhab por Dios:
Nzhab Dios lo Señor da:
“Guzob lad direch da,
35 haxta zhin zhë len,
cheꞌptsa (biꞌch laka) gak rë men dilant lol,
rë xaꞌ kwaꞌn nidilal kun lëꞌ.”
36 Orzeꞌ nzhab Per:
―Bin goi,
men Israel,
lëꞌ go rë xaꞌ kwaꞌn mikëꞌ Jesukrist lo krus.
Lëꞌ Dios mizo Jesukrist lo be,
par gak Me Señor cheꞌn be,
mbaino Krist;
Me kwaꞌn mixëꞌl Dios.
37 Or mbin bixaꞌ kureꞌ,
orzeꞌ dox mizi bixaꞌ nzëꞌb xki bixaꞌ lo Dios,
orzeꞌ nzhab bixaꞌ lo Per,
no lo zipla apost:
―¡Lëꞌo wech!,
¿kwan nakiꞌn leꞌ no nal?
38 Orzeꞌ nzhab Per:
―Bilaꞌ go rë kwaꞌn nakap nileꞌ go lo Dios,
no nu goklëiꞌ go leꞌn nits nela xmod mileꞌ ka Jesukrist mandad,
no cheꞌ Dios rë kwaꞌn nzëꞌb xki go,
no neꞌ Dios Sprit cheꞌn Dios yo laxtoꞌ go,
39 porke par go milaꞌ Dios diꞌzh kureꞌ,
no par rë xmëꞌd go,
mbaino par xtu ben rë men zit,
haxta par rë xaꞌ kwezh Dios par gak men cheꞌn Dios.
40 No seꞌ midiꞌzh Per,
no kun más rë widiꞌzh,
par mizaꞌ Per kunsej,
nzhab Per:
―Guroꞌ go xid rë men nakap kwaꞌn nzho nalreꞌ,
par nagal go yalzi kwaꞌn zak bixaꞌ.
41 No rë xaꞌ ngwayila widiꞌzh cheꞌn Dios kwaꞌn midiꞌzh Per,
ngoklëiꞌ bixaꞌ.
Zhë zeꞌ,
migan pas chon mil men,
par nguio bixaꞌ xid más rë men cheꞌn Jesukrist.
42 No dubtaꞌ,
nikizë rë xaꞌ reꞌ,
nela xmod mitseꞌd rë apost bixaꞌ,
no nguzhin bixaꞌ wen,
no nu nzhao bixaꞌ lizh kad wech bixaꞌ,
mbaino junt ninaꞌb bixaꞌ lo Dios.
Xmod miban rë xaꞌ galo laka kwaꞌn ngok men cheꞌn Jesukrist
43 No por rë señ nazhon kwaꞌn nileꞌ Dios por rë apost,
rë men nizheb lo Dios,
no wen nidiꞌzh bixaꞌ por Dios.
44 No rë xaꞌ kwaꞌn ngwayila widiꞌzh cheꞌn Dios por Jesukrist,
tutsa nzhin bixaꞌ,
no tutsa kinu bixaꞌ rë kwaꞌn.
45 No mito bixaꞌ rë kwaꞌn nak cheꞌn bixaꞌ,
par ndiꞌz bixaꞌ dimi,
kaꞌ rë xaꞌ kwaꞌn nakiꞌne,
rë xaꞌ kwaꞌn nzho xid bixaꞌ.
46 No zilitaꞌ nigan bixaꞌ leꞌn yadoꞌ,
no tutsa xigab nileꞌ bixaꞌ.
No nigan bixaꞌ lizh kad wech bixaꞌ par nzhao bixaꞌ junt,
mbaino nizak laxtoꞌ bixaꞌ,
nileꞌ bixaꞌi.
47 No nidiꞌzh bixaꞌ dox nazhon Dios,
no wen nidiꞌzh rë men tich bixaꞌ,
por Jesukrist.
No kad zhë nileꞌ Señor ñar men yadoꞌ,
rë xaꞌ kwaꞌn kibezh Dios par chëꞌ Dios xmod naban bixaꞌ,
mbaino zaꞌ Dios kwaꞌn nazhon kaꞌ bixaꞌ.