2 nzhab Me:

―Wa go yezh win kwaꞌn niluꞌ baꞌ,

lëꞌ go zhin plo nikidoꞌ tu burrit kwaꞌn gat zob ni tu men;

bixëk go ma no diꞌnu go ma,

3 no chi cho ne lo go:

“¿Plo weiꞌ go burrit baꞌ?”,

orzeꞌ gab go:

“Lëꞌ Señor nakiꞌn ma,

per lwegaꞌ yiꞌdlaꞌ no ma.”

4 Orzeꞌ ngwa bixaꞌ,

no une bixaꞌ burrit nikidoꞌ leꞌn nez roꞌ tu pwert,

no mixëk bixaꞌ ma.

5 Zeꞌ nzo pla men,

xaꞌ nzhab:

―¿Chon kixëk go burrit baꞌ?

6 Orzeꞌ nzhab rë men cheꞌn Jesús nela xmod nzhab ka Jesús lo bixaꞌ,

kuzeꞌ milaꞌ rë xaꞌ reꞌ.

7 Orzeꞌ ñano bixaꞌ burrit reꞌ lo Jesús,

mbaino mixoꞌb bixaꞌ xab bixaꞌ tich ma no nguzob Jesús ma.

8 No dox men ndix xab dilant plo ded Jesús,

no nzho bixaꞌ ndix rram la kwaꞌn michoꞌ bixaꞌ dan,

9 no xaꞌ nzha dilant,

no rë xaꞌ nzë tras,

naye kibizhië bixaꞌ,

nzhab bixaꞌ:

11 No or nguio Jesús yezh Jerusalén,

ngwa Me yadoꞌ;

no or miwiꞌ Me rë plo,

une Me rë kwaꞌn nzhak zeꞌ,

orzeꞌ nzha Me kun dub tu dusen men cheꞌn Me par yezh Betania,

porke ya cho gor la.

12 No xtu riyëꞌl,

or nguroꞌ bixaꞌ yezh Betania,

orzeꞌ mbiꞌd nilaꞌn Jesús,

13 no zitraꞌ,

une Jesús tu ya nzhaoꞌ nayëꞌ,

no ngwatswiꞌ Me,

nabei chi nzo nzhaoꞌ loi;

no or mizhin Me xan ya,

yent kwan nak loi,

nab lai,

porke gat lëꞌt tiemp kwaꞌn nizaꞌi orzeꞌ.

14 Kuzeꞌ mizhiꞌbde Jesús ya nzhaoꞌ zeꞌ,

nzhab Me:

―Ya nayotraꞌ yiꞌd men,

gao men nzhaoꞌ cheꞌnal.

No kiyon rë men cheꞌn Mei.

15 Or nguio bixaꞌ yezh Jerusalén,

mizhin Jesús lo luwe cheꞌn yadoꞌ;

orzeꞌ nguzublo kigoꞌtin Me rë xaꞌ kileꞌxbiꞌ no rë xaꞌ kwaꞌn kiziꞌ zeꞌ,

mbaino michixche Me rë mes cheꞌn rë xaꞌ nichiꞌl dimi cheꞌn men,

no plo nito men palom,

no michixche Me plo nizob bixaꞌ.

16 No nangalaꞌtraꞌ Jesús ngaded men kun kwaꞌn lo luwe zeꞌ.

17 Orzeꞌ nguzublo kiluꞌ Me lo rë men nzhin zeꞌ,

nzhab Me:

―¿Chi nanet go,

seꞌ nzobniꞌ lo Yech cheꞌn Dios:

“Lizha yiꞌd rë nak men yizhyuo,

par yiꞌdiꞌzh bixaꞌ lon”?

¡Per go kileꞌi nela plo nibin rë waꞌn gaꞌ!

18 No or mbin rë ngulëiꞌ ro kureꞌ,

kun rë xaꞌ niluꞌ ley,

orzeꞌ mikwaꞌn bixaꞌ mod par gut bixaꞌ Jesús,

porke or niluꞌ Me widiꞌzh cheꞌn Dios,

rë men ñaꞌn xe.

Kuzeꞌ nizheb bixaꞌ nine bixaꞌ Me.

19 No or nzhala yëꞌl,

nguroꞌ Jesús kun rë men cheꞌn Me,

yezh Jerusalén.

20 No xtu riyëꞌl zeꞌ,

or garziꞌl;

dub nzha bixaꞌ nez,

une bixaꞌ,

lëꞌ ya nzhaoꞌ zeꞌ mibizh la,

dub luche.

21 No Per mitsila or mizhiꞌbde Jesús ya zeꞌ,

kuzeꞌ nzhab Per:

―Maestr,

lëꞌ ya nzhaoꞌ kwaꞌn mizhiꞌbde go zeꞌ,

¡mibizhe biwiꞌule!

22 Orzeꞌ nkab Jesús:

―Kuzeꞌ la nin,

wayila go Dios.

23 Walika kwaꞌn nin,

wanei cho men gab lo yiꞌ baꞌ:

“Chi baꞌ,

bizë leꞌn nitsdoꞌ”,

no naleꞌt xaꞌ chop xigab or gab xaꞌi,

sino yila xaꞌ rë kwaꞌn gab xaꞌ,

orzeꞌ lëꞌi gak,

lëꞌ Dios leꞌi.

24 Kuzeꞌ kinin,

rë kwaꞌn naꞌb go lo Dios,

wayila goi,

lëꞌi gap go;

lëꞌi zhin lo go.

25 No or kinaꞌb go lo Dios,

biyaꞌl laxtoꞌ go rë kwaꞌn nileꞌ men lo go,

nes par lëꞌ Xuz go,

Me nzho lo yibëꞌ,

yaꞌl laxtoꞌ Me rë kwaꞌn nzëꞌb xki go lo Me.

26 Per chi nayaꞌl laxtoꞌ go rë kwaꞌn nileꞌ men lo go,

nu ska Xuz go,

Me nzho lo yibëꞌ,

nayaꞌlt laxtoꞌ Me rë kwaꞌn nzëꞌb xki go lo Me.

27 Orzeꞌ nguiubre Jesús xtu wëlt yezh Jerusalén kun rë men cheꞌn Me.

No or nzo Me lo luwe cheꞌn yadoꞌ,

lëꞌchi nguzubi rë ngulëiꞌ ro lo Me,

kun rë xaꞌ niluꞌ ley,

mbaino kun rë xaꞌ nak zhiꞌn yezh,

28 par nzhab bixaꞌ:

―¿Cho mileꞌ mandadal kileꞌl rë kureꞌ,

o cho mixëꞌlal par leꞌle?

29 Orzeꞌ nkab Jesús:

―Nuska da nabdiꞌzh tu kwaꞌn lo go;

no chi lëꞌ go nei,

orzeꞌ ganin cho mileꞌ mandad da kilen rë kureꞌ.

30 Nal bine go,

¿cho mixëꞌl Juan,

xaꞌ miliꞌlëiꞌ men leꞌn nits?

¿Chi Diose,

o mene?

31 Orzeꞌ kidiꞌzh bixaꞌ entre lëꞌ bixaꞌ:

―Chi gab be:

“Diose”,

orzeꞌ lëꞌ xaꞌ ne lo be:

“¿Chon ska nangayila go xaꞌ?”

32 No por rë men,

nazheꞌb be par be,

kuzeꞌ nagakt gab be:

“Men mixëꞌl Juan”.

Porke rë men nidiꞌzh,

walika Dios mixëꞌl Juan,

33 kuzeꞌ,

seꞌ mikab bixaꞌ lo Jesús:

―Nanet no choi.

Orzeꞌ nzhab ska Jesús:

―Nuska da nanita,

cho mixëꞌl da,

kilen rë kureꞌ.