2 nzhab rë xaꞌ reꞌ lo Jesús:

―Bine lo no,

¿kwan nakal par kileꞌl rë kureꞌ,

mbaino cho mixëꞌlal par leꞌle?

3 Orzeꞌ nzhab Jesús:

―Nuka da,

nabdiꞌzh tu kwaꞌn lo go,

no bine goi:

4 ¿Cho mixëꞌl Juan par lilëiꞌ Juan men leꞌn nits?

¿Chi Diose,

o mene?

5 Orzeꞌ nguzublo kidiꞌzh bixaꞌ lo wech bixaꞌ:

―Chi gab be:

“Lëꞌ Dios mixëꞌl Juan”,

orzeꞌ lëꞌ xaꞌ ne lo be:

“¿Chonska nangayila go xaꞌ?”

6 No chi gab be:

“Men mixëꞌl Juan”,

orzeꞌ lëꞌ rë men reꞌ koke be,

porke rë men zak,

lëꞌ Juan ngok tu profet,

xaꞌ midiꞌzh por Dios.

7 Orzeꞌ nzhab bixaꞌ:

―Nanet no cho mixëꞌl Juan.

8 Orzeꞌ nzhab Jesús lo bixaꞌ:

―Nuska da,

nanita cho mixëꞌl da kilen rë kureꞌ.

9 Orzeꞌ midiꞌzh Jesús kwent reꞌ,

lo rë men nzhin zeꞌ,

nzhab Me:

―Tu miyiꞌ mixëꞌn tu pedas ya gub,

orzeꞌ mizaꞌ xaꞌi med lo rë men gaꞌne;

orzeꞌ nguroꞌ xaꞌ tu tiemp xche.

10 Or ngol tiemp mizaꞌi,

mixëꞌl xaꞌ nak cheꞌn ya gub reꞌ,

tu mos cheꞌn xaꞌ par naꞌb xaꞌ lo rë men ngoꞌne,

kwaꞌn gal xaꞌ.

Per rë xaꞌ ngoꞌne reꞌ,

ndin bixaꞌ mos reꞌ,

no mizhire bixaꞌ mos reꞌ nab yaꞌ mos.

11 Orzeꞌ mixëꞌl xaꞌ xtu mos,

no nu ska mos reꞌ ndin bixaꞌ,

no cheꞌptsa mileꞌ bixaꞌ neꞌ,

no mizhire bixaꞌ mos reꞌ,

nab yaꞌ ska mos.

12 Orzeꞌ mixëꞌl xaꞌ mos yon;

nu ska xaꞌ reꞌ mitsiweꞌ bixaꞌ,

no ngulutin bixaꞌ mos reꞌ al tich.

13 ’Orzeꞌ mileꞌ xaꞌ nak cheꞌn ya gub reꞌ xigab:

“¿Kwan len nal?

Mejor yub xgaꞌna xëla,

xaꞌ nazhiꞌ da,

pas roꞌ xaꞌ reꞌse gon bixaꞌ.”

14 Per or une rë men ngoꞌn yuo reꞌ,

xgaꞌn xaꞌ kwaꞌn nak cheꞌne,

tutsa miaꞌn bixaꞌ nzhab bixaꞌ:

“Xaꞌ reꞌ nak cheꞌn rëi;

chaoꞌ gut be xaꞌ,

par kaꞌ be rë nak kureꞌ.”

15 Orzeꞌ ngulutin bixaꞌ,

xgaꞌn xaꞌ nak cheꞌne al tich,

par mbit bixaꞌ miyiꞌ reꞌ.

Orzeꞌ nzhab Jesús lo rë men nzhin zeꞌ:

―Nal,

¿kwan leꞌ xaꞌ nak cheꞌn ya gub reꞌ?

16 Lëꞌ xaꞌ yëꞌd par loꞌx xaꞌ rë xaꞌ kwaꞌn ngoꞌn ya gub cheꞌn xaꞌ,

mbaino lëꞌ xaꞌ zaꞌi gaꞌn xtu ben men.

No or mbin rë men nzhin zeꞌ kureꞌ,

nzhab bixaꞌ:

―¡Kubaꞌse nayot gak!

17 Per or miwiꞌ Jesús xe lo bixaꞌ,

nzhab Me:

―Aja,

kwan gab widiꞌzh kwan nzobniꞌ reꞌx:

18 No rë men yachin lo ke reꞌ,

lëꞌi gut xaꞌ;

no chi lëꞌ ke reꞌ gab yek tu men,

lëꞌi taꞌch xaꞌ.

19 Rë xaꞌ nileꞌ mandad lo rë ngulëiꞌ,

no rë xaꞌ niluꞌ ley;

mis orzeꞌ ngokla bixaꞌ ngazen bixaꞌ Jesús,

porke mizi bixaꞌ par yek bixaꞌ nzha kwaꞌn midiꞌzh Jesús.

Per nangakt ngaleꞌ bixaꞌi,

porke nizheb bixaꞌ lo más rë men nzhin zeꞌ.

20 Kuzeꞌ,

mixëꞌl bixaꞌ pla miyiꞌ kwaꞌn leꞌ,

chigab walika nzhakla bixaꞌ ne bixaꞌ tu kwaꞌn,

per ka namás par laꞌch bixaꞌi,

par ne bixaꞌ gab Jesús tu kwaꞌn gat ñal,

par zaꞌ chi bixaꞌ Me lo gobier cheꞌn men Roma.

21 Orzeꞌ kuzeꞌ nzhab bixaꞌ lo Jesús:

―Maestr,

nzhon no kwaꞌn nidiꞌzh go,

no kwaꞌn niluꞌ go,

pura kwaꞌn ñale;

no gat nibet go men or nileꞌ go tu kwaꞌn par men;

no niluꞌ go gon men roꞌ Dios nela xmod nzhakla ka Dios.

22 Lëꞌo,

¿kwan ne go?

¿Chi lëꞌka kix met dimi cheꞌn rreyse,

o gat lëꞌte?

23 Per lwegaꞌ mizi Jesús cho xigab kileꞌ bixaꞌ;

orzeꞌ nzhab Me:

―¿Chon kizenbeꞌ go da (kiwiꞌ go xmod nak da)?

24 Guloꞌ go tu pes,

par ne be xmod nake.

No bineu,

¿cho nikë loi,

mbaino cho lë kinui?

Orzeꞌ nzhab bixaꞌ:

―César nikë loi.

25 Orzeꞌ nzhab Jesús:

―Ne goix,

bizaꞌ go cheꞌn César kwaꞌn nak cheꞌn César;

mbaino cheꞌn Dios kwaꞌn nak cheꞌn Dios.

26 No nangaktraꞌ ngakab bixaꞌ lo rë men;

xe miaꞌn bixaꞌ tuli por xmod nkab Jesús.

27 Orzeꞌ nguzubi pla men saduceo lo Jesús,

no rë xaꞌ reꞌ gat ñilat chi wali ruban men ngut,

minabdiꞌzh bixaꞌ kureꞌ:

28 ―Maestr,

lëꞌ Muisés mizob lo yech,

or gat tu miyiꞌ no laꞌ xaꞌ unaꞌ cheꞌn xaꞌ,

mbaino nangapt xaꞌ mëꞌd kun lëꞌ unaꞌ,

orzeꞌ wech xaꞌ nakiꞌn ban kun unaꞌ reꞌ par gap xaꞌ ngut reꞌ mëꞌd kun lëꞌ unaꞌ.

29 Pwes nguio gazh miyiꞌ tutsa wech;

xaꞌ galo ngok tsaꞌ tu unaꞌ,

no ngut xaꞌ sin nangap xaꞌ mëꞌd.

30 Xaꞌ mirop seꞌgaꞌ,

31 no wech mion xaꞌ seꞌska,

haxta za gazh bixaꞌ ngut,

sin nangapt bixaꞌ mëꞌd kun lëꞌ unaꞌ reꞌ.

32 No lult,

nu ska unaꞌ reꞌ ngut.

33 No nal,

or ruban bixaꞌ,

¿cho xaꞌ gak cheꞌn unaꞌ reꞌ?,

porke za gazh bixaꞌ miban kun lëꞌ unaꞌ.

34 Orzeꞌ nzhab Jesús:

―Yizhyuo reꞌ,

miyiꞌ kun unaꞌ niban bixaꞌ,

35 per rë men xaꞌ wiꞌ Dios,

ñal ban xtu yizhyuo kwaꞌn kinu Dios,

or ruban bixaꞌ,

nagaptraꞌ bixaꞌ unaꞌ,

ni nagak jwandang cheꞌn bixaꞌ,

36 porke orzeꞌ,

nayotraꞌ gat bixaꞌ,

lëꞌ bixaꞌ gak nela ganj cheꞌn Dios gaꞌ,

no gak bixaꞌ xmëꞌd Dios porke nguruban bixaꞌ.

37 No par yila go lëꞌ rë men ngut ruban,

¿chi nagat goꞌl go,

kwaꞌn midiꞌzh Dios lo Muisés,

or une Muisés tu ya yich nzobyol?

Lëꞌ Dios nzhab:

“Na nak Dios cheꞌn Abraham,

no Dios cheꞌn Isaac,

mbaino Dios cheꞌn Jakob.”

38 Rë widiꞌzh reꞌ niluꞌ,

lëꞌ Dios gat nakt Dios,

Dios cheꞌn rë men ngut;

lëꞌ Dios nak Dios cheꞌn rë men naban;

porke lo Dios rë men naban.

39 Orzeꞌ nzhab pla maestr xaꞌ niluꞌ ley:

―Maestr,

dox wen kwaꞌn midiꞌzhal.

40 Orzeꞌ nangayetraꞌ laxtoꞌ bixaꞌ,

nganabdiꞌzh bixaꞌ más kwaꞌn lo Jesús.

41 Orzeꞌ nzhab Jesús:

―¿Xmod nzhab men,

lëꞌ Krist nak xgaꞌn Dabi?,

42 porke mis Dabi mizob lo libr cheꞌn Salmos widiꞌzh reꞌ:

45 No dub kiyon rë men kwaꞌn kidiꞌzh Jesús,

orzeꞌ nzhab Me lo rë men cheꞌn Me:

46 ―Neu kun rë xaꞌ niluꞌ ley,

napaꞌ keꞌd bixaꞌ kwaꞌn nak bixaꞌ go.

Lëꞌ bixaꞌ ño laxtoꞌ nzhak bixaꞌ pura lar wen,

mbaino ño laxtoꞌ bixaꞌ,

or niniꞌ men lo bixaꞌ,

kun rop lad yaꞌ men zen men yaꞌ bixaꞌ,

mbaino lo rë men ño laxtoꞌ bixaꞌ leꞌ men seꞌ kun lëꞌ bixaꞌ;

no nizob bixaꞌ pura plo nizob rë men tsak,

leꞌn yoꞌ plo nitseꞌd men widiꞌzh cheꞌn Dios,

mbaino lo rë lani,

seꞌska nileꞌ bixaꞌ.

47 No nilat bixaꞌ haxta lizh unaꞌ ngut xmiyiꞌ.

No chigab walika men cheꞌn Dios bixaꞌ,

xche nidiꞌzh bixaꞌ lo Dios;

kuzeꞌ más zakzi Dios bixaꞌ.